Sɛ Ɛbrɛ Wɔnwo Ase A, Ɔkɔboka Wɔ Maa Ekonya Aboterɛ

1. Sɛ yɛwɔ adwuma nu anaa sukuu nu a, edwirɛ beni yeɛ ebiemɔ kora bisa yɛ ɔ?

SƐ EBIE bɔ ɛne ye kɔ sukuu, anaa ɛne ye yɛ adwuma bisa edwirɛ bie fa wɔ gyidie nwo a, aso ɛyɛ a wɔ kunu tete wɔ anaa? Yenu pẽe wɔ berɛ a, sɔ yeɛ ɔto yɛ ɔ. Nakoso sɛ ebie bisa edwirɛ bɔ ɔte sɔ a, ɔmaa yenwu bɔ ɔwɔ sona ne tianu, ɔne bɔ ode di ɔ. Ɛhẽne boka yɛ maa yenya yenwo atẽe yɛfa yɛkã nzɛmba ne bie yekyire sona ne. Ɔtɔ mmerɛ bie a, atẽe bɔ ebiemɔ fa so bisa edwirɛ bie fa yɛ gyidie nwo ne, ɛyɛ a né bɛpena kyɛ bɛne yɛ su aporowaa. Nakoso sɛ ɔba sɔ a, ɔnzɛkyɛ yɛmaa ɔyɛ yɛ nwanwa. Ebiemɔ wɔ berɛ a, edwirɛ bɔ ɔtte nahorɛ bɔ bate bafa Yehowa Adanzefoɛ nwo nati, yeɛ ɔmaa bebisa yɛ dwirɛ wɔ sɔ atẽe naso ɔ. (Aso. 28:22) Nikyee foforɛ bɔ ɔmaa bɛyɛ sɔ yeɛ ole kyɛ, yɛte “ayieleɛ mmerɛ” nanu. Ɛhene ati, mmeni pẽe nde dwirɛ bo, na “bɛ ti anu te awosii.”—2 Tim. 3:​1, 3.

2. Nzuati yeɛ anwobrɛaseɛ nwo hia ɔ?

² Ebia ekobisa wɔnwo kyɛ, ‘Sɛ ebie bisa me gyidie nwo dwirɛ bie wɔ atẽe bie aso bɔ ɔpena kyɛ ɔne me su aporowaa maa mefɛ yaa a, nzu yeɛ ɔkɔboka me maa ngonya aboterɛ ɔ?’ Sɛ ɔba sɔ a, subaen bɔ ɔkɔhora kɔboka wɔ yeɛ ole anwobrɛaseɛ. Sona bɔ ɔbrɛ yenwo ase ne, sɛ ebie kã edwirɛ bie maa ɔyɛ ye yea po a, ɔmvɛ yaa, na mmom ɔhyɛ yenwo so. (Any. 16:32) Nakoso, yɛkã ye, ɔlla ase kyɛ ekonya sɔ subaen he ɔ. Yede ɔkɔyɛ sɛɛ né ahora anya anwobrɛaseɛ? Na sɛ ebie bisa wɔ gyidie nwo dwirɛ wɔ atẽe bie so bɔ ɔpena kyɛ ɔne wɔ su aporowaa a, sɛɛ yeɛ anwobrɛaseɛ kɔboka wɔ maa ekonya sona nanwo aboterɛ ɔ? Afei sɛ ɛte awofoɛ a, ɛkɔyɛ sɛɛ né aboka wɔ mmaamɔ maa babrɛ bɛnwo ase mmerɛ bɔ bekyirekyire bɛ gyidie nu bekyire ebie ne? Ɛmɔma yɛnea bɔ ɔkɔhora kɔboka yɛ ɔ.

