Dichuku dimwing uchuku mwant Nebukadinezar walata chilat chimwing chikash. Chilat chinech chamwakamisha nakash ni chamukangesha kulal. Chawiy, chayitazukay in kupong end ni wayileja anch: ‘Nlejany kurumburik kwa chilat chinalatanga.’ Amuleja anch: ‘A! Mwant tuleja chilat chiwalatang .’ Pakwez, Nebukadinezar wayileja anch: ‘Teshany! anch en kiwinlejinanyap yom yinalatanga nikukujipany.’ Awiy amwakula kand mwant anch: ‘Tuleja kwetu chilat chin, chakwel tuchirumburila.’ Mwant wakula anch: ‘En wovijanangany kal pamwing chakwel windimbany. Chawiy, nlejany chilat cham!’ Amuleja kand mwant anch: ‘Kwikil muntu ap umwing uda pa mangand ukutwisha kukurumburil chilat chinech. Yom wipwila yikasiken.’

Nebukadinezar wajimana nakash ni wakwata mupak wa kuyijip antu awonsu akweta manang adinga mwi ngand yend. Pakach pa antu inay akimbay mwant kujip pading Daniel, Shadirak, Meshak ni Abed nego. Daniel wamwita mwant chisu chikemp. Kupwa ndiy pamwing ni arund end amulembila Yehova chakwel ayikwasha. Chom ik chasalay Yehova?

Mu chishimushimu, Yehova wamuleja Daniel chilat cha Nebukadinezar ni kurumburik kwach. Pikwacha, Daniel waya kud kashalapol wa mwant ni wamuleja anch: ‘Kangal wayijip in manang awonsu. Nikutwish kurumburil chilat cha mwant.’ Kashalapol wamutwala Daniel kuday Nebukadinezar. Daniel wamuleja mwant anch: ‘Nzamb wakulejang yom yikukushikena. Tesh kurumburik kwa chilat chey: Wamanang chirumbidij chijim chikweta mutu wa utad wa or, ntul ni makas ma utad wa argent, mbund ni tutaf twa mend twa utad wa bronze, mend ya utad ujal ni yidjatil yend ya utad ujal ubombakena ni kam. Kupwa, diyal dijim dadokala ku mukandu, dawil ku mend kwa chirumbidij. Chirumbidij chapuchoka ni rinkind wasenda rufunfut ra yom yapuchoka. Diyal dajimba dikal mukandu ni dambwika mangand mawonsu.’

Kupwa Daniel walonda kand anch: ‘Chilat chinech chirumburikin mwamu: Want wey ud mutu wa utad wa or. Utad wa argent ud want ukwikalaku kupwa kwa want wey. Kupwa kukwikal want wa utad wa bronze, ukeza kayikel mangand mawonsu. Want ukwambakenap ukwikal ni usu mud utad ujal. Kupwa kand, kukwikal want wa yikunku yaad, chikunku chimwing chikwikal ni usu mud utad ujal ni chikwau chikwikal ni usu mud kam. Diyal dijim nakash dikala mukandu wawiy Want wa Nzamb. Want winou ukez kashesh mant mawonsu ni ukez kwikal wa chikupu.’

Nebukadinezar wazengama pansh kurutu kwa Daniel. Walonda anch: ‘Nzamb wey wakulejang kurumburik kwa chilat cham. Kwikil Nzamb uda mud ndiy.’ Pa ndond pa kumujip Daniel, Nebukadinezar wamuteka kwikal mukurump wa in manang awonsu ni in kuyikel adinga mu musumb wa Babilon. Ukutwish kujingunin mutapu Yehova wakulay malembil ma Daniel?

Kupwa kwa Mwant Nebukadinezar kulat piur pa chirumbidij, wasala chirumbidij chijim cha utad wa or. Wachiteka mu kabeng ka Dura ni wayikumangeja antu akweta usey adinga mwi ngand, mukach mwa antu iniya mwading Shadirak, Meshak, ni Abed nego, ayileja kwiman kurutu kwa chirumbidij chinicha. Mwant wapana mbil anch: ‘Piukuteshanya chidjimin cha mpuny, cha mishiy, ni cha tudad, ukuzengamany pansh ni kwifukwil! Muntu mwawonsu ukulika kwifukwil akumudjibwil mu fur wa kasu. Ov, ansand inay asatu ifukwila ku chirumbidij chinech anch amwifukwila ching Yehova?’

Papanay mwant mbil ya kuwang miminy, antu awonsu azengama pansh mulong wa kwifukwil chirumbidij pakwez, Shadirak, Meshak ni Abed nego kifukwilap. Antu amwing ayimana ansand inay ni amuleja mwant anch: ‘Ansand asatu in Hebereu alikin kwifukwil ku chirumbidij.’ Nebukadinezar wayitazuka ni wayileja anch: ‘Kinak kawiy kapamp ka nsuden kud en kakwifukwil chirumbidij. Anch walikany kand , nikukudjibwilany mu fur wa kasu. Kwikil nzamb ukutwisha kukupandishany mu makas mam.’ Amwakula anch: ‘Tuswiridinap kapamp kakwau. Nzamb wetu ukutupandish. Pakwez, ap anch Nzamb katupandishinap, kitukwifukwilap chirumbidij chey.’

Nebukadinezar wajimana nakash. Wayileja antu end anch: ‘Kundakeshany kasu tupamp sambwad!’ Kupwa wayileja kand amasalay end anch: ‘Yikasany ansand inay moj chakwel uyidjibwilany mu kasu!’ Mizwizu ya kasu yapandakana nakash, anch amasalay aseja piswimp ni kasu afanyina kufa kapamp kamwing. In Hebereu inay asatu ayidjibwila mu kasu. Pakwez, patalay Nebukadinezar mu kasu, wamana anch mwading antu anying ading kunyingumok mu fur wa kasu mwadingau ansand inay asatu. Wova wom nakash ni wayipula amasalay end anch: ‘Ov, kitwadjibulangap ansand asatu mu fur wa kasu? Nimen mud antu anying, muntu wa kanying ufaniken ni mwangel!’

Nebukadinezar waseja piswimp ni chis cha fur wa kasu ni watazuka anch: ‘Budikany ezany en atushalapol a Nzamb Mwin Dikand Dawonsu!’ Antu awonsu ashimwoka nakash pamanau Shadirak, Meshak ni Abed nego abudik mu kasu pakad kutem. Mijimbu yau, nsuch ni masun yatemap ni kanunkap madjimb ma kasu.

Nebukadinezar walonda anch: ‘Nzamb wa Shadirak, Meshak ni Abed nego ud Nzamb mujim. Ndiy watumang mwangel wend mulong wa kuyikamunin. Kwikil nzamb uda mud Nzamb wau.’

Mud ansand in Hebereu, ov, ukutwish kushal ushinshamena kud Yehova chikalap nchik yom yikutwisha kukushiken?