Y’ABRABƆ KYƐ KRISTOFOƐ
Yehowa Pepɛ Dé Bɛbɔ B’abanu Abu Ne
Ɔtɔ mmerɛ bie a yɛwora bɔ paa. Sɛ ebie wora bɔ a, ongyire kyɛ ollé Yehowa nu gyidie. Nzuati yeɛ yɛkã sɔ ɔ? Ofikyɛ Bible ne maa yenwu kyɛ Yehowa po, ɔtɔ mmerɛ bie a ye wora bɔ. (Gye 6:5, 6) Nakoso sɛ wɔ wora bɔ, na ennwu bɔ ɛyɛ wɔnwo a, nzu yeɛ ɛkɔhora kɔyɛ ɔ?
Srɛ Yehowa kyɛ ɔboka wɔ. Yehowa dwene yɛnwo paa, na ɔse bɔ yɛfa nu mukoraati. Yeti sɛ yɛnye gye a Yehowa se, na sɛ yɛwora bɔ koso a, ɔse. Afei koso, nikyee deinn bɔ wamaa yedi aworabɔlɛ ne, Yehowa se. (Edw 7:9b) Nakoso nna kyɛ Yehowa se bɔ yɛfa nu ne mbaen, na mmom ɔdwene yɛnwo paa. Yeti sɛ yɛwora bɔ, anaakyɛ adwenedwene hyɛ yɛ so a, ɔboka yɛ maa yegyina yenoa.—Edw 34:18.
Fa w’adwene sie nningyein bɔ ɔkɔhora kɔboka wɔ naso. Sɛ yɛ abanu bu a, ɔmaa anigye bɔ yɛfa yɛsõ Yehowa ne kɔ ase, na ɔkora sɛkye adamvoa bɔ yɛne ye le ye ne. Ɛhẽne ati odikyɛ yɛbɔ yɛ adwene nwo waen. Ɛhe kyire kyɛ, yɛngɔfa yɛ adwene yengosie yɛ haw naso, na mmom odikyɛ yɛfa yɛ adwene yesie nningyein bɔ ɔkɔhora kɔboka yɛ naso.—Any 4:23.
NEA VIDIO BƆ YEƐ OLE, KYƐBƆ YELIEMAMƆ LE ASOMDWEE Ɔ, ƆMVA YENWO NE ANWONYERƐ, NA YE NZƐMMISA HEMƆ NOA:
Mmerɛ bɔ anwonyerɛ bɔle Nikki ne, nzu yeɛ ɔbokale ye maa ogyinane yenoa ɔ?
Ɔyɛle sɛɛ yeɛ Nikki nwuni kyɛ, odikyɛ ɔkɔ hɔspitel ɔ?—Mat 9:12
Nzu yeɛ Nikki yɛle fahyirele kyɛ wafa yenwo wato Yehowa so ɔ?