Fa Nya Asetena Nu Anigye Daa! Ne Di Dwumaa Wɔ Asɛnga Nu

Nea kyɛbɔ yɛnye agye paa kyɛ, yanya brohyeɔ ne nwomaa foforɛ bɔ yɛkɔfa yɛkɔyɛ Bible adesua ɔ! Yɛbɔ mbaeɛ kyɛ Yehowa kohyira mmɔden biala bɔ yɛkɔbɔ naso ná yaboka mmeni pẽe maa baayɛ asuafoɛ. (Mat 28:18-20; 1Ko 3:6-9) Sɛɛ yeɛ yɛkɔfa nnwinadeɛ foforɛ hemɔ yekoli dwumaa ɔ?

Ɔnate kyɛ Nya Asetena Nu Anigye Daa!, bɔ bɛfa bɛyɛ Bible adesua ne maa yenwu atẽe foforɛ koraa bɔ yɛfaso yekyirekyire nati, mmerɛ bɔ esua, na ɛfa yɛ Bible adesua ne, di yenwo akwangyerɛ hemɔ aso.a

• Kenga edwirɛ ne, na susu nzɛmmisa nemɔ nwo

• Ɛmɔkenga tworɔnzɛm bɔ bahworɔ kyɛ “kenga” ne, na boka suaniɛ ne ma ɔte kyɛbɔ ɔkɔfa koli dwumaa nabo

• Ɛmɔbɔ vidio ahoroɛ ne, na ɛmɔfa nzɛmmisa nemɔ besusu yenwo

• Ɛmɔsusu adesua biala bɔ ɔwɔ bue kõ biala nu nanwo

Wɔ asɛnga nu ne, dimoa fa brohyeɔ ne ma sona ne fa kanyaen ye anigye. (Nea alaka “Kyɛbɔ Ɛkɔfa Nya Asetena Nu Anigye Daa! brohyeɔ ne kɔma ebie wɔ Nzrahwɛ Bɔ Olimoa Nu Ɔ.”) Sɛ ɛmɔyie adesua ne, na sɛ suaniɛ ne nye gye yenwo kyɛ okosua pẽe kɔboka so a, yede, fa nwomaa ne ma ye, na ɛne ye bɛtoa so wɔ adesua 04 ne. Sɛ ɛne ebie té sua nwomaa ahoroɛ bɔ yɛne mmenia fa yɛ Bible adesua nanu biala a, kakyi kɔ Nya Asetena Nu Anigye Daa! nwomaa nanu, na nea adesua bɔ ɔkɔboka ye ɔ.

NEA VIDIO BƆ YEƐ OLE YƐYƐ WƆ AKWAABA YƐBA WƆ BIBLE ADESUA NASO NE, NA YE EDWIRƐ BƆ OLILISO HEMƆ NOA:

• Nzu yeɛ Bible asuafoɛ kosua kofi nwomaa foforɛ he anu ɔ?

• Nzuati yeɛ odikyɛ ɛye vidio he kyire Bible asuafoɛ bɔ bɛte foforɛ ne ɔ?

• Nzu yeɛ odikyɛ ɛhyɛ wɔ suaniɛ ne ngunaen maa ɔfa sie ye nye so na odwu yenwo ɔ?—Nea alaka, “Botaeɛ Bɔ Yeti Yeɛ Bɛhyehyɛle Adesua Ne Bue Biala Ɔ”