Mmenia Nyɔ Bɔ Baaboka Akwangyerɛ Kue Naso Ɔ

WƆ AFOƐNOA nhyiamu bɔ bɛyɛle ye October 5, 2024 nabo ne, bɛfale ngaebɔ titire bie bɛtole dwaa. Yeɛ ole kyɛ, baye Aliemaa Jody Jedele ne Jacob Rumph kyɛ bɛɛboka Yehowa Adanzefoɛ Akwangyerɛ Kue naso. Sɔ aliemaa hemɔ afa afoɛ pee asõ Yehowa nahorɛ nu.

Bɛwole Aliemaa Jedele wɔ Missouri U.S.A, na né ye awofoɛ te Yehowa Adanzefoɛ. Nekaa bɔ ne bɛte ne, Yehowa Adanzefoɛ kãa bie yeɛ ne bɛwɔ berɛ ɔ. Ɛyɛ a ne aliemaamɔ bɔ befi nekaa ahoroɛ pee ba berɛ bayɛ asɛnga adwuma ne. Ɛhene maa onyane yenwo atee ɔne bɛnu pee bɔle. Yenye gyele ɔdɔ ne ngabonu bɔ ne ɔwɔ bɛnu nanwo paa. Ɛhene ati wɔ October 15, 1983 ne, ɔbɔle asu. Sɔ mmerɛ ne, ne ɔte abɛɛmaa. Ne yenye gye asɛnga adwuma nanwo paa, yeti oyiele sɛkɛndre sukuu ne, ɔɔyɛle ateepakyelɛniɛ wɔ September 1989 nu.

Mmerɛ bɔ ne Aliemaa Jedele te akwalaa ne, ne ye awofoɛ taa fa ɔne oliema brasua ne kɔ Bɛtɛl maa bɛkɔnea berɛ. Sɔ nzrahwɛ ne maa ɔne oliema ne nye ɔɔgyele adwuma bɔ bɛyɛ ye wɔ Bɛtɛl nanwo. Yeti bɛfa besiele bɛnye so kyɛ bɛkɔɔsõ wɔ Bɛtɛl, na sɔ pɛpɛɛpɛ yeɛ bɛyɛle ɔ. Wɔ September 1990 nu ne, Aliemaa Jedele ɔɔsone wɔ Wallkill Bɛtɛl. Ahyɛaseɛ ne, ne ɔboka bɛbɔ besiesie Bɛtɛl berɛ naso, na siɛ ye bɛmaa ɔɔyɛle adwuma wɔ ɔffis bɔ bɛnea anwonyerɛsalɛ nwo dwirɛ so ne.

Sɔ mmerɛ nanu ne, asafo biemɔ bɔ ne bɛfa Spanish dwudwolɛ bɛyɛ adesua wɔ sɔ porɛ nanu berɛ ne, ne behia mmrandeɛ pee maa bɛbaboka bɛ. Yeti Aliemaa Jedele hɔle sɔ asafo nanu kõ nu ɔɔbokale bɛ, na osuane Spanish dwudwolɛ ne. Nu berɛ nala yeɛ oyiale aliemaa brasua bie bɔ bɛfrɛ ye Damaris ɔ. Né ɔte ateepakyelɛniɛ wɔ bɛ manzini nanu. Siɛ ye begyale, na Damaris ɔɔbokale ye so wɔ Bɛtɛl.

Wɔ 2005 nu ne, befili Bɛtɛl bɛɛneane b’awofoɛ. Sɔ mmerɛ ne, bɛɛyɛle ateepakyelɛfoɛ. Aliemaa Jedele bokale bɛbɔ bekyire nikyee wɔ ateepakyelɛfoɛ sukuu nanu naso. Ne osa boka HLC foɛ, ɔne Kɔmatii bɔ bɛnea maa besisi Ahennie Asa naso.

Wɔ 2013 nu ne, besa bɛtole bɛsa bɛfrɛle Aliemaa Jedele ne ɔye maa bɛhɔle Bɛtɛl, na bɛmaa bɛbokale suasilɛ adwuma bɔ ne ɔkɔso wɔ Warwick ne. Ɛhene si ne, bɛmaa bɛɛsone wɔ Patterson ne Wallkill Bɛtɛl. Aliemaa Jedele yɛle adwuma wɔ LDC ne Hospital Information Services. Wɔ March 2023 nu ne, bɛmaa ɔɔyɛle Soen Kɔmatii ne bokafoɛ. Sɛ ɔnea dwumadie ahoroɛ bɔ bafa bawura yesa ne a, ɔkã kyɛ: “Sɛ bɛfa dwumadie foforɛ bie bewura wɔsa a, ebiaa wɔ kunu kɔtete wɔ. Nakoso sɛ ɔba sɔ a, odikyɛ ɛkae wɔnwo kyɛ Yehowa kɔhora kɔmaa yɛkɔyɛ bɔ okuro biala, yeti sɛ ɛfa wɔnwo to ye so a ɔkɔboka wɔ maa ɛkɔyɛ.”

