Citani Pisankhulo Pyanu Mwandzeru

1, 2. Kodi musakomerwa kucita pisankhulo, pontho musapibva tani na pisankhulo pinango pinacita imwe?

PISANKHULO! Pisankhulo! Ntsiku zonsene tisathimbana na pisankhulo pizinji. Kodi musapibva tani na pisankhulo pinacita imwe? Anthu anango asafuna kakamwe kusankhula okhene pinthu pyonsene. Iwo asakakamira ufulu wawo wakucita pisankhulo okhene, pontho asaipirwa khala munthu aacitira cisankhulo. Natenepa, pana ale anagopa kucita pisankhulo pyakukhonda kwanisika mu umaso wawo. Anango asasaka mabukhu apitsogolero peno aphungu, panango asabvunga kobiri izinji toera kugumana uphungu unafuna iwo.

² Azinji a ife ali pakati na kati. Tisadziwa kuti pinthu pinango nkhabe kupikwanisa, pontho nee cinthu cibodzi cakuti tinakwanisa kucicita thangwi ya pyenepi; mbwenye tisatsandzaya kuti m’makhundu mazinji a umaso tinakwanisa kucita pisankhulo pinafuna ife. (Agal. 6:5) Ngakhale tenepa, tisatawira kuti nee pisankhulo pyonsene pinacita ife ndi pyandzeru peno pyakuphindulisa.

3. Ndi pitsogolero pipi piri na ife pakucita pisankhulo, mbwenye ndi pinentso pipi piripo?

³ Ninga atumiki a Yahova, tinakwanisa kutsandzaya nakuti iye apereka pitsogolero pyadidi thangwi ya pinthu pizinji pyakufunika mu umaso wathu. Tisadziwa kuti tingatowezera pitsogolero pyenepi, tinakwanisa kucita pisankhulo pyakuti pinadzakomeresa Yahova, pontho tinaphindula. Natenepa, panango tinathimbana na pinthu peno makhaliro akuti nee asalongwa pakweca m’Mafala a Mulungu. Kodi tinacitanji? Mwacitsandzo, tisadziwa kuti nee tisafunika kuba. (Aef. 4:28) Mwandimomwene kuba kusabvekanji? Kusabveka ntengo wa cinthu cidabiwa, cifuno, peno pinthu pinango? Kodi tisasankhula tani pinthu pyakuti anango asapipenula? Ninji cinafuna kutitsogolera?

KUNYEREZERA MWADIDI

4. Kodi tisafuna kutambira uphungu upi pakucita pisankhulo?

⁴ Tingalonga kuti tisafuna kucita cisankhulo cakufunika, panango Nkristu ndzathu anakwanisa kulonga kuti tisafunika kunyerezera mwadidi. Mwandimomwene, unoyu ndi uphungu wadidi. Bhibhlya isaticenjeza kukhonda kucita pinthu mbitidzati kunyerezera. “Munthu anacita pinthu mbakhonda kunyerezera asatcerenga.” (Mis. 21:5, Tradução do Novo Mundo) Kodi pisabvekanji kuphatisira manyerezero adidi? Kodi basi ene pisabveka kuti kufunika kukhala na ndzidzi, toera kunyerezera pisankhulo, kukhala wakulinganira, na kuphatisira mwadidi ndzeru? Ntsonga izi zonsene zisaphedza toera kucita cisankhulo cadidi, mbwenye pana pinthu pizinji toera kuphatisira manyerezero adidi.​—Arom. 12:3; 1 Ped. 4:7.

5. Thangwi yanji mphyacibaliro kusowa manyerezero aungwiro?

⁵ Tisafunika kutawira kuti nee m’bodzi wa ife abalwa na manyerezero aungwiro. Thangwi yanji? Thangwi tonsene tabalwa m’madawo na mwakusowa ungwiro, natenepa nee tiri na manungo na manyerezero aungwiro. (Sal. 51:5; Arom. 3:23) Kusiyapo pyenepi, azinji a ife akhali pakati pa ale akuti manyerezero awo akhadaphimbirwa na Sathani, nee tikhadziwa Yahova na midida yace yakulungama. (2 Akor. 4:4; Tito 3:3) Nakuti tikhacita pisankhulo pyathu mwakubverana na pire pikhaona ife kuti mphyadidi na pyakulinganira, panango tikhataika tekhene, mwakukhonda tsalakana kunyerezera mwacidikhodikho kukhacita ife mbatidzati kucita cisankhulo.​—Mis. 14:12.

