Tongin bil pa mutapu wafanyinay kwiyov Nowa ni dijuku diend mu machuku minam 40 ma kusambish kupwa kwa Yehova kufung chis cha waat. Padandamena ruval winou mukash kunakin pa waat dichuku ni dichuku, antu chinan inay asala mudimu umwing ukash​—kukwashijan umwing ni mukwau, kuwanyish maswir ma dijuku diau, ni ma anam adinga mu mayind mau. Pa chisu chimwing, waat winou ujim wasambisha kunyikek, ni kwanzwanzu. Wasambisha kand kuya oku ni oku! Waat wading piur pa men mavulijana, kupwa mauzambwisha piur nakash, “mauzambwisha waat piur kuudiosh pansh.” (Disambishil 7:17) Chinech chamekesha mudi ik usu wa Yehova Nzamb wa dikand diawonsu!

“APANDA PASUTAU PA MABEB MA MEM”

Pa chisu chanzwanzwa waat pa men, antu adingamu atesha kamu masok mamwing makash ni kutoy kwa antu padingau mu waat. Ov, Nowa wova wom mulong wa uvud wa mambek ap ukash wa waat? Bwat. Wom winou ukutwish kwikalaku pakach pa antu akad ritiy nlel unou, pakwez Nowa kadingap wakad ritiy. Bibil ulejen anch: “Ku ritiy Nowa . . . wasala waat.” (Hebereu 11:7) Ritiy mu chom ik? Yehova wachipa machip, washilamu anch ukez kumupandish Nowa ni antu awonsu adinga nend ku mem ma Mabeb. (Disambishil 6:18, 19) Ov, Nzamb watanga mangand mawonsu, divu, ni yitangil yawonsu yikweta mwom walama waat winou chakwel kangal usheshika? Mwaning! Nowa wamuchingejina chakin kamu Yehova anch ukez kuwanyish kushilamu Kwend. Chikwau kand, ndiy ni dijuku diend “apanda pasutau pa mabeb ma mem.”​—1 Pita 3:20.

Pikwasuta machuku 40 ma muten ni 40 ma uchuku, ruval wakatuka. Kukwatijan nich kalandriye wetu, chading pamwing ap pa Kachirikin mu muvu wa 2370 K.C.C. Pakwez weny wa dijuku dined mu waat wadandamena. Waat winou wading wizwil nich yitangil yikweta mwom pa men mikala mudi karung mujim, ni piur pa misong ya mikandu. (Disambishil 7:19, 20) Tukutwish kutongin piur pa Nowa utenchikina mudimu ukash chakwel ndiy ni anend​—Sem, Sham, nenday Yafet—​atwisha kuyidish anam awonsu ni kuyilam ishitwila, ni akash. Chakin kamu, Nzamb wasala anch anam awonsu inay a mwisuku ikala akad kuswej chakwel andama mu waat ni wading nich usu wa kuyilam chakwel adandamena kwikal akad kuswej pa chirung cha Mabeb.a