ADESŨA 26
DWEIN 123 Brɛ Wo Ho Ase Ma Nyankopɔn Nhyehyɛe
Nningyein Bɔ Ɛnze Ne, Brɛ Wɔnwo Ase Na Dé Tonu
“Tuminiɛ ne, kyɛbɔ osi te ne, yɛngɔhora yɛngɔte yebo.”—YOB 37:23, NWT.
BƆ ADESŨA NE KƆHÃ YENWO DWIRƐ Ɔ
Sɛ yede yɛto nu kyɛ nna nikyeebiala yeɛ yɛse a, ɔkɔboka yɛ maa yɛkɔfa yɛnwo yɛkɔto Yehowa so, na yafa y’adwene yasie bɔ yɛse naso. Ɛhene kɔmaa yɛkɔhora yekogyina ɔhaw biala bɔ ɔkɔto yɛ ne noa.
1. Sɛɛ yeɛ Yehowa bɔle yɛ ɔ?
ƆNATE kyɛbɔ Yehowa si bɔle yɛ nati, yɛkora yesusu nningyein nwo, yesua nikyee yɛte yebo, na yɛfa bɔ yasua ne koso yɛyɛ adwuma. Yede, nzuati yeɛ ɔbɔle yɛ wɔ sɔ atee naso ɔ? Ofikyɛ ɔpena kyɛ ‘yenya yenwo nimdeɛ,’ na yɛkora yesi gyinayɛɛ pá mmerɛ bɔ yɛsõ ye ne.—Any. 2:1-5; Rom. 12:1.
2. (a) Nzu yeɛ odikyɛ yedé yɛtonu ɔ? (Yob 37:23, 24) (Nea foto ne koso.) (b) Sɛ yedé yɛtonu kyɛ nna nikyeebiala yeɛ yɛse a, ɔboka yɛ sɛ?
2 Ɔwɔ nu kyɛ yɛkora yesua nningyein pee, nakoso nna nikyeebiala yeɛ yɛse ɔ. (Kenga Yob 37:23, 24.) Sɛ yɛnea Yob sɔa a, Yehowa bisale ye edwirɛ biemɔ, na ɛhene maa onwuni kyɛ sãa nningyein pee wɔ berɛ bɔ ɔnze ɔ. Sɔ dwirɛ ne maa Yob nwuni kyɛ odikyɛ ɔbrɛ yenwo ase, na ɔsesã adwene bɔ wanya ye ne. (Yob 42:3-6) Yɛ koso, sɛ yede yɛtonu kyɛ nna nikyeebiala yeɛ yɛse a, ɔboka yɛ bɔbɔ. Ofikyɛ ɔmaa yenya gyidie kyɛ Yehowa ngome yeɛ ɔkɔboka yɛ maa yekonwu nikyee deinn bɔ odikyɛ yɛyɛ, na wamaa yahora yasi gyinayɛɛ pá ɔ.—Any. 2:6.
Sɛ yedé yɛto nu kyɛ nna nikyeebiala yeɛ yɛse a, ɔkɔboka yɛ, kyɛbɔ ɔbokale Yob ne (Nea ngyekyɛmuɛ 2)
3. Nzu yeɛ yekosusu yenwo wɔ adesua he anu ɔ?
3 Adesua he anu ne, yɛkɔnea nningyein biemɔ bɔ yɛnze, ɔne ɔhaw bɔ ɛhene fa brɛ yɛ ɔ. Yekosa yekɔnea bɔ yeti yeɛ ɔte pá kyɛ yɛnze nningyein biemɔ ɔ. Sɛ yesusu edwirɛ hemɔ nwo a, ɔkɔmaa yekonya gyidie kyɛ Yehowa “bɔ ye nimdeɛ di mu ne,” okohyire yɛ nningyein deinn bɔ odikyɛ yenwu ye ɔ.—Yob 37:16.
