8. (a) Chom ik chikutwishau kufanikesh nich mikandu mu Bibil? (b) Ov, chom ik chifanikeshinau nich “mukandu wa Mitond mudi ya Mpach”?

⁸ Mulong Yerusalem​—“musumb”​—udi chifanikesh cha Yerusalem wa mwiur, “mukandu wa Mitond mudi ya Mpach, udia mutambu wa kwingangel kwa musumb wa Yerusalem,” ufanyidin kand kwovikan mu chifanikesh. Ov, chom ik chifanikeshinau ni mukandu winou? Ov, mutapu ik akeza “kauril mukandu winou mu yibar yaad” ni yikala mikandu yaad? Ov, mulong wak Yehova wisambidin piur pa yiney anch ‘mikandu yam’? (Tang Zakariy 14:3-5.) Mu Bibil, mikandu akutwish kuyifanikesh nich mant, ap mawinyikel. Chikwau kand, yiyukish ni diking akat kuyilikej nich mukandu wa Nzamb. (Kus. 72:3; Isay 25:6, 7) Chawiy lel, mukandu wa Mitond mudi ya Mpach, udia mutambu wa kwingangel kwa musumb wa Yerusalem wa pansh umekeshin ukaleng wa mangand mawonsu wa Yehova, winyikel wend wa piur nakash.

KUCHININ KWI NKURUBUK KUSAMBISHIN!

11, 12. (a) Ov, chisu ik chikeza kusambish kuchinin ku nkurubuk wa mu chifanikesh? (b) Ov, chom ik chimekeshina anch chikas chikash cha Yehova chidi ni antwend?

¹¹ Yesu wayibabesha in kumulondul end anch: “Antu awonsu akez kukukisany mulong wa kwingambat am.” (Mat. 24:9) Mu machuku mansudiel ma ditenchik dined, kudiosh pa muvu wa 1914, rukis riner rasambisha kwikal rikash. Chikalap nchik rupompat rikash pantaliken ni atushal azizidilau many kudi akankuny nau pa chisu cha Njit ja Mangand Mawonsu ja I, antu a mu chisak chinech chishinshamena kayijipap. Mu 1919 ayidiosha mu uswik wa Babilon Mujim​—marelijon mawonsu ma makasu. (Kuj. 11:11, 12)a Chawiy chisu chasambishau kuchinin ku nkurubuk wa mikandu ya Yehova.

¹² Kudiosh pa 1919 nkurubuk wa diking dia Nzamb wadandamena kuyilam in kwifukwil akin pa divu diawonsu. Mu dikum dia mivu, mu jindond jivud ja mangand, alikisha mudimu wa kulejan mu chingand ni kupan mikand yimedina pa Bibil ya Atuman a Yehova. Kulikish kwinoku kudandamedin kand mu jingand jimwing. Ap anch akamichid akutwish kupakish kusal mwamu, pakwez, awiy kakezap kutwish kushesh difukwil diakin! Chikas chikash cha Yehova chikez kwikal ni antwend.​—Kuv. 11:2.

13. Ov, mutapu ik tukata kushal mu nkurubuk wa diking dia Yehova, ni mulong wak chidi cha usey nakash kusal mwamu?

¹³ Anch twalamat kudi Yehova ni twiman dang mu uyakin, ndiy ni Mwanend, Yesu Kristu, akez kutulam, ni Nzamb kakezap kumulikidil muntu ap chom chimwing chishikena ‘kuyibwit mu chikas chend.’ (Yoh. 10:28, 29, TMK) Yehova udi tayad kupan ukwash wawonsu chakwel tumuziyila mudi Mukaleng wa Mangand Mawonsu ni tushala antu ashinshamena a Want wa Mesia. Chidi cha usey anch twashal mu nkurubuk wa diking, mulong nkurubuk winou ukez kwikal nich wa usey nakash kudi in kwifukwil akin pa mar makash masejina swaa.