Má Wɔ Ngyerɛkyerɛ Nu La Berɛ

Bɔ Yesu Yɛle Ɔ

VIDIO: Yesu Mvandoho Bɔ Ɔmaa Yenwu Kyɛ Yehowa Dwene Yɛnwo Ɔ

1. Nea VIDIO ne, anaa kenga Mateo 6:​25-27. Eyie a susu nzɛmmisa hemɔ nwo:

1. Mvandoho beni yeɛ Yesu fa hyirehyirele kyɛbɔ Yehowa dwene yɛnwo nanu ɔ?

2. Ɔwɔ nu kyɛ né Yesu se nnomaa nwo dwirɛ pẽe de, nakoso nzuati yeɛ ɔhãne bɛnwo dwirɛ kãa bie ɔ? Sɔ atẽe bɔ Yesu fale so hyirehyirele ne, nzuati yeɛ ɔte kama paa ɔ?

Bɔ Yesu Yɛle Ne, Nzu Yeɛ Yesũa Yefi Nu Ɔ?

2. Sɛ yekyirekyire mmenia a, odikyɛ yɛmaa yɛ dwirɛ ne yɛ tikaapẽ, na enu da berɛ. Yɛyɛ sɔ a, ɔmaa bɛkae, na bɛfa bɛyɛ adwuma koso.

Suesũa Bɔ Yesu Yɛle Ne

3. Ɛyɛ a nnédwudwo pẽe. Ebia nikyee bɔ ɛne sona ne besũa ne, ɛse yenwo dwirɛ pẽe, nakoso edwirɛ bɔ ɔwɔ nwomaa bɔ ɛmɔ sũa nanu ne, ɛhẽne yeɛ fa w’adwene sie so ɔ. Sɛ ebisa dwirɛ bie a, to wɔ boase má ɔye yenoa. Nakoso sɛ ebia ɔnze mmuayɛɛ ne, anaa mmuayɛɛ bɔ ɔkɔma ne, ɔmva bɔ ɛmɔsũa nanwo hwee a, nzu yeɛ ɛkɔyɛ ɔ? Sɛ ɔba sɔ a, bisa edwirɛ ne wɔ atẽe foforɛ so, kyɛbɔ ɔkɔyɛ a ɔkɔhora kɔye yenoa ɔ. Sɛ onya te bɔ ɛmɔ sũa nabo a, ɛmɔ toa so.

4. Má ɔhã bɔ ɔse fa edwirɛ nanwo dada ɔ, ná nea atẽe bɔ ɛkɔfa so kɔboka ye ɔ. Yɛfa ye kyɛ, ɛne Bible sũaniɛ ne baasũa nikyee bie fa awufoɛ bɔ Yehowa kotingyé bɛ nanwo. Kora bɔ yeɛ ɛmɔ kɔhyɛ adesũa nabo ne, ɛkɔhora kobisa ye kyɛ; sona wu a nisɔa yeɛ ɔkɔ ɔ?

5. Fa mvandoho yɛ adwuma yé. Sɛ ɛpena kyɛ ɛfa mvandoho kyirekyire edwirɛ bie nu a, bisa wɔnwo kyɛ:

1. ‘Aso mvandoho ne te tikaapẽ, na enu la berɛ?’

2. ‘Aso me sũaniɛ ne kɔte yebo?’

3. ‘Sɛ yeyie adesũa ne a, nzu yeɛ me sũaniɛ ne kɔkae paa ɔ, mvandoho ne, anaa edwirɛ titire bɔ né ɔwɔ adesũa nanu ne?’