Mmerɛ Bɔ Yesu Wɔ Aseɛ He Aso Ne, Nzu Yeɛ Ɔyɛle Ɔ?

Mmeni pẽe adwene yɛ bɛ kyɛ Yesu tɛ te adɔma bɔ ɔngora nyɛ hwee, afoforɛ susu kyɛ ɔte diyifoɛ bɔ ɔse nworɛ, anaa biãa bie bɔ owuo ɔ. Nakoso ɛnea a, nzu yeɛ yɛkɔhora yekosua yɛkɔfa ye aseɛ so asetena nwo ɔ? Wɔ adesua he anu ne, yɛkɔnea nningyein ahoroɛ bɔ yenwo hia bɔ Yesu yɛle, ɔne kyɛbɔ ɔkɔhora kɔboka wɔ ɔ.

1. Adwuma titire beni yeɛ né Yesu yɛ ɔ?

Né Yesu adwuma titire yeɛ ole kyɛ “ɔkɔhã Nyameɛpiri ahennie nanwo dwirɛ pá ne.” (Kenga Luka 4:​43.) Ɔhãne edwirɛ pá bɔ yeɛ ole kyɛ, Nyameɛpiri kɔfa ahennie anaa awaen bɔ okoli adasamma haw mukoraati nwo dwumaa kɔwa.a Yesu fale afoɛ nza ne bue yɛle adwuma serɛ hãne ahennie nanwo dwirɛ pá hyirɛle mmenia.​—Mateo 9:35.

2. Atirimbɔ beni ati yeɛ Yesu yɛle nzɛngyerɛneɛ ahoroɛ ne ɔ

Bible ne kyire ‘anwanwadeɛ ne nzɛngyerɛneɛ pẽe bɔ Nyameɛpiri nate [Yesu] so yɛle ɔ.’ (Asomafoɛ Ne Nnwumaa 2:​22) Ɔnate Nyameɛpiri tumi so ne, Yesu hora lili ewienu nzakraeɛ so, ɔmane mmeni pẽe aleɛ, ɔsale anwonyerɛ, na otingyele awufoɛ. (Mateo 8:​23-​27; 14:​15-​21; Marko 6:​56; Luka 7:​11-​17) Nzɛngyerɛneɛ ahoroɛ bɔ Yesu yɛle ne kyire kyɛ Nyameɛpiri yeɛ ɔsomane ye ɔ. Na osa maa yenwu kyɛ, Yehowa le tumi bɔ ɔkɔfa koli yɛ haw ahoroɛ nwo dwumaa ɔ.

3. Nzu yeɛ yɛkɔhora yekosua yekofi Yesu asetena nu ɔ?

Yesu tiele Yehowa wɔ tebea biala nu. (Kenga Yohane 8:​29.) Ɔmva yenwo ne ɛpɔen bɔ Yesu yiale ne, olili nahorɛ mane ye baba oodwuli ewue nu. Ɔmaa ɔlale ali kyɛ mmenia kɔhora kɔsõ Nyameɛpiri, mmerɛ pó bɔ bɛfa ɔhaw nu ne. Yesu nate ɛhe aso “yakyili [yɛ] nneasoɛ kyɛ yɛli ye gyasi pɛɛ.”​—1 Petro 2:​21.

5. Yesu hyirehyirɛle edwirɛ bɔ yenwo hia ɔ

Nná Nyameɛpiri Ahennie nanwo dwirɛ ngome yeɛ Yesu hãne ɔ, na mmom osa hyirehyirɛle abrabɔ nu dwirɛ koso. Nea yenwo nneasoɛ biemɔ wɔ ye Bokaa so Asɛnga bɔ wale dumaa nanu. Kenga Mateo 6:​14, 34 ɔne 7:​12, na susu nzɛmmisa hemɔ nwo:

• Abrabɔ nu afutue beni yeɛ Yesu fa mane wɔ sɔ ngyekyɛmuɛ hemɔ anu ɔ?

• Esusu kyɛ sɔ afutue hemɔ nwo té hia anaa?

6. Yesu yɛle nzɛngyerɛneɛ ahoroɛ

Yehowa mane Yesu tumi maa ɔyɛle nzɛngyerɛneɛ pẽe. Sɛ ɛpena yenwo nneasoɛ kõ a, kenga Marko 5:​25-​34 anaa bɔ VIDIO ne. Na susu nzɛmmisa bɔ olili so hemɔ nwo.

VIDIO: Maame Bie Nyane Ayaresa (5:10)

• Wɔ vidio nanu ne, nzu yeɛ né maame bɔ wafokyɛ ne dédi ɔ?

• Nzu yeɛ wɔnye gye yenwo wɔ nzɛngyerɛneɛ he anwo ɔ?

Kenga Yohane 5:​36, na susu nzɛmmisa he anwo:

• Nzu yeɛ Yesu nzɛngyerɛneɛ ne “di yenwo adanzeɛ”, anaa ɔkã fa yenwo ɔ?

YEMUABƆLƐ

Yesu hãne Nyameɛpiri Ahennie nanwo dwirɛ, ɔyɛle nzɛngyerɛneɛ, na otiele Yehowa wɔ tebea biala nu.

Ndimu

• Adwuma titire beni yeɛ Yesu yɛle mmerɛ bɔ né ɔwɔ aseɛ so ne?

• Nzu yeɛ Yesu nzɛngyerɛneɛ ahoroɛ ne kyire ɔ?

• Abrabɔ nu dwirɛ ahoroɛ beni yeɛ Yesu hyirehyirɛle ɔ?

NEA ƐHE KOSO

Edwirɛ beni yeɛ Yesu hãne yenwo dwirɛ pẽe ɔ?

“Nyameɛpiri Ahennie ​—Bɔ Okyire Ma Yesu” (The Watchtower, October 1, 2014)

Nea nikyehorɛtibɔ yɛkɔhora yekole yekoli kyɛ, Yesu nzɛngyerɛneɛ ahoroɛ ne sili paa ɔ.

“Yesu Nzɛngyerɛneɛ Ahoroɛ Ne ​—Nzu Yeɛ Ɛkɔhora Kosua Kofi Nu Ɔ?” (The Watchtower, July 15, 2004)

Kenga kyɛbɔ baba bie sesãne ye abrabɔ, mmerɛ bɔ oowuni kyɛbɔ Yesu dwene afoforɛ nwo ne.

“Né Medwene Menwo Ngome” (The Watchtower, October 1, 2014)

Nea dwumadié titire bɔ ɔhɔle so wɔ Yesu asɛnga adwuma nanu bɔ bahyehyɛ ye nnidisoɛ nnidisoɛ ɔ.

“Dwumadié Titire Bɔ Ɔhɔle So Wɔ Yesu Aseɛ So Asetena Nu Ɔ” (New World Translation of the Holy Scriptures, Appendix A7)