BƆ ƆKƆBOKA WƆ MAA EKONYA ANWOBRƐASEƐ Ɔ

3. Sɛ ebie brɛ yenwo ase a, ongyire kyɛ wagyimi. Nzuati ɔ? (2 Timoteo 2:​24, 25)

³ Sɛ ebie brɛ yenwo ase a, ɛhẽne ngyire kyɛ wagyimi. Ofikyɛ sɛ ebie brɛ yenwo ase a, ɛhẽne yeɛ ɔboka ye maa sɛ ɔhaw bie bɔ enu yɛ se ba a, ɔkora gyina ye noa ɔ. Subaen bɔ Nyameɛ “Sunzum” ne maa yenya ne, anwobrɛaseɛ bokaso. (Gal. 5:​22, 23) Greek dwirɛ bɔ bɛfa behyirehyirele “anwobrɛaseɛ” nu ne, ɔtɔ mmerɛ bie a, né bɛfa begyina berɛ bɛma pɔngɔ bɔ yenye so yɛ hye bɔ bafa nyamaa basɔ yenoa, kyɛbɔ ɔkɔyɛ a, bɛkɔhora bɛkɔtena ye so ɔ. Ɔwɔ nu kyɛ sɔ nyamaa ne bɔ bafa basɔ pɔngɔ ne noa ne, ɔkora maa sona tena ye so, nakoso ɛhẽne mma kaka ne anwoserɛ so nde. Yede, yɛ bɔ yɛte sona ne koso, yɛkɔyɛ sɛɛ na yahora yabrɛ yɛnwo ase, na yasa yanya anwoserɛ yafa yagyina yɛ haw noa? Nahorɛ dwirɛ yeɛ ole kyɛ, yɛngɔhora yɛngɔfa yɛ bɔbɔ y’anwoserɛ yɛngɔyɛ sɔ, sana yɛbɔ Nyameɛ mbaeɛ kyɛ ɔfa ye honhom ne boka yɛ, na yɛhora yenya sɔ subaen bɔ ɔyɛ nyemene he. Aliemaamɔ pẽe yeɛ bahora bayɛ sɔ ɔ. Ebie yeɛ ole kyɛ, sɛ ebie kã edwirɛ bie bɔ ɔkɔmaa bɛkɔfɛ yaa a, bɛbrɛ bɛnwo ase na benya sɔ sona nanwo aboterɛ. Ɛhẽne amaa mmeni pẽe anya Yehowa Adanzefoɛ nwo adwene pá. (Kenga 2 Timoteo 2:​24, 25.) Yede, ɔkɔyɛ sɛɛ na wɔ koso, ahora anya sɔ subaen pá he bie?

4. Kyɛbɔ né Yisake brɛ yenwo ase ne, nzu yeɛ yɛkɔhora yekosũa yekofi nu ɔ?

⁴ Bɔ yeti yeɛ yenwo hia kyɛ yɛbrɛ yɛnwo ase ne, yenwu yenwo dwirɛ pẽe wɔ Bible nanu. Enu kõ yeɛ ole bɔ ɔfa Yisake nwo ne. Mmerɛ bɔ Yisake ɔɔtenane Filistifoɛ aseɛ so wɔ Gyeraa ne, né Filistifoɛ nemɔ nye boro ye. Yeti abura bɔ ye baba Abraham tutuli ne, Filistifoɛ nemɔ fale nnɛterɛ tuatuale ye mukoraati. Kyɛ ahãa Yisake ne bɛ kɔhõ ne, wannyɛ sɔ, na mmom ɔne ye abusũa tu fili berɛ, na beetuli abura ne bie wɔ nekaa foforɛ. (Gye. 26:​12-18) Ɛberɛ koso, Filistifoɛ nemɔ hãne kyɛ nzue ne te bɛ deɛ. Nakoso ɛhe mukoraati nu ne, Yisake yakyili nu mane bɛ fahyirele kyɛ okuro asomdwee. (Gye. 26:​19-25) Yede, nzu yeɛ ɔbokale Yisake maa ɔbrɛle yenwo ase, ɔmva yenwo kyɛ Filistifoɛ nemɔ bɔle mmɔden kyɛ bɛkɔyɛ nikyeebie maa ɔkɔfɛ yaa ne? Bɔ ɔbokale ye yeɛ ole kyɛ, osuesũane ye baba Abraham, ɔne ye maame Sara bɔ né ɔte ebie bɔ “odwo, na ɔbrɛ yenwo ase” ne.—1 Pet. 3:​4-6; Gye. 21:​22-34.

5. Nneasoɛ beni yeɛ okyire kyɛ, Kristofoɛ bɔ bɛte awofoɛ ne kɔhora kɔboka bɛ mmaamɔ maa bekonwu bɔ yeti yeɛ yenwo hia kyɛ bɛbrɛ bɛnwo ase ɔ?

