³ Isay walonda anch: “Changadim mujik wakad kal kumwijik ikundj ukez kimish divumu ni kumuval mwan ikundj. Akez kamupil dijin anch, Emanuwel . . . kurutu kwa kushik chirung chinech, mangand ma ant inay aad [Siria ni Isarel] akez kamakwatish wom ni makez kasheshik, mwashal mwamwamu.” (Is. 7:14, 16) Chikunku cha kusambish cha uprofet winou akat kuchisadil yisu yivud mu mutapu utentamina piur pa kuvadik kwa Mesia. (Mat. 1:23) Pakwez, kudiosh pinipa “ant inay aad,” mwant wa Asiria ni mwant wa Isarel, kamurishishap kand Yuda mu chitot cha kusambish cha mivu C.C., uprofet piur pa Emanuwel wafanyidina kuwanyin kapamp kakusambish pa chirung cha Isay.

⁴ Kupwa kwa Isay kulond mazu minam, mukajend wimisha ni wavala mwan wapilau dijin anch Maher-shalal-hash-baz. Chimeken pamwing ap anch mwan winou wisambinau kudi Isay wading “Emanuwel.”a Pa chirung chafundau Bibil mwan adinga afanyidina kumupil dijin dimwing pavadikinay, mulong wa kuvurik pamwing ap chinship cha pakampwil, pakwez anvaj ni anamakwend ela kumupil pamwing ap dijin dikwau. (2 Sam. 12:24, 25) Kwikil diyingish dimekeshina anch ading kumutazuk Yesu pa dijin dia Emanuwel.​—Tang Isay 7:14; 8:3, 4.