ADESŨA BƆ ƆTƆ SO 27
Nzuati Yeɛ Odikyɛ Yesuro Yehowa Ɔ?
‘AWURADE ne bɛbɔ besuro ye ne, yeɛ bɛfa adamvoa ɔ.’ —EDW. 25:14.
DWEIN 8 Yehowa Ne Yɛn Guankɔbea
BƆ YƐBAASŨA Ɔa
1-2. Kyɛbɔ Edwein 25:14 kã ne, sɛ yɛpena kyɛ yɛfa Yehowa adamvoa a, nzu yeɛ odikyɛ yɛyɛ ɔ?
SƐ BEBISA wɔ kyɛ subaen beni yeɛ odikyɛ enya ye, na wamaa ɛne ebie afa adamvoa a, nzu yeɛ ɛkɔhã ɔ? Ebia ɛkɔhã kyɛ nnamvoa de odikyɛ bekuro bɛnwo dwirɛ, ná bɛboka bɛnwo, na ɔtte nikyee bɔ ɛkɔhã kyɛ odikyɛ esuro wɔ damvo ne ɔ. Nakoso adesũa he kɔboka yɛ maa yekonwu kyɛ, bɛbɔ bɛpena kyɛ bɛfa Yehowa adamvoa ne, odikyɛ “besuro ye.”—Kenga Edwein 25:14.
2 Ɔmva yenwo ne afoɛ dodoɔ bɔ yafa yasõ Yehowa ne, odikyɛ yɛkɔso yesuro ye. Yede, sɛ bɛkã kyɛ ebie suro Yehowa a, okyire sɛɛ? Yɛkɔyɛ sɛɛ né yahyire kyɛ yesuro Yehowa? Obadia bɔ né ɔnea Ahabo ahemvie berɛ ne, Sɔfo Panyi Yehoada, ɔne Ɔhene Yehoase yɛle nikyee bie fahyirele kyɛ besuro Nyameɛ. Yɛkɔyɛ sɛɛ né yasuesũa bɔ bɛyɛle ne?
SƐ BƐKÃ KYƐ EBIE SURO NYAMEƐ A, OKYIRE SƐƐ?
3. Sɛ yɛpena kyɛ yɛyɛ nikyeebie ná esuroen kã yɛ a, sɛɛ yeɛ ɔkora boka yɛ ɔ?
3 Sɛ yɛpena kyɛ yɛyɛ nikyeebie na esuroen kã yɛ a, ɔkora boka yɛ. Nzuati yeɛ yɛkã sɔ ɔ? Sɛ yɛyɛ nikyee bie ná yesuro kyɛ bɔ yɛyɛ ne kɔmaa yekoyia ɔhaw a, yɛtwẽ yɛnwo yefi yenwo. Sɛ yegyi anwuro yɛyɛ adwuma bie, ná yesuro kyɛ yekofĩ ase yekopira a, ɔmaa yɛnea yɛnwo yé. Afei koso sɛ yesuro kyɛ yɛkɔyɛ nikyeebie maa ɔkɔha yɛ busũaniɛ anaa yɛ damvo bie bɔ yekuro ye dwirɛ a, yɛkɔnea yɛnwo yé.
4. Adwene beni yeɛ Satan pena kyɛ yenya ye wɔ Yehowa nwo ɔ?
4 Satan pena kyɛ mmenia nya adwene kyɛ, sɛ bɛte Yehowa dumaa a, odikyɛ bɛnwo wosowoso bɛ. Elifase hãne edwirɛ bie bɔ okyire kyɛ Yehowa tianu yɛ se, na bɔ yɛkɔyɛ biala ne, ɔnzɔ ye nye. Sɔ adwene ne bie yeɛ Satan pena kyɛ yenya ɔ. (Yob 4:18, 19) Satan se kyɛ, sɛ yenya adwene bɔ ɔte sɔ a, yɛkɔyakyi Yehowa sõen. Nakoso ɔnzɛkyɛ yɛyɛ sɔ, na mmom odikyɛ yebu Yehowa, na yɛbɔ mmɔden kyɛ yɛngɔyɛ nikyee biala bɔ onguro ɔ.
