Avud a pakach petu kakezap kuyibwikin kwishin kwa divu mudi in kupund mingoch ya makal inay chidivu ap kusot kufa mu chak cha chitangil. Pakwez, etu tusotil anch atupandisha, mulong tukutwishap twiyep ayinetu ku kusheshik kwa mayej ni upal ni kupwa kushiken ni ku rufu. Nshakur Yob mwin kushinshaman washinshikina anch: “[ Muntu wavalau kudi mband ukwet], mwom wa mivu yikemp, pakwez wizwil sens nich mar. Ufanaken mudi chisalamb chikat kubudik, chad kurutu, ukat kuchin mudi urel wakad kwiman.” (Yob 14:1, 2) Ilel, pasutil kal mivu 3 500, mazu minam machidi ni katat makin, mulong nany umwing wa pakach petu ukutwisha kwiyep yibudikin yiyimp ya—rufu? Chikalap nchik ndond kutushicha ap mutapu uwamp mudi ik utulamina mujimbu wetu, tuswiridin etu awonsu atupandisha kudiokal mu mar, upal, ni rufu.

Ap anch witiyijin ap bwat yovil ya Yob piur pa mwom ni rufu, chitwishikinap mudi mu yiyila mivu, niyey ukez “kuchin mudi urel,” kulemp kwin kamu ni arund ney, ni dijuku diey, ni chikumbu chey, ni yawonsu yiwasala—ukushiken kamu ku rufu. Mwant mwin manangu Salomon wa Isarel wa pasak wafunda anch: “Antu aom ij anch, kwisudiel tukez kafa, pakwez antu afu kijap chom, awiy kakwetap kand difut. Awiy ayivuramedin kal.”—Mulej 9:5.