Aliemaa Rumph koso, bɛwole ye wɔ California, U.S.A. Mmerɛ bɔ ne ɔte akwalaa ne, ne ye maame ayakyi adesua ne asɛnga hɔlɛ, nakoso ɔfale Bible ne hyirehyirele ye. Afei koso, afoɛ biala ne okodi akwamma wɔ ye nana brasua bɔ ɔte Yehowa Danzeniɛ ne berɛ. Ye nana ne bokale ye maa yenye ɔɔgyele nahorɛ nanwo. Yeti onyane afoɛ 13 ne, ɔhane kyɛ okosua Bible ne, na wɔ September 27, 1992 nu ne, ɔbɔle asu. Bɔ ɔyɛ anigye yeɛ ole kyɛ, ye maame sa hyɛle yebo kyɛ ɔkɔ adesua ne asɛnga, na ye baba ne oliemamɔ koso bɛhyɛle yebo kyɛ besua nikye, na bɛbɔle asu.

Mmerɛ bɔ ne Aliemaa Rumph te abrandeɛ ne, ne onwu ye kyɛ bɛbɔ bɛyɛ ateepakyelɛ adwuma ne nye gye paa. Yeti oyiele sɛkɛndre sukuu ne, ɔfale yenwo wurale ateepakyelɛ adwuma nanu wɔ September 1995 nu. Wɔ 2000 nu ne, otu hɔle Ecuador kyɛ ɔkwaaboka maa bɛyɛ asɛnga adwuma ne wɔ dɔ, na ɛberɛ yeɛ oyiale taluwa bie bɔ bɛfrɛ ye Inga ɔ. Ne ɔte ateepakyelɛniɛ bɔ ofi Canada, na siɛ ye begyale. Begya beyiele ne, bɛtenane kuro bie aso wɔ Ecuador berɛ ala, na bɛɛbokale grup bie bɔ ne adawurubɔfoɛ kãa bie yeɛ bɛwɔ nu ɔ. Ɛnnɛ, sɔ grup ne ayɛ asafo.

Bɛmaa Aliemaa Rumph ne ɔye bɛɛyɛle ateepakyelɛfoɛ titire, na siɛ ye bɛɛyɛle manzini adwuma. Wɔ 2011 nu ne, bɛtole asaa bɛfrɛle bɛ maa bɛhɔle Gilead Sukuu bɔ ɔtɔ so 132 ne bie. Beyiele sukuu ne, bɛmaa bɛɛsone wɔ maen ahoroɛ so, na besa benyane yenwo atee biemɔ. Ebie yeɛ ole kyɛ bɛɛyɛle adwuma wɔ Bɛtɛl, na bɛyɛle nzɛmbatrɛlɛ ne manzini adwuma. Aliemaa Rumph sa nyane yenwo atee hyirele nikyee wɔ Ahennie Nanwo Nzɛmbahãnɛfoɛ Sukuu nabo.

COVID-19 anwonyerɛ ne wale ne, bɛmaa Aliemaa Rumph ne ɔye sa hɔle United States. Beedwuli ne, bɛmaa bɛhɔle Wallkill Bɛtɛl, na Aliemaa Rumph lɛle ndeteyɛɛ wɔ Service Department. Ɛhene si ne, besa bɛhɔle Ecuador Bɛtɛl, na bɛmaa Aliemaa Rumph ɔɔbokale Bɛtɛl Kɔmatii naso. Wɔ 2023 nu ne, bɛhɔle Warwick Bɛtɛl, na wɔ January 2024 nu ne, bɛmaa Aliemaa Rumph ɔɔyɛle Soen Kɔmatii ne bokafoɛ. Sɛ ɔnea nekaa ahoroɛ bɔ waasõ ne a, bɔ ɔkã yeɛ ole kyɛ: “Nna nekaa pɔtee bɔ asafo ne kɔfa wɔ kɔhɔ ne, yeɛ okyire kyɛ wɔ dwumadie nanwo hia ɔ. Na mmom aliemaamɔ bɔ ɛkɔɔto bɛ bɔ ɛne bɛ kɔbonu kɔyɛ adwuma ne yeɛ yenwo hia ɔ.”

Sɔ aliemaa nyɔ hemɔ yɛ adwuma serɛ paa, yeti ‘bɛsombo bɛma yɛ.’—Flp. 2:29.