Buku wa Job Ukutwish Kukukwash Chisu Umena Mar

1-2. Mayingishin ik mamwing mafanyidina kutubachik kutang buku wa Job?

OV, WASANGAREDIN kutang buku wa Job machuku ma kwinyim am? Ap anch amufunda kwasut kal mivu 3 500, antu avud nlel amukwatin anch ud pakach pa mabuku ma usey nakash. Antu akat kumubaz muntu wafunda buku winou, mulong wasadina mazu mawamp ni maswapela kutesh. Moses ndiy wafunda buku winou, pakwez musul win kamu ud Yehova.​—2 Tim. 3:16.

² Buku wa Job chid chikunku cha usey nakash cha Bibil. Mulong wak? Diyingishin dimwing did anch, ulejen mulong ujim uyitadina angel ni antu—kutumbish dijin da Yehova. Utufundishin kand piur pa mikadil yishimokishena nakash yikwetay Yehova mud, rukat rend, manang, kutentam, ni usu ukwetay. Chilakej, buku wa Job umujimbwil Yehova anch “Mwin Dikand Diawonsu” tupamp 31, kusutamu mabuku makwau mawonsu mada mu Bibil. Buku wa Job wakwil kand ku yipul yivud ya mu mwom, kuwejinaku ni chipul ech chiyirumbangeshina antu avud mu manang: Mulong wak ulikidinay Nzamb mar?

3. Yom ik tukutwisha kwilej anch twatang buku wa Job?

³ Tukutwish kufanakesh kutang buku wa Job ni kukaninik ku mukandu. Anch twakandam pa mukandu, tukutwish kuman nawamp yom yitunyingumukina. Chilik chimwing kand, kusutin kutang buku wa Job tukutwish kuman nawamp yom yitonginay Yehova piur pa mar metu. Tumanany mutapu ukutwisha buku winou kutukwash chisu tumena mar. Tukwilej mutapu wafanyinau kutaninamu In Isarel mu rusang ra Job ni mutapu tukutwisha niyetu kutaninamu mu rusang riner. Tukuman kand mutapu tukutwisha kusadin buku winou mulong wa kuyikasikesh nich antu akwau.

NZAMB WITIYA ANCH JOB AMAN MAR

4. Kushalijan ik kwading pakach pa job ni In Isarel ading mu Idjibit?

⁴ Chisu chading chimenau In Isarel mar mu usuk mu Idjibit, Job wading ushich mwi ngand ya Uz. Ngand yiney yading pamwing ap kwingangel kwa Ngand ya Kushilamu, ni pamwing ap kwiyand mwi ngand ya Arabi. Chinyim ni In Isarel amwing ifukwila anzamb a makasu, Job wamusadina Yehova nich kushinshaman. (Jos. 24:14; Ezek. 20:8) Yehova walonda piur pa Job anch: “Kwikil muntu udia mudi ndiy pa mangand.”a (Job 1:8) Job wading mpich nakash ni ading amulimishin nakash kwi ndond kwading kushichay. (Job 1:3) Chid chakin anch Satan wafanyina kamu kwov kuyip nakash pa kumuman ikundj winou wading wijau ni ulimishinau kud antu avud ukat kumusadin Nzamb nich kushinshaman!

5. Mulong wak Yehova witiya anch Job aman mar? (Job 1:20-22; 2:9, 10)

⁵ Satan wafa mukan anch Job ukwimik kumusadin Nzamb anch waman mar. (Job 1:7-11; 2:2-5) Yehova wading umukatin Job nakash. Pakwez witiya anch amupak Job mulong wa kumekesh anch yom yalonday Satan yading yakin ap bwat. (Job 1:12-19; 2:6-8) Satan wamusheshina Job annam end, wamujipina anend dikum ni kumwas makolong ma yitat yisansena yayipisha mujimbu wend wa kabuj. Pakwez chikalap nchik yom yasalay Satan, Job washala ushinshamena. (Tang Job 1:20-22; 2:9, 10.) Mu kusut kwa chisu, Yehova wamuchirishina Job ukash wa mujimbu uwamp, mapit, katumb kadingay nich, ni wamwinkisha kand an akwau dikum. Wamukwasha kand Job kushakam mivu yikwau 140, chawiy watwisha kuman ijukur nau ijukuril au. (Job 42:10-13, 16) Rusang riner rayikwasha mutapu ik atushalapol a Nzamb a pasak, niyetu rikutwish kutukwash mutapu ik?

