Yezu yoba ari Imana Mushoboravyose?
Inyishu zikunze gutangwa:
▪ “Egome, Yezu ni Imana Mushoboravyose.”
▪ “Yezu yari Imana yigize umuntu.”
Yezu yabivuzeko iki?
▪ “Iyo muba munkunda, mwari kunezerwa n’uko ndiko ndagenda kwa Data, kuko Data anduta.” (Yohani 14:28) Yezu yaremera ko atangana na Se.
▪ “Ndiko ndaduga kwa Data ari we So no ku Mana yanje ari yo Mana yanyu.” (Yohani 20:17) Yezu ntiyavuze ko ari Imana, ahubwo yavuze ko Imana itandukanye na we.
▪ “[Sinavuze] ndavyitumye, ahubwo Data ubwiwe yandungitse ni we yampaye ibwirizwa ry’ivyo ntegerezwa kumenyesha n’ivyo ntegerezwa kuvuga.” (Yohani 12:49) Ivyo Yezu yigisha ntivyava kuri we; vyava kuri Data.
YEZU yavuze ko ari Umwana w’Imana, ntiyavuze ko ari Imana Mushoboravyose. Niba Yezu yari Imana, none yaba ariko asenga nde igihe yari akiri ng’aha kw’isi? (Matayo 14:23; 26:26-29) Emwe, nta gukeka ko Yezu ataba ariko arigirisha ngo ariko avugana n’uwundi muntu!
Igihe babiri mu bigishwa ba Yezu bamusaba ngo aze abahe ibibanza bidasanzwe mu Bwami bwiwe, yishuye ati: “Ivy’ukwo kwicara iburyo bwanje n’ibubamfu bwanje si ivyanje ngo ndabitange, ahubwo ni ivy’abo Data yabiteguriye.” (Matayo 20:23) None Yezu yoba yariko arababesha igihe yavuga yuko ata burenganzira yari afise bwo kubaha ivyo bari basavye? Oya nawe nu! Ahubwo riho, yaremeye yicishije bugufi yuko Imana yonyene ari yo ifise uburenganzira bwo gufata mwene izo ngingo. Yezu yaranasiguye yuko hariho ibintu bimwebimwe yaba we canke abamarayika batari bazi, ariko vyari bizwi na Se gusa.—Mariko 13:32.
Yezu yoba atari afise ubukuru bungana n’ubw’Imana igihe gusa yari ng’aha kw’isi? Oya. Mbere n’inyuma y’urupfu rwiwe be n’ukuzuka kwiwe, Yezu adondorwa muri Bibiliya ko afise ikibanza kiri munsi y’ic’Imana. Intumwa Paulo atwibutsa yuko “Imana iri hejuru ya Kristu.” (1 Abakorinto 11:3, Today’s English Version) Bibiliya ivuga ko muri kazoza “igihe ibintu vyose azoba yabihawe ngo abiganze, [ari] ho Umwana ubwiwe na we azoyoboka akaganzwa n’Uwamuhaye kuganza ibintu vyose, ngo Imana ibe vyose ku muntu wese.”—1 Abakorinto 15:28.
Biratomoye ko Yezu atari Imana Mushoboravyose. Ni co gituma ku bijanye na Se yavuze ngo “Imana yanje.”—Ivyahishuwe 3:2, 12; 2 Abakorinto 1:3, 4.a
[Akajambo k’epfo]
a Ushaka kumenya vyinshi ku bijanye n’ivyo, raba urupapuro rwa 201-204 mu gitabu Mu vy’ukuri Bibiliya yigisha iki? casohowe n’Ivyabona vya Yehova.
[Iciyumviro nyamukuru/Ifoto ku rup. 7]
Yezu yavuze yuko hariho ibintu bimwebimwe yaba we canke abamarayika batari bazi, ariko vyari bizwi na Se gusa