⁵ Awofoɛ bɔ ɛmɔte Kristofoɛ, ɛmɔ koso ɛmɔkɔhora bɛkɔboka ɛmɔ mmaamɔ maa bekonwu bɔ yeti yeɛ yenwo hia kyɛ bɛbrɛ bɛnwo ase ɔ. Maxence te abrandeɛ bɔ wali afoɛ 17. Ɛmɔma yɛnea bɔ y’awofoɛ yɛ fa bokale ye ɔ. Sɛ né Maxence wɔ sukuu nu, anaa asɛnga nu a, né ɔtaa yia mmenia bɔ bɛkã edwirɛ bie bɔ ɔkɔmaa ɔkɔfɛ yaa ɔ. Nakoso Maxence awofoɛ tole bɛ boase bokale ye maa onwuni kyɛbɔ ɔkɔbrɛ yenwo ase ɔ. Bɛhãne kyɛ, “Kesaalae, Maxence aate yebo kyɛ, sɛ bɛkã kyɛ ebie nwo yɛ se a, yeɛ ole ebie bɔ sɛ ebie yɛ nikyeebie maa ɔfɛ yaa po a, ɔbɔ mmɔden kyɛ ɔkɔbrɛ yenwo ase, na wahyɛ yenwo so ɔ.” Bɔ ɔyɛ anigye yeɛ ole kyɛ kesaalae, Maxence te ebie bɔ ɔbrɛ yenwo ase paa ɔ.

6. Sɛɛ yeɛ mbaeɛ kɔboka yɛ maa yɛkɔhora yɛkɔbrɛ yɛnwo ase ɔ?

⁶ Sɛ odwu mmerɛ bie a, ebiemɔ kora kã edwirɛ bie bɔ ɔkɔmaa yɛkɔfɛ yaa ɔ. Ebie yeɛ ole kyɛ, bɛkã edwirɛ bie bɔ ɔttemayé bɛfa Nyameɛ dumaa nanwo, anaakyɛ bedwudwo betia Bible ne. Sɛ ɔba sɔ a, nzu yeɛ yɛkɔhora yɛkɔyɛ ɔ? Odikyɛ yɛbɔ mbaeɛ yɛsrɛ Yehowa kyɛ ɔfa ye honhom krongron ne boka yɛ, kyɛbɔ ɔkɔyɛ a, yɛkɔhora yɛkɔto yɛboase yɛne sona ne yekodwudwo ɔ. Afei koso, ebia mmerɛ bɔ sona ne hãne sɔ dwirɛ ne, yɛne ye andwudwo yé. Sɛ ɔba sɔ a, nzu yeɛ yɛkɔhora yɛkɔyɛ ɔ? Yɛkɔhora yɛkɔbɔ Yehowa mbaeɛ kyɛ ɔboka yɛ, kyɛbɔ ɔkɔyɛ a kyẽa foforɛ, sɛ ebie kã edwirɛ bɔ ɔte sɔ a, yɛkɔhora yɛkɔto yɛboase yɛkɔma ye mmuayɛɛ ɔ. Sɛ yɛyɛ sɔ a, Yehowa koso kɔfa ye honhom krongron ne kɔboka yɛ maa yɛkɔhora yɛkɔhyɛ yɛnwo so, na yabrɛ yɛnwo ase.

7. Sɛ yɛfa tworɔnzɛm bie yɛto yɛ tianu a, sɛɛ yeɛ ɔkɔboka yɛ maa yɛkɔhyɛ yɛnwo so, mmerɛ bɔ ebie ahã edwirɛ bie maa wayɛ yɛ yea ne? (Anyandera 15:​1, 18)

