Woba vy’ukuri ukenguruka imihezagiro ufise?

KUBERA yuko bene Isirayeli bari bakuwe mu buja mu Misiri ku gitangaro, mu ntango barahimbawe no kuba bari baronse umwidegemvyo wo gusenga Yehova. (Kuv. 14:29–15:1, 20, 21) Ariko rero, budakeye na kabiri ukuntu babona ibintu kwarahindutse. Baciye batangura kwidogera ukuntu ivyabo vyari vyifashe. Uti kubera iki? Kubera yuko batanguye gushira umutima ku ngorane zijanye no kuba mu gahinga aho kuwushira ku vyo Yehova yari yarabakoreye. Babwiye Musa bati: “Kubera iki mwatuduganye mudukuye mu Misiri kugira dupfire mu gahinga? Kuko ata mukate n’amazi bihari, kandi dusigaye twarazinutswe uyu mukate [manu] ugayitse.”​—Guh. 21:5.

Haciye imyaka amajana, Umwami Dawidi wa Isirayeli ya kera yaririmvye ati: “Nayo jewe, ubuntu bwuzuye urukundo bwawe ni bwo nizigiye; umutima wanje nunezererwe ubukiriro bwawe. Nzoririmbira Yehova, kuko yangiriye neza.” (Zab. 13:5, 6) Dawidi ntiyibagiye ibikorwa biranga ubuntu bwuzuye urukundo Yehova yari yaramukoreye. Ahubwo nyabuna, yama afata umwanya wo kubizirikana. (Zab. 103:2) Na twebwe nyene Yehova yaratugiriye neza, kandi twoba tubaye inkerebutsi tudafashe minenerwe ivyo yatugiriye. Nimuze rero turimbure imihezagiro imwimwe Imana yaduhaye twinovora muri kino gihe.

“Ubugenzi somambike na Yehova”

Umwanditsi wa Zaburi yaririmvye ati: “Ubugenzi somambike na Yehova ni ubw’abamutinya.” (Zab. 25:14) Ese ukuntu ari agateka kuba abantu b’abanyagasembwa bagiranira ubucuti somambike na Yehova! Ariko none, tuvuge iki mu gihe twotwarwa cane n’ibikorwa vyo mu buzima bwa misi yose ku buryo dusanga tumara umwanya muto turiko turasenga? Nuzirikane ivyoca bishikira ubucuti bwiza dufitaniye na Yehova. Kubera ko Yehova ari Umugenzi wacu, yiteze ko tumwizigira maze tugasuka imbere yiwe ibiri mu mutima wacu biciye kw’isengesho, tukamuserurira ibiduteye ubwoba, ivyipfuzo vyacu be n’ibituraje ishinga. (Imig. 3:5, 6; Flp. 4:6, 7) Wumva none tudakwiye kwitwararika ukuntu amasengesho dutura ameze?

Igihe Icabona akiri muto umwe yitwa Paula yazirikana ibijanye n’amasengesho yiwe, yarabonye ko yari akeneye kuyaryohora. Yavuze ati: “Nari nsigaye mfise akamenyero ko gukoresha amajambo amwe igihe naba ndiko ndasenga Yehova.” Igihe Paul yagira ubushakashatsi kuri ico ciyumviro mu gitabu Index des Publications Watch Tower yaramenye yuko hariho amasengesho ashika 180 yanditse muri Bibiliya. Muri ayo masengesho, abasavyi ba Yehova ba kera baraserura inyiyumvo z’imbere muri bo. Paul yavuze ati: “Igihe nazirikana kuri mwene ubwo burorero bwo mu Vyanditswe, narize kudomako mu masengesho yanje. Ivyo vyaramfashije guserurira Yehova akari ku mutima. Ubu birampimbara kumwiyegereza mw’isengesho.”

