Ezekiyeli
32 Pa ntsiku yakutoma ya mwezi 12 wa caka 12, Yahova alonga pontho na ine, mbandipanga: 2 “Iwe mwana wa munthu, imba nyimbo yaciliro thangwi ya Farau mambo wa ku Ejitu, mbumpanga kuti:
‘Iwe ukhali nkhalamu yamphambvu na yakuwanga pakati pa madzindza a anthu,
Mbwenye iwe wamatamiswa.
Iwe ukhali ninga cikala cikulu ca mʼbara,+ mbubvundula-bvundula mwamphambvu mikulo yako,
Ukhabvundula madzi na miyendo yako, mbupswipisa mikulo.’
3 Ipi ndi pidalonga Yahova, Mbuya Wankulu Kakamwe:
‘Ine ndinaphatisira nsoka wa mbumba zizinji toera kukuteyera kokota yanga,
Pontho iwo anadzakumanga na kokota yanga.
4 Ine ndinadzakusiya wekhene pantunda;
Ndinadzakuponya pa mbuto yapakweca.
Ndinadzacitisa kuti mbalame zonsene ziphame pana iwe,
Pontho pinyama pyonsene pya ntsanga pa dziko yapantsi ndinadzapikhutisa na manungo ako.+
5 Ndinadzaponya manungo ako mʼmapiri,
Pontho manungo ako akufa ndinaadzadza mʼmagowa.+
6 Dziko yapantsi ndinadzaitotesa na ciropa cinafuna kucuca mʼmanungo mwako mpaka mʼmapiri,
Pontho ico cinadzadza mikulo.’
7 ‘Iwe ungadzafudzwa, ine ndinaphimbira kudzulu, pontho ndinacitisa nyenyezi kukhala cidima.
Dzuwa ndinadzaiphimbira na makole,
Pontho mwezi nee unadzapangiza ceza cace.+
8 Thangwi ya iwe, ine ndinadzacitisa kuti pyonsene pinamwanikira kudzulu pikhale cidima.
Pontho dziko yako ine ndinadzaiphimbira na cidima,’ alonga Yahova, Mbuya Wankulu Kakamwe.
9 ‘Ine ndinadzatsukwalisa mitima ya mbumba zizinji ndingadzakwata mbumba yako mbandiiendesa ku ubitcu kuna anthu a madzindza anango,
Ku madziko akuti iwe nkhabe kuadziwa.+
10 Ine ndinadzacitisa kuti mbumba zizinji zidzumatirwe,
Pontho amambo awo anadzatetemera mwakugopa thangwi ya iwe ndingadzaphatisira supada yanga pamaso pawo.
Iwo anadzapitiriza kutetemera, mʼbodzi na mʼbodzi mbagopa kuphiwa,
Pa ntsiku yakufudzwa kwako.’
11 Thangwi ipi ndi pidalonga Yahova, Mbuya Wankulu Kakamwe:
‘Supada ya mambo wa ku Bhabhilonya inabwera kuna iwe.+
12 Ine ndinadzacitisa kuti misoka ya mbumba yako iphiwe na masupada a anyankhondo amphambvu,
Onsene ndi akuipa mitima kakamwe kupiringana mbumba zonsene.+
Iwo anadzamalisa kudzikuza kwa Ejitu, pontho misoka yonsene ya mbumba yace inadzaphiwa.+
13 Ine ndinadzapha pinyama pyace pyonsene pinadya nʼkhundu mwa madzi ace mazinji,+
Pontho miyendo ya anthu na nyondo za pinyama nkhabe kudzabvundulabve madzi anewa.’+
14 ‘Pa ndzidzi unoyu, ine ndinadzacenesa madzi ace,
Pontho ndinadzacitisa kuti mikulo yace iwewe ninga mafuta a azeti,’ alonga Yahova, Mbuya Wankulu Kakamwe.
15 ‘Ine ndinadzacitisa dziko ya Ejitu kukhala thando yakusowa anthu, dziko idatapatwa pinthu pyonsene piri mwenemu,+
Ndingapha anthu onsene anakhala mwenemu,
Iwo anadzadziwa kuti ine ndine Yahova.+
16 Iyi ndi nyimbo yaciliro,
mwandimomwene anthu anadzaimba nyimbo ineyi;
Akazi a madzindza anango anadzaimba nyimbo ineyi.
Iwo anadzaiimba thangwi ya Ejitu, pontho thangwi ya misoka yonsene ya mbumba yace,’ alonga Yahova, Mbuya Wankulu Kakamwe.”
