Ɔkɔyɛ Sɛɛ Ne Yɛ Sõen Ahora Asɔ Nyameɛpiri Nye?

Kyɛbɔ yalimoa yasusu yenwo ne, nná sõen mukoraati yeɛ ɔsɔ Nyameɛpiri nye ɔ. Nakoso, yɛkɔhora yɛkɔsõ yɛ Bɔfoɛ ne wɔ atẽe bie so maa yenye kɔgye. “Sõen” beni yeɛ ɔsɔ Nyameɛpiri nye ɔ? (Yakobo 1:​27) Susu bɔ Bible kyirekyire nanwo nea.

1. Nzu aso yeɛ odikyɛ yɛfa yɛ sõen yegyina ɔ?

Odikyɛ yɛfa yɛ sõen yegyina Bible naso. Yesu hãhyirɛle Nyameɛpiri kyɛ: “Wɔ dwirɛ te nahorɛ.” (Yohane 17:​17) Sõen biemɔ afa nahorɛ bɔ ɔwɔ Nyameɛpiri Dwirɛ, Bible nanu ne bato ahãmeɛ. Na bafa kurosona ngyerɛkyerɛ ne tete amammerɛ basi yegya nu. Nakoso Yehowa nye ngye bɛbɔ bɛfa “anyeteɛ atẽe so bɛkwati Nyameɛpiri ahyɛdeɛ” nanwo. (Kenga Marko 7:9.) Nakoso atẽe foforɛ so ne, yɛmaa Nyameɛpiri nye gye, mmerɛ bɔ yɛbata Bible nanwo na yetie enu afutue ne.

2. Sɛɛ yeɛ odikyɛ yɛsõ Yehowa ɔ?

Ɔfata paa kyɛ yɛfa sõen bɔ odimũ yɛma yɛ Bɔfoɛ, Yehowa. (Nyekyire 4:​11) Ɛhe kyire kyɛ, odikyɛ yɛdɔ ye na yɛsõ ye ngome, na ɔnzɛkyɛ yɛfa ahoni biala yedi dwumaa.​—Kenga Aizaya 42:8.

Odikyɛ yɛ sõen yɛ “krongron na ɔsɔ” Yehowa nye. (Romanfoɛ 12:1) Ɛhe kyire kyɛ odikyɛ yɛfa ye mmraa yɛyɛ adwuma. Kyɛ nneasoɛ ne, bɛbɔ bɛdɔ Yehowa ne, bɛfa ye ahyɛdeɛ bɔ ɔfa agyaa nwo ne bɛyɛ adwuma. Na bɛtwẽ bɛnwo befi ningyein tɛɛ bɔ okopira bɛ, tekyɛ wii ne nnubɔne nnonɛ́, anaa nzãbolɛ nwo.a

3. Nzuati yeɛ odikyɛ yɛne yeliemaamɔ Kristofoɛ bonu sõ Yehowa ɔ?

Nhyiamu bɔ yɛyɛ ye dapɛen biala ne maa yenya yenwo atẽe “yɛye Yehowa ayɛ . . . wɔ asafo nanu.” (Edwein 111:​1, 2) Atẽe kõ bɔ yɛfa so yɛyɛ ɛhe yeɛ olé kyɛ, yɛto dwein yɛye Nyameɛpiri ayɛ. (Kenga Edwein 104:​33.) Bɔ yeti yeɛ Yehowa kã kyire yɛ kyɛ yɛhɔ nhyiamu ahoroɛ ne yeɛ olé kyɛ, ɔdɔ yɛ na ɔse kyɛ sɔ bɔ yɛkɔyɛ ne kɔboka yɛ maa yekonya asetena nu anigye daa. Sɛ yeyia nu yɛhyehyɛ yɛnwo ngunaen a, yenya mvasoɛ yefi so paa.

SUA PẼE BOKASO

4. Ɔnzɛkyɛ yɛfa ahoni yedi dwumaa wɔ yɛ sõen nu

VIDIO: Aso Nyameɛpiri Dé Ahoni Bɔ Bɛfa Bedi Dwumaa Wɔ Sõen Nu Ne To Nu Anaa? (3:26))

• Mmerɛ bɔ Nyameɛpiri mmenia bɔ bɛtenane ase wɔ Bible mmerɛ nu ne yɛle kyɛ bɛkɔfa ahoni so bɛkɔsõ ye ne, nzu yeɛ osili ɔ?