5. Sɛ bɛkã kyɛ ebie suro Nyameɛ a, okyire sɛɛ?
5 Sɛ bɛkã kyɛ ebie suro Nyameɛ a, bɔ okyire yeɛ ole kyɛ sona ne dɔ ye, na onguro kyɛ ɔkɔyɛ nikyee biala bɔ ɔkɔmaa ɔne Nyameɛ afĩa kɔsɛkye ɔ. Sɔ ala yeɛ Yesu yɛle ɔ. Né ‘osuro Nyameɛ.’ (Heb. 5:7) Ɛhẽne ngyire kyɛ onwu Yehowa a, né ye kunu ate ye. (Yes. 11:2, 3) Na mmom bɔ okyire paa yeɛ ole kyɛ, né Yesu dɔ Yehowa, na né ɔbɔ mmɔden kyɛ ɔkɔyɛ bɔ okuro ɔ. (Yoh. 14:21, 31) Yɛkoso, yɛpena kyɛ yesuesũa bɔ Yesu yɛle ne. Yehowa te ɔdɔ, ɔse nworɛ, ole tumi, na odi nahorɛ. Yeti ɛhe kã yɛ maa yebu ye paa. Yehowa dɔ yɛ paa, na ɛhẽne ati yeɛ ɔma yɛ akwangyerɛ ne. Sɛ yetie Yehowa a, ɔmaa yenye gye, na sɛ yandie ye koso a, ɔmaa ye wora bɔ.—Edw. 78:41; Any. 27:11.
NZU YEƐ ƆKƆBOKA YƐ MAA YEKOSURO NYAMEƐ Ɔ?
6. Sɛ yɛpena kyɛ yesuro Yehowa a, nzu yeɛ odikyɛ yɛyɛ ɔ? (Edwein 34:11)
6 Yenu biala nne berɛ bɔ bɛwole ye ne, né osuro Yehowa anaa ɔdɔ ye ɔ. Yeti odikyɛ yɛyere yɛnwo paa kora, né yahora yasuro Yehowa. (Kenga Edwein 34:11.) Yede, nzu yeɛ ɔkɔhora kɔboka yɛ ɔ? Nikyee kõ bɔ ɔkɔboka yɛ paa yeɛ ole kyɛ, yɛkɔdwenedwene nningyein bɔ Yehowa abɔ nanwo. Nningyein bɔ Yehowa abɔ ne, ɔmaa yenwu kyɛ ɔse nworɛ, ole tumi, na ɔdɔ yɛ paa. Yeti sɛ yɛdwenedwene nningyein bɔ Nyameɛ abɔ nanwo a, ɔmaa yenya obuo, ɔne ɔdɔ bɔ enu yɛ se yɛma ye. (Rom. 1:20) Aliemaa brasua bie bɔ bɛfrɛ ye Adrienne hãne kyɛ: “Sɛ medwenedwene nningyein bɔ Yehowa abɔ nanwo a, ɛyɛ a né ɔyɛ me nwanwa, na ɔmaa menwu kyɛ ɔse nworɛ paa, na ɔdwene menwo.” Ɔnate kyɛ né ɔdwenedwene nningyein bɔ Yehowa abɔ nanwo nati, sɛɛ yeɛ waboka ye ɔ? Ɔtoale ye dwirɛ naso kyɛ: “Sɛ Yehowa abɔ nningyein bɔ ɔyɛ nwanwa hemɔ de a, yede nzuati yeɛ odikyɛ meyɛ nikyee bie bɔ ɔkɔmaa me ne ye afĩa kɔsɛkye ɔ?” Sɛ ɛfa mmerɛ kãa dwenedwene nningyein bɔ Yehowa abɔ nwo dapɛen he anu a, ɔkɔboka wɔ maa ekonya ɔdɔ kɔma Yehowa, na ekobu ye paa.—Edw. 111:2, 3.