6. Ninji cinafuna kutiphedza toera kukulisa manyerezero adidi?

⁶ Ngakhale kuti nee tiri na ungumi wadidi na manyerezero adidi, Yahova, Baba wathu wakudzulu, ndi waungwiro mu njira zonsene. (Deut. 32:4) Mwakutsandzaya, iye atiphedza toera tikhale na ndzeru zipswa, pontho na kukulisa ndzeru zadidi. (Lerini 2 Timoti 1:7.) Ninga Akristu, tisafunika kunyerezera mwadidi na kucita pinthu mwakubverana. Tisafunikambo kuyang’anira manyerezero na mabvero athu mbatisangizira manyerezero, mabvero na macitiro a Yahova.

7, 8. Fokotozani cakugumana naco cakuti capangiza pisankhulo pyandzeru ngakhale kuti pagumanika mikakamizo.

⁷ Tendeni tidinge citsandzo cibodzi. Anthu anango akuti asaphata basa mu dziko yacilendo asakhala na nsambo wa kutumiza ana awo ku dziko ya kwawo toera kutsalakanwa na anyakubala awo, iwo mbakapitiriza kuphata basa.a Nkazi m’bodzi anakhala ku dziko yacilendo, abala mwana wamamuna. Kubulukira mu ndzidzi unoyu, iye atoma kupfundzira Bhibhlya mbakula mwauzimu. Axamwali na acibale atoma kukakamiza iye na mamunace toera atumize mwana wawo kuna ayavu awo. Natenepa, mukhapfundza iye adzindikira kuti ninga nyakubala, ukhali mwai wakupaswa na Mulungu toera kukuza mwanace. (Sal. 127:3; Aef. 6:4) Kodi iye akhafunika kuti atowerere nsambo wakuti azinji akhauona ninga wadidi? Peno akhafunika kutowerera pire pikhapfundza iye m’Bhibhlya mbaikha pangozwi mpfuma yawo na kupwazwa na anthu? Kodi mbamudacita tani mbamudakhala pa mbuto yace?

⁸ Thangwi ya kukakamizwa na kutsukwala, nkazi unoyu anyindira Yahova na kusaka pitsogolero pyace. Alonga na mpfundzisi wace wa Bhibhlya na anthu anango a m’mpingo pya nkhani ineyi, buluka penepo atoma kucita pinthu m’maonero a Yahova. Pontho, iye aona kunentseka kwa manyerezero a ana adasiiwa na anyakubala awo mbaciri ang’ono. Pakumala kudinga cinentso ceneci mu kuphatisira Malemba, iye atonga kuti nee pikhali pyadidi kutumiza mwanace. Mamunace akwanisambo kuona ciphedzo cidacita piwalo pya mpingo, pontho kutsandzaya na ungumi ukhali na mwanace, buluka penepo atawira kupfundza Bhibhlya na kugumanika pa misonkhano pabodzi na nkazace.

9, 10. Kodi pisabvekanji kuphatisira manyerezero adidi, na tinapicita tani?

⁹ Ineyi ndi thangwi ibodzi, mbwenye isapangiza kuti kuphatisira ndzeru zadidi nee pisabveka basi ene kutowerera manyerezero a anthu anango peno pinaona iwo kuti mphyakulinganira. Manyerezero akusowa ungwiro na ntima wathu pisakhala ninga rorojo yakuti ina ndzidzi wakuthamanga kakamwe peno wakudembuka kakamwe. Natenepa kutsogolerwa na rorojo ineyi mbakudatibweresera nyatwa ikulu. (Yer. 17:9) Tisafunika kusasanyira manyerezero na ntima wathu mu kuphatisira midida yakunyindirika ya Mulungu.​—Lerini Izaiya 55:8, 9.

¹⁰ Na mathangwi adidi, Bhibhlya isaticenjeza kuti: “Khulupira Mulungu na ntima wako wonsene mbuleka kukhulupira ndzeru zako. Munyerezere kuenda na kuenda, Iye anadzazereza njira zako.” (Mis. 3:5, 6) Onani fala yakuti ‘leka kukhulupira ndzeru zako.’ Isatowerera na fala yakuti ‘unyerezere [Yahova].’ Pyenepi pisabveka kuti iye ndi M’bodzi wakuti ana manyerezero adidi akunyindirika. Natenepa, tingafuna kucita pisankhulo tisafunika kudinga mafala a m’Bhibhlya toera kuona ndi api maonero a Mulungu. Buluka penepo tinacita pisankhulo mwakubverana na maonero ace. Mu njira ineyi tisasangizira Yahova mu kuphatisira manyerezero adidi.