YƐNZE MMERƐ BƆ AYIELEƐ NE KƆWA Ɔ
4. Kyɛbɔ Mateo 24:36 kã ne, edwirɛ beni yeɛ yɛnze ɔ?
4 Kenga Mateo 24:36. Yɛnze mmerɛ bɔ ewiase he ayieleɛ ne kɔwa ɔ. Yesu po, mmerɛ bɔ né ɔwɔ aseɛ so ne, né ɔnze “kyẽa ne ne dɔnhwere ne.”a Siɛ ye, ɔhahyirele ye asomafoɛ nemɔ kyɛ Yehowa ngome yeɛ “ole ye tumi wahyehyɛ mmerɛ” bɔ ɔkɔyɛ nningyein biemɔ ɔ. (Aso. 1:6, 7) Yehowa ahyɛ mmerɛ bɔ ɔkɔfa ewiase he kɔwa ye ayieleɛ ɔ. Nakoso, yɛngɔhora yengohyire mmerɛ pɔtee bɔ ɔkɔyɛ sɔ ɔ.
5. Ɔnate kyɛ yɛnze mmerɛ bɔ ayieleɛ ne kɔwa nati, ɔkɔhora kɔhã yɛ sɛ?
5 Edwirɛ bɔ Yesu hane ne, ɔmaa yenwu kyɛ yɛnze mmerɛ tendenn bɔ odikyɛ yɛnwondɛ kora né ewiase he ahɔ ayieleɛ ɔ. Yesɔ nati, annea a yekonya adwene kyɛ Yehowa kyẽa ne ahyɛ soma, na ɛhene kɔmaa y’abanu kobu, ye titire ne sɛ yafa afoɛ pee yanea ayieleɛ ne atee a. Afei koso, sɛ mmenia goro yɛnwo kyɛ ayieleɛ ne ahyɛ a, ebiaa ɔkɔyɛ se kyɛ yekogyina yenoa ɔ. (2 Pet. 3:3, 4) Ɛhene ati, ebiaa yekonya adwene kyɛ sɛ yɛse kyẽa deinn bɔ ayieleɛ ne kɔwa a, ahaa ɔkɔboka yɛ paa.
6. Nzuati yeɛ ɔte pá kyɛ yɛnze mmerɛ bɔ ayieleɛ ne kɔwa ɔ?
6 Ɔnate kyɛ Yehowa hanne mmerɛ deinn bɔ ayieleɛ ne kɔwa nati, wamaa yanya yenwo atee yafa yahyire bɔ yeti yeɛ yɛsõ ye ɔ. Ɛhene yeɛ ole ɔdɔ bɔ yele yɛma ye, ɔne gyidie bɔ yele ye wɔ yenu ne. Yɛpena kyɛ yɛsõ ye daa, na mmom nna ayieleɛ ne bɔ ɔkɔwa nati yeɛ yɛyɛ sɔ ɔ. Yeti kyɛ ahaa yɛkɔfa y’adwene yekosie mmerɛ deinn bɔ “Nyameɛ kyẽa” ne kɔwa naso ne, nningyein pá bɔ sɔ kyẽa ne ba a, yɛsa kɔhã ne mmom yeɛ odikyɛ yɛfa y’adwene yesie so ɔ. Sɛ yɛyɛ sɔ a, ɔkɔmaa yekopingye Nyameɛ, na yayere yɛnwo yayɛ bɔ okuro ɔ.—2 Pet. 3:11, 12.