7. Sɛ yɛbɔ Yehowa mbaeɛ a, sɛɛ yeɛ ɔboka yɛ ɔ?
7 Nikyee foforɛ bɔ ɔkɔboka yɛ maa yekonya ɔdɔ ne obuo yɛkɔma Nyameɛ yeɛ ole kyɛ, yɛkɔbɔ ye mbaeɛ daa. Sɛ yɛbɔ mbaeɛ daa a, ɔmaa yepingyé Yehowa, na yɛfa ye adamvoa. Sɛ nzɔhwɛ bie to yɛ, na yɛsrɛ Yehowa kyɛ ɔma yɛ anwoserɛ bɔ yɛkɔfa yekogyina yenoa a, ɔmaa yenwu kyɛ ole tumi. Yehowa kuro yɛ dwirɛ ti, ɔmaa Ɔwa ne wu mane yɛ. Yeti sɛ yɛda ye ase wɔ yɛ mbaeɛ nu a, okyire kyɛ yɛdɔ ye. Afei koso sɛ ɔhaw bie to yɛ, na yɛsrɛ Yehowa kyɛ ɔboka yɛ maa yegyina yenoa a, ɛhẽne kyire kyɛ yɛfa yɛnwo yɛto yeso, ofikyɛ yedé yedi paa kyɛ ɔse nworɛ. Sɛ yɛbɔ mbaeɛ bɔ ɔte sɔ a, okyire kyɛ yebu Yehowa paa, na ɛhẽne kɔboka yɛ maa yɛkɔyɛ bɔ okuro ɔ.
8. Yɛkɔyɛ sɛɛ na yahyire kyɛ yesuro Nyameɛ?
8 Sɛ yesũa Bible a, ɔboka yɛ maa yesuro Nyameɛ. Bɔ yeti yeɛ ɔte sɔ yeɛ ole kyɛ, sɛ yɛkenga Bible ne a, yenwu mmeni pẽe bɔ né besuro Nyameɛ, ɔne bɛbɔ bɛyɛle bɔ ɔttemayé nwo dwirɛ. Ɛhẽne ati, yɛkora yesũa nikyee yefi bɔ bɛyɛle nanu. Wɔde ɛmɔma yesusu bɛbɔ né besuro Nyameɛ nanu nyɔ nwo kãa. Sɔ mmenia nemɔ yeɛ ole, Obadia bɔ né ɔnea Ahabo ahemvie berɛ ne, ɔne Sɔfo Panyi Yehoada. Afei koso yekosusu Yehoase bɔ né ɔte Yuda hene nanwo. Ahyɛaseɛ ne, né ɔsõ Yehowa kama, nakoso odwuli nekaa bie ne, wanzõ Yehowa kõ.
NYA AKOKODURO TEKYƐ OBADIA BƆ NÉ OSURO NYAMEƐ NE
9. Ɔnate kyɛ né Obadia suro Yehowa nati, ɔbokale ye sɛ́? (1 Ahemvo 18:3, 12)
9 Bible ne kã Obadiab nwo dwirɛ kyɛ, “né osuro AWURADE paa.” (Kenga 1 Ahemvo 18:3, 12.) Sɛɛ yeɛ ɛhe bokale ye ɔ? Ɔnate kyɛ né osuro Yehowa nati, né ɔkã nahorɛ. Ɛhẽne ati bɛmaa ɔneane ahemvie naso. (Fatoto Nehemia 7:2 nwo.) Obadia tenane ase mmerɛ bɔ né Ahabo bɔ ye tianu yɛ se ne di hene ne. Bible ne kã Ahabo nwo dwirɛ kyɛ: “Ɔyɛle bɔne trale ahemvo bɔ belili ye nyunu moa namukoraati.” (1 Ahe. 16:30) Yeti, né yenwo hia kyɛ Obadia nya akokoduro, na ɔnate kyɛ né osuro Yehowa nati, Yehowa koso bokale ye maa onyane sɔ subaen bɔ yeɛ ole akokoduro ne. Afei koso, né Ahabo aye Yesebɛl sõ Baal. Yeti, ɔbɔle mmɔden kyɛ okotu Yehowa sõen bo kofi Yuda aheman nanu. Nyameɛ adiyifoɛ ne pó, ohũhũni benu pẽe. (1 Ahe. 18:4) Ɛhe mukoraati maa yenwu kyɛ né ɔlla ase koraa kyɛ Obadia kɔsõ Yehowa sɔ mmerɛ ne.
