Uratumiwe n’igishika cinshi

KUMBURE uramaze guca hafi y’ahari Ingoro y’Ubwami y’Ivyabona vya Yehova yo mu karere iwanyu maze ukibaza ivyoba bikorerwayo. Woba wari uzi yuko amakoraniro bagira ku ndwi ku ndwi ashobora kwitabwa n’umuntu uwo ari we wese? Abashitsi barahabwa ikaze n’igishika cinshi.

Ariko rero, ushobora kuba ufise ibibazo bimwebimwe. Ni kubera iki Ivyabona vya Yehova bakoranira hamwe? Ni ibiki bigirwa muri ayo makoraniro? Kandi abashitsi batari Ivyabona vya Yehova bavuga iki ku bijanye n’ayo makoraniro?

“Muze mukoranye abantu”

Kuva mu bihe vya kera, abantu bamye bakoranira hamwe kugira ngo basenge Imana bongere bige ibiyerekeye. Nko mu myaka 3.500 iheze, Abisirayeli babwiwe bati: “Muze mukoranye abantu, abagabo n’abagore n’abana, n’abanyamahanga baba muri mwebge, kugira ngo bavyumve, bavyige, bubahe Uhoraho Imana yanyu, bitondere amajambo yose y’ibi vyagezwe, babishitse.” (Gusubira mu vyagezwe 31:12) Ku bw’ivyo, muri Isirayeli abato cokimwe n’abakuze barigishwa gusenga no kugamburukira Yehova Imana.

Inyuma y’ibinjana bitari bike, igihe ishengero rya gikirisu ryatanguzwa, amakoraniro yabandanije kuba ikintu nyamukuru kigize ugusenga kw’ukuri. Intumwa Paulo yanditse ati: “Twiyumvirane kugira tuvyuriranire ugukundana n’ibikorwa vyiza, tudaheba kwa gukoranira hamwe kwacu, nk’uko bamwe babimenyereye, mugabo turemeshany[e].” (Abaheburayo 10:24, 25) Nka kurya nyene ubucuti bwo mu muryango bukomera igihe abawugize bamarana umwanya, ni ko n’ubucuti burangwa urukundo buri hagati y’abipfuza gukorera Imana bukomera igihe abakirisu bakoranira hamwe kugira ngo basenge.

Mu buryo buhuye n’ubwo burorero bushingiye ku Vyanditswe, Ivyabona vya Yehova barakoranira hamwe mu Ngoro zabo z’Ubwami kabiri mu ndwi. Ayo makoraniro arafasha ababa bayitavye guha agaciro ingingo ngenderwako zo muri Bibiliya, kuzitahura no kuzishira mu ngiro. Aho bishoboka, porogarama y’ayo makoraniro usanga ari imwe kw’isi yose, kandi ikoraniro rimwerimwe ryose riba rifise intumbero ryisangije. Imbere y’uko amakoraniro atangura be n’inyuma yayo, abayitaba ‘barahanahana indemesho’ biciye ku biyago vyubaka. (Abaroma 1:12) None ni ibiki bigirwa kw’ikoraniro rimwerimwe ryose muri ayo?

Insiguro ishingiye kuri Bibiliya

Ikoraniro rya mbere ryitabwa n’abantu benshi ni insiguro ishingiye kuri Bibiliya igenewe abantu bose, iyikunze gushikirizwa mu mpera y’umushamvu. Akenshi Yezu Kristu yarashikiriza abantu insiguro, muri izo hakaba harimwo ya Nsiguro izwi cane yo ku Musozi. (Matayo 5:1; 7:28, 29) Intumwa Paulo na we yarashikirije insiguro abagabo b’i Atene. (Ibikorwa 17:22-34) Mu gukurikiza ako karorero, mu makoraniro y’Ivyabona vya Yehova harimwo umuce w’insiguro igenewe canecane abantu muri rusangi, bamwe muri bo bikaba bishoboka ko ari bwo bwa mbere baba bitavye ikoraniro.