7. Nzu yeɛ yɛse ɔ?
7 Nningyein biemɔ bɔ yɛse ne, odikyɛ yɛdwenedwene yenwo. Ebie yeɛ ole kyɛ, yɛse kyɛ ayieleɛ mmerɛ ne hyɛle yebo afoɛ 1914. Sɔ yeɛ Yehowa nate Bible ngɔmhyɛ so amaa yanwu ye ɔ. Nna ɛhene angome, na mmom Yehowa asa amaa yanwu nningyein pɔtee biemɔ bɔ ofi sɔ mmerɛ ne bɔ ɔkɔ ne, okosisi ɔ. Ɛhene ati, yede yedi paa kyɛ, “AWURADE kyẽa piri ne wapingye.” (Sef. 1:14) Yesa koso yɛse adwuma bɔ Yehowa pena kyɛ yɛyɛ ɔ. Yeɛ ole kyɛ yɛkɔhã “ahennie ne nwo nzɛmba” ne yekohyire mmeni dodoɔ biala bɔ yɛkɔhora ɔ. (Mat. 24:14) Bɛ́kã sɔ nzɛmba he wɔ maen kɔyɛ 240 so wɔ dwudwolɛ kɔbo 1,000 nu. Yenwo nhia kyɛ yekonwu “kyẽa ne ne dɔnhwere ne” kora, né yayere yɛnwo yayɛ sɔ adwuma bɔ yenwo hia ne bie.
YƐNZE ATEE BƆ YEHOWA FA SO YƐ YE NIKYE Ɔ
8. ‘Atee bɔ Nyameɛ fa so yɛ ye adwuma,’ bɔ Bible ne kã yenwo dwirɛ ne, okyire sɛɛ? (Nworɛ Dwirɛhanɛniɛ 11:5)
8 ‘Atee bɔ Nyameɛ fa so yɛ ye adwuma’ ne, nna yemu yeɛ yɛse ɔ. (Kenga Nworɛ Dwirɛhanɛniɛ 11:5.) Sɔ dwirɛ ne, bɔ okyire yeɛ ole nningyein bɔ Yehowa ayɛ, anaa bɔ ɔma atee maa osi kyɛbɔ ɔkɔyɛ a bɔ ɔpena kyɛ ɔyɛ ne kɔwa nu ɔ. Bɔ yeti yeɛ Yehowa ma atee maa edwirɛ bie si, ɔne nikyee deinn bɔ okuro kyɛ ɔyɛ faboka yɛ ne de, yɛngɔhora yengonwu ye. (Edw. 37:5) Sɛ yɛnea bɛbɔ basua saens ne sɔa a, atee bɔ akwalaa faso nyi wɔ ye maame kunu ne, ɔbaadwu ɛnnɛ benya bɛtelle yebo. Sɔ ala yeɛ yɛ koso, atee bɔ Yehowa faso yɛ ye nningyein ne, nna yemu yeɛ yɛte yebo ɔ.
9. Ɔnate kyɛ yɛnze atee pɔtee bɔ Yehowa kɔfa so kɔboka yɛ nati, annea a, yɛkɔyɛ yɛ nikyee sɛ?
9 Ɔnate kyɛ yɛnze atee pɔtee bɔ Yehowa kɔfa so kɔboka yɛ nati, ebiaa y’adwene nu kɔyɛ yɛ naa. Yeti annea a, ɔkɔyɛ se kyɛ yɛkɔfa nningyein yɛkɔbɔ afɔleɛ na wamaa yanya mmerɛ pee yafa yayɛ asɛnga adwuma ne, anaa yatu yahɔ nekaa bɔ behia adawurubɔfoɛ pee ɔ. Afei koso, ebiaa né yafa botaeɛ bie yasie yɛnye so wɔ asafo nanu, nakoso yangora yandwu yenwo. Anaa yayɛ asɛnga adwuma ne dee, koso yennya sona kõ po yɛne ye nzua nikye. Anaakyɛ asafo ne afa adwuma bie awura yɛsa, nakoso nningyein biemɔ amaa wayɛ se kyɛ yɛkɔyɛ ɔ. Sɛ ɔba sɔ a, ebiaa yekonya adwene kyɛ Yehowa nye ngye yɛnwo.