10. Nzu yeɛ Obadia yɛle bɔ né okyire kyɛ ole akokoduro paa ɔ?
10 Nzu yeɛ Obadia yɛle bɔ né okyire kyɛ ole akokoduro paa ɔ? Mmerɛ bɔ né Yesebɛl kũkũ Nyameɛ adiyifoɛ nemɔ ne, Obadia ‘fale benu ɛyaa kõ, na ɔhyɛle benu aburannu aburannu fa bɛ feale nyɔboɛ nu, na ɔmane bɛ aleɛ ne nzue.’ (1 Ahe. 18:13, 14) Ɔwɔ nu kyɛ né Obadia le akokoduro, nakoso sɛ Yesebɛl nwuni bɔ ɔyɛle ne a, ahãa kyɛbɔ ɔte biala okohũ ye. Yenu biala suro ewue, na sɔ ala yeɛ né Obadia koso suro ewue ɔ. Nakoso né ɔdɔ Yehowa, na né yenye gye yenwo kyɛ ɔkɔfa ye ngõa kɔto berɛ kɔma Yehowa asomvoɛ nemɔ.
Babra yɛsõen ne wɔ maen bie so, na aliemaa bie kyekyɛ asafo nwomaa ma aliemaamɔ. Bɔ ɔyɛ ne kyire kyɛ ole akokoduro (Nea ngyekyɛmuɛ 11)c
11. Yehowa asomvoɛ bɔ bɛwɔ berɛ ɛnnɛ ne, sɛɛ yeɛ besuesũa Obadia ɔ? (Nea foto ne koso.)
11 Ɛnnɛ, babra Yehowa Adanzefoɛ sõen wɔ maen ahoroɛ pẽe so. Aliemaamɔ bɔ bɛwɔ berɛ ne, bebu atumvoɛ nemɔ paa, nakoso ɔnate kyɛ besuesũa Obadia nati, bɛfa akokoduro bɛsõ Yehowa. (Mat. 22:21) Ɔnate kyɛ besuro Nyameɛ nati, betie ye dwirɛ bɛtra kuro sona. (Aso. 5:29) Daa bɛkɔ asafo nhyiamu, na bɛyɛ asɛnga adwuma ne. Nakoso bɛmaa bɛnye da berɛ kyɛbɔ ɔkɔyɛ a, atumvoɛ nemɔ ngonwu bɛ ɔ. (Mat. 10:16, 28) Bɔ ohia sɔ aliemaa hemɔ paa yeɛ ole kyɛ bɛkɔboka bɛnwo kyɛbɔ ɔkɔyɛ a, benu biala kɔhora kɔsõ Yehowa ɔ. Henri te Africa maen bie so, na mmerɛ bie bɛbrale yɛ sõen adwuma ne wɔ berɛ. Yeti, né ɔbɔ mmɔden fa nwomaa kɔma aliemaamɔ. Henri hãne kyɛ: “Nde ebie bɔ mefɛre nikye paa. Yeti sɛ nná Yehowa bɔ mesuro ye a, ahãa mengɔhora ngɔyɛ sɔ adwuma ne.” Aso edé di kyɛ ɛkɔhora konya akokoduro bɔ Henri nyane ne bie anaa? Sɛ ɛkɔhora konya sɔ akokoduro ne bie a, odikyɛ esuro Nyameɛ.
DI NAHORƐ TEKYƐ SƆFO PANYI YEHOADA
12. Nzu yeɛ Sɔfo Panyi Yehoada ne ɔye bɛyɛle bɛfa behyirele kyɛ bedi nahorɛ bɛma Yehowa ɔ?
12 Ɔnate kyɛ né Sɔfo Panyi Yehoada suro Yehowa nati, olili nahorɛ, na ɔbokale mmenia nemɔ maa bɛsõne Yehowa. Bɔ ɔmaa yenwu sɔ yeɛ ole kyɛ, sɔ mmerɛ ne, né Atalia bɔ ɔte Yesebɛl awa ne afa atẽe bie so waayɛ ɔhemaa wɔ Yuda. Né Atalia tianu yɛ se, na né yenye boro nikyee koso. Ɔbɔle mmɔden kyɛ okohũ ye bɔbɔ ye nnõmaamɔ bɔ né bele yenwo atẽe kyɛ bedi hene ne mukoraati. Ɛhẽne ati, né mmenia suro ye paa. (2 Abe. 22:10, 11) Ye anõmaa kõ bɔ bɛfrɛ ye Yehoase ne de, wannya ye wangũ ye. Ofikyɛ Yehosabeate ne ohũ Yehoada fale Yehoase feale, na bɛneane ye. Ɛhe maa benyane ebie bɔ né okoli hene wɔ Dawide abusũa nu ɔ. Yehoada hɔleso lili nahorɛ mane Yehowa, na wanzuro Atalia.—Any. 29:25.
