Michid dikum ya want wa Isarel yading ni ant ayimp, pakwez Akab wading mwant muyimp nakash. Wata mband muyimp nakash wadinga kumwifukwil Bal. Dijin dend dading Jezabel. Akab ni Jezabel izwisha ngand ya kabuj nich difukwil da Bal ni asambisha kuyijip aprofet a Yehova. Chom ik chasalay Yehova? Wamutuma muprofet Elija kuya kumulej Akab mazu.

Elija wamuleja Mwant Akab anch mulong wa yom yiyimp yasadinay, ruval kakunakap mu Isarel. Mu mivu yisatu ni kusut, mbut jaminyap ni antu asambisha kufa ni chipupu cha nzal. Yehova wamutuma kand Elija kuya kud Akab. Mwant wamwela anch: ‘Yeya uletishina kanrumbangesh kinak! Chid mulong wa kurumbuk kwey.’ Elija wamwakula mwant anch: ‘Kiyamap niletishina chang chinech. Oku, yeya usadishina mwamu mulong umwifukwidil Bal. El tupaka. Kumangej muchid ni aprofet a Bal pa Mukandu wa Karimel.’

Antu akumangana pa mukandu. Elija walonda anch: ‘Tongany chom chakusal. Anch Yehova Nzamb ud Nzamb wakin mulondulany. Pakwez, anch Bal ndiy nzamb wakin ukutwish kumulondulany. Natek kal kupak kwinoku. Aprofet 450 a Bal afanyidin kurijek mulambu ni kumutazuk nzamb wau ni am nikurijek mulambu wam ni nikumutazuk Yehova. Nzamb ukwakula kusutil ku kasu ndiy Nzamb wakin.’ Antu itiya.

Aprofet a Bal arijeka mulambu wa kupesh. Dichuku dakabuj amutazuka nzamb wau anch: ‘A! Bal, twakula amboku!’ Palikay Bal kwakul, Elija wasambisha kuyisip. Walonda anch: ‘Toyan nakash kamu. Pamwing ap ulel ni ukwet kuswir kwa muntu ukutwisha kumulangwish.’ Kushik ni urel aprofet a Bal adandamen kutazuk. Pakwez kayakulap.

Elija wateka mulambu pa chintamb ni wichilap mem. Kupwa walembila anch: ‘A! Yehova, ngakula amboku chakwel antu ijika anch ey ud Nzamb wakin.’ Pakad kulab Yehova washirisha kasu mwiur, keza kwosh mulambu. Antu atoya anch: ‘Yehova ud Nzamb wakin!’ Elija walonda anch: ‘Yikwatany aprofet awonsu a Bal!’ Pa dichuku dinedia aprofet 450 a Bal ayijipa.

Pamanau didj pa karung, Elija wamuleja Akab anch: ‘Ruval ukimbin kunak. Rijek ditemb dey chakwel uya kwol kwey.’ Diur diajala ni madj, rinkind wasambisha kutut, mu chisu chikemp ruval mukash wasambisha kunak. Kupwa chang chapwa. Akab wendisha ditemb dend mau kamu. Nich ukwash wa Yehova, Elija waya mau kusutamu ditemb! Ov, milong ya Elija yapwa? El tumanany.

Pateshay Jezabel yom yayishikena aprofet a Bal, wajimana nakash. Watuma mazu kud Elija anch: ‘Damashik niyey ukufa mud mwafilau aprofet a Bal.’ Elija wova wom nakash ni wachinina mwimpay. Walembila anch: ‘Yehova nikwetap kand chom cha kusal. Nlika kwam nifa.’ Elija wading waziyang kal kamu ni walala mwinshin mwa mutond.

Mwangel wamulangwisha pakemp pakemp ni wamuleja anch: ‘Lank chakwel uda.’ Elija wamana mukat wakwoshin pa mayal ni nsab ya mem. Wada mukat winou ni wana mem kupwa walala kand. Mwangel wamulangwisha kand ni wamwela anch: ‘Dang. Ukwet kuswir kwa usu mulong ud mu weny.’ Chawiy Elija wada nakash. Kupwa wasala weny muten ni uchuku mu machuku 40 djat ni pashikay ku Mukandu wa Horeb. Kwinikwa, Elija wandama mu mandam walal mwinimwa. Pakwez, Yehova wamwipula anch: ‘Elija usadin yom ik pinap?’ Elija wakula anch: ‘In Isarel ajipin kal kushilamu kwau kwashilaumu. Abumodin kal yintamb yey ni ayijipin kal aprofet ey. Katat akimbin anjipa niyam.’

Yehova wamuleja anch: ‘Yang wimana pa mukandu.’ Chakusambish, rinkind mukash watuta mu mandam. Cha kaad, divu dazala nakash kupwa kweza kasu. Cha kasatu, Elija watesha dizu dikemp da kunyinyit. Wabwika chifu ni nkandj wend kupwa wabudika wiman ku chis cha mandam. Yehova wamwipula kand mulong wak wachinangay. Elija wakula anch: ‘Nashadin kal kwam amwinam.’ Pakwez, Yehova wamuleja anch: ‘Kiudap kwey amwiney. Kud antu 7 000 mu Isarel adandamedina kwingifukwil. Yang umutonda Elisha chakwel ikala muprofet pa ndond yey.’ Kapamp kamwing, Elija waya kusal yom yamulejau kud Yehova. Utongin anch Yehova ukukukwash niyey anch wasal yom yikwitinay kusal? Mwaning, ukukukwash. El tushinshikinany yom yashikena pa chisu cha chang.