6. Mutapu ik wafanyinau In Isarel kutaninamu kusutin kwijik mulong wak Nzamb ulikidin mar? (Tal kand chipich.)

⁶ Mutapu wafanyinau kutaninamu In Isarel. Mwom wa In Isarel wadingap uswapela mu Idjibit. Chilakej, Yoshua ni Kaleb asutisha usand wau wawonsu mu usuk. Mulong wa kurumbwok kwa antu akwau, asutisha mivu 40 mwi mpay. Kwijik rusang piur pa yikokujol ya Job ni mutapu wamuyukishau kwafanyina kuyikwash In Isarel pamwing ni ijukuril au kwijik muntu uletishining mar. Afanyina kand kutesh nawamp mulong wak Nzamb ulikidin mar ni mutapu ukwatinay nich usey kujijaman ni kushinshaman kwa an a antu.

7-8. Buku wa Job ukutwish nchik kuyikwash antu amena mar? Let chilakej.

⁷ Mutapu tukutwisha kutaninamu. Cha ushon, antu avud nlel alikinap kal kumuchingejin Nzamb mulong kwovilap kurumburik mulong wak yom yiyimp yikat kuyishiken antu awamp. Shinshikin chilakej cha Hazelb uda mu Rwanda. Padingay changadim, wading umwitiyijin Nzamb. Pakwez yom yaswimpa. Anvaj end alikijana, mud chibudikin, amulila kud tatukwend wa katumbu wamumeshang mar nakash. Padingay changadim, ikundj umwing wamulala ku usu. Hazel waya ku egliz wau mulong wa kumukasikesh, pakwez kwikil muntu wamukasikesha. Mu kusut kwa chisu, Hazel wamufundina Nzamb mukand. Mu mukand winou wafundamu anch: “Nzamb, nakulembila, nasala usu wa kusal yom yiwamp pakwez ey wanchirishin kal uyimp. Katat nakulikal kwam ni nasambish kal kusal yawonsu nikatina mulong wa kwikal ni musangar.” Mud Hazel, antu avud ayidimbin kal yom yivud piur pa Nzamb ni itiyijin kal anch ndiy ukata kuletish mar. Tukwet ushon mulong kijap uyakin piur pa Nzamb ni tukatin kamu kuyikwash!

⁸ Kusutin buku wa Job, twilejin kal anch Nzamb kandiyap ukata kuletish mar, pakwez Satan! Twilejin kal kand kulik kutong anch antu akat kuman mar mulong wa yom yau yiyimp yasalau. Bibil utulejin anch “chisu cha mar” chikutwish kumushiken muntu mwawonsu ni chisu chawonsu. (Mul. 9:11; Job 4:1, 8) Ni twajingunin kal kand anch kusutin kujijamen yikokujol yetu, tukat kumwinkish Yehova mutapu wa kumwakul Satan. Kwijik mwamu kukat kutukwash kulondin Dijin dend. (Job 2:3; Jnsw. 27:11) Tukwatin nich usey yom twileja mulong yitukwashin kwijik uyakin piur pa yom yisadina anch etu ni antu tukatina tumana mar. Mu kusut kwa chisu, Hazel wasambisha kwilej Bibil ni Atuman a Yehova ni washikena kujingunin anch Nzamb kandiyap wamumesha mar. Walonda anch: “Namulembila Nzamb tupamp ni tupamp mulong wa kumulej mutapu nading niyovila. Namuleja Yehova anch, pinamwela anch namulikal, kichadingap chakin mulong mu uyakin nadingap kamu kwam nimwija nawamp. Pinap nij anch Yehova winkatin. Nikwet katat musangar.” Chisangareshin mud ik kwijik yom yimubachikina Nzamb kulikidil mar! Tushinshikinany katat mutapu ukutwisha rusang ra Job kutukwash chisu tumena mar.