13. Mmerɛ bɔ Yehoase lili afoɛ nzoo ne, nzu biekũ yeɛ Yehoada yɛ fahyirele kyɛ odi nahorɛ ma Yehowa ɔ?
13 Mmerɛ bɔ Yehoase lili afoɛ nzoo ne, Yehoada sá yɛle nikyee bie fahyirele kyɛ odi nahorɛ ma Yehowa. Ɔyɛle kyɛ ɔkɔmaa Yehoase kɔɔyɛ ɔhene. Sɛ né Atalia te sɔ dwirɛ ne a né okohũ ye. Nakoso, Yehowa bokale Yehoada maa ɔhora yɛle. Lewifoɛ ne mbanyi nemɔ bokale Yehoada maa bɛfale Yehoase besili bia so kyɛ ɔhene, na behũni Atalia. (2 Abe. 23:1-5, 11, 12, 15; 24:1) Ɛhẽne sĩ ne, ‘Yehoada yɛle apam tole AWURADE, Nana Yehoase, ɔne maen ne bafĩa, kyɛ odikyɛ bɛyɛ Awurade maen.’ (2 Ahe. 11:17) Afei koso “ɔmane anoa awɛmvoɛ nemɔ gyinagyinane AWURADE awuro berɛ anoa nemɔ noa, kyɛ ebiala bɔ yenwo agua fĩɛ ne, ɔnzɛkyɛ bɛmaa owura AWURADE awuro berɛ.”—2 Abe. 23:19.
14. Ɔnate kyɛ Yehoada lili Yehowa ni nati, nzu yeɛ Yehowa yɛ mane ye ɔ?
14 Né Yehowa alimoa ahã kyɛ: “Bɛbɔ bedi me ni ne, me koso ngoli bɛ ni.” Sɔ ala yeɛ ɔyɛ mane Yehoada ɔ. (1 Sam. 2:30) Nningyein pá bɔ Yehoada yɛle ne, Yehowa maa bɛhworɔle ye wɔ Bible nanu kyɛbɔ ɔkɔyɛ a, yekosũa nikyee yekofi nu ɔ. Ɛhe kyire kyɛ Yehowa koso lili Yehoada ni amba. (Rom. 15:4) Afei koso né Yehoada tte ɔhene, nakoso mmerɛ bɔ owuli ne, “besiele ye wɔ Dawide kuro wɔ ahemvo asieleɛ, ofikyɛ ɔyɛle nikyee pá wɔ Yisrael mane Nyameɛ ne Nyameɛ awuro ne.”—2 Abe. 24:15, 16.
Sɛ yesuro Yehowa a, yɛkɔboka yeliemamɔ Kristofoɛ kyɛbɔ Sɔfo Panyi Yehoada yɛle ne (Nea ngyekyɛmuɛ 15)d
15. Nzu yeɛ yesũa yefi bɔ Yehoada yɛle nanu ɔ? (Nea foto ne koso.)
15 Sɛ yɛdwenedwene bɔ Yehoada yɛle nanwo a, ɔkɔboka yɛ maa yekosuro Nyameɛ. Sɛ asafo nu mbanyi suesũa bɔ Yehoada yɛle ne a, ɔkɔboka bɛ maa bɛnye kɔla berɛ, ná babɔ Yehowa mmenia nwo waen. (Aso. 20:28) Bɛbɔ b’afoɛ ahɔ anyunu ne koso, odikyɛ bɛkae kyɛ Yehowa wora filli bɛ. Yeti sɛ besuesũa Yehoada ná bedi nahorɛ bɛma Yehowa a, ɔkɔboka bɛ maa bɛkɔyɛ nningyein pẽe wɔ asafo nanu, kyɛbɔ Yehowa bokale Yehoada maa ɔyɛle ne. Odikyɛ mmrandeɛ ne ndaluwa bɔ bɛwɔ asafo nanu ne suesũa kyɛbɔ Yehowa lili Yehoada ni ne, ná bɛfa obuo bɛma bɛbɔ bafoɛ ahɔ anyunu ne, ye titire ne bɛbɔ bafa afoɛ pẽe basõ Yehowa ne. (Any. 16:31) Afei koso ɛmɔma yemukoraati yesuesũa kyɛbɔ Lewifoɛ ne, ɔne mbanyi nemɔ bokale Yehoada ne. Atẽe kõ bɔ yɛkɔfa so yɛkɔyɛ sɔ yeɛ ole kyɛ yekotie mbanyi nemɔ, na yaboka bɛ.—Heb. 13:17.