⁷ Edwirɛ biemɔ wɔ Bible nanu bɔ ɔkɔboka yɛ maa yɛkɔhora yɛkɔhyɛ yɛnwo so, mmerɛ bɔ ebie ahã edwirɛ bie maa wayɛ yɛ yea ne. Yeti, odikyɛ yesũa sɔ dwirɛ nemɔ. Sɛ yɛyɛ sɔ a, Nyameɛ honhom ne kɔhora kɔboka yɛ maa yɛkɔkae sɔ tworɔnzɛm ne, kyɛbɔ ɔkɔyɛ a, yɛkɔhora yɛkɔhyɛ yɛnwo so ɔ. (Yoh. 14:26) Ebie yeɛ ole kyɛ, sɛ yɛnea Anyandera nwomaa nanu a, yenwu edwirɛ ahoroɛ bɔ ɔte sɔ ne bie wɔ nu, bɔ ɔkɔhora kɔboka yɛ maa yɛkɔbrɛ yɛnwo ase ɔ. (Kenga Anyandera 15:​1, 18.) Afei koso edwirɛ bɔ ɔwɔ Anyandera nwomaa nanu ne, osa maa yenwu kyɛ sɛ ebie yɛ nikyeebie maa yɛfɛ yaa, na yenya sona nanwo aboterɛ a, ɔboka yɛ bɔbɔ.—Any. 10:19; 17:27; 21:23; 25:15.

SƐ YELE NDEASEƐ A, ƆBOKA YƐ MAA YƐBRƐ YƐNWO ASE

8. Sɛ ebie bisa yɛ dwirɛ bie fa yɛ gyidie nwo a, nzuati yeɛ odikyɛ yɛto yɛ boase yenwu bɔ yeti yeɛ sona ne abisa sɔ dwirɛ ne ɔ?

⁸ Sɛ yele ndeaseɛ a, ɛhẽne koso kora boka yɛ maa yɛhyɛ yɛnwo so. (Any. 19:11) Sona bɔ ole ndeaseɛ ne, sɛ ebie kã edwirɛ bie bɔ ɔttemayé fa ye gyidie nwo a, ɔkora hyɛ yenwo so. Yeti odikyɛ yɛkae kyɛ sɛ ebie bisa yɛ dwirɛ bie a, nna mmerɛ mukoraati yeɛ yɛkɔhora yekonwu bɔ yeti yeɛ sona ne abisa sɔ dwirɛ ne ɔ. Ebie yeɛ ole kyɛ, ɔtɔ mmerɛ bie a, ebia bɔ sona ne ate afa yɛnwo nati yeɛ wamaa obisa yɛ sɔ dwirɛ ne ɔ. Yeti sɛ ebie bisa wɔ dwirɛ bie a, to wɔ boase nwu bɔ yeti yeɛ wabisa wɔ sɔ dwirɛ ne, kora né ama yenwo mmuayɛɛ.—Any. 16:23.

9. Mmerɛ bɔ né Gideon ne Efraimfoɛ nemɔ dwudwo ne, nzu yeɛ ɔyɛ fahyirele kyɛ ole ndeaseɛ, na ɔbrɛ yenwo ase ɔ?

⁹ Mmerɛ bie bɔ né Yisraelfoɛ ne bɛ pɔfoɛ kwaahõ ne, Gideon amvrɛ Efraimfoɛ nemɔ. Yeti mmerɛ bɔ Efraimfoɛ nemɔ tele yenwo dwirɛ ne, bɛfɛle Gideon so yaa paa. Yede nzu yeɛ ɔmaa bɛyɛle sɔ ne? Aso né b’adwene yɛ bɛ kyɛ, Gideon amva obuo amma bɛ hɔ? Ɔmva yenwo ne adwene biala bɔ né bele ye ne, Gideon tole ye boase ne bɛ dwudwole. Nzu yeɛ ofili nu wale ɔ? Atẽe bɔ Gideon fale so ne bɛ dwudwole ne maa “b’ahone bɔ wahu ne tɔle nzue nu,” na ɔmaa edwirɛ naso pɛle.—Mae. 8:​1-3.

