Ben hadad mwant wa Siriya waya kuyirishikish in Isarel. Pakwez, muprofet Elisha wamubabesha mwant wa in Isarel tupamp tuvud chawiy chamukwashang iyepa. Chawiy, Ben hadad wakwata mupak wa kumujip Elisha. Wajingunina anch Elisha ud mu musumb wa Dotan ni watuma amasalay a in Siriya chakwel amukwata.

In Siriya eza uchuku ku Dotan. Pamanch, kashalapol wa Elisha wabudika pol ni wamana anch ayinyingumukang kal kud amasalay. Wova wom nakash ni watoya anch: ‘Elisha yom ik tukusala?’ Elisha wamuleja anch: ‘Atuda nau etu apandaken kuvul kusutamu ada ni awiy.’ Pa chisu chinicha, Yehova wasala anch kashalapol wa Elisha amana pa mikandu yawonsu yinyingumukina musumb pizulankal atubar ni matemb ma njit.

Pakimbau amasalay in Siriya kumukwat Elisha, ndiy walembila anch: ‘Yehova yipuputisha mes.’ Kapamp kamwing amasalay awonsu kamanap ni kijikap ndond yafanyinau kuya. Elisha wayileja amasalay anch: ‘Udany mu musumb uyimp. Nlondulany, chakwel nikulejany muntu ukimbinanya.’ Amulondula Elisha djat ni kushik ku Samarya kwadingay mwant wa Isarel.

Kupwa, in Siriya ajingunina ndond yidau. Mwant wa Isarel wamwipula Elisha anch: ‘Ov, niyijipa?’ Ov, Elisha wamana anch chawiy chisu chiwamp cha kuyijip antu inay? Bwat. Elisha walonda anch: ‘Kangal wayijip. Yinkisha yakuda chakwel achirika kwau.’ Chawiy, mwant wasala nau musambu ni wayileja chakwel achirika kwadokalau.

Jezabel wading ni mwan mband dijin dend Atalia, wadinga ni yisal yiyimp mud ya makwend. Atalia amwata kud mwant wa mu Yuda. Pafay nfumwend, mwanau ikundj wasambisha kuyikel. Pafay mwanau ikundj, Atalia wasambisha kuyikel amwinend mu Yuda. Kupwa wasambisha kujip antu a mu dijuku da want, wajipa kand muntu mwawonsu wela kwikal mwant pa ndond yend ap kand mwijikur wend. Antu awonsu amwova wom nakash.

Mwin Kupesh mujim Jehojada pamwing ni mukajend, Josheba ading ij anch Atalia wading ni kusal yom yiyimp nakash. Akimba kuyijip mulong amujindjika mwijikur wa Atalia dijin dend Jowas padingay mwan mukemp. Amulidina ku tempel.

Pawanyishay Jowas mivu sambwad, Jehojada wayikumangeja ant ni in Levi kupwa wayileja anch: ‘Lamany ku yis ya tempel ni pikil muntu ap umwing ufanyidina kwandam.’ Kupwa Jehojada wamuteka Jowas kwikal mwant wa Yuda ni wamudjika chibangul cha want. Antu a mu Yuda alonda nich musangar anch: ‘Mwant asala mivu yivud!’

Mwant mband Atalia watesha masok ma antu ni waya pakad kulab ku tempel. Pamumanay mwant musu watoya anch: “Ampunganang kal! Ampunganang kal!” Ant a michid amukwata mwant mband winou muyimp, amubudisha pol kupwa amujipa. Mwant mband winou wading ni chibachikin ik chiyimp mu muchid?

Jehojada wakwasha muchid kusuk manswik ni Yehova ni muchid winou wakana kumwifukwil ching Yehova. Jehojada wapumwona tempel wa Baal ni wapuchola akish awonsu. Watonda in kupesh ni in Levi chakwel asala mudimu mu tempel mulong wa kuyikwash antu amwifukwila Nzamb. Watonda kand antu akwau afanyidina kulam tempel chakwel pikil muntu wijondila andamamu. Kupwa, Jehojada ni ant a michid amuteka Jowas mu chipang ni amushichika mwi nkwas ya want. Antu a mu Yuda asangara nakash. Asambisha kumwifukwil Yehova ni akwolika mu uswik wa mwant mband muyimp Atalia ni kifukwilap kand Baal. Ov, umen mutapu kutakaman kwa Jehojada kwayikwasha antu avud?