KYƐBƆ ƐNE EBIE KƆHYƐ YEBO KƆBƆ NGƆMMƆ Ɔ
Luka 19:1-7
ADESŨA 6
Nya Akokoduro
Bɔ Adesũa Ne Gyi So Ɔ: “Yɛsili y’ahõne [anaa yenyane akokoduro] wɔ yɛ Nyameɛ nu kyɛ yɛkɔhã Nyameɛ nzɛmba ne yɛkohyire ɛmɔ.”—1 Tɛs. 2:2.
Bɔ Yesu Yɛle Ɔ
1. Nea VIDIO ne, anaa kenga Luka 19:1-7. Eyie a susu nzɛmmisa hemɔ nwo:
Ɔkɔyɛ kyɛ nzuati yeɛ né ebiemɔ nguro Sakeo dwirɛ ɔ?
Nzuati yeɛ Yesu de, ɔhãne nzɛmba ne hyirele ye ɔ?
Bɔ Yesu Yɛle Ne, Nzu Yeɛ Yesũa Yefi Nu Ɔ?
2. Sɛ yɛkɔhora yɛkɔhã nzɛmba ne yekohyire ebiala a, odikyɛ yenya akokoduro.
Suesũa Bɔ Yesu Yɛle Ne
3. Srɛ Yehowa kyɛ ɔboka wɔ. Nyameɛ honhom yeɛ ɔfa bokale Yesu maa ɔhãne nzɛmba ne ɔ. Yeti wɔ koso, ɔkɔfa kɔboka wɔ maa ɛkɔyɛ asɛnga adwuma ne. (Mat. 10:19, 20; Luka 4:18) Sɛ ebia esuro kyɛ ɛkɔhã nzɛmba ne kohyire ebie a, srɛ Yehowa kyɛ ɔma wɔ akokoduro.—Aso. 4:29.
4. Nnɛkã kyɛ sona he de ongotie. Ɔtɔ mmerɛ bie a, yenguro kyɛ yedi mmenia biemɔ adanzeɛ. Ebia yɛnea kyɛbɔ sona ne asiesie yenwo, ye subaen, asɔre bɔ ɔkɔ ɔ, nekaa bɔ ofi, ye amammerɛ, ɔne dwudwolɛ bɔ ɔkã ne a, ɛyɛ a yenguro kyɛ yekopingyé sona ne po, na yɛne ye abɔ ngɔmmɔ. Mmerɛ biala bɔ sɔ adwene ne kɔwa wɔ tianu ne, kae kyɛ:
Yehowa ne Yesu ngome twé yeɛ bɛse bɔ ɔwɔ sona ahõne nu ɔ.
Yehowa kɔhora kɔboka ebiala maa ɔkɔɔsõ ye.
5. Odikyɛ enya akokoduro, nakoso má wɔnye laberɛ. (Mat. 10:16) Ɛyɛ a nnɛmaa ɛne ebiala su aporowaa. Sɛ ebie nguro kyɛ otie edwirɛ ne, anaa ɔpena kyɛ ɔfa ngodĩi teta wɔ a, pɛ ngɔmmɔ naso na kɔ.—Any. 17:14.
KENGA TWORƆNZƐM HEMƆ KOSO
Aso. 4:31; Ɛfe. 6:19, 20; 2 Tim. 1:7