10. Sɛ ebie bisa yɛ gyidie nwo dwirɛ bie a, nzu yeɛ ɔkɔboka yɛ maa yekonwu kyɛbɔ yɛkɔma ye mmuayɛɛ ɔ? (1 Petro 3:15)

¹⁰ Ɔtɔ mmerɛ bie a, bɛbɔ yɛne bɛ yɛ adwuma anaa bɛbɔ yɛne bɛ kɔ sukuu ne, bɛkɔhora bekobisa yɛ bɔ yeti yeɛ yɛmva yɛnwo yenwura abrabɔ bie nu nwo dwirɛ. Sɛ ɔba sɔ a, odikyɛ yɛbɔ mmɔden yekyirekyire nu yekyire bɛ. Nakoso odikyɛ yɛyɛ ye wɔ obuo nu. (Kenga 1 Petro 3:15.) Yeti sɛ ebie bisa yɛ dwirɛ bie a, ɔnzɛkyɛ yenya adwene kyɛ sona ne pena kyɛ odwudwo tia yɛ, anaa ɔpena kyɛ ɔne yɛ su aporowaa. Na mmom odikyɛ yenwu ye kyɛ edwirɛ bɔ sona ne abisa yɛ ne, ɔkɔmaa yekonwu bɔ odé di, na yahora yaboka ye. Yeti ɔmva yenwo ne atẽe biala bɔ sona ne kɔfaso kobisa yɛ dwirɛ ne, odikyɛ yenya sona nanwo aboterɛ, na yɛma ye mmuayɛɛ. Sɛ yɛyɛ sɔ a, ebia ɔkɔhora kɔsesã adwene bɔ ɔttemayé bɔ sona ne le ye wɔ yɛnwo ne. Sɛ atẽe bɔ sona ne fale so bisale edwirɛ ne kyire kyɛ ommu yɛ po a, odikyɛ yɛbɔ mmɔden kyɛ yekonya yenwo aboterɛ.—Rom. 12:17.

11-12. (a) Sɛ ebie bisa yɛ dwirɛ bie a, nzu yeɛ odikyɛ yedimoa yesusu yenwo kora né yama ye mmuayɛɛ ɔ? (Nea foto ne koso.) (b) Sɛ ebie bisa yɛ dwirɛ bie a, yenwo atẽe beni yeɛ ɔkɔhora kobukyé kɔma yɛ ɔ? Kyirekyire nu.

¹¹ Sɛ ebie bɔ ɛne ye yɛ adwuma bisa wɔ bɔ yeti yeɛ Yehowa Adanzefoɛ nni b’awoda a, odikyɛ ebisa wɔnwo kyɛ: Aso sona ne adwene yɛ ye kyɛ Yehowa Adanzefoɛ ngye bɛnye hɔ? Anaa ebia osusu kyɛ ɔnate kyɛ enni awoda nati, ɔkɔsɛkye bɛbɔ ɛne bɛ yɛ adwuma ne afĩa anaa? Ɔba sɔ a, ɛkɔhora kɔmaa sona ne konwu ye kyɛ, wɔnye sɔ mmɔden bɔ ɔbɔ kyɛ ɔkɔmaa asomdwee kɔtena adwuma nu berɛ ne, na sɔ ala yeɛ wɔ koso ɛpena ye ɔ. Edwirɛ bɔ ɔte sɔ bɔ ɛkɔhã ne kɔhora kɔmaa sona ne ahõne kɔtɔ ye kunu, na okobukyé yenwo atẽe maa ɛkɔboka sona ne maa okonwu bɔ Bible ne kã fa ebie awoda bɔ okoli nanwo ɔ.

¹² Sɛ ebie bisa yɛ edwirɛ foforɛ bie a, yɛkɔhora yɛkɔfa sɔ atẽe nala so yɛkɔma ye mmuayɛɛ. Ebia ebie bɔ ɛne ye kɔ sukuu kɔhora kɔhã kohyire wɔ kyɛ, adwene bɔ Yehowa Adanzefoɛ le ye wɔ brienzua ne brienzua bɔ bɛda, ɔne brasua ne brasua bɔ bɛda nwo ne, ɔttemayé yeti odikyɛ bɛsesã ye. Ebia bɔ ɔmaa ɔkã sɔ ne yeɛ ole kyɛ, bɔ yeti yeɛ Yehowa Adanzefoɛ nné sɔ abrabɔ ne bɛndo nu ne, ɔnde yebo. Anaa ebia né ye damvo bie anaa ye busũaniɛ bie bɔ sɔ bra ne bie, yeti yeɛ ɔmaa ɔkã sɔ anaa? Aso ye adwene yɛ ye kyɛ mmenia bɔ bɛbɔ sɔ bra ne, Yehowa Adanzefoɛ nguro bɛ dwirɛ hɔ? Sɛ yebisa yɛnwo sɔ dwirɛ hemɔ a, ɔkɔmaa yɛkɔhora yɛkɔboka sona ne maa okonwu kyɛ, Yehowa Adanzefoɛ kuro ebiala dwirɛ, na yenwo atẽe bɔ sona biala le ye kyɛ osi ye bɔbɔ ye gyinayɛɛ ne koso, yedé yɛto nu.b (1 Pet. 2:17) Afei yɛkɔhora yekohyirehyire nu yekohyire ye kyɛ, sɛ ebie fa Bible nanu dwirɛ bɔ ye bra a, ɔboka ye bɔbɔ.