PFUNDZISANI LUSO YANU YAKUDZINDIKIRA

11. Ninji cinafunika toera kupfundza kuti tinacita tani pisankhulo pyandzeru?

¹¹ Kupfundza toera kucita pisankhulo pyandzeru na kupikwanirisa ndi kwakunentsa. Makamaka pyenepi pinakhala pyakunentsa kwa anthu apswa mu undimomwene peno kwa ale akuti akutoma kuthambaruka mwauzimu. Natenepa, Bhibhlya isalonga kuti mphyakukwanisika kuthambaruka mwauzimu kwa ale akuti ndi apswa mu undimomwene. Onani kuti mwana wang’ono asapfundza tani kufamba mbakhonda kugwa. Toera kufamba iye asafunika kuyesera pang’ono-pang’ono mbakacita pyenepi mwakubwereza-bwereza. Pyenepi ndi sawasawa kuna ale akuti ndi apswa mu undimomwene mu ndzidzi unacita iwo pisankhulo pyandzeru. Kumbukani kuti mpostolo Paulu alonga kuti anthu akukola mwauzimu ndi ale “anadzolowera kuyesera [ndzeru] zawo towera adzindikire pya udidi na pyakuipa.” Mafala akuti ‘kudzolowera’ na “kuyesera,” asaphemba kuwangisira ndzidzi onsene, pontho ndi pyenepi pisafunika kucitwa na anthu apswa.​—Lerini Ahebere 5:13, 14.

12. Kodi tinakulisa tani luso yathu toera kucita pisankhulo pyandzeru?

¹² Ninga pyalongwa kale, ntsiku zonsene tisafunika kucita pisankhulo pizinji, pikulu na ping’ono. Mwakubverana na pfundziro ibodzi, mapurusentu akupiringana 40 a macitiro athu nee asabulukira mu kunyerezera mwanyapantsi, mbwenye m’misambo na pikhulupiro pyakunentsa kucinja. Mwacitsandzo, panango macibese onsene musasankhula nguwo zinafuna imwe kubvala. Panango musakwanisa kuona pyenepi ninga pinthu ping’ono, pontho munacita cisankhulo mbamukhonda kucita mpholemphole, makamaka khala muli wakucimbiza. Mbwenye pakucita pinthu, mphyakufunika kunyerezera kuti ndife atumiki a Yahova. (2 Akor. 6:3, 4) Pakugula nguwo, panango munakwanisa kunyerezera ntundu wa mabvaliro acincino, mbwenye ndiye tani maonekero ayo na ntengo? Kucita pisankhulo pyadidi mu pinthu pyenepi kunadzaphedza toera kupfundzisa ndzeru zathu zakudzindikira, zakuti zinatiphedza kucita pisankhulo pyadidi mu pinthu pyakufunika.​—Luka 16:10; 1 Akor. 10:31.

KULISANI CIFUNO TOERA KUCITA PINTHU PYADIDI

13. Ninji cinafunika toera kunyindira kuti tisatowerera pisankhulo pinacita ife?

¹³ Tonsene tisadziwa kuti kucita cisankhulo cadidi ndi cinthu cibodzi, mbwenye kucitowerera ndi cinthu cinango. Mwacitsandzo, anthu anango akuti anafuna kusiya kufumali asanentseka thangwi yakusowa cikulumizo cakukwana. Cinafunika ndi kudzitonga toera kutowerera njira idasankhulwa. Anango asakhulupira kuti mphambvu yathu yakudzitonga ndi sawasawa na manungo. Kazinji kene tingathathamula manungo, asakhala akuwanga kakamwe. Mbwenye tingakhonda kuathathamula asakhala akufewa. Mphapo, ninji cinafuna kutiphedza toera kukulisa peno kuwangisa cifuno cathu toera kuphatisira na kutowerera njira idasankhula ife? Kunyindira Yahova kunadzatiphedza.​—Lerini Afilipi 2:13.

14. Thangwi yanji Paulu akhali na mphambvu toera kucita pikhadziwa iye kuti mbadapicita?

¹⁴ Paulu adziwa pyenepi kubulukira mu cakugumana naco cace. Iye adungunya: ‘Ndingafuna kucita pyadidi mphambvu zakupichita sinazigumanabve tayu.’ Iye akhadziwa pikhafuna iye kucita, mbwenye midzidzi inango pinthu pikhancimwanisa kucita pyenepi. Iye apitiriza kulonga: ‘Ndinakomerwa na mwambo wa Mulungu, mbwenye ndisaonambo m’maphindi peno piwalo pya manungo anga mwambo unango unapokanya mwambo ule wa m’manyerezero anga, mbundicitisa kudza ndzakazi wakutawira mwambo wa madawo uli m’maphindi a manungo anga.’ Kodi akhasowa cidikhiro? Nkhabe. Iye athimiza kulonga kuti: “Ndi nkhombo za Mulungu mwa Yezu Kristu Mbuyathu.” (Arom. 7:18, 22-25) Konsene kukhagumanika iye akwanisa lemba: “Ine ndinakwanisa pyonsene mwa uyu anandipasa mphambvu.”​—Afil. 4:13.