MUTAPU UTUKWASHINA RUSANG RA JOB KUJIJAMAN

9. Yom ik tukutwisha kulond piur pa Job pashichay mu mawut? (Yakobu 5:11)

⁹ Tong bil mud Job ushich mu mawut amwinend. Mujimbu wizwil ni makolong ni kusansan. Chikit chading chajalang kal mulong wa mayej ni chikat kupwichik ku mujimbu wend unyanyina. Mulong uziyin ku mujimbu, Job umeken mud kakwetap cha kusal ching kusu kwikul ni chibar cha kam ni kakwetap ruchingej. Job kadandamenap kwend kusu kwikal mwom, pakwez wadandamena kujijaman. (Tang Yakobu 5:11.) Yom ik yamukwasha Job kujijaman?

10. Urund wa mutapu ik wading pakach pa Job ni Yehova? Rumburil.

¹⁰ Job wamuleja Nzamb mutapu wading wiyovilay. (Job 10:1, 2; 16:20) Chilakej, shapitre wa 3 utulejin mutapu wading unenganenay Job mulong wa mar mading mamenay ni mutapu wamufishay nich Yehova anch ndiy wading umuletidina mar minam. Ni mu mambamb mend nau arunend asatu, Job walondina kutentam kwend, yisu yivud wadandamena kuyilej anch wading ushinshamen ku mes ma Yehova. Mazu ma Job mading mamekeshin anch yisu yimwing wikwatang mud wading utentamin nakash kumusutamu Nzamb. (Job 10:1-3; 32:1, 2; 35:1, 2) Pakwez mu uyakin, witiyina anch pasalangay usu wa kulondin kutentam kwend, washikena yisu yimwing kulond “mazu ma usup.” (Job 6:3, 26) Mu shapitre wa 31, tutangin anch Job wading ukatin anch Nzamb amwakul ni kumulej anch kadingap kafanyidina kumupup. (Job 31:35) Chakin kamu, Job wading ufil nich pa kumwel Nzamb anch amulej kwisu kudokila mar mend.

11. Yom ik yasalay Yehova pantaliken ni chakul cha Job piur pa kushinshaman kwend?

¹¹ Katat twovil kurumburik anch, ang Job wambamba ni Yehova mu mutapu winou chid mulong wa urund wend ni ndiy, ni wading uchingejin anch Yehova ukumurumburish nich kutentam. Pamwakulay Job kusutin chinzwizu, Yehova kalondap kachom ku kachom piur pa yom yaletisha mar mend. Ni kamufishap nich Job mulong wa yom yalonday ap kujimbul mutapu wiyingishay nich. Pakwez Yehova wamuyula Job mud mutapu ukutwishay nvaj kumuyul mwanend. Winou wawiy wading mutapu uwamp wa kumukwash Job. Mud chibudikin, Job witiyina nich kwikepish anch wading wij yom yikemp ni wakarumuka ku mazu mend mayimp. (Job 31:6; 40:4, 5; 42:1-6) Rusang riner rafanyina kuyikwash mutapu ik antu a pasak ni mutapu ik rikutwisha kutukwash niyetu nlel?