13. Sɛ ebie kã kyɛ bɛbɔ bedé Nyameɛ bedi ne, bɛnze nworɛ a, ɛkɔyɛ sɛɛ né aboka ye?

¹³ Sɛ ebie kã kyɛ ɔne yɛ nyɛ adwene wɔ edwirɛ bie nwo a, ɔnzɛkyɛ ɛberɛ nala yenya adwene kyɛ, ɔpena kyɛ ɔne yɛ su aporowaa nati yeɛ ɔkã sɔ ɔ. Mmom odikyɛ yenya yenwo aboterɛ. (Tito 3:2) Fa ye kyɛ ebie bɔ ɛne ye kɔ sukuu ahã ahyire wɔ kyɛ, ebiala bɔ odé di kyɛ Nyameɛ wɔ berɛ ne, ɔnze nworɛ. Ɔba sɔ a, nzu yeɛ ɛkɔyɛ ɔ? Aso ekonya adwene kyɛ sona ne asũa saens nwo dwirɛ wahɔ sĩɛ, na ɛhẽne ati yeɛ ɔkã sɔ ne anaa? Ebia né ɔtte sɔ, na mmom edwirɛ bɔ mmenia ahã maa wate nati yeɛ ɔkã sɔ ne. Kyɛ ahãa ɛne ye kosu sɔ dwirɛ nanwo aporowaa ne, bɔ mmɔden kyɛ ɛkɔma ye nwomaa bie maa ɔkɔkenga. Afei koso, ɛkɔhora kɔmaa ɔkɔhɔ jw.org, na waasũa nningyein bɔ Nyameɛ abɔ nanwo nikyee wɔ berɛ. Sɛ ɛyɛ sɔ a, ebia nziɛen sona ne nye kɔgye yenwo kyɛ, ɔne wɔ kɔbɔ nwomaa bie bɔ ɔkengale, anaa vidio bie bɔ ɔneane wɔ berɛ nanwo ngɔmmɔ. Yeti sɛ ɛto wɔ boase, na ɛne sona ne dwudwo obuo nu a, ebia ɛhẽne kɔmaa yenye kɔgye yenwo kyɛ okosũa Bible ne.

14. Sɛɛ yeɛ Niall fale yɛ wɛbsait ne bokale ebie bɔ ɔne ye kɔ sukuu maa ɔsesãne adwene bɔ ole ye wɔ Yehowa Adanzefoɛ nwo ne ɔ?

¹⁴ Abrandeɛ bie bɔ oli Niall fale yɛ wɛbsait ne bokale bɛbɔ ɔne bɛ kɔ sukuu ne maa benwuni kyɛ, bɔ mmenia kã fa Yehowa Adanzefoɛ nwo ne, ɔtte nahorɛ. Niall hãne kyɛ, “Bɛbɔ me ne bɛ kɔ sukuu ne, benu kõ hãhyirele me kyɛ Bible ne bɔ mesũa ne, enu dwirɛ ne tte nahorɛ. Ɛhẽne ati yeɛ ɔmaa edwirɛ bɔ bɛbɔ basũa saens nwo nikyee ne kã ne, menné mendo nu ne.” Ɔwɔ nu kyɛ abrandeɛ ne amma Niall atẽe maa wangyirekyire edwirɛ nanu wangyire ye de, nakoso Niall hãhyirele ye kyɛ ɔhɔ jw.org so, na ɔhɔ nekaa bɔ yenwa “Nyansahu Ne Bible,” na okonya bɔ ɔkã nanwo dwirɛ pẽe wɔ berɛ. Niall damvo ne hɔle berɛ ɔɔkengale edwirɛ ahoroɛ bɔ ɔwɔ berɛ ne bie. Yeti nziɛen, ɔmane Niall atẽe maa ɔne ye bɔle bɔ ɔyɛle a ngõa wale nanwo ngɔmmɔ. Wɔ koso, sɛ ebie bisa wɔ dwirɛ bie na enya yenwo aboterɛ a, ɔkɔhora kobukyé yenwo atẽe maa ekoli ye adanzeɛ.

