Yehova wamuleja Samwel anch: ‘Yang ku chikumbu cha Yese. Umwing wa pakach pa anend ukwikal mwant wa kaad wa Isarel.’ Chawiy Samwel waya ku chikumbu cha Yese. Pamumanay mwan wa kusambish, watonga anch: ‘Nsand winou ukutwish kwikal ndiy.’ Pakwez Yehova wamuleja Samwel anch kandiyap winou. Yehova walonda anch: ‘Am nimening yida mu muchim wa muntu, nimeningap kuwap kwa mujimbu.’

Yese waleta an amakundj akwau musamban kud Samwel. Pakwez Samwel walonda anch: ‘Kwikil muntu watondangay Yehova pakach pa an inay. Ov, ukwetap an akwau?’ Yese wakula anch: ‘Kwashal kal mwan umwing kasulans, David. Wayang kal kulam amikoku am.’ Chisu chezay David, Yehova wamuleja Samwel anch: ‘Ndiy winou!’ Samwel wamuzizina David many pa mutu anch ndiy ukwikala mwant wa Isarel.

Chisu chimwing, in Isarel ading kurish njit nau in Filistin, in Filistin ading ni chifuv ikundj mwin kurish njit dijin dend Goliat, ndiy wading kuyirishin. Dichuku ni dichuku, Goliat wayisarumunang in Isarel. Walonda ni dizu da piur anch: ‘Ntuminany muntu ukurisha niyamam. Anch wawin, tukwikal aswik en. Pakwez anch namuwin, ukwikalany aswik etu.’

David waya mu chibeng cha amasalay a in Isarel ni yakuda ya ayayend ading amasalay. Wamutesha Goliat ni walonda anch: ‘Nikurish nend!’ Mwant Saul wamwela anch: ‘Uchid kwey mwanikanch.’ David wamwakula anch: ‘Yehova ukwinkwash.’

Saul wamwinkisha David yom yend ya njit, pakwez David walonda anch: ‘Nikutwishap kurish ni yom yiney.’ David wanona ut wend wa ndundu ni waya ku wit, wanona mayal matan, wamatek mwi ntwuku. Kupwa David waya kuday Goliat. Goliat walonda ni dizu da piur anch: ‘Mwan mukemp sej kunoku. Nikupan mbij jey kud atujil ni kud annam a yidany.’ David kovap wom. Walonda ni dizu da piur anch: ‘Ey wezin ni mpak ya musamun ni kalembil, pakwez am nezin mu dijin da Yehova. Urishinap niyetwetu, urishin ni Nzamb. Muntu win mwawonsu uda pinap ukuman anch Yehova ukwet usu kusutamu mpak ya musamun ap kalembil. Ukukupanan en awonsu mu makas metu.’

David wateka diyal mu ut wend wa ndundu ni wamwasa Goliat ni usu wawonsu. Nich ukwash wa Yehova, diyal damukwata Goliat ni damwandama pa mpal. Goliat wawa pansh ni wafa. Kupwa in Filistin achina mau mulong wa kupandish mwom yau. Ov, umuchingejidin Yehova mud mwasalay David?

Kupwa kwa David kumujip Goliat, Mwant Saul wamwinkisha chisend cha kulam amasalay end. David wawina njit jivud, ni wijikana nakash. Chisu chawonsu chadokalangay David kwi njit, amband ajangang ni awangang anch: ‘Saul wajipa tunan, ni David makum ma tunan!’ Saul wamwovila David mukau ni wakimba kumujip.

David wading kubulang kadad nawamp nakash. Dichuku dimwing padingay David umubudidin Saul kadad, mwant wamwasa kalembil. David wiyepa, ni kalembil kapampa mu rubumbu. Kupwa kwa yom yiney, Saul wapakisha tupamp tuvud kumujip David. Chawiy, David wachina ni wajingama mwi mpay.

Saul wasenda amasalay 3 000 ni aya kumukimb David. Wandama mu mandam (dibuk) mwading mujingaminay David ni antu end. Antu a David amuleja David mu kayauyau anch: ‘Chinech chawiy chisu chey cha kumujip Saul.’ David wazengama wakatul rizez ra nkandj wa mwant Saul. Saul kateshap. Kupwa kwa yom yiney, David wova nayimp anch kamulimishap mwant wazizilau many kud Yehova. Kitiyap anch antu end amurishikisha Saul. Kupwa, wamutazuka Saul ni wamuleja anch nafanyinang kukujip chisu chinadinga ni mutapu wa kusal mwamu. Ov, Saul waswimpa yitongijok yend piur pa David?

Bwat. Saul wadandamena kumulondul David. Uchuku umwing David ni mwipwend Abishay andama mu chibeng cha Saul. Ap Abiner, isalay wamulamang Saul, wading ulel. Abishay walonda anch: ‘Chinech chawiy chisu! Itiy amboku chakwel nimujip.’ David wamwakula anch: ‘Yehova ndiy ukumujipa Saul. Non kwey ching kalembil kend ni nsab yend ya mem ni tuya.’

David wakandama ku mukandu wading piswimp ni wasambisha kutal chibeng cha Saul. Wasambisha kutoy anch: ‘Abiner, mulong wak umulaminap mwant wey? Nsab ni kalembil ka Saul yid kwisu?’ Saul wova dizu da David ni walonda anch: ‘Wafanyinang kwinjip, pakwez wasalangap mwamu. Nij anch ukwikal mwant wa kaad mu Isarel.’ Saul wachirika mu chipang chend. Pakwez kadap antu awonsu a mu dijuku da Saul amukisa David.