Mmenia biemɔ te ngã kyɛ bɛkɔhora bɛkɔfa ahoni so bɛkɔhwẽ bekopingye Nyameɛpiri. Nakoso sɔ bɔ ebie kɔyɛ ne kɔhora kɔmaa Nyameɛpiri kɔhwẽ yenwo anaa? Kenga Ɛzadɔs 20:​4-6 ɔne Edwein 106:​35, 36, na afei susu nzɛmmisa hemɔ nwo:

• Ahoni beni yeɛ anwu kyɛ mmenia fa di dwumaa wɔ bɛ sõen nu ɔ?

• Sɛɛ yeɛ Yehowa te ngã wɔ ahoni bɔ bɛfa bedi dwumaa nanwo ɔ?

• Wɔ koso sɛɛ yeɛ ɛte ngã wɔ ahoni bɔ bɛfa bedi dwumaa nanwo ɔ?

5. Sɛ yɛsõ Yehowa ngome a, yekolé yɛnwo yekofi ngondombo ngyerɛkyerɛ biala nwo

VIDIO: Nahorɛ Ne Kɔmaa Ekolé Wɔnwo (5:16)

Kenga Edwein 91:​14, na susu nzɛmmisa he anwo:

• Sɛ yɛda yali kyɛ yɛdɔ Yehowa na yɛsõ ye ngome a, nzu yeɛ wahyɛ yɛ bɔ kyɛ ɔkɔyɛ kɔma yɛ ɔ?

6. Yɛsõ Nyameɛpiri wɔ asafo nhyiamu ahoroɛ bo

Yɛnate dwein bɔ yɛto ne mmuaeɛ bɔ yɛma wɔ asafo nhyiamu bo naso yɛye Yehowa ayɛ, na yɛhyehyɛ yɛnwo ngunaen. Kenga Edwein 22:​22, na afei susu nzɛmmisa hemɔ nwo:

• Wɔnye agye kyɛbɔ bɛma mmuaeɛ wɔ asafo nhyiamu bo nanwo anaa?

• Ekuro kyɛ ekosiesie wɔnwo kɔma mmuaeɛ anaa?

7. Yɛkã bɔ yesua nanwo dwirɛ yekyire afoforɛ a, ɔmaa Yehowa nye gye

Atẽe pẽe wɔ berɛ bɔ yɛkɔhora yɛkɔfa so yɛkɔhã Bible nu nahorɛ dwirɛ ne yekohyire afoforɛ ɔ. Kenga Edwein 9:1 ɔne 34:​1, na susu nzɛmmisa he anwo:

• Nzu yeɛ asua afi Bible nanu bɔ ekuro kyɛ ɛkɔhã yenwo dwirɛ kohyire ebie ɔ?

YEMUABƆLƐ

Yɛnate asafo nhyiamu bɔ yɛkɔ, bɔ yesua nanwo dwirɛ bɔ yɛkã yekyire afoforɛ, ɔne yɛ Bɔfoɛ bɔ yɛsõ ye ngome naso yɛsɔ yenye.

Ndimu

• Atẽe beni yeɛ Nyameɛpiri kyire yɛ kyɛ yɛfa so yɛsõ ye ɔ?

• Nzuati yeɛ odikyɛ yɛsõ Yehowa ngome ɔ?

• Nzuati yeɛ odikyɛ yɛne mmenia bɔ bɛpena kyɛ bɛsɔ Nyameɛpiri nye ne bonu sõ ɔ?

NEA ƐHE KOSO

Wɔ edwirɛ bɔ yenwa “Nnde Akoaa Mma Ahoni Kõ“ nu ne, nea kyɛbɔ maame bie nye gyele kyɛ ɔhora hwẽne yenwo fili ahoni nwo ɔ.

“Bible Ne Sesã Asetena” (The Watchtower, July 1, 2011)

Sua bɔ ɔkɔhora kɔboka wɔ maa ɛkɔma mmuaeɛ wɔ asafo nhyiamu bo nanwo nikye.

“Bible Ne Sesã Asetena” (The Watchtower, January 2019)

Nea kyɛbɔ abrandeɛ bie nyane mvasoɛ fili asafo nhyiamu so, ɔmva yenwo kyɛ ne ɔyɛse ma ye kyɛ ɔkɔhɔ bie ne.

Yehowa Neane Me (3:​07)

Ebiemɔ dédi kyɛ odikyɛ Kristofoɛ fa krɔs di dwumaa wɔ bɛ sõen nu, nakoso ɛnea a, odikyɛ yɛfa yɛboka yɛ sõen so anaa?

“Nzuati Yeɛ Yehowa Adanzefoɛ Mva Krɔs Nni Dwumaa Wɔ Bɛ Sõen Nu Ɔ?” (Edwirɛ bɔ ɔwɔ intanɛt so)