‘Ibifungurwa biza ku gihe kibereye’

Uwundi muhezagiro Yehova yaduhaye ni ibintu vyinshi vyerekeye ukuri twize mu Vyanditswe. Kubera ko twisenena ibifungurwa umukimba kandi binuze vyo mu buryo bw’impwemu, turafise imvo yumvikana yo “kwiha akamo k’umunezero kubera [tu]merewe neza ku mutima.” (Yes. 65:13, 14) Ariko rero, dutegerezwa kuba maso kugira ntitureke ngo utwosho twonona dutume dutakaza igishika dufitiye ukuri. Nk’akarorero, kwumviriza inyigisho z’abahuni birashobora kwonona ivyiyumviro vyacu bigatuma tutabona agaciro k’‘ibifungurwa vyo mu buryo bw’impwemu biza ku gihe kibereye,’ ivyo Yehova aturonsa abicishije kuri wa “mushumba w’umwizigirwa kandi w’ubwenge.”​—Mat. 24:45-47.

Uwitwa André, uno akaba yaramaze imyaka akorera Yehova, yarashikiwe n’ibintu bibabaje, ivyo na vyo bikaba ari uguhendwa n’ivyiyumviro vy’abahuni. Yabona yuko gutereza akajisho ku muhora wa Internet w’abahuni ata kaga vyomuteye. Avuga ivyo yibuka ati: “Mu ntango, narakwegerewe n’ivyitwa ngo ni ukuri abahuni bavuga. Uko narushiriza gusuzuma ivyo bavuga, ni ko narushiriza kwiyumvira yuko nari mfise imvo yumvikana yo guheba ishirahamwe rya Yehova. Mugabo mu nyuma, igihe nagira ubushakashatsi ku vyiyumviro abahuni bashikiriza mu kurwanya Ivyabona vya Yehova, naratahuye ukuntu abo bigisha b’ikinyoma bari abanyaruyeri. Mu bisanzwe, ivyo bita ngo ni ikimenyamenya gikomeye yaba ari amakuru baba batandukanije n’ibiyakikuje. Ni co gituma naciye mfata ingingo yo gusubira gusoma ibisohokayandikiro vyacu no kwitaba amakoraniro. Sinatevye gutahura yuko nari nahomvye ibintu vyinshi.” Igishimishije ni uko André yagarutse mw’ishengero.

“Umuryango wose w’abavukanyi”

Umuryango wacu w’abavukanyi ukundana kandi wunze ubumwe ni umuhezagiro uva kuri Yehova. (Zab. 133:1) Birabereye kubona intumwa Petero yanditse ati: “Mukunde umuryango wose w’abavukanyi.” (1 Pet. 2:17) Kubera ko turi mu bagize umuryango w’abakirisu, turashigikirwa mu buryo buranga igishika na ba data, ba mawe, bene wacu hamwe na bashiki bacu bo mu buryo bw’impwemu.​—Mrk. 10:29, 30.

Naho ari ukwo, ibintu bitandukanye birashobora gutuma rimwe na rimwe ubucuti dufitaniye n’abavukanyi be na bashiki bacu buhungabana. Nk’akarorero, biroroshe ko dushavuzwa n’udusembwa tw’umuntu munaka maze tukagira agatima ko kuza turamutora amahinyu. Hamwe ivyo vyoshika, ntivyodufasha none twibutse ko Yehova akunda abasavyi biwe naho bafise udusembwa? Vyongeye, “iyo tuvuze ngo: ‘Nta gicumuro dufise,’ tuba turiko turizimiza kandi ukuri ntikuba kuri muri twebwe.” (1 Yoh. 1:8) Ntidukwiye none kwihatira “[k]ubandany[a] kwihanganirana no kubabarirana ata gahigihigi”?​—Kol. 3:13.