12. Mutapu ik wafanyinau In Isarel kutaninamu mu rusang ra Job?

¹² Mutapu wafanyinau kutaninamu In Isarel. In Isarel afanyina kwilejin ku yom yamushikena Job. Twisambinany chilakej cha Moses. Chading chimwitin kujijamen yikokujol yikash ni kuziy pading patakedinay muchid wa Isarel. Chinyim nau In Isarel in kubwambwil amwinanina Yehova yisu yivud, Moses ndiy wamuleja Yehova yakamish yend. (Kub. 16:6-8; Kuch. 11:10-14; 14:1-4, 11; 16:41, 49; 17:5) Moses niyend wading ukwet kuswir kwa kujijaman pamupupau. Chilakej, padingau In Isarel ku Kades, pamwing ap mu muvu wawanishau mivu 40 mwi mpay, Moses “walonda yom yakad kutongijokin” ni wakanganya kupan katumb pa dijin da Yehova. (Kus. 106:32, 33) Mud chibudikin, Yehova kitiyap anch Moses andam mwi Ngand ya Kushilamu. (Kuv. 32:50-52) Chakin kamu, dipup dined dafanyina kumusal Moses nayimp nakash, pakwez chikalap nchik mwamu waditiya nich kwikepish. Rusang ra Job rafanyina kuyikwash ijukuril a In Isarel kujijamen yikokujol yarishau nich. Kutongijokin pa rusang riner, kwafanyina kuyikwash antu ashinshamena kwilej mutapu wa kumulej Yehova yovil yau ni kwipuk kwiyingish nich kurutu kwend. Afanyina kand kwilej mutapu wa kwitiyin dipup da Yehova nich kwikepish.

13. Rusang ra Job rikutwish nchik kutukwash kujijaman? (Hebereu 10:36)

¹³ Mutapu tukutwisha kutaninamu. Chituda In Kristu, niyetu tukwet kuswir kwa kujijaman. (Tang Hebereu 10:36) Chilakej, amwing pakach petu ayedin, arishin ni yikokujol ya mu dijuku, afishin akatish nau ap akwet milong yikash. Yisu yimwing, yom yilondinau antu ap yisadinau yikutwish kusal anch chitukasiken kujijaman. (Jnsw. 12:18) Pakwez buku wa Job utufundishin anch tukutwish kumulej Yehova mutapu twiyovila nich kashinsh anch ukututesh. (1 Yoh. 5:14) Kakutufishap nich anch chisu tumwilembidina twashiken pamwing ap kulond “mazu ma usup” mud yamushikena Job. Pa ndond pa kusal mwamu, Nzamb ukutwinkish usu ni manang tuswirikedina mulong wa kujijaman. (2 Jsng. 16:9; Yak. 1:5) Ukutwish kand kutupup mu chilik kanang mud mwasalay pantaliken ni Job. Buku wa Job utufundishin kand mutapu wa kujijaman anch atuyul ap anch atupup kusutin Dizu da Nzamb, dirijek Dend, ap kusutin arund aswila mu spiritu. (Heb. 12:5-7) Job wataninamu pitiyay chiyul nich kwikepish, niyetu tukutwish kutaninamu anch atuyul. (2 Kor. 13:11) Rusang ra Job ritufundishin malejan ma usey nakash! Tumanany katat mutapu tukutwisha kusadin rusang riner mulong wa kuyikwash nich antu akwau.

SADIN BUKU WA JOB MULONG WA KUYIKWASH NICH ANTU AKWAU

14. Mutapu ik tukutwisha kusadin yitongijok yiney mu mudimu wa kulejan, mulong wa kurumburil mulong wak kud mar?

¹⁴ Ov, wataninap kal muntu mu mudimu wa kulejan wakwipula mulong wak antu amen mar? Mutapu ik wakula ku chipul chend? Pamwing ap wamuleja yom yilondinay Bibil piur pa yom yasadika mu chir cha Eden. Natong wamuleja bil anch Satan, mwangel umwing wa chisum wayidimba antu a kusambish makasu mayishikija kumubwambwil Nzamb. (Dis. 3:1-6) Kupwa, wamuleja chad anch kupwa kwa Adam ni Ev kubwambwil, mangand mizula nich mar ni rufu. (Rom 5:12) Disuden, wamurumburila pamwing ap anch Nzamb umushidin Satan chisu mulong wa kumekesh anch ud mukamakasu, ni mulong wa kuyilej antu rusang ruwamp piur pa mutapu ukwikalau kand antu awanyidina mu machuku ma kurutu. (Kuj. 21:3, 4) Winou ud mutapu uwamp wa kutongijokin pa chipul chinech ni ukutwish kuyikwash antu avud kwijik mulong wak antu awamp akat kuman mar.

