Dimoa Siesie W’ahone

Sɛ yesua Bible ne a, yɛpena kyɛ nu dwirɛ ne ka y’ahone. Sɔ yeɛ Ɛsra yɛle ɔ. “Né watu yenwo wasie berɛ, [anaa wasiesie ye ahone] kyɛ okosua AWURADE mmeraa ne.” Yɛkoso yɛkɔhora yekosuesua ye. (Ɛsra 7:10) Yede yɛkɔyɛ sɛɛ né yahora yayɛ sɔ?

Bɔ mbaeɛ. Koraka ɛkɔhyɛ yebo kyɛ esua nikyee ne, dimoa bɔ mbaeɛ. Srɛ Yehowa kyɛ ɔboka wɔ ma ɛte bɔ ɛbaasua nabo, na ɛfa yɛ adwuma.—Edw. 119:​18, 34.

Brɛ wɔnwo ase. Bɛbɔ bɛma bɛnwo so, na bɛfa bɛnwo bɛto bɛ bɔbɔ bɛ nimdeɛ so ne, Nyameɛ fa nahorɛ ne fea bɛ. (Luka 10:21) Yeti nnenya adwene kyɛ esua nikye kyɛbɔ ɔkɔyɛ a mmenia konwu kyɛ wɔde abẽ ɔ. Afei sɛ enwu ye kyɛ ele adwene bie bɔ ɔne Nyameɛ deɛ ne nyia a, bɔ mmɔden kyɛ ɛkɔyɛ nzakrayɛɛ.

Bɔ mmɔden kyɛ ekotie asafo dwein ne bie. Dwein te nikyee bɔ tumi wɔ nu ɔ, na ɔkora kã y’ahone paa. Yeti sɛ ɛbaasua nikye na edimoa tie asafo dwein ne bie a, ɔkɔboka wɔ maa ekosiesie w’ahone kɔma bɔ ɛbaasua ne.