Uwukiri muto umwe yitwa Ann yatahuye agaciro ko kwifatanya n’abakirisu abanje kwibonerako. Mu gukora mu buryo bunaka nka wa mwana w’icangazi avugwa muri ca kigereranyo ca Yezu, yaragiye akayombekere arava mw’ishengero rya gikirisu. Mu nyuma yarikubise agashi maze aragaruka mu kuri. (Luka 15:11-24) Ni igiki none Ann yigiye ku vyamushikiye? Yigana ati: “Ubu ko nagarutse mw’ishirahamwe rya Yehova, ndaha agaciro abo dusangiye ukwemera bose naho bafise udusembwa. Kera narihutira kubatora amahinyu. Mugabo ubu niyemeje kutareka ngo hagire ikintu na kimwe gituma mpomba imihezagiro nironkera ndi mu bo dusangiye ukwemera. Nta kintu na kimwe co mw’isi gikwiye gutuma duheba iparadizo yacu yo mu buryo bw’impwemu.”

Niwame ukenguruka imihezagiro ufise

Kuba twizigira ko Ubwami bw’Imana ari bwo buzotorera umuti ingorane zose abantu bafise ni ubutunzi bw’agaciro ntangere. Ese ukuntu imitima yacu yuzuye ugukenguruka igihe twagira ico cizigiro ari bwo bwa mbere! Twumvise tumerewe nka wa mudandaza avugwa muri wa mugani wa Yezu “[y]agurisha ibintu vyose yari afise” kugira ngo agure “imaragarita imwe y’agaciro kanini.” (Mat. 13:45, 46) Yezu ntiyavuze yuko uwo mudandaza yigeze areka gukenguruka iyo maragarita. Nimuze natwe ntitwigere tureka gukenguruka icizigiro ciza igitangaza dufise.​—1 Tes. 5:8; Heb. 6:19.

Rimbura ibijanye na mushiki wacu umwe yitwa Jean amaze imyaka irenga 60 akorera Yehova. Avuga ati: “Icamfashije kugumiza ku muzirikanyi Ubwami bw’Imana ni ukuyagira abandi ibibwerekeye. Iyo mbonye bahimbawe kubera ko batahura Ubwami ico ari co, biragira ikintu ciza bikoze kuri jewe. Kubona ukuntu ukuri kwerekeye Ubwami gutuma uwo twigana Bibiliya aryohora ubuzima bwiwe biratuma niyumvira nti: ‘Mbega ukuri kwiza igitangaza ntegerezwa kubwira abandi!’”

Turafise imvo zumvikana zo gukenguruka imihezagiro myinshi yo mu buryo bw’impwemu twifitiye. Naho twoshobora kuba twugarijwe n’ibigeragezo nk’ukurwanywa, indwara, ubusaza, akabonge gakomeye, ukubura abacu hamwe n’ingorane z’ivy’ubutunzi, turazi ko ari ivy’igihe gito. Mu gihe c’Ubwami bw’Imana, tuzokwironkera imihezagiro yo mu buryo bw’umubiri izoza yiyongera ku mihezagiro yo mu buryo bw’impwemu twifitiye. Imibabaro iyo ari yo yose turiko turihanganira ubu izokurwaho mw’isi nshasha.​—Ivyah. 21:4.

Mu kurindira, nimuze duhe agaciro imihezagiro yo mu buryo bw’impwemu twifitiye maze tugaragaze ugukenguruka nk’ukwo umwanditsi wa Zaburi yagaragaje, we yaririmvye ati: “Wewe ubwawe wakoze ibintu vyinshi, ewe Yehova Mana yanje, mbere n’ibikorwa vy’agatangaza vyawe n’ivyiyumviro udufiseko; nta n’umwe ariho yogereranywa nawe. Hamwe norondera kubivuga no kubiyaga, ni vyinshi kuruta ivyo nodonda.”​—Zab. 40:5.

[Akajambo k’epfo]

[Ifoto ku rup. 18]

Turahezagirwa mu gushigikirwa mu buryo bw’impwemu mu bihe vy’ibigeragezo