Dɔkotafoɛ Biemɔ Abɔ Amaneɛ Kyɛ, Ɛlɛsaen Sohyial Midia Sɛkye Mmrandeɛ Ne Ndaluwa—Nzu Yeɛ Bible Ne Kã Fa Yenwo Ɔ?

Wɔ May 23, 2023 ne, adɔkotafoɛ biemɔ bɔ bɛwɔ United States fa tole dwaa kyɛ Sohyial midia pira mmrandeɛ ne ndaluwa paa.

• “Ɔwonu, sohyial midia aboka mmrandeɛ ne ndaluwa biemɔ de, nakoso yele adanzeɛ pẽe bɔ okyire kyɛ, sohyial midia amaa mmrandeɛ ne ndaluwa biemɔ anya adwene nu anwonyerɛ, na ɔha bɛ nipadua ne koso.”—Social Media and Youth Mental Health: The U.S. Surgeon General’s Advisory, 2023.

Sɔ nhwehwɛmuɛ bɔ bayɛ ne, ɔmaa yenwu ye kyɛ, kyɛbɔ sohyial midia sɛkye mmabunu ne, odikyɛ yɛmaa yɛ adwene kɔ so paa.

• Ngwalaa bɔ bali afoɛ 12 kosi 15, “bɔ bɛfa nnɔnhwere kɔbo nza bɛkɔ sohyial midia so kyẽa biala ne kora nya adwene nu anwonyerɛ ndɛ, na adwenedwene kora batɔ bɛ so.”

• Ngwalaa bɔ bali afoɛ 14 “bɔ bɛtaa bɛfa sohyial midia bedi dwumaa ne, ɛyɛ a bɛnna yé, bɛteetee bɛ wɔ intanɛt so, benwu bɛnwo kyɛ bɛnzɛ hwee, na benné bɛnwo benni. Mmrasua yeɛ sɔ nikye ne taa to bɛ paa ɔ.”

Nzu yeɛ awofoɛ kɔhora kɔyɛ kɔfa kɔbɔ bɛ mmaamɔ nwo waen kofi sɔ ɔhaw hemɔ nwo ɔ? Bible ne fa yenwo afutue ma.

Nzu yeɛ awofoɛ kɔhora kɔyɛ ɔ?

Nwu bɔ odikyɛ ɛyɛ ɔ. Sɛ ɛte awofoɛ a, susu ɔhaw ahoroɛ bɔ ɔwɔ sohyial midia so nanwo, na nea kyɛ aso ɛkɔmaa wɔ mmaa nemɔ kɔfa koli dwumaa anaa.

• Bible nu dwirɛ: “Tete akwalaa ma onwu atẽe pá bɔ odikyɛ ɔfa so ɔ.”—Anyandera 22:6.

• Sɛ ɛpena yenwo dwirɛ pẽe a kenga sɔ dwirɛ he: “Should My Child Use Social Media?”

Sɛ ɛkɔma atẽe maa ɛwa kɔhɔ sohyial midia so a, dimoa nwu ɔhaw ahoroɛ bɔ ɔwɔ berɛ ne, na má wɔnye li nningyein bɔ ɔtaa yɛ ye wɔ intanɛt so ne sĩ. Ɛkɔyɛ ye sɛ́?

Bɔ wɔ mmaa nemɔ nwo waen. Boka ɛwa ne maa onwu nningyein tɛ́ɛ bɔ ɔwɔ intanɛt so ne, na ɔhwẽ yenwo fi yenwo.

• Bible nu dwirɛ: “Na adwamanbɔlɛ, bra fĩɛ amukoraa anaa anyeboroborolɛ nwo dwirɛ po, ɔnzɛ kyɛ ofité ɛmɔ nu. . . nnɛmɔmaa nyanzoen dwirɛ, ngwaseasɛm anaa aseresɛm bɔ ɔmvata nwo dwirɛ fité ɛmɔ nu.”—Ɛfesofoɛ 5:3, 4.

• Sɛ ɛpena kyɛ enwu kyɛbɔ ɛkɔyɛ ye a, kenga sɔ dwirɛ he: “Teaching Your Teenager Social Media Safety.”

Hyehyɛ yenwo mmraa. Kyɛ nneasoɛ ne, má wɔ mmaa nemɔ nwu mmerɛ bɔ odikyɛ bɛkɔ sohyial midia so, ɔne mmerɛ dodoɔ bɔ odikyɛ bedi ye wɔ berɛ ɔ.

• Bible nu dwirɛ: “Yiti ɛ́mɔnea ɛmɔ nwo yé wɔ atẽe bɔ ɛmɔnate so nwo, . . . ɛmɔnea ɛmɔ mmerɛ so yé.”—Ɛfesofoɛ 5:15, 16.

• Vidio bɔ yeɛ ole, Nea Ye Wɔ Sohyial-Nɛtwɛk So ne, ɛkɔhora kɔfa kɔboka ɛwa ne maa okonwu bɔ yeti yeɛ odikyɛ ɛhyehyɛ mmraa ma ye ɔ.