Pikalay Salomon mwant wa mu Isarel, Yehova wamwipula anch: ‘Chom ik ukatina chakwel nikwinkisha?’ Salomon wakula anch: ‘Nichid kwamu nsand, nijap kwamu yom nifanyidina kusal. Nginkishaku amboku manang makutwisha kwinkwash nilama nich antu ey.’ Yehova wamwakula anch: ‘Mulong wangit kal anch wikala ni manang, chawiy ukwikal mwin manang nakash pa divu da kabuj. Ukwikal kand mpich nakash. Ni anch wanziyin, ukusal mivu yivud.’

Salomon wasambisha kutung tempel. Wasadina utad wa or ni utad wa argent uwamp nakash, mabay ni mayal ma usey nakash. Tunan twa amakundj ni amband akweta ukaliweny awiy asala mudimu wa kutung tempel winou. Kupwa kwa mivu sambwad papwishau kutung tempel, afanyina kumupan kud Yehova. Mu tempel winou mwading chintamb cha kupeshin padinga yakupesh. Salomon wasa manungin mend kurutu kwa chintamb ni walembila anch: ‘A! Yehova tempel winou kadap mujim nakash ap wa ufun nakash ku mes mey, pakwez, itiy amboku difukwil detu ni tesh kulembil kwetu.’ Mutapu ik watongay Yehova piur pa tempel winou ni malembil ma Salomon? Papwishay kamu Salomon kulembil, kasu kadokala mwiur ni kwosha mulambu wadinga pa chintamb. Yehova witiya anch tempel winou ikala wendendiy. Pamanau in Isarel yom yiney asangara nakash.

Mwant Salomon wijikana nakash mu Isarel mwawonsu ni ku jindond ja kulemp mulong wa manang mend. Antu ezang kud Salomon mulong wa kuyikwash kupwish milong yau. Ap mwant mband wa ku Seba weza kumupak ni yipul yikash. Pateshay yakul ku yipul yend, mwant winou walonda anch: ‘Kinadap nitiyijina yom yawonsu yinatesha kud antu mulong weyey, pakwez katat najingunin kal kamu anch ey ukwet manang kusutamu yom yinatesha. Yehova Nzamb wey wakuyukisha kal.’ Mashakamin ma muchid wa in Isarel mading masangareshina. Pakwez, yom yaswipa.

Padingay Salomon ni kumwifukwil Yehova, mu Isarel mwading chisambu. Pakwez, Salomon wata amband avud a mu jingand jikwau, amband inay ading in kwifukwil akish. Pakemp pakemp, Salomon waswimpa ni wasambisha niyend kwifukwil akish. Yehova wajimana nakash. Wamuleja Salomon anch: ‘Muchid wa Isarel ukwaurik kusambishin mu dijuku dey ni ukwaurik mu yikunku yaad. Nikez kupan chikunku chijim kud atushalapol ey ni dijuku dey dikuyikel ka chikunku kakemp.’

Yehova wakwata mupak winou patok mu mutapu ukwau. Kashalapol umwing pakach pa atushalapol end, Jerobowam waya mu weny ni wasankanijan ni muprofet Akija. Akija wapwola nkandj wend mu tuyibel 12 ni wamuleja Jerobowam anch: ‘Yehova ukutambul want wa Isarel mu dijuku da Salomon ni ukuwangan mu yikunku yaad. Tambul yibel dikum mulong yeya ukwikala mwant wa michid dikum.’ Mwant Salomon watesha yom yiney ni wakimba kumujip Jerobowam! Chawiy Jerobowam wachinina mu Idjibit. Kupwa kwa machuku, Salomon wafa ni mwanend Robowam wikala mwant. Chawiy chamanay Jerobowam anch ufanyidin kuchirik mu Isarel.

Amakurump a mu Isarel amuleja Robowam anch: ‘Anch wayilam antu nawamp, akwikal ashinshamena kud ey.’ Pakwez murund nend nsand wa Robowam wamuleja anch: ‘Ufanyidin kuyimesh antu mar! Yisadisha midimu ku usu!’ Robowam walondula chiyul cha murund nend. Wikala ni chisum nakash mulong wa antu kupwa antu amubwambwila. Amuteka Jerobowam kwikal mwant wa michid dikum, yijikana kwikal mud want wa Isarel. Michid yikwau yaad yijikana mud want wa Yuda, yashala yishinshamena kuday Robowam. Michid 12 ya Isarel yaurika.

Jerobowam kakatap anch antu aya ku Yerusalem mulong wa kwifukwil mulong kwawiy kwadingay Robowam mwant. Wij mulong wak? Jerobowam wova wom anch antu akutwish amubwambwil ni akuya ku mutambu wa Robowam. Chawiy chasalay an a ngomb aad a utad wa or ni wayileja antu end anch: ‘Yerusalem ud kulemp nakash. Ukutwishany kwifukwil pinap.’ Antu asambisha kwifukwil an a ngond a utad wa or ni amuvuramena Yehova.