Swivutiso Swa Vadondzri

Xana hi ta tama hi yentxa ntizro wa ku zrezra lowu hi wu yentxaka swoswi ku ya tlhasa siku muni?

Yesu a te: “Madzrungula lawa lamanene ya Mfumu ma ta zrezriwa a misaveni hinkwayu akuva ku va wumboni ka matiko hinkwawu, kutani hi kone wugamu byi taka tlhasa.” (Mat. 24:14) A zritu dzra Xigriki ledzri liki teʹlos ledzri loko dzri ndzruluteliwa dzri liki “wugamu”, ka ndzrimana leyi, ni ka tindzrimana 6 ni 13 dzri tlhamuxela ku helisiwa ka wugamu ka misava leyi ya Sathana. (Mpful. 16:14, 16) Xileswo, hi ta tama hi zrezra madzrungula lamanene ya Mfumu ku ya tlhasa loko ku ta va na ku sale nkamanyana akuva wugamu lebyo byi tlhasa.

Loku i ku yampswisiwa ka matwisisela yezru ya khale. A khale a hi twisisa leswaku hi ta yima ku zrezra madzrungula lamanene loko ku sungula nhlomulo lowukulu hi nkama wa ku helisiwa ka Babilona Lwenkulu. (Mpful. 17:3, 5, 15, 16) A hi twisisa leswaku nhlomulo lowukulu a wu ta kombisa wugamu dzra ‘lembe ledzra vunene bya Yehovha’. Leswi liki, i nkama lowu Yehovha a a ta nyika vhanu mukhandlu wa ku yamukela madzrungula lamanene. (Eza. 61:2) Nakone a hi tlhela hi yanakanya leswaku lava taka huluka ka nhlomulo lowukulu a va ta kombisa ku dumbeka ka Yehovha na nhlomulo lowo wu nga si na tlhasa. A hi yanakanya leswaku lava taka huluka va fana ni Vayuda lava hulukiki loko Yerusalema a helisiwa hi 607 N.N.Y. Vayuda lava a va buya na va gandzrela Yehovha nakone a va nyenya leswi bihiki, xileswo a va fungiwe ku huluxiwa na Yerusalema a nge si helisiwa. (Ezek. 5:11; 9:4) Kambe leswo a swi yelani ni mazritu ya Yesu lawa ma nga ka Matewu 24:14, lawa ma kombisaka leswaku vhanu a va ta va ni mukhandlu wa ku pfumela madzrungula lamanene na ku helisiwa ka wugamu ka Armagedoni ku nga si na tlhasa.

Matwisisela yezru lamampshwa ya Matewu 24:14, ma tlhela ma txintxa leswi a hi swi twisisa mayelanu ni dzrungula dzra yavanyiso ledzri fanisiwaka ni mazralana ka Mpfuletelo 16:21. Wukambisisi lebyi yentiki byi tlhamuxela leswaku tindzrimana letibidzri ta yelana. Hi ndlela yini? A nhlamulo yi tikomba hi ndlela leyi vhanu va yangulaka ha yone ka dzrungula dzra Mfumu. Mupostola Pawulo a tsrale leswaku “ka lava yaka ku huluxiweni”, a dzrungula ledzri a dzri ta nyonxisa ku fana ni “ku nun’hwela ka wutomi”. Kambe ka valala va Xikwembu Nkulukumba a dzrungula ledzro a dzri nge ti nyonxisa, ku fana ni “ku nun’hwela ka lifu”. (2 Kor. 2:15, 16) Valala lavo va dzri nyenya dzrungula dzra Mfumu hikusa dzri paluxa ntiyiso wa leswaku misava leyi va yi zrandzraka ngopfu, yi bihile, yi fumiwa hi Sathana nakone ku nga li khale yi ta helisiwa.—Yoh. 7:7; 1 Yoh. 2:17; 5:19.

Swa hlamalisa ku xiya leswaku a Mpfuletelo 16:21 na yone yi kombisa leswaku a mazralana lamakulu ma ta ‘honetela ngopfu swinene’. Kumbexana leswo swi tlhamuxela leswaku ka nhlomulo lowukulu, a ntizro wa ku zrezra wu ta va wukulu ngopfu swinene, leswi liki a vito dzra Yehovha dzri ta tiviwa ngopfu swinene a matin’wini hinkwawu ya vhanu. (Ezek. 39:7) Xana a nkameni lowo, ntsrhaku ka loko ku ta va na ku helisiwe Babilona Lwenkulu, van’wana va ta yamukela madzrungula lamanene swanga ku nun’hwela loku ka ku nandzrika? Leswo swi nga ha yentxeka. Kumbexana va ta dzrimuka leswaku ku dzringana malembe manyingi, Timboni ta Yehovha a ti zrezra mayelanu ni wukhongoti bya madzrimi.

Leswo swi hi yentxa hi dzrimuka leswi yentxekiki khale a Egipta ntsrhaku ka 10 wa makhombo. Ntsrhaku ka loko Yehovha a “[yavanyise] swikwembu hinkwaswu swa Vaegipta”, “vhanu vanyingi va ku siyanasiyana lava na vone va fambiki na vone” va tipatsre ni vhanu va Xikwembu Nkulukumba. (Eks. 12:12, 37, 38) Swi nga yentxeka vhanu lavo va yime na Yehovha ntsrhaku ka ku vona hinkwaswu leswi Moxe a swi hlayiki mayelanu ni 10 wa makhombo.

Mun’wana ni mun’wana lweyi a taka hlawula ku yima na Yehovha ntsrhaku ka loko ku ta va na ku helisiwe Babilona Lwenkulu, a ta va ni tovoko dzra ku seketela vamakwavu va Kriste lava taka va na va ha li lani misaveni. (Mat. 25:34-36, 40) I ntiyiso leswaku mukhandlu wa ku yavanyisiwa swanga hamba wu ta hela na ke sala kutsrongo akuva ku tlhasa Armagedoni, hi nkama lowu vatotiwa lava ha liki lani misaveni va taka yamukela hakelo dzravu dzra le tilweni.

Ku yampswisiwa ka matwisisela lawo, i xitiyisekiso xa lizrandzru ledzrikulu dzra Yehovha kun’we ni timpswalu take. Nakunene yene “a nga naveli leswaku ni mun’we a helisiwa kambe a navela leswaku vhanu hinkwavu va tisola”.—2 Pet. 3:9.