NNESUESŨA BƆ ƆHENE YEHOASE YƐLE NE
16. Nningyein bɔ ɔttemayé beni yeɛ Ɔhene Yehoase yɛle ɔ?
16 Yehoada bokale Ɔhene Yehoase maa ɔsõne Yehowa. Ɛhẽne ati mmerɛ bɔ né Yehoada te ase ne, Yehoase bɔle mmɔden kyɛ ɔkɔyɛ bɔ Yehowa kuro ɔ. (2 Ahe. 12:2) Nakoso mmerɛ bɔ Yehoada wuli ne, Yehoase tiele Yudafoɛ mbanyi bɔ né bɛsõ bosõen ne, na ɛhẽne ati ye koso ɔɔsõne bosõen. (2 Abe. 24:4, 17, 18) Bɔ bɛyɛle ne yɛle Yehowa yea paa. Yeti Yehowa somane y’adiyifoɛ anaa “ngɔmhyɛlɛfoɛ, maa behyɛle bɛ kyɛ besá bɛbra ye berɛ . . . , nakoso bandɛ́ bɛso.” Ngɔmhyɛlɛfoɛ, anaa adiyifoɛ bɔ Yehowa somane bɛ kyɛ bɛbɔ mmenia nemɔ kɔkɔ ne, né benu kõ yeɛ ole Sakaria. Né Sakaria baba yeɛ ole Yehoada, yeti né ɔte Yehoase busũaniɛ. Nakoso Yehoase anndie Sakaria, na ɔmaa behũni ye po. Bɔ Sakaria baba Yehoada yɛ mane Yehoase ne mukoraati ne, wangae.—2 Abe. 22:11; 24:19-22.
17. Nzu yeɛ ɔtole Ɔhene Yehoase ɔ?
17 Né Yehowa alimoa ahã kyɛ: “Bɛbɔ betietia me nyunu ne, mekoso mengɔfa bɛ ngɔyɛ húu.” (1 Sam. 2:30) Bɔ ɔtole Yehoase ne maa yenwu kyɛ sɔ dwirɛ ne te nahorɛ. Ɔnate kyɛ né Yehoase nzuro Yehowa nati, nningyein angɔ yé amma ye. Bɔ yeti yeɛ ɔte sɔ yeɛ ole kyɛ, mmerɛ bɔ Siriafoɛ ne Yisraelfoɛ bɛɛhõne ne, Siriafoɛ asogyafoɛ bɔ né bɛte kãa ne lili Yehoase ne ye asogyafoɛ bɔ né bɛsõne paa naso ngunim. Afei bepirale Ɔhene Yehoase. Mmerɛ bɔ kõɛ ne wale ayieleɛ ne, Yehoase ngoaa nemɔ bɔle yenwo porɛ, na behũni ye. Sakaria bɔ Yehoase hũni ye nati, yeɛ ɔmaa bɛyɛle sɔ ne. Ɔnate kyɛ né Yehoase tianu yɛ se nati, mmerɛ bɔ owuli ne, “banzie ye wɔ ahemvo nemɔ b’asieleɛ naso po.”—2 Abe. 24:23-25.
