Pa chisu cha chang, Yehova wamuleja Elija anch: ‘Tumbuk uya ku Sarepita. Mwadamufu uda kwinikwa ukukwinkish yakuda.’ Pashikay ku chis cha musumb, Elija wamumana mwadamufu kazwendj ukat kunonijol nkuny. Wamwita mem ma kuna. Payay kumusendin mem, Elija wamutazuka wamwel anch: ‘Nletinaku kand amboku chikunku cha mukat.’ Pakwez mwadamufu wamwakula anch: ‘Nikwetap mukat wa kukwinkish. Nikwet kwam ching wung ukemp ni many makemp kusu mwi nsab mulong wa dijuku dam.’ Elija wamuleja anch: ‘Yehova wakana anch, ang wansadin mukat, wung ni many mey makupwap kushik ni pakunakina ruval.’

Chawiy, mwadamufu waya kwol kwend, wamusadina muprofet mukat. Mud mwakanay kamu Yehova, mwadamufu ni mwanend ikundj ikala ni yakuda pa chisu cha chang. Chimpay chend chizula wung ni nsab yend yizula kand many.

Kupwa, kwashikena chom chimwing chiyimp nakash. Mwan ikundj wa mwadamufu wayela nakash kupwa wafa. Mwadamufu wamwilembina Elija chakwel amukwasha. Elija wamusenda mwan winou mu makas mend ni waya nend mu kapalikany ka piur. Wamuladika pa ulal ni walembila anch: ‘A! Yehova, nakwilembil amboku muchirishaku mwan winou ku mwom.’ Wij mulong wak chading chom chishimokishena chafanyinay Yehova kusal? Mud mutwija kamu, kwikil muntu ap umwing wading wavumbulawap kal. Mwadamufu winou ni mwanend kadingap in Isarel.

Pakwez, mwan ikundj winou wachirika ku mwom ni wasambisha kupim! Elija wamuleja mwadamufu anch: ‘Tal! Mwaney ikundj ud mwom.’ Mwadamufu wasangara nakash ni wamuleja Elija anch: ‘Ud chakin kamu muntu wa Nzamb. Nij mwamu mulong ulondin ching yom ya kulejau kud Yehova kulond.’

Padingay Mwant Akab mu chipang chend mu Jizarel wamana pa dididish mitond ya nviny ya Nabot. Akab wakata anch mitond yiney yikala yendendiy ni waya kumulej Nabot chakwel amulandishay. Pakwez, Nabot kitiyap kulandish mitond yiney mulong Yijil ya Yehova yading yijidikin kulandish ngand ya uswan. Ov, Akab walimisha chijil chinech chamulejau kuday Nabot? Bwat. Akab wova kuyip nakash. Wajimana nakash, waya kulal pa ulal ni walika kuda.

Jezabel mband muyimp wa Akab wamuleja nfumwend anch: ‘Oku yeya mwant wa Isarel. Ukutwish kwikal ni yom yawonsu ukatina. Nikukwinkish ngand yiney.’ Wayifundina amakurump a musumb mikand, wayileja anch chifanyidin kumukas Nabot mulong wamusaadil Nzamb, chawiy chifanyidin kumwas mayal chakwel afa. Amakurump asala yom yayilejau kusal kud Jezabel ni wamuleja kand Akab anch: ‘Nabot wafang kal. Mitond ya nviny yid katat yeyey.’

Nabot kadingap muntu wa kusambish kujip kuday Jezabel. Wajipa antu avud adinga amukatina Yehova. Wading mwin kwifukwil akish ni wasalanga yom yikwau yiyimp. Yehova wamananga yom yawonsu yiyimp yasalangay Jezabel. Yehova wamusala ik?

Pafay Akab, mwanend ikundj Joram wikala mwant. Yehova wamutuma Yehu chakwel amupupa Jezabel ni dijuku dend.

Yehu waya ni ditemb dend ku Jezarel kwadingay Jezabel. Joram niyend weza ni ditemb dend chakwel amusankana Yehu ni wamwipula anch: ‘Ov, kud chisambu pakach petu?’ Yehu wamwakula anch: ‘Kukwikal nchik chisambu anch makwey Jezabel usadin yom yiyimp.’ Joram wafumbisha ditemb dend chakwel ashirika. Pakwez, Yehu wamwasa Joram nseu ni wafa.

Kupwa Yehu waya mu chipang cha Jezabel. Pateshay Jezabel anch Yehu ukat kwez, wadjala yom ya kwileng nich, warijeka nsuch jend ni waya wiman pa dididish. Pashikay Yehu, Jezabel wamulangwisha pakad kalimish. Yehu wayileja atushalapol a Jezabel adingay nend anch: ‘Mudjibulany pansh!’ Amubachikina pa dididish, wawa pansh ni wafa.

Kupwa, Yehu wajipa an 70 a Akab ni wajiyisha difukwil da Baal mwi ngand. Wij anch Yehova wij yom yawonsu ni ukwet chisu chend chatekay mulong wa kuyipup antu awonsu asadina yom yiyimp?