10. Ɔnate kyɛ yɛnze kyɛbɔ Yehowa kɔboka yɛ nati, subaen beni yeɛ ɛhene maa yenya ye ɔ?
10 Ɔnate kyɛ yɛnze kyɛbɔ Yehowa kɔboka yɛ nati, ɔmaa yɛbrɛ yɛnwo ase. Ofikyɛ yɛbate yebo kyɛ Yehowa adwene, ɔne kyɛbɔ osi yɛ ye nningyein ne, ɔbo yɛ deɛ so. (Yes. 55:8, 9) Afei koso, ɔmaa yɛfa yɛnwo yɛto ye so, ofikyɛ yɛse kyɛ ye ngome yeɛ ɔkɔhora kɔboka yɛ maa bɔ yɛyɛ biala kɔhɔ ye ɔ. Ɛhene ati sɛ yenya mmenia yɛne bɛ sua nikyee wɔ asɛnga nu, anaa yɛkora yɛyɛ adwuma bie bɔ bafa bawura yɛ sa wɔ asafo nanu a, yɛfa yɛnwo asenaa yɛma Yehowa. (Edw. 127:1; 1 Kor. 3:7) Sɛ nningyein angɔ kyɛbɔ yɛnea atee po a, odikyɛ yɛkae kyɛ Yehowa anwu mmɔden bɔ yabɔ ne mukoraati. (Yes. 26:12) Yeti yɛ deɛ alaa yeɛ ole kyɛ yɛkɔyɛ bɔ yɛkɔhora ɔ, na yayakyi bɔ waha ne yama Yehowa. Sɛ wanyɛ anwanwadeɛ bie wamva wammoka yɛ kyɛbɔ ɔyɛle ye tete ne po a, yele gyidie kyɛ ɔkɔma yɛ akwangyerɛ bɔ ɔkɔboka yɛ ɔ.—Aso. 16:6-10.
11. Nningyein bɔ yenwo hia benimɔ yeɛ yɛse ɔ?
11 Yɛse kyɛ Yehowa kuro yɛ dwirɛ, ɔse nworɛ, na bɔ ɔyɛ biala koso tengyɛ. Yesa yɛse kyɛ bɔ yɛyɛ yɛma ye, ɔne bɔ yɛyɛ yɛma yeliemamɔ ne, yenye sɔ paa. Afei koso, yɛse kyɛ bɛbɔ bedi nahorɛ bɛma ye ne, mmerɛ biala oyira bɛ.—Heb. 11:6.
YƐNZE ƐHEMA DWIRƐ
12. Kyɛbɔ Yakobo 4:13, 14 kã ne, nzu yeɛ yɛnze ɔ?
12 Kenga Yakobo 4:13, 14. Nahorɛ dwirɛ yeɛ ole kyɛ yɛnze bɔ ɔkɔto yɛ ɛhema ɔ. Ewiase he anu de, “mmerɛ ne asane” kora to yɛ nu biala. (Nwo. 9:11, NWT.) Ɛhene ati sɛ yɛnwa yɛkɔyɛ nikyeebie a, kyɛ ɔkɔyɛ yé anaa ɔngɔyɛ yé ne, yɛngɔhora yengohyire. Afei, kyɛ yɛkɔtena ngoa nu koodwu kyɛ yekoyie sɔ nikyee ne koso, yɛnze.
13. Ɔnate kyɛ yɛnze ɛhema dwirɛ nati, sɛɛ yeɛ ɔkora yɛ ɔhaw ma yɛ ɔ?
13 Ɔnate kyɛ yɛnze ɛhema dwirɛ nati, ɔkɔhora kɔyɛ ɔhaw paa kɔma yɛ. Atee beni aso? Ebiaa daa yɛkɔdwenedwene bɔ ɔkɔto yɛ kyẽabie nanwo, na ɛhene ngɔma yɛnye ngɔgye. Edwirɛ bie kɔhora kɔto yɛ maa nningyein kɔsesã komapɛ wɔ y’asetena nu. Sɛ ɔba ye sɔ a, yɛ wora kɔhora kɔbɔ paa. Afei koso, sɛ yɛnye la nikyeebie aso na wamma nu sɔ a, ɔkora maa yɛyɛ basaa, na y’aba nu bu.—Any. 13:12.