17 Pa ntsiku 15 ya mwezi ubodzi ene wa caka 12, ine ndatambira mafala awa a Yahova: 18 “Iwe mwana wa munthu, lira thangwi ya misoka ya anthu a ku Ejitu, pontho longa kuti iwo pabodzi na anthu a madzindza amphambvu anadzafudzwa pabodzi pene na ale anatcitira munthumbi.*
19 “‘Iwe usanyerezera kuti ndiwe wakubalika kakamwe kupiringana anango? Iwe unadzafa, mbugona pabodzi na anthu akukhonda sidzwa!’
20 “‘Iwo anadzagwa pakati pa ale anafuna kuphiwa na supada.+ Iye aphiwa na supada; nkwateni pabodzi na misoka yonsene ya mbumba yace.
21 “‘Pantsi kakamwe pa Nthumbi,* anyankhondo amphambvu anadzalonga na iye pabodzi na ale anamʼphedzera. Iwo anadzaphiwa na supada mbagona munthumbi ninga anthu akukhonda sidzwa. 22 Asirya ali kweneko pabodzi na misoka yace yonsene. Nthumbi zawo ziri nʼkhundu mwace, onsene amala kuphiwa na supada.+ 23 Nthumbi zace ziri nʼdjenje yakuzika, misoka yace iri nʼkhundu mwa nthumbi yace, onsene amala kuphiwa na supada, thangwi iwo akhagopesa anthu mu ndzidzi ukhali iwo na umaso.
24 “‘Elami+ pabodzi na misoka ya mbumba yace ali kweneko nʼkhundu mwa nthumbi yace, onsene amala kuphiwa na supada. Iwo atcitira munthumbi munjira yakupasa manyadzo,* iwo akhagopesa anthu mu ndzidzi ukhali iwo na umaso. Cincino iwo anapasika manyadzo pabodzi na ale anatcitira munthumbi. 25 Iye asasanyirwa talimba pakati pa anthu akufa, pabodzi na misoka yonsene ya mbumba yace nʼkhundu mwa nthumbi zace. Onsene ndi akukhonda sidzwa, iwo amala kuphiwa na supada, thangwi iwo akhagopesa anthu mu ndzidzi ukhali iwo na umaso. Iwo anapasika manyadzo pabodzi na ale anatcitira munthumbi. Iye aikhwa pakati pa anthu akufa.
26 “‘Mezeki na Tubhali+ ali kweneko pabodzi na misoka yonsene ya mbumba zawo. Nthumbi zawo ziri nʼkhundu mwace, onsene ndi anthu akukhonda sidzwa, iwo amala kuphiwa na supada, thangwi akhagopesa anthu mu ndzidzi ukhali iwo na umaso. 27 Kodi iwo nee anadzagona na anyankhondo amphambvu akukhonda sidzwa adamala kufa, akuti atcitira Munthumbi* na pida pyawo pya nkhondo? Masupada awo anadzaikhwa pantsi pa misolo yawo, madawo awo anadzaikhwa padzulu pa magogodo awo, thangwi anyankhondo anewa amphambvu akhagopesa anthu mu ndzidzi ukhali iwo na umaso. 28 Mbwenye iwe unadzanyedzwa pakati pa anthu akukhonda sidzwa, pontho unadzagona pabodzi na ale adaphiwa na supada.
29 “‘Edhomi+ ali kweneko na amambo ace pabodzi na akulu-akulu ace onsene. Maseze iwo ndi amphambvu, agoneswa pakati pa anthu adaphiwa na supada; iwo anadzagonambo na anthu akukhonda sidzwa,+ pabodzi na ale anatcitira munthumbi.
30 “‘Atsogoleri onsene a kunkwiriro ali kweneko na Asidhoni+ onsene adatcitira munthumbi mwakupasa manyadzo pabodzi na ale adaphiwa, maseze iwo akhagopesa anthu na mphambvu zawo. Iwo anadzagona munthumbi ninga anthu akukhonda sidzwa, pabodzi na ale adaphiwa na supada, iwo anadzapasika manyadzo pabodzi na ale anatcitira munthumbi.
31 “‘Farau anadzaaona onsene, pontho anadzabalangazika na pinthu pinafuna kucitikira misoka ya mbumba yace.+ Farau na anyankhondo ace onsene anadzaphiwa na supada,’ alonga Yahova, Mbuya Wankulu Kakamwe.
32 “‘Nakuti Farau akhagopesa anthu mu ndzidzi ukhali iye na umaso, iye na misoka ya mbumba yace anadzaikhwa munthumbi pabodzi na anthu akukhonda sidzwa, pabodzi pene na anthu adaphiwa na supada,’ alonga Yahova, Mbuya Wankulu Kakamwe.”