18. Kyɛbɔ Yeremia 17:7, 8 maa yenwui ne, yɛkɔyɛ sɛɛ né yannyɛ bɔ Yehoase yɛle ne bie?
18 Sɛ ɛfa bakaa sũa baana ná mvrama bɔ maa bakaa ne ye fi baana nabo a, baana ne kobu kɔtɔ ase. Sɔ ala yeɛ Ɔhene Yehoase dwirɛ ne yɛle ɔ. Mmerɛ bɔ Yehoada bɔ né ɔboka Yehoase ne wuli ne, otiele bɛbɔ bɛnzõ Yehowa ne, na ɛhẽne ati ɔyakyili Yehowa sõen na ɔɔsõne bosõen. Nzu yeɛ yesũa yefi Yehoase dwirɛ nanu ɔ? Ɔwɔ nu kyɛ y’abusũafoɛ ne yɛ damvomɔ boka yɛ maa yɛsõ Yehowa, nakoso ɔnzɛkyɛ ɔkɔyɛ kyɛ, sɛ bɛnne berɛ a yɛngɔhora yɛngɔsõ Yehowa kõ. Sɛ yɛkɔhɔ so yɛkɔyɛ bɔ Yehowa kuro a, odikyɛ yɛbɔbɔ yɛyere yɛnwo yesũa nikye, yɛdwenedwene bɔ yasũa nanwo, ná yɛbɔ mbaeɛ. Ɛhẽne kɔboka yɛ maa yekonya ɔdɔ yɛkɔma Yehowa, na yekobu ye paa. Sɛ yɛyɛ sɔ a, ɔkɔmaa yɛkɔsõ ye daa.—Kenga Yeremia 17:7, 8; Kol. 2:6, 7.
19. Nzu yeɛ Yehowa pena kyɛ yɛyɛ ɔ?
19 Yehowa nguro kyɛ yɛkɔyɛ bɔ ɔbo y’awonserɛ so ɔ. Wahã bɔ ɔpena kyɛ yɛyɛ nanwo dwirɛ wɔ Nworɛ Dwirɛhanɛniɛ 12:13 nanu. Ɛberɛ kã kyɛ: “Suro Nyameɛ na di ye mmraa dwirɛ so, ofikyɛ bɔ odikyɛ kuro sona biala ɔyɔ hɔ ɛne.” Sɛ yesuro Nyameɛ a, ɔkɔboka yɛ maa yɛkɔyɛ bɔ okuro ɔ. Sɛ yɛyɛ sɔ a, Yehowa koso kɔboka yɛ maa yekogyina ɔhaw biala bɔ yekoyia ye kyẽabie ne noa. Afei, ɔkɔboka yɛ maa yɛkɔhɔso yekoli nahorɛ yɛkɔma ye kyɛbɔ Obadia ne Yehoada yɛle ne.
DWEIN 3 Yɛn Ahoɔden, Yɛn Anidaso, Ne Yɛn Ahotoso
a Wɔ Bible nu ne, sɛ bɛkã kyɛ ebie suro nikyeebie a, okyire nningyein pẽe. Ɔtɔ mmerɛ bie a, okyire kyɛ anwu nikyeebie maa wɔ kunu ate wɔ, na ɔtɔ mmerɛ bie koso a okyire kyɛ ɛfa obuo ma ebie. Sɛ bɛkã kyɛ ebie suro Yehowa a, adesũa he kɔboka yɛ maa yekonwu bɔ okyire ɔ. Afei koso yɛkɔnea kyɛbɔ sɔ suroen ne kɔboka yɛ maa yekonya akokoduro, na yali nahorɛ yama Yehowa ɔ.
b Obadia bɔ yɛkã yenwo dwirɛ wɔ wa ne, nná ye yeɛ ole diyifoɛ Obadia bɔ ɔhworɔle Bible nu nwomaa bɔ ye dumaa la so ne.
c BƆ FOTO NE KÃ YENWO DWIRƐ Ɔ: Aliemaa bie kyekyɛ asafo nwomaa ma aliemaamɔ ɔmva yenwo kyɛ babra yɛsõen ne wɔ sɔ maen nanu ne.
d BƆ FOTO NE KÃ YENWO DWIRƐ Ɔ: Aliemaa brasua bie bɔ ye afoɛ ahɔ anyunu ne, odi adanzeɛ wɔ fon so, na ɛhẽne amaa taluwa ne, osũa kyɛbɔ bedi adanzeɛ wɔ fon so fi ye berɛ. Aliemaa bie bɔ ye afoɛ ahɔ anyunu di ebie adanzeɛ, na ɛhẽne amaa aliemaa abrandeɛ ne, osũa kyɛbɔ okonya akokoduro wɔ asɛnga nu ɔ. Aliemaa bie bɔ ye afoɛ ahɔ anyunu ne, ɔfa ndeteɛ ma aliemaa biemɔ maa benwu kyɛbɔ bekosiesie nningyein bɔ wasɛkye wɔ Ahennie Asa so ɔ.