Iryo koraniro ritangurwa n’ururirimbo rukuwe mu gitabu Ririmbira Yehova amashemezo.a Ababa bipfuza guhaguruka bose maze bakifatanya n’abandi mu kuririmba urwo ruririmbo baratumirirwa kubigira. Isengesho rigufi rimaze guturwa, umushikirizansiguro abishoboye aratanga insiguro imara iminuta 30. (Raba uruzitiro ruvuga ngo “Insiguro ngirakamaro zigenewe abantu bose.”) Iyo nsiguro ashikiriza iba ishingiye cane kuri Bibiliya. Uwo mushikirizansiguro akenshi arasaba abumviriza ngo barabe ivyanditswe vy’inkoramutima bongere bamukurikire igihe aba ariko arabisoma. Ku bw’ivyo rero, ubishimye woza uzanye Bibiliya yawe, canke na ho woshobora gusaba umwe mu Vyabona vya Yehova akayikuronsa imbere yuko amakoraniro atangura.

Inyigisho y’Umunara w’Inderetsi

Mu mashengero nka yose y’Ivyabona vya Yehova, insiguro y’icese ikurikirwa n’Inyigisho y’Umunara w’Inderetsi, kino kikaba ari ikiganiro c’ibibazo n’inyishu kimara isaha imwe cerekeye iciyumviro kinaka gishingiye kuri Bibiliya. Iryo koraniro riraremesha ababa baryitavye bose gukurikiza akarorero k’Abanyaberoya bo mu gihe ca Paulo “bakiriye ijambo babishashaye cane gusumba, basuzuma Ivyanditswe . . . bavyitondeye.”​—Ibikorwa 17:11.

Inyigisho y’Umunara w’Inderetsi itangurwa n’ururirimbo. Amakuru arimburwa be n’ibibazo bibazwa n’uwuba ariko arayobora iryo koraniro biboneka mu nteguro y’ukwiga y’iki kinyamakuru. Woshobora kuronka ikopi y’integuro y’ukwiga uyihawe n’umwe mu Vyabona vya Yehova. Mu biganiro biherutse kurimburwa harimwo nk’ibi: “Bavyeyi, nimurere abana banyu mubigiranye urukundo,” “Ntimusubirize umuntu mu nkōko ikibi yabagiriye,” be n’ikivuga ngo “Igituma ugucumukura kwose kugiye kurangira vuba.” Naho iryo koraniro riyoborwa mu buryo bw’ibibazo n’inyishu, abumviriza barigiramwo uruhara bavyigombeye kandi insasanuro zitangwa n’ababa basomye bakongera bakazirikana imbere y’igihe kuri ico kiganiro be no ku vyanditswe bishigikira ivyiyumviro biri muri co. Iryo koraniro risozerwa n’ururirimbo be n’isengesho.​—Matayo 26:30; Abanyefeso 5:19.

Inyigisho ya Bibiliya y’ishengero

Ku mugoroba umwe buri ndwi, Ivyabona vya Yehova barasubira gukoranira hamwe mu Ngoro y’Ubwami kugira ngo bakurikirane porogarama igizwe n’ibihimba bitatu imara isaha imwe n’iminuta 45. Igice ca mbere kigizwe n’Inyigisho ya Bibiliya y’ishengero, kikaba kimara iminuta 25. Iryo koraniro rirafasha ababa baryitavye kurushiriza kumenyera gukoresha Bibiliya zabo, kubogora ivyiyumviro vyabo n’inyifato zabo rikongera rikabafasha gutera imbere bwa bigishwa ba Kristu. (2 Timoteyo 3:16, 17) Nka kurya kw’Inyigisho y’Umunara w’Inderetsi, iryo koraniro rigizwe n’ikiganiro c’ibibazo n’inyishu gishingiye kuri Bibiliya. Abatanga insasanuro bazitanga bavyigombeye. Igikoresho gifasha mu kwiga Bibiliya akenshi kiba ari igitabu canke agatabu kasohowe n’Ivyabona vya Yehova.

