Kyɛbɔ Ewienu Ayɛ Hye Ɛlɛsaen Ne—Nzu Yeɛ Bible Ne Kã Fa Yenwo Ɔ?

Ɛlɛsaen, ewienu ayɛ hye paa wɔ nekaa biemɔ wɔ ewiase amukoraati, na ɛhe amaa atoyerɛngyɛm pẽe asisi. Wɔde, tie bɔ ɔkɔso wɔ nekaa ahoroɛ biemɔ ɔ:

• “Kɔyɛ afoɛ 174 ɛhe yeɛ bɛhyɛle yebo kyɛ, odwu June biala a kyɛbɔ ewienu si yɛ hye ne, bɛkɔhworɔ bɛkɔto berɛ ɔ, na afoɛ he deɛ ne tra yemu.”—National Oceanic and Atmospheric Administration, U.S. Department of Commerce, July 13, 2023.

• “Sɛ ɛkɔ Italy, Spain, France, Germany, ɔne Poland a, ewienu ayɛ hye wɔ berɛ paa. Na supɔ bɔ bɛfrɛ ye, Sicily ɔne Sardinia naso po de, kyɛbɔ nningyein si kɔ ne, annea ɔkɔhora kɔyɛ hye alaa koodwu 48°C [118°F]. Ɛhe bie silli llé wɔ Europe.”—European Space Agency, July 13, 2023.

• “Kyɛbɔ ewienu asi ayɛ hye ne, ɔkɔmaa aseɛ naso koso kɔyɛ hye. Sɛ ɔba sɔ a, ɔkɔmaa nzue kɔtɔ paa, na okoyi kɔsɛkye nningyein.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

Aso sɛ ɛte sɔ amaneɛbɔ hemɔ a, ɔmaa okunu tete wɔ hɔ? Yede, nea bɔ Bible kã fa ɛhe anwo ɔ.

Kyɛbɔ ewienu asi ayɛ hye ne, aso né Bible ne ahã kyɛ nikyee bie bɔ ɔte sɔ kosisi hɔ?

Yoo. Yesu hãne kyɛ, sɛ ewiase he kɔ ye ayieleɛ a, yekonwu “nningyein suronyisuronyi ne nzɛngyerɛnneɛ mbiri mbiri.” (Luka 21:11; Good News Translation) Ewienu bɔ wayɛ hye ɛlɛsaen ne koso boka sɔ nningyein bɔ Yesu hãne kyɛ okosisi naso. Ɛhe amaa mmeni pẽe suro kyɛ okodwu nekaa bie ne, annea a ebiala ngɔhora ngɔtena aseɛ naso kõ.

Yeti ɔte amba kyɛ, aseɛ he kɔsɛkye koraa bɔ ebiala ngɔhora ngɔtena so kõ ɔ?

Ɔtte sɔ koraa. Ofikyɛ Nyameɛ bɔle aseɛ ne kyɛ sona tena so daa. Yeti ɔngɔma ebiala ngɔsɛkye ye llé. (Edwein 115:16; Nworɛ Dwirɛhanɛniɛ 1:4) Nyameɛ ahyɛ bɔ kyɛ ‘ɔkɔsɛkye bɛbɔ bɛsɛkye aseɛ’ ne.—Nyekyire 11:18.

Bible ne maa yenwu kyɛ Nyameɛ le tumi, yeti ɔngɔmaa nikyee biala ngɔsɛkye aseɛ ne. Má yɛnea bɔ yeti yeɛ yɛkã sɔ ɔ:

• Nyameɛ “mane mvrama piri ne yɛle konn, na ɛpo asorɔkye ne yɛle dinn.” (Edwein 107:29) Ɛhe kyire kyɛ, nningyein bɔ ɔkɔhora kɔsɛkye aseɛ ne, Nyameɛ le tumi bɔ ɔkɔhora kɔfa kosi yenoa ɔ. Ɛhe ati, ɔngɔhyɛ biala, mvrama ne nzue pirikua bɔ ɔtɔ sɛkye mmenia nningyein ne, ebie ngosi kõ.

• “Ɛba bapasa aseɛ ye anwo, na eguagua so nzue, ɛmaa nningyein paa ba so.” (Edwein 65:9) Ɛhe kyire kyɛ, Yehowa kosiesie aseɛ naso maa ɔkɔyɛ Paradise.

Sɛ ɛpena kyɛ enwu kyɛbɔ aseɛ ne kɔyɛ Paradise nanwo dwirɛ pẽe a, kenga edwirɛ bɔ bato ye dumaa kyɛ, “Who Will Save the Earth?” ne.