14. Sɛ yɛnye kɔgye paa a, ogyi nzu aso? (Nea foto ne koso.)
14 Sɛ edwirɛ bie to yɛ na yemia yɛnye yegyina nu a, yɛmaa ɔda ali kyɛ yɛdɔ Yehowa nati yeɛ yɛsõ ye ɔ, na mmom nna bɔ ɔyɛ ma yɛ nati ɔ. Bible ne maa yenwu kyɛ ɔnzɛkyɛ yɛnea atee kyɛ Yehowa kɔbɔ yɛnwo waen bɔ ɔhaw biala ngɔto yɛ ɔ. Afei koso, Yehowa hyehyɛlle bɔ ɔkɔto yɛ biala ɔtolle berɛ. Ɔse kyɛ sɛ yɛnze bɔ ɔkɔto yɛ ɛhema po a, nna ɛhene yeɛ ɔkɔmaa yɛnye kɔgye ɔ. Na mmom sɛ yɛmaa okyire y’atee, na yɛyɛ sotie yɛma ye a, yeɛ ɔkɔmaa yɛnye kɔgye ɔ. (Yer. 10:23) Sɛ yɛbaasi gyinayɛɛ bie na yɛfa yɛnwo yɛto Yehowa so a, ɔtekyɛ bɔ yɛkã kyɛ nyoo: “Sɛ Awurade boka ná yɛte ngoa nu a, yɛkɔyɔ he anaa ɛhene” ne. —Yak. 4:15.
Sɛ yɛpena Yehowa akwangyerɛ, ná yɛyɛ sotie yɛma ye a, ɛhene bɔ yɛnwo waen (Nea ngyekyɛmuɛ 14-15)b
15. Nzu yeɛ yɛse kyɛ Yehowa kɔyɛ ɔ?
15 Ɔwɔ nu, yɛnze ɛhema dwirɛ, nakoso yɛse kyɛ Yehowa ahyɛ bɔ kyɛ ɔkɔma yɛ daa ngoa. Ebiemɔ konya bɛ deɛ wɔ anwuro, na ebiemɔ koso anya bɛ deɛ wɔ aseɛ he aso. Afei koso, yɛse kyɛ Yehowa mbɛ ngondombo, yeti bɔ wahyɛ bɔ kyɛ ɔkɔyɛ ne, ye mukoraati kɔwa nu bɔ nikyefee ngɔhora ngosi ye atee ɔ. (Tito 1:2) Ye ngome yeɛ ‘ɔkã ayieleɛ dwirɛ, na ofi tetetete ɔkã bɔ onnya ossili nwo dwirɛ ɔ.’ Edwirɛ biala bɔ Yehowa hane ye tete ne, ɔwale nu. Sɔ ala yeɛ bɔ wahã kyɛ okosi kyẽabie ne koso kɔwa nu ɔ. (Yes. 46:10) Ɔdɔ bɔ Yehowa le ma yɛ ne, yɛse ye paa kyɛ nikyefee nne berɛ bɔ ɔkɔhora kɔtete nu ɔ. (Rom. 8:35-39) Yehowa kɔmaa yekonwu nworɛ, ɔkɔkyekye yɛ wora, na wama yɛ anwoserɛ maa yamia yɛnye yagyina ɔhaw biala bɔ ɔkɔto yɛ ne noa. Yedé yedi paa kyɛ Yehowa kɔboka yɛ, na okoyira yɛ.—Yer. 17:7, 8.