None ni kubera iki muri iryo koraniro hakoreshwa ibisohokayandikiro bishingiye kuri Bibiliya? Mu bihe vya Bibiliya, gusoma Ijambo ry’Imana vyonyene ntivyari bihagije. “Barabibasobanurira kugira ngo batahure ivyo basomewe.” (Nehemiya 8:8) Mu myaka ya vuba, ibisohokayandikiro bisigura igitabu ca Yesaya, ica Daniyeli be n’ic’Ivyahishuwe vyarafashije abitaba iryo koraniro gutahura ivyo bitabu vyo muri Bibiliya.

Ishure ry’ubusuku bwa gitewokarasi

Inyigisho ya Bibiliya y’ishengero ikurikirwa n’Ishure ry’ubusuku bwa gitewokarasi. Iryo koraniro rimara iminuta 30, rigenewe gufasha abakirisu gutsimbataza “ubuhanga bwo kwigisha.” (2 Timoteyo 4:2) Nk’akarorero, vyoba birashika umwana wawe canke umugenzi akakubaza ikibazo cerekeye Imana canke cerekeye Bibiliya hanyuma bikakugora kumuha inyishu nziza? Ishure ry’ubusuku bwa gitewokarasi rirashobora kukwigisha ukuntu wotanga inyishu ziremesha kandi zishingiye kuri Bibiliya ku bibazo bitoroshe. Ku bw’ivyo, turashobora kwumva tumerewe nk’umuhanuzi Yesaya, uwavuze ati: “Umwami Uhoraho ampaye ururimi rw’abigishwa, kugira ngo mmenye uko nosindagirisha ūrushe amajambo.”​—Yesaya 50:4.

Ishure ry’ubusuku bwa gitewokarasi ritangurwa n’insiguro ishingiye ku bigabane binaka vyo muri Bibiliya abitavye ikoraniro baba bararemeshejwe gusoma mu ndwi y’imbere y’iyo. Iyo nsiguro iheze, uwuyishikiriza aca asaba abumviriza gutanga insasanuro ngufingufi zerekeye ivyiyumviro basanze ari ngirakamaro vyo muri ivyo bigabane basomye. Ico kiganiro giheze, abanyeshure baba barahisemwo kwiyandikisha muri iryo shure barashikiriza ibiganiro bashinzwe.

Abanyeshure barashingwa gusoma igihimba kinaka co muri Bibiliya bari ku mukiruruko canke bagashingwa kwerekana ukuntu umuntu yokwigisha uwundi iciyumviro kinaka gishingiye ku Vyanditswe. Ikiganiro kimwekimwe cose kirangiye, umuhanuzi azi utuntu n’utundi arakeza umunyeshure ku vyo aba yakoze neza, ivyo avuga akaba abishingira ku gitabu Niwungukire ku Nyigisho yo mw’Ishure ry’Ubusuku bwa Gitewokarasi. Mu nyuma arashobora kugira inama uwo munyeshure bari ukwa bonyene ku bijanye n’ukuntu yoshobora kugira ivyo aryohoye.

Ico gihimba ca porogarama gisa n’ikinyaruka guhera, ntikigenewe gufasha abanyeshure gusa ariko kandi kigenewe gufasha ababa bacitavye bose bipfuza kuryohora ubuhanga bwabo bwo gusoma, bwo kuvuga be n’ubwo kwigisha. Ishure ry’ubusuku bwa gitewokarasi rirangiye, ururirimbo rushingiye ku canditswe co muri Bibiliya ruca rutangurira Ikoraniro ry’umurimo.

