Edwirɛ Bɔ Ebiemɔ Bisa Ɔ
Nwamɔ yeɛ bele “abɔfo bɔ baneanea nu baye bɛ,” bɔ 1 Timoteo 5:21 ne kã bɛnwo dwirɛ ne?
Somafoɛ Pɔɔlo hworɔle krataa ɔɔmane Timoteo bɔ né ɔte ye mmango asafo nu panyi ne kyɛ: ‘Ngyi Nyameɛ ne Awurade Kristo Yesu ne abɔfo bɔ baneanea nu baye bɛ ne nyunu mehyɛ wɔ kyɛ, di nhyehyɛleɛ hemɔ so, bɔ ɛnnea sona nyunu anaa ɛnyɛ nyeyemuɛ ɔ.’—1 Tim. 5:21.
Yede, abɔfo kue bɔ Pɔɔlo hane bɛnwo dwirɛ ne, nwamɔ yeɛ bɛbokkaso ɔ? Bɔ ɔte yeɛ ole kyɛ mmenia 144,000 ne, bɛbokka sɔ abɔfo kue naso. Ofikyɛ mmerɛ bɔ Pɔɔlo hworɔle kraata ne ɔɔmane Timoteo ne, asomafoɛ nemɔ ne Kristofoɛ bɔ baha bɔ bapopa bɛ ne, né bennya betingyelle bɛnu biala ma ɔhɔlle anwuro ɔɔyɛle abɔfo. Yeti nna bɛ yeɛ bele “abɔfo bɔ baneanea nu baye bɛ” ne.—1 Kor. 15:50-54; 1 Tɛs. 4:13-17; 1 Yoh. 3:2.
Afei koso, “abɔfo bɔ baneanea nu baye bɛ” ne, nna bɛ yeɛ bele abɔfo bɔ bɛyɛle asoserɛ kora yeɛ Nzueyilɛ ne ba ne. Sɔ abɔfo nemɔ fale bɛnwo bɔle Satan, na bɛɛyɛle sunzummɔne bɔ bɛte Yesu pɔfoɛ ɔ. (Gye. 6:2; Luka 8:30, 31; 2 Pet. 2:4) Kyẽabie Yesu kɔhye bɛ kɔto aseɛ bo dɔ kumaa kuronguronn nanu afoɛ 1,000. Ɛhene si ne, bɛkɔsɛkye bɛ bɛkɔboka Satan so.—Yuda 6; Nye. 20:1-3, 10.
Wɔ sɔ tworɔnzɛm nanu ne, Pɔɔlo bɔle ‘Nyameɛ ne Yesu Kristo’ dumaa. Yeti “abɔfo bɔ baneanea nu baye bɛ” bɔ ɔhane bɛnwo dwirɛ ne, ɔkɔyɛ kyɛ bɛte abɔfo bɔ bɛwɔ anwuro bɔ bɛta Nyameɛ ne Yesu si ɔ.
Abɔfo bɔ bɛwɔ anwuro bɔ bedi nahorɛ ne, bɛte pee mbaen, bɔ ɛngɔhora ngonwu bɛnoa ɔ. (Heb. 12:22, 23) Nakoso, ɔnzɛkyɛ yenya adwene kyɛ bɛmu bɛyɛ adwuma kõ. (Nye. 14:17, 18) Bɔ yeti yeɛ yɛkã sɔ yeɛ ole kyɛ, Yehowa maa abɔfo komapɛ huhuni Asiria sogyafoɛ 185,000. (2 Ahe. 19:35) Abɔfo nanu pee wɔ berɛ a, ebiaa b’adwuma yeɛ ole kyɛ, ‘bɛkɔboaboa bɔ ɔte sundidua amukoraa ne bɔnefoɛ amukoraa noa bekofi Yesu Ahennie ne anu.’ (Mat. 13:39-41) Ebiemɔ koso, ebiaa ɔkɔsoma bɛ maa “bɛkɔboaboa bɛ bɔ waneanea nu waye bɛ nemɔ noa” bɛkɔhɔ anwuro. (Mat. 24:31) Abɔfo ne biemɔ wora, wafa wawura bɛsa kyɛ ‘bɛnea yɛ so wɔ y’atee amukoraa so.’—Edw. 91:11; Mat. 18:10; fatoto Mateo 4:11; ɔne Luka 22:43 nanwo.
“Abɔfo bɔ baneanea nu baye bɛ” bɔ Pɔɔlo hane bɛnwo dwirɛ wɔ 1 Timoteo 5:21 ne, ɔkɔyɛ kyɛ bɛte abɔfo bɔ bafa bawura bɛsa kyɛ bɛnea ma nningyein hɔso kama wɔ asafo nanu ne. Pɔɔlo tuli asafo nu mbanyi bɔ odikyɛ bɛfa anidie bɛma bɛ ne koso foɛ wɔ sɔ krataa nanu. Ɔmaa benwuni kyɛ sɛ bédi b’asɛdeɛ ahoroɛ nwo dwumaa a, ɔnzɛkyɛ ‘bɛnea sona nyunu anaa bɛyɛ nyeyemuɛ.’ Afei koso, odikyɛ besusu nikyeebie nwo yé kora né basi yenwo gyinayɛɛ. Yenwo hia paa kyɛ bɛfa Pɔɔlo afutue ne bɛyɛ adwuma, ofikyɛ begyi ‘Nyameɛ ne Awurade Kristo Yesu ne abɔfo bɔ baneanea nu baye bɛ ne nyunu.’ Sɔ dwirɛ he maa yenwu ye kyɛ, abɔfo ne biemɔ wɔ berɛ a, bafa bɔ ɔkɔso wɔ asafo nanu ne bawura bɛsa. Ebie yeɛ ole kyɛ, mmenia bɔ bɛsõ Yehowa ne, bɛbɔ bɛnwo waen, bɛboka bɛ wɔ asɛnga nu, na bɔ bekonwu ye biala ne, bɛkã yenwo dwirɛ bekyire Yehowa.—Mat. 18:10; Nye. 14:6.