Tupamp tuvud, antu a mu Yuda amulikang Yehova ni ifukwilang anzamb a makasu. Pakwez, mu mivu yivud Yehova wasalang usu wa kuyikwash. Ndiy watumang aprofet avud mulong ayibabesha, pakwez antu inay kateshangap kwau. Cha ushon antu inay ayiswingishanga aprofet. Mutapu ik Yehova wapwishay milong yiney ya kwifukwil akish?

Mwant wa mu Babilon Nebukadinezar wakwatang muchid umwing ku umwing. Kapamp ka kusambish wakwata Yerusalem ni wamukwata kand Mwant Jojakim, in kutakel, amasalay, antu ading ni ukaliweny ni waya nau awonsu ku Babilon. Wasenda kand mapit mawonsu mading mu tempel wa Yehova. Kupwa, Nebukadinezar wamuteka Sedekias kwikal mwant wa mu Yuda.

Kwinsambishin Sedekias wamuziyina Nebukadinezar. Pakwez, aprofet amakasu ni michid yading piswimp, amuleja Sedekias anch ufanyidin kubwambwil ku umutakel wa Babilon. Yeremiy wamubabesha anch: ‘Anch wabwambwil kukwikal kujipan, nzal yikash ni mayej mu Yuda.’

Kupwa kwa kuyikel mu mivu chinan, Sedekias wakwata mupak wa kubwambwil ku umutakel wa Babilon. Wayileja amasalay in Idjibit chakwel amukwasha. Kupwa Nebukadinezar watuma amasalay kuya kurishikish Yerusalem ni kunyingumuk musumb wawonsu. Yeremiy wamuleja Sedekias anch: ‘Yehova ulondin anch, ang waziyin ku umutakel wa Babilon, ey ukupand pamwing ni musumb. Pakwez, anch uziyidinap in Babilon akwosh Yerusalem ni akukutek mu rukan.’ Sedekias wakula anch: ‘Nikuziyinap!’

Kupwa kwa muvu umwing ni chikunku, amasalay a Babilon abumona jimbumbu ja Yerusalem ni awosha musumb. Osha kand tempel, ayijipa antu avud, akwata tunan twa antu ni ayiteka mu rukan.

Sedekias wachina mu Yerusalem, pakwez, in Babilon amulondula. Amukwatina piswimp ni Yeriko ni amutwala kuday Nebukadinezar. Mwant wa Babilon wajipa an amakundj enday Sedekias kurutu kwa Sedekias. Kupwa, Nebukadinezar wamubuza Sedekias mes ni wamuteka mu rukan. Pakwez, Yehova wayikana in Yuda anch: ‘Kupwa kwa mivu 70 nikukuchirishany mu Yerusalem.’

Yom ik yayishikena ansand akwatau mu rukan ku Babilon? Ov, ashala ashinshamena kuday Yehova?

Pakwatay Nebukadinezar in kutakel a mu Yuda mulong wa kuyitwal ku Babilon, wamuleja mukurump wa dirumburish dijim Ashipenaz kuyilam antu inay. Nebukadinezar wamuleja Ashipenaz kutond ansand akad kuyel ni akweta manang pakach pa antu akwatau. Ansand inay afanyina kuyifumb mu mivu yisatu. Kuyifumb kwinoku kwela kuyisal ansand inay ikal amakurump a dirumburish da mu Babilon. Ansand inay afanyina kwilej kutang, kufund ni kulond dizu dalondangau mu Babilon. Afanyina kuda kand yakuda yadangay mwant ni antu awonsu adinga mu chipang chend. Ansand inay anying ading Daniel, Hanania, Mishayel ni Azaria. Ashipenaz wayipila majim masu ma mu Babilon, Balitasar, Shadirak, Meshak ni Abed nego. Kuyifumb kwinoku kwayikangesha kumwifukwil Yehova?

Ansand inay anying akwata mupak wa kumuziyin Yehova. Ading ij anch kafanyidinap kuda yakuda ya mwant mulong Yijil ya Yehova yalikisha kuda yom yijondila. Chawiy chamulejau Ashipenaz anch: ‘Kangal amboku watwinkish yakuda ya mwant.’ Ashipenaz wayileja anch: ‘Anch udilanyap chad mwant wakumanany uyedilany ukwinjip.’

Daniel wading ni chitongijok. Wamuleja kalam wayilamanga anch: ‘Twinkishang kwetu amboku yakuda ya mayij ni mem ma kuna mu machuku dikum. Kupwa, ukutwilikesh ni antu akwau akata kuda yakuda ya mwant.’ Kalam winou witiya.

Kupwa kwa kuyipak mu machuku dikum, Daniel pamwing ni arund nend asatu ikala ni mijimbu yiwamp kusutamu ansand awonsu. Yehova wasangara nakash mulong amuziyina. Wamwinkisha Daniel manang ma kurumburil yishimushimu ni yilat.

Papwishau kuyifumb, Ashipenaz wayitwala ansand inay kuday Nebukadinezar. Mwant wambamba nau ni wamana anch Daniel, Hanania, Mishayel ni Azaria ading ni manang nakash ni ababela kusutamu ansand akwau. Wayitonda ansand inay anying chakwel asadina mudimu mu chipang cha dirumburish. Mwant wayitanga yisu yivud yiyul pa milong ya usey. Yehova wayinkisha ansand inay manang kusutamu antu awonsu a mwant akweta manang ni in kupong.

Ap anch ading mwi ngand ya wingendj, Daniel, Hanania, Mishayel ni Azaria kavuramenap anch ading antu a Yehova. Ukutwish niyey kumuvurik Yehova yisu yawonsu ap anch ud amwiney pakad kwikal nau anvaj ey?