Ikoraniro ry’umurimo

Igihimba gisozera iyo porogarama ni Ikoraniro ry’umurimo. Biciye ku nsiguro, imyerekano, ibiganiro vyo kubaza ibibazo be n’ivyo guhana ijambo n’abumviriza, ababa bitavye iryo koraniro bariga ukuntu bokwigisha ukuri kwo muri Bibiliya mu buryo ngirakamaro. Imbere yuko Yezu arungika abigishwa biwe kwamamaza, yarabakoranirije hamwe maze arabaha ubuyobozi bw’ido n’ido. (Luka 10:1-16) Kubera ko bari bateguwe neza ku bw’igikorwa co kwamamaza Injili, bariboneye ibintu bishimishije vyinshi. Mu nyuma, abayoboke ba Yezu baragarutse kumubwira ivyo babonye. (Luka 10:17) Akenshi abo bigishwa baraganira ku vyo baba babonye.​—Ibikorwa 4:23; 15:4.

Urutonde rw’Ikoraniro ry’umurimo rimara iminuta 35 ruraboneka mu kinyamakuru c’impapuro nkeyi gisohoka buri kwezi citwa Igikorwa dukorera Ubwami. Mu biganiro biherutse kurimburwa harimwo ibigira biti: “Dusenge Yehova uko tugize umuryango,” “Igituma tuza turasubirayo,” be n’ikivuga ngo “Niwigane Kristu mu busuku urangura.” Iryo koraniro risozerwa n’ururirimbo, kandi umwe mu bagize ishengero aragenwa kugira ngo ature isengesho ryo gusozera.

Ivyavuzwe n’abashitsi ku bijanye n’ayo makoraniro

Amashengero arihatira gutuma umuntu wese yumva ko yisanze. Nk’akarorero, uwitwa Andrew yari yarumvise amakuru menshi mabi ku bijanye n’Ivyabona vya Yehova. Mugabo igihe yitaba ikoraniro ari bwo bwa mbere, yaratangajwe n’ukuntu yakiriwe neza. Andrew avuga ati: “Hari ahantu haryoshe cane. Naratangajwe cane n’ukuntu abantu bafatana kigenzi be n’ukuntu banyitwararitse.” Uwitwa Ashel, uno akaba ari umuyabaga aba muri Kanada, aremeranya n’ayo majambo. Avuga ati: “Ikoraniro ryari rihimbaye cane! Vyari vyoroshe gukurikira.”

Uwitwa José, uno akaba aba muri Berezile, yari azwi mu kibano yabamwo ko yari umuntu w’inkazi. Naho ari ukwo, yaratumiwe ku Ngoro y’Ubwami yo mu karere iwabo ngo yitabe ikoraniro. Avuga ati: “Abari ku Ngoro y’Ubwami barampaye ikaze n’igishika cinshi, naho bari bazi ingeso nahoze mfise.” Uwitwa Atsushi, aba mu Buyapani, yibuka ibi: “Sinoharira ko numvise umengo ndabuze amahoro igihe nitaba ikoraniro ry’Ivyabona vya Yehova ari bwo bwa mbere. Naho kwari ukwo, nahavuye ntahura ko ari abantu basanzwe. Baragerageje vy’ukuri gutuma numva nisanze.”

Urahawe ikaze

Nk’uko ayo majambo yavuzwe aho haruguru avyerekana, kwitaba amakoraniro ku Ngoro y’Ubwami birashobora gutuma uronka impera nyinshi. Uzokwiga ibijanye n’Imana, kandi biciye ku nyigisho ishingiye kuri Bibiliya uzoharonkera, Yehova Imana azokwigisha “ibikugirira ikimazi.”​—Yesaya 48:17.

Kwitaba amakoraniro y’Ivyabona vya Yehova ni ku buntu, kandi nta mahera atozwa. Woba woshima kwitaba ikoraniro ku Ngoro y’Ubwami y’aho uba? Uratumiwe n’igishika cinshi kuryitaba.