ƐMƆLIMOA BƐBOA ƐMƆ NWO

15. Sɛɛ yeɛ awofoɛ kɔhora kɔboka bɛ mmaamɔ maa bɛkɔto bɛ boase bɛkɔma ebie mmuayɛɛ, mmerɛ bɔ wabisa bɛ gyidie nwo dwirɛ ne?

¹⁵ Awofoɛ kɔhora kɔboka bɛ mmaamɔ maa bekonwu kyɛbɔ sɛ ebie bisa bɛ edwirɛ bie bɔ ɔfa bɛ gyidie nwo a, bɛkɔhora bɛkɔma sona ne mmuayɛɛ ɔ. (Yak. 3:13) Awofoɛ biemɔ wɔ berɛ a, sɛ bɛyɛ abusũa sõen a, bedimoa bɛne bɛ mmaamɔ susu edwirɛ ahoroɛ bɔ ɔkɔhora kosi ne biemɔ nwo. Bɔ bɛyɛ ne bie yeɛ ole kyɛ, edwirɛ ahoroɛ bɔ ɔkɔhora kosi wɔ sukuu nu ne, bedimoa bekyire bɛ mmaa nemɔ atẽe bɔ bɛkɔfa so bɛkɔma yenwo mmuayɛɛ ɔ. Afei koso, bɛboka bɛ maa benwu kyɛbɔ bekonya mmenia bɔ bebisa sɔ dwirɛ nemɔ nwo aboterɛ ɔ.—Nea alaka bɔ yenwa, “Edwirɛ Bɔ Mmenia Kɔhora Kobisa Ne, Sɛ Ɛmɔ Dimoa Besusu Yenwo A, Ɔkɔboka W’abusũa Ne.”

16-17. Sɛ awofoɛ ne bɛ mmaamɔ dimoa susu edwirɛ ahoroɛ bɔ ɔkɔhora kosi nanwo a, sɛɛ yeɛ ɔkɔboka ngwalaa nemɔ ɔ?

¹⁶ Sɛ Kristofoɛ dimoa susu edwirɛ ahoroɛ biemɔ bɔ ɔkɔhora kosi nanwo a, ɔkɔboka bɛ maa sɛ ebie bisa bɛ gyidie nwo dwirɛ a, bɛkɔhora bekohyirehyire yenu. Afei koso, bɛyɛ sɔ a, ɔkɔboka bɛ maa bɛ gyidie kɔyɛ se. Edwirɛ bɔ ɔba ndoɔtoasoɛ bɔ ɔwɔ jw.org so bɔ ye dwirɛti yeɛ ole “Mmabun Bisa Sɛ“ bɔ ɔwɔ Twi nu ne, edwirɛ bie wɔ berɛ bɔ yenwa “Mmabun Dwumadi Nkrataa.“ Sɔ dwirɛ ne kɔboka mmrandeɛ ne ndaluwa maa bɛ kɔboa bɛnwo bekosie, na ɔkɔmaa bɛ gyidie kɔyɛ se. Afei koso, ɔmaa benwu kyɛbɔ bɛkɔma mmenia mmuayɛɛ mmerɛ bɔ babisa bɛ gyidie nwo dwirɛ ne. Sɛ abusũa ne bɔ nu susu sɔ dwirɛ ahoroɛ bɔ ɔwɔ berɛ nanwo a, ɔkɔmaa bekonya aboterɛ bekohyirehyire edwirɛ bɔ ɔfa bɛ gyidie nwo nanu bekohyire mmenia.

¹⁷ Abrandeɛ bie bɔ bɛfrɛ ye Matthew hãne kyɛbɔ y’awofoɛ bokale ye ɔ. Bɔ né y’awofoɛ yɛ yeɛ ole kyɛ, edwirɛ bɔ bɛnea a, bɛkɔhora bekobisa Matthew wɔ sukuu nu ne, né bedimoa besusu yenwo wɔ abusũa sõen bo. Matthew hãne kyɛ: “Ɔnate sɔ nikyee bɔ né m’awofoɛ yɛ fa boka me nati, sɛ mekɔ sukuu na ebie bisa me sɔ dwirɛ bɔ yasusu yenwo ne a, na mekora mekyirekyire yenu bɔ menzuro ɔ. Ɛhẽne koso maa menya mmenia nwo aboterɛ mmerɛ bɔ babisa me dwirɛ bie ne.”