15. Kodi kucita pinthu mwacinyindiro peno mwakusowa cinyindiro kusakhuya tani ale anacita?

¹⁵ Mwandimomwene, toera kutsandzayisa Mulungu pasafunika kucita pinthu mwakunyindirika. Kumbukani mafala a Eliya kwa alambiri a Baale na Aisraele akupanduka pa Phiri ya Karmelo: “Munadzaleka lini kutchikhamira makhundu mawiri ene? Ngakhale kuti [Yahova] ndiye Mulungu kakamwe, muntowere; ngakhale kuti ndi Baale, khalani na Baale.” (1 Am. 18:21) Ana Aisraele akhadziwa ninji pikhafuna cita iwo, mbwenye ‘akhatcikhama’ na kupenula. Mwakusiyana, pyaka pya nduli Yoswa apangiza citsandzo cadidi kuna Aisraele mudaapanga iye kuti: “Kungakhala kuti kusakunentsani kumphatira, mphapo sankhulani lero ene ule anafuna imwe kumphatira . . . mbwenye ine na nyumba yanga tinaphatira [Yahova].” (Yos. 24:15) Kodi ndi maphindu api adagumanika pa cisankhulo cace? Yoswa na onsene adantowerera atambira nkhombo za kupita mu Dziko Yakupikirwa, ‘dziko ya nkaka na uci.’​—Yos. 5:6.

CITANI PISANKHULO PYANDZERU NA TAMBIRANI NKHOMBO

16, 17. Perekani citsandzo ca maphindu akucita pisankhulo mwakubverana na cifuno ca Mulungu.

¹⁶ Dingani makhaliro a ntsiku zino. M’bale mupswa wakubatizwa amanga banja, iye na nkazace ali na ana atatu ang’ono. Ntsiku ibodzi, ndzace wa pa basa alonga kuti iye pabodzi na m’bale unoyu aende kaphata basa pa kompanyia inango yakuti inalipa kobiri izinji. M’bale wathu anyerezera, mbacita phembero thangwi ya nkhani ineyi. Iye asankhula kupitiriza na basa yace, yakuti akhalipwa kobiri yakucepa, toera kumala kwa sumana agumanike pa misonkhano na kuenda mu utumiki pabodzi na banjace. Iye anyerezera kuti nee mbadakwanisa kukhala na ndandanda ninga ineyi khala mbadatawira basa ineyi ipswa. Kodi imwe mbamudacita tani?

¹⁷ Mu kulandanisa maphindu auzimu na kulipwa kobiri izinji, m’bale akhonda basa inango. Kodi musanyerezera kuti iye asandikika na cisankhulo ceneci? Nee pang’ono pene. Iye aona kuti nkhombo zauzimu zikhali zakuphindulisa kakamwe kwa iye na banjace kusiyapo kulipwa kobiri izinji. Iye na nkazace akhali akutsandzaya mu ndzidzi wakuti mwana wawo wakutoma wankazi wa pyaka khumi, alonga kuti iye asafuna kakamwe anyakubala ace, abale na alongo, pontho asafunambo kakamwe Yahova. Iye alonga pontho kuti asafuna kubatizwa toera kutumikira Yahova mu umaso wace. Mphyakutsandzayisa tani kwa iye kuona citsandzo cadidi ca babace cakuikha ulambiri wa Yahova pa mbuto yakutoma mu umaso wace!

18. Thangwi yanji mphyakufunika kucita pisankhulo pyandzeru ntsiku zonsene?

¹⁸ Mose Wankulu, Yezu Kristu, asatsogolera alambiri andimomwene a Yahova mu thando ya dziko ya Sathani mu pyaka pizinji. Ninga Yoswa Wankulu, Yezu ali dzololo toera kumalisa makhaliro ano akuphekesa na kutsogolera anyakupfundzace mu dziko ipswa ya ulungami idapikirwa. (2 Ped. 3:13) Natenepa, uno nee ndi ndzidzi wakubwerera mu njira za manyerezero athu akale, misambo, makhaliro na pifuno pyathu. Uno ndi ndzidzi toera kudziwa na kubvesesa mwadidi kuti Mulungu asafunanji kwa ife. (Arom. 12:2; 2 Akor. 13:5) Pakucita pisankhulo pyanu ntsiku zonsene pangizani kuti ndimwe munthu wakuthema kutambira nkhombo za Mulungu za kwenda na kwenda.​—Lerini Ahebere 10:38, 39.