Antu Amwitiyija Yehova Mudi Chibar Chau

8. Rumburil kanvundangesh kamanay mwin Levi Asaf.

⁸ Muchid wa in Levi wafanyidina kumwitiyij Yehova mudi chibar chau. Chidi cha usey, mulong, muntu ni muntu pakach pa in Levi wasadila dizu “Kinikwetap mukwau, ching kusu [Yehova]” mulong wa kumekesh kwipan kwau kudi Nzamb ni kumuchingejin. (Mad. 3:24.) Muntu umwing pakach pa in Levi wading mwin kuwang ni mwin kufund mias. Tukutwish kulond anch ndiy wadinga Asaf, ap anch ndiy kadingap chid cha dijuku dia Asaf, mwin Levi wayitakela in kuwang pa chirung cha Mwant David. (1 Jnsg. 6:31-43) Mu Kuseng 73 tutangin anch Asaf (ap umwing wa anend) wakashimuka. Ndiy wayovila antu ayimp ris mulong ading ni mwom uwamp ni washikena ku kulond anch: “Ov, komb nalama kwam muchim wam zwang chamwamu?” Chimeken anch ndiy washadisha chitongijok cha chisend chend cha mudimu; ndiy wakanganya kwitiyij anch Yehova wading chibar chend. Ndiy wikal nich kanvundangesh muspiritu “ching kusu pa chisu [chandamay] mu chikumbu cha [Yehova].”—Kus. 73:2, 3, 12, 13, 17.

11. Ov, chipul ik chadingay nich Jeremiy, ni mutapu ik wamwakulau?

¹¹ Muprofet Jeremiy wading mwin Levi mukwau witiyija anch Yehova udi chibar chend. Shinshikinany amboku chasotay kulond pasadinay dizu dined. Jeremiy wadinga mu ul wa Anatot, musumb wa in Levi wadinga piswimp ni Yerusalem. (Jer. 1:1) Chisu chimwing, Jeremiy wiyipula anch: Mulong wak antu ayimp akat kuzangam pakwez in kutentam amen mar? (Jer. 12:1) Kupwa kwa kushinshikin pa yom yading yisadikina mu Yerusalem ni kudi in Yuda, ndiy wiyova anch ndiy wafanyidina ‘kwinan’ piur pa yom yamanay. Jeremiy wading wij anch Yehova utentamin. Ov, chom ik chasalay Yehova kupwa kwa kumupepil Jeremiy chakwel apana uprofet ni mutapu ik Wawanyishay mazu ma uprofet winou wapana chakul chikash ku chipul cha muprofet. Kwambatan nich uprofet wa Nzamb, antu aziyila ku wintakel wa Yehova ‘achidija mwom wau,’ pakwez antu ayimp akata kuzangam kateshap kubabesh ni asheshika.—Jer. 21:9.

12, 13. (a) Ov, chom ik chamubachika Jeremiy kulond anch: “Kinikwetap mukwau, ching kusu [Yehova]” ni chitongijok ik chadingay nich? (b) Mulong wak michid yawonsu ya in Isarel yakudisha mwikadil wa kuchingel?

¹² Kupwa pasambishay Jeremiy kutongijokin piur pa ul wend washeshika, ndiy wiyova mudi wading ukat kwendil mu mididim. Chading mudi Yehova wasala anch “nishakama mu mididim yikurikina ya rufu.” (Mad. 1:1, 16; 3:6) Jeremiy wayileja in muchid antombuj chakwel achirika kudi Tatukwau wa mwiur, pakwez uyimp wau wasalau washikena mu chilik chakwel anch Nzamb alika Yerusalem ni Yuda asheshika. Chinech chamwovisha Jeremiy kusansan, ap anch kasalap uyimp. Mu mar mend, muprofet wavurika riy ra Nzamb. Ndiy walonda anch: “Riy rend yishiching chikupu.” Chikwau kand, riy ra Yehova rikat kumekan pamanch ni pamanch! Chawiy lel, Jeremiy walonda anch: “Kinikwetap mukwau, ching kusu [Yehova].” Ndiy wadandamena kwikal nich chisend cha kumusadil Yehova mudi muprofet.—Tang Madil ma Jeremiy 3:22-24.

¹³ Mu mivu 70, in Isarel akutwish kuburena ngand ya kushakam. Ngand yila kushal mwakad antu. (Jer. 25:11) Pakwez mazu ma Jeremiy “Kinikwetap mukwau, ching kusu [Yehova]” mamekesha ruchingej rend mu riy ra Nzamb, ni mamwinkisha diyingish dia kumekesh ‘mwikadil wa kuchingel.’ Michid yawonsu ya in Isarel yela kushadish uswan wau, afanyina kukudish mwikadil mudi wa muprofet winou. Yehova wading ruchingej rau rimwing kusu. Kupwa kwa mivu 70, antu a Nzamb ayichirisha kwi ngand yau ni ayinkisha chisend cha kumusadil kwinikwa.—2 Jnsg 36:20-23.