KYƐBƆ YEHOWA SE YƐ NE, ƆBO Y’ADWENE NE YƐ NDEASEƐ SO
16. Kyɛbɔ Edwein 139:1-6 kã ne, yɛnwo dwirɛ beni yeɛ Yehowa se bɔ ɔyɛ nwanwa paa ɔ?
16 Kenga Edwein 139:1-6. Yehowa bɔ ɔbɔle yɛ ne, ɔse yɛnwo dwirɛ biala, yeti bɔ yɛfa nu wɔ y’asetena nu mukoraati ɔse. Ɔse edwirɛ bɔ yɛkã, bɔ ɔmaa yɛkã sɔ, nningyein bɔ yɛyɛ, ɔne bɔ yeti yeɛ yɛyɛ sɔ nningyein ne mukoraati. Kyɛbɔ Ɔhene Dawide hane ne, nekaa biala bɔ yɛwɔ ne, Yehowa nye wɔ yɛ so, na ɔpena kyɛ ɔboka yɛ. Wɔde nea kyɛ Nyameɛ bɔ ɔbɔle anwuro ne ase, bɔ ole tumi wɔ nikyeebiala so ne, yenye li yɛsi ɔ. Ɛhe te nikyee bɔ ɔyɛ nwanwa paa! Dawide hane kyɛ: ‘Sɔ nimdeɛ ne, ɔyɛ me nwanwa soma; ɔwɔ anwuro soma, bɔ me sa ngora ndwu so ɔ.”—Edw. 139:6.
17. Nzuati yeɛ ɔkɔhora kɔyɛ se kyɛ yekole yɛkɔto nu kyɛ Yehowa se yɛ paa ɔ?
17 Ɔnate abusua bɔ yefi nu, y’amammerɛ, ɔne bɔ né yedé yedi koraka yenwu nahorɛ nati, ebiaa ɔkɔyɛ se kyɛ yekole yɛkɔto nu kyɛ Yehowa te yɛ Baba bɔ okuro yɛ dwirɛ, na yɛnwo hia ye ɔ. Anaa ebiaa y’adwene kɔyɛ yɛ kyɛ, bɔne biemɔ bɔ yayɛ ne, ɔte mbiri soma. Ɛhene ati, Yehowa ahwe yenwo afi yɛnwo, na ɔmva yɛ nyɛ hwee kõ. Dawide po odwuli nekaabie ne, onyane sɔ adwene ne bie. (Edw. 38:18, 21) Ebie bɔ omia yenye paa kyɛ ɔkɔsesã ye subaen na wayɛ bɔ Nyameɛ kuro ne, ebiaa okobisa yenwo kyɛ, ‘Sɛ Nyameɛ se me paa a, yede sɔ subaen bɔ waha me berɛ ye, nzuati yeɛ ɔpena kyɛ meha menwo kyɛ ngɔyakyi ɔ?’
18. Sɛ yedé yɛto nu kyɛ Yehowa se yɛ tra kyɛbɔ yɛbɔbɔ yɛse yɛnwo a, sɛɛ yeɛ ɔkɔboka yɛ ɔ? (Nea foto ne koso.)
18 Odikyɛ yedé yɛto nu kyɛ Yehowa se yɛ tra kyɛbɔ yɛbɔbɔ yɛse yɛnwo ɔ. Subaen pá bɔ ɔwɔ yɛnwo ne, ebie wɔ berɛ a yɛbɔbɔ po yɛnze, nakoso ye de, ɔse yemu. Ɔwɔ nu, onwu mvomsoɛ bɔ yedi ne, nakoso okuro yɛ dwirɛ, ofikyɛ ɔse kyɛ yɛpena kyɛ yɛyɛ bɔ ɔte pá ɔ. (Rom. 7:15) Sɛ yedé yɛto nu kyɛ nningyein pá bɔ yɛkora yɛyɛ ne, ɛhene yeɛ Yehowa fa ye adwene sie so a, ɔkɔmaa yɛnye kɔgye, na yahɔso yasõ ye nahorɛ nu.