18. Sɛ yɛfa edwirɛ bɔ ɔwɔ Kolosefoɛ 4:6 ne yɛyɛ adwuma a, nzu yeɛ ɔkɔhora kofi nu kɔwa ɔ?

¹⁸ Ɔmva yenwo ne atẽe biala bɔ yɛkɔfa so yekohyirehyire bɔ yedé yedi nanu yekohyire mmenia ne, nná bɛ mukoraati yeɛ bɛnye kɔgye yenwo kyɛ bekotie yɛ ɔ. Nakoso sɛ yɛbrɛ yɛnwo ase na yɛmaa yɛnoa dwudwolɛ yɛ fɛ a, ɔkɔmaa ebiemɔ kotie yɛ. (Kenga Kolosefoɛ 4:6.) Yɛkɔhora yɛkɔfa yɛ gyidie nwo dwirɛ bɔ yɛkɔhã yekohyire mmenia ne yɛkɔtoto mmenia nyɔ bie bɔ bɛbɔ bɔɔl nwo. Sɛ bɛkɔhora bɛkɔbɔ bɔɔl ne maa ɔkɔyɛ kama a, sana bɛto bɛ boase bɛpaase bɔɔl ne bɛma bɛnwo. Sɔ ala yeɛ sɛ yɛbrɛ yɛnwo ase, na yenya mmenia nwo aboterɛ mmerɛ bɔ yɛne bɛ dwudwo ne a, ɔkɔmaa bɛnye kɔgye yenwo kyɛ bekotie yɛ, na ɛhẽne kobukyé yenwo atẽe maa yekoli b’adanzeɛ. Nakoso, sɛ yenwu ye kyɛ sona ne ahyɛ da kyɛ ɔne yɛ kosu aporowaa, anaa ɔkɔgoro yɛnwo a, ɛhẽne de odikyɛ yɛpɛ so na yɛkɔ. (Any. 26:4) Nakoso, nná ebiala yeɛ ɔkɔyɛ sɔ ɔ, na mmom mmeni pẽe nala wɔ berɛ a, bɛnye kɔgye yenwo kyɛ bekotie yɛ.

19. Sɛ yɛkã yɛ gyidie nwo dwirɛ yekyire mmenia a, nzuati yeɛ odikyɛ yɛbrɛ yɛnwo ase ɔ?

¹⁹ Sɛ yɛyere yɛnwo yenya mmenia nwo aboterɛ a, ɔboka yɛ paa. Sɛ ebie pena kyɛ ɔne wɔ su aporowaa, anaa obisa edwirɛ bie bɔ ɔkɔmaa ɛkɔfɛ yaa a, bɔ Yehowa mbaeɛ kyɛ ɔboka wɔ ma enya aboterɛ. Kae kyɛ sɛ ɛbrɛ wɔnwo ase a, ɔkɔmaa sɛ ebie ne wɔ nyɛ adwene wɔ edwirɛ bie nwo po a, ekonya sona nanwo aboterɛ, na ɛmɔngosu aporowaa. Yeti, sɛ mmenia bisa wɔ dwirɛ bie, na enya bɛnwo aboterɛ fa kyire kyɛ ebu bɛ mmerɛ bɔ ɛma bɛ mmuayɛɛ ne a, ɔkɔmaa bɛkɔhora bɛkɔsesã adwene bɔ bele ye wɔ Yehowa Adanzefoɛ nwo ne. Ebiekũ koso, ɔkɔmaa bekole nahorɛ bɔ ɔwɔ Bible nanu ne bɛkɔto nu. Yeti, yere wɔnwo kyɛ ‘mmerɛ biala ɛkɔboa wɔnwo kosie, kyɛbɔ ɔkɔyɛ a sɛ ebie bisa wɔ gyidie nwo dwirɛ a, ɛkɔhora kɔye yenoa kohyire ye wɔ anwobrɛaseɛ ne anidie nu ɔ.’ (1 Pet. 3:15) Kae kyɛ sɛ ɛbrɛ wɔnwo ase a, ɔkɔboka wɔ maa ekonya aboterɛ.