15. Mutapu ik tukutwisha kusadin buku wa Job mulong wa kuyikwash antu atwipwila anch, mulong wak antu amen mar? (Tal kand yipich.)

¹⁵ Shinshikin mutapu ukwau tukutwisha kutongijokin pa buku wa Job—ukutwish kuusadin mutapu winou pamwing ap chisu wakwila ku chipul chinech. Ukutwish bil kumujikitish muntu mulong wa chipul chend. Kupwa wamulej anch Job, ikundj ushinshamena wamana mar makash niyend wiyipula chipul cha mutapu winou. Wafanyina kushiken kutong anch Nzamb niyend wading umuletidinaku mar mu mutapu kanang. (Job 7:17-21) Muntu wambambina nend ukutwish kushimwok pakwijikay anch komb kudosh pakur antu akwau iyipulap kal mulong wak tumen mar. Kupwa, ukutwish kumurumburil nich nkeu anch kadap Nzamb waletisha mar ma Job pakwez ud Djabul. Satan wasala mwamu chakwel ayipak antu mulong wa kumekesh anch amusadidin kwau Nzamb mulong wa yom yitanidinawamu. Ukutwish kuwejinaku anch ap ang Nzamb kaletishap mar ma Job, witiya anch amana mar mulong wa kumekesh anch ukwet kashinsh anch antu ashinshamena akutwish kusaul makasu ma Satan. Kwinsuden, ukutwish kumulej anch mu kusut kwa chisu Nzamb wamuyukisha Job mulong washala ushinshamena. Komb, tukutwish kuyikasikesh antu akwau kusutin kuyinkish kashinsh anch kadap Nzamb uletishina mar.

16. Let chilakej chimekeshina mutapu ukutwishay buku wa Job kumukwash muntu umena mar.

¹⁶ Man mutapu buku wa Job wamukwasha Mario. Mu muvu wa 2021, nambaz umwing wading ukat kulejan ku telefon. Patazukay kapamp ka kusambish, wamutangina Mario verse umwing ni wamurumburila anch Nzamb kimediningap kwend kusu pa kutesh malembil metu, pakwez ukat kutwinkish kand ruchingej ra mwom uwamp mu machuku ma kurutu. Pamwipulay yitongijok yend, Mario wamwakula anch chisu chamutazukay, wading ukat kufund mukand wa nsuden mulong wading ukimbin kwikudik. Mario walonda anch: “Nimwitiyijin Nzamb, pakwez nading niyipwil pamanch mulong wa kwijik anch wanlikin kal kwend.” Pamutazukay ku telefon kapamp ka kaad, wambamba nend piur pa mar ma Job. Mario wajingunina anch wading ufanyidin kutang buku wa Job mwawonsu. Chawiy nambaz wamutumina lien utwadina ku Bibil—Dikarumun da Ngand Yisu. Yibudikin ik yikalaku? Mario witiya dilejan da Bibil ni wasangera kwilej yom yivud piur pa Nzamb wa rukat wamekesha anch umubangidin.

17. Mulong wak umujikitishin Yehova piur pa buku wa Job wafundikishay mu Bibil? (Job 34:12)

¹⁷ Pakad kwidjidjek, Dizu da Nzamb dikwet kamu usu nakash wa kuyikwash antu, kuwejinaku ni antu amena mar. (Heb. 4:12) Tumujikitishin Yehova nakash mulong wafundikisha rusang ra Job mu Dizu Dend dapepilay! (Job 19:23, 24) Buku wa Job utulejin anch “chakin kamu, Nzamb kakutwishap kusal kuyip.” (Tang Job 34:12) Utufundishin mulong wak Nzamb ulikidin mar ni mutapu tukutwisha kujijaman anch matushiken. Ni utukwashin kand kuyongoj antu amena mar. Mu mutu wa mulong wambakedina tukuman mutapu ukutwishay buku wa Job kutukwash chisu tuyulena.