Yehowa ahyɛ bɔ kyɛ ɔkɔmaa yɛnye kɔgye wɔ ewiase foforɛ nanu. Ɛhene maa sɛ edwirɛ bie to yɛ a, yɛkora yegyina yenoa (Nea ngyekyɛmuɛ 18-19)c
19. Nzu yeɛ yɛse yɛfa Yehowa nwo ɔ?
19 Yɛse kyɛ Yehowa te ɔdɔ. Ɛhe te nahorɛ dwirɛ bɔ aporowaa biala nne yenwo ɔ. (1 Yoh. 4:8) Abrabɔ nwo mmraa bɔ wafa wama yɛ ne, yɛse kyɛ okuro yɛ dwirɛ na ɔpena kyɛ osi yɛ yé nati yeɛ wafa wama yɛ ɔ. Yesa yɛse kyɛ Yehowa pena kyɛ yenya daa ngoa, na ɛhene ati yeɛ ɔmaa Ɔwa ne oowu mane yɛ ne. Yesu wue ne maa yenya gyidie kyɛ, ɔmva yenwo kyɛ bɔne wɔ yɛnwo ne, yɛkɔhora yɛkɔyɛ bɔ Yehowa kuro ɔ. (Rom. 7:24, 25) Afei koso yɛse kyɛ “Nyameɛ te piri tra yɛ tiboa, na ɔse nikyee biala.” (1 Yoh. 3:19, 20) Yehowa se yɛnwo dwirɛ biala, na odé di kyɛ yɛkɔhora yɛkɔyɛ bɔ okuro ɔ.
20. Nningyein biemɔ bɔ yɛnze ne, nzu yeɛ ɔkɔboka yɛ na yamva yenwo dwirɛ yanha yɛnwo ɔ?
20 Nikyeebiala bɔ Yehowa kuro kyɛ yenwu ye yɛfa yenwo ne, wamaa yanwu ye. Sɛ yedé sɔ dwirɛ ne yɛto nu a, nningyein biemɔ bɔ yɛnze ne, yɛngɔfa yɛngɔha yɛnwo. Na mmom bɔ yɛnwo hia paa ne, yeɛ yɛkɔfa y’adwene yekosie so ɔ. Sɛ yɛyɛ sɔ a, okyire kyɛ Yehowa “bɔ ye nimdeɛ di mu” ne, yedé ye yedi. (Yob 36:4) Kesaalae de, nna nikyeebiala yeɛ yɛkɔte yebo ɔ. Nakoso yɛnea atee kyɛ kyẽabie yɛ Nyameɛ ne kɔmaa yekonwu yenwo dwirɛ pee, na ɔkɔyɛ sɔ daa.—Nwo. 3:11.
DWEIN 104 Honhom Kronkron Yɛ Onyankopɔn Akyɛde
a Yesu yeɛ okoli anyunu maa bɛkɔsɛkye Satan wiase he wɔ Amagedon kõɛ nanu ɔ. Yeti ndeaseɛ wɔ nu kyɛ yɛkɔhã kyɛ kesaalae de, ɔse mmerɛ bɔ Amagedon kɔwa, ɔne mmerɛ bɔ ɔkɔfa ‘koli ngunim korakora’ ɔ.—Nye. 6:2; 19:11-16.
b BƆ FOTO NE KÃ YENWO DWIRƐ Ɔ: Biaa bie ne ɔwa fa nningyein gua bɛ go bag nu besie berɛ, kyɛbɔ ɔkɔyɛ a sɛ edwirɛ bie si a, bɛnwo ngɔha nu ɔ.
c BƆ FOTO NE KÃ YENWO DWIRƐ Ɔ: Aliemaa bie bɔ ɔ́fa ɔhaw nu ne, ɔdwenedwene anigye bɔ okonya ye wɔ ewiase foforɛ nanu nanwo.