Yesu wamuleja muntu winou anch: “Ey wakul kal nawamp. Sal mwamu chakwel ukwikal mwom.” Ov, kwakul kwinoku kwawiy kwapwisha mambamb? Muntu winou kadingap kakimbina chakul, ndiy wading ukimbin ‘kwimekesh anch udi muntu utentamina,’ mulong wa kumekesh anch ukwet chitongijok chiwamp chawiy wiyingisha nich mutapu ukatay kuyisadin antu akwau. Ndiy wipula anch: ‘Ov, mutej wam ndiy nany?’ (Luka 10:28, 29) Chimeken anch chipul chinech chading mupit. Mulong wak?

In Yuda ading ij anch dizu ‘mutej’ difanyidin kudisadin ching kudi antu alimishanga yishankur ya in Yuda ni chamekana mudi anch mukand wa In Levi 19:18 wakasikesha chitongijok chinech. Chakin kamu in Yuda ading kulond anch, chading “chijidik” kubombakan nau antu akad kwikal in Yuda. (Midimu 10:28) Chawiy muntu winou pamwing ni in kwilej amwing a Yesu atonga anch ading atentamina anch ayisadin in Yuda nawamp. Pakwez akutwish kumusadin muntu wakad kwikal mwin Yuda mu mutapu uyimp; mulong muntu winou kadiap ‘mutej’ nau.

Wading mutapu uwamp wa kufundish mud ik! Anch Yesu wamuleja kusu muntu winou anch muntu wakad kwikal mwin Yuda ndiy mutej nend, ov muntu winou ni in Yuda akwau ela kwitiy? Bwat kelap kwitiy. Pakwez, pasadinay Yesu rusangu riner, mu kurumburil nawamp chakwel in kumutesh ajingunina, akula ku chipul chamwipulau anch ‘Nany mutej nam?” ni atesha nawamp. Muntu wamekesha kwikal mutej wakin wading muntu wamekesha rukat ni ranaken mud mutwitinau kusal mu Bibil.