7 Уруок

Таҥараҕа чугаһыырга үҥээһин хайдах көмөлөһүөн сөбүй

Үҥэр идэлээх буолар тоҕо олус нааданый? (1)

Кимиэхэ уонна хайдах үҥүөхтээхпитий? (2, 3)

Туох туһунан үҥүөххэ сөбүй? (4)

Хаһан үҥүөххэ сөбүй? (5, 6)

Таҥара үҥээһиннэри барытын истэр дуо? (7)

1. Үҥээһин — бу Таҥараны кытта сытыары майгылаахтык кэпсэтии. Таҥараҕа үҥэр идэлээх буолар, булгуччу наада. Оннук эн киниэхэ, күндү доҕоргор курдук чугас буолуоҥ. Иегова төһө даҕаны муҥура суох улуу уонна модун күүстээҕин үрдүнэн, кини биһиги үҥэрбитин истэр! Эн Таҥараҕа тиһигин быспакка үҥэҕин дуо? (Псалом 65:2; 1 Фессалоникиецтарга 5:17).

2. Үҥээһин — сүгүрүйүүгэ киирсэр. Ол иһин Таҥараҕа — Иеговаҕа эрэ үҥүөхтээхпит. Иисус сиргэ баар эрдэҕинэ, бэйэтин Аҕатыттан ордук кимиэхэ да үҥпэт этэ. Биһиги эмиэ оннук гыныахтаахпыт (Матфей 4:10; 6:9). Ол гынан баран үҥээһиммитин барытын Иисус аатыттан этиэхтээхпит. Оннук биһиги Иисус балаһыанньатын убаастыырбытын уонна кини толуйар сиэртибэтин итэҕэйэрбитин көрдөрөбүт (Иоанн 14:6; 1 Иоанн 2:1, 2).

3. Таҥараҕа үҥэрбитигэр биһиги тылларбыт ис сүрэхпититтэн тахсыахтаахтар. Эрдэттэн үөрэтэн баран үҥэрбит эбэтэр кинигэттэн ааҕарбыт табыллыбат (Матфей 6:7, 8). Убаастабыллаахтык туттан, хаһан баҕарар уонна ханнык баҕарар миэстэҕэ үҥүөххэ сөп. Таҥара оннооҕор испитигэр үҥэрбитин истэр (1 Самуила 1:12, 13). Бэйэбит соҕотох үҥэрбитигэр мэһэйэ суох сири булар ордук (Марк 1:35).

4. Туох туһунан үҥүөххэ сөбүй? Кинини кытта доҕордоһууга туох сыһыаннааҕын барытын таарыйыахха сөп (Филиппиецтарга 4:6, 7). Холобур буолар үҥээһинтэн көстөрүнэн, Иегова аатын уонна кини көҥүлүн туһунан үҥүөхтээхпит. Ону таһынан материальнай өйөбүлү, аньыыларбытын бырастыы гынарын уонна аньыы угаайытыгар киирбэт туһугар көмө көрдөһүөххэ сөп (Матфей 6:9—13). Бэйэбитигэр эрэ туһа таһаарынаары үҥүө суохтаахпыт. Таҥара көҥүлүгэр сөп түбэһэр эрэ туһунан үҥүөхтээхпит (1 Иоанн 5:14).

5. Эн Таҥараҕа ис сүрэххиттэн махтаныаххын уонна кинини айхаллыаххын баҕардаххына, хаһан баҕарар үҥүөххүн сөп (1 Летопись 29:10—13). Олоххор кыһалҕалары көрүстэххинэ уонна итэҕэлгэр куттал үөскээтэҕинэ үҥүөххүн наада (Псалом 55:22; 120:1). Аһаары олорон үҥэрбит сөптөөх буолар (Матфей 14:19). Иегова биһигини «хаһан баҕарар» үҥэрбитигэр ыҥырар (Ефесяннарга 6:18).

6. Улахан аньыыны оҥордоххуна, үҥэриҥ хайаан да наада. Маннык түгэҥҥэ, Иегова аһыныгастык сыһыаннаһарын уонна бырастыы гынарын ааттаһан көрдөһүөхтээххин. Өскөтүн эн кини иннигэр аньыыларгын билинэр буоллаххына уонна туох баар күүскүнэн ону хатылаабат гына кыһалыннаххына, Таҥара «бырастыы гынарга бэлэм» (Псалом 86:5; Притчи 28:13).

7. Иегова кырдьыктык эрэ быһыыланар дьон үҥэллэрин истэр. Таҥара эн үҥэргин истэр буоларыгар, кини сокуоннарын тутуһан олорорго бары күүскүнэн кыһаллыахтааххын (Притчи 15:29; 28:9). Үҥэргэр эн сытыары майгылаах буолуохтааххын (Лука 18:9—14). Уонна Таҥараттан тугу көрдөһөрүҥ туһугар бэйэҥ кыһаллыахтааххын. Оннук эн итэҕэллээх буоларгын бигэргэтиэҥ уонна чахчы эн хайдах толкуйдууруҥ курдук саҥараргын көрдөрүөҥ. Оннук эрэ буоллаҕына Иегова эн үҥэргэр эппиэттиэҕэ (Еврейдэргэ 11:6).