Jonatan mwan ikundj wa kusambish wa mwant Saul, wading mwin kurish njit utakamena. David walonda anch Jonatan wayanga mau mud mbur ni wading ni usu mud wa ntambu. Dichuku dimwing, Jonatan wamana amasalay in Filistin 20 pa mukandu. Wamuleja nsand mwin kumusendin yom yend ya njit anch:‘Tukuyirishikish anch Yehova watulej kusal mwamu. Anch in Filistin atulej kuyisejin piswimp chawiy tukwijik anch tufanyidin katat kuyirishikish.’ In Filistin alonda nich dizu da piur anch: ‘Ezany kud etu chakwel turishany!’ Chawiy, amakundj inay aad akaninika ku mukandu ni ayirishikisha amasalay.

Jonatan mwan ikundj wa kusambish wa Saul ndiy wafanyina kwikal mwant kupwa kwa rufu ra tatukwend. Pakwez, Jonatan wading wij anch Yehova wamutondin kal David mulong wa kwikal mwant wa Isarel, chawiy kamwovilap mukau. Jonatan ni David ikala arund akin. Akanijana anch akukingijan ni akulamijan umwing ni mukwau. Jonatan wamwinkisha David nkandj wend, mpak yend ya musamun, ut wend wa nseu ni mukab mulong wa kumekesh chijingidij cha urund wau.

Pachinay David mulong akimba kumujip kuday Saul, Jonatan wamulondula ni wamuleja anch: ‘Kangal wov wom ni ikasikesha. Yehova wakutondin kal kwikal mwant. Ap tatuku wij mwamu.’ Ov, ukatin kwikal ni murund muwamp mud Jonatan?

Tupamp tuvud, mwom wa Jonatan wading mu ubaj mulong wa kukimb kumukwash murund nend. Wading wij anch Mwant Saul wakimba kumujip David, chawiy chamulejay tatukwend anch: ‘Ukusal chitil anch wamujip David, kwikil chom chiyimp chasadinay.’ Saul wamujimena Jonatan nakash. Mivu yikemp yasuta, Saul ni Jonatan awonsu aad afa kwi njit.

Pafay Jonatan, David wamukimba Mefiboket mwan ikundj wa Jonatan. David pamutanay Mefiboket wamwela anch: ‘Mulong tatukwey wading murund nam muwamp, nikukulam mu mwom wey wawonsu. Ukushakam mu chipang cham ni tukudang ney pamwing.’ David kamuvuramenap murund nend Jonatan.

Pafay Saul, David wikala mwant. Wading ni mivu 30. Kupwa kwa mivu yikemp yasuta pikalay mwant, dichuku dimwing uchuku padingay piur pa chikumbu chend, wamumana mband umwing wa ufun. David wajingunina anch dijin da mband winou dading Batisheba ni nfumwend wading isalay dijin dend Uria. David wamutumesha Batisheba chakwel eza mu chipang chend. Asala masandj kupwa Batisheba wimisha. David wasala usu wa kujindjik chitil chasalay. Wamuleja mukurump wa amasalay chakwel amuteka Uria kurutu kwa yisak ya amasalay yikurisha njit ni kupwa akuchirik panyim. Pafay Uria kwi njit, David wamwata Batisheba.

Pakwez, Yehova wamana yom yiney yawonsu yiyimp yasadika. Chom ik chasalay? Yehova wamutuma muprofet Natan kuya kuday David. Natan wamuleja David anch: ‘Mpich umwing wading ni amikoku avud, chad kazwendj wading ni kan ka mukoku kamwing kakatinay nakash. Mpich wakwatang kan ka mukoku ka kazwendj kinika wakasend.’ David wajimana nakash ni walonda anch: ‘Mpich winou afanyidin kumujip!’ Kupwa Natan wamuleja David anch: ‘Mpich winou yeya kamu!’ David waziya nakash ni witiyina uyimp wend kud Natan ni walonda anch: ‘Am nasadin kal chitil kud Yehova.’ Chitil chinech chamuletina David mar mavud pamwing ni dijuku dend. Yehova wamupupa David, pakwez kamujipap mulong wading mwin kashinsh ni witudishina.

David wakata kutung tempel wa Yehova, pakwez Yehova watonda mwanend Salomon chakwel atunga tempel winou. David wasambisha kumukwash Salomon kutek pamwing yom ya kutung nich ni walonda anch: ‘Tempel wa Yehova ufanyidin kwikal wa ufun. Salomon uchid mwanikanch pakwez, am nikumukwash kutek pamwing yom ya kutung nich.’ David wapana nfalang jivud mulong wa kukwash mudimu wa kutung. Wakimba antu akweta ukaliweny wa kutung. Wakungameja utad wa or, utad wa argent ni mabay mavud madokalang ku Tir ni ku Sidon. Kurutu afa, David wamuleja mwanend Salomon mutapu ukutungay tempel winou. Wamuleja anch: ‘Yehova wanfundidin yom yiney mulong weyey. Yehova ukukukwash. Kangal kwov wom. Ikal mukash ni sambish kusal mudimu.’