Fade mo yeke tambela na Nzapa?

“Tambela na Nzapa ti mo na tâ be-ti-molenge.”​—MICHÉE 6:8.

MBENI bébé so gere ti lo ade ti kpengba pëpe ayôro maboko ti lo ti gbu ti babâ ti lo na lo to nda ti bi kozo gere ti lo. A lingbi ti kpa mbeni kete ye, me ti babâ na mama ti lo, a yeke mbeni kota ye na lê ti ala. A yeke mbeni ngoi so azi lege na ala ti ku ambeni pendere ye na pekoni. Ala yeke ku ti tene, na yâ ti angu so ayeke ga, ala tambela legeoko na molenge ti ala ni, ti gbu maboko ti mba. Na yâ ti aye mingi, ala yeke ku ti fa lege na lo nga ti mû maboko na lo teti kekereke ti lo.

² Jéhovah Nzapa ayeke bâ amolenge ti lo, azo ti sese, tongaso nga. Mbeni lâ, lo sala tënë so na ndo ti azo ti lo Israël, wala Ephraïm, lo tene: “Mbi fa na Ephraïm lege ti tambela; Mbi kamata ala na tïtî Mbi . . . Mbi gboto ala na kamba ti be-nzoni, na kamba ti ndoye.” (Osée 11:3, 4). Ge so, Jéhovah afa tele ti lo tongana mbeni babâ ti ndoye so yeke yeke ayeke fa na molenge ti lo ti tambela. Tongana molenge ni atï, peut-être lo yeke yô lo na kate ti lo. Jéhovah ayeke Babâ so mara ni use ayeke pëpe, na lo ye mingi ti fa na e tongana nyen ti tambela. Lo yeke nga na ngia ti duti na tele ti e tongana e yeke gue na li ni. Tongana ti so kota versê ti e afa ni, e lingbi ti tambela na Nzapa! (Michée 6:8). Me ti tambela na Nzapa aye ti tene nyen? Ngbanga ti nyen a lingbi e tambela na lo? Tongana nyen ti sala ni? Na aye ti nzoni wa e yeke wara tongana e tambela na Nzapa? Zia e bâ ahundango tënë so oko na oko.

Ti tambela na Nzapa aye ti tene nyen?

³ Tâ tënë, senge zo ti sese alingbi ti tambela tâ na tele ti Jéhovah pëpe, lo yeke zo ti yingo (Exode 33:20; Jean 4:24). Tongaso, tongana Bible atene so azo atambela na Nzapa, a yeke gi na lege ti fä. Lo yeke sala kusala na mbeni pendere tënë so azo kue na ndo kue alingbi ti mä yâ ni, atâa ala yeke ti giriri wala ti laso. Ti tâ tënë ni, tënë ti azo use so ayeke tambela oko, azo kue alingbi ti gbu nda ni. Tënë so afa yengo tele so ayeke na popo ti azo use. Mara ti yengo tele tongaso amû lege na e ti hinga mbeni ye na ndo ye so aye ti tene ti tambela na Nzapa. Zia e bâ tënë ni mbilimbili.

⁴ Bâ tapande ti Hénoc na Noé, akoli be-ta-zo. Ngbanga ti nyen a tene ala tambela na Nzapa? (Genèse 5:24; 6:9). Na yâ ti Bible, tënë “ti tambela” aye mingi ti sala tënë ti mbeni lege so zo amû ti sala na ye. Hénoc na Noé asoro lani ti sala ye so bê ti Jéhovah Nzapa aye. Nde na azo ti ngoi ti ala, ala ye si Jéhovah afa lege na ala na ala mä yanga ti lo. Ala zia bê ti ala kue na lo. Tënë so aye ti tene pëpe so Jéhovah si ayeke mû desizion na place ti ala. Ên-ën. Jéhovah aleke zo na ngangu ti soro ye ti bê ti lo, na lo ye si e gbu li ti e kozoni ti sala mbeni ye. Me tongana e yeke mû desizion ti sala mbeni ye, na tâ be-ti-molenge e yeke zia si bibe ti Jéhovah so ayeke kota ahon ti e afa na e ye ti sala ni (aProverbe 3:5, 6; Esaïe 55:8, 9). Biani, tongana angu ayeke hon si e duti na fini, a yeke mo bâ mo tene e yeke tambela na tele ti Jéhovah.

⁵ Bible ahaka mingi ni fini ti zo na mbeni tambela so lo yeke gue dä. Na yâ ti ambeni versê, lo yeke fa ni polele, me na yâ ti ambeni lo fa ni na ambeni lege nde. Na tapande, Jésus atene: “Zo nyen na popo ti i, tongana lo gi bê ti lo, alingbi sala si tele ti lo [wala fini ti lo] ayo ahon ti kozoni?” (Matthieu 6:27). Ndali ti nyen si tongana Jésus asala lani tënë ti fini ti zo, lo sala tënë ti yongo ti mbeni ye, me pëpe tënë ti ngoi so ye ni ayeke ninga na ni? Lo haka biani fini na mbeni tambela so zo ayeke gue dä. Lo fa so tongana zo agi bê ti lo, lo lingbi pëpe ti sala si fini ti lo akiri ayo même gi kete tongaso na ndo ni. So ti tene lege ayeke pëpe ti tene e tambela na Nzapa a yo? Oko pëpe! Tënë so ague na e na use hundango tënë ni, Ngbanga ti nyen a lingbi e tambela na Nzapa?

Ngbanga ti nyen a lingbi e tambela na Nzapa?

⁶ Jérémie 10:23 afa na e mbeni oko ti nda ni so a lingbi e tambela na Jéhovah Nzapa. Lo tene: “O L’Eternel, mbi hinga lege ti zo ayeke na tïtî lo mveni pëpe; na a yeke na bê ti zo so atambela ti fa lege na gere ti lo nga pëpe.” Tongaso, e azo e yeke na ngangu pëpe ti fa lege na gere ti e, na e yeke na droit ni nga pëpe. E yeke lakue na bezoin ti tene a fa lege na e. Ala so asala kpengba li, si ala ye ti duti yamba na Nzapa, ala yeke sala gi oko ye so Adam na Eve asala ândö. Kozo babâ na mama ti e so abâ ti ala lani atene a yeke na ala ti soro ye so ayeke nzoni na sioni (Genèse 3:1-6). Me a yeke biani “na tîtï” e oko pëpe ti fa lege na gere ti e.

⁷ Mo bâ so a lingbi mbeni zo afa lege na mo na yâ ti fini ti mo pëpe? Lâ oko oko, e yeke na adesizion ti mû, akete ni na akota ni. Ambeni desizion ni akpengba na ala lingbi ti sala ye na ndo gigi ti e ti kekereke. Me ala lingbi nga ti sala ye na ndo ti azo ti e so e ye ala. Bâ kete si, mbeni zo ayeke dä so aninga ahon e nga lo yeke na ndara ahon e. Lo yeke na ngia ti fa na e ye ti sala na yâ ti adesizion so e yeke mû. Me mawa ni ayeke so mingi ti azo aye ti zia gi bê ti ala na ala mveni na ala ye ti fa lege gi na gere ti ala wani. Ala ke ti yeda na tënë ti aProverbe 28:26 so atene: “Zo so azia bê ti lo na ndara ti lo mveni, lo yeke wabuba, me zo so atambela na lege ti ndara, fade a zi lo.” Biani, zo so azia si bê ti lo so ayeke na handa afa na lo ye ti sala, lo lingbi ti wara ye ti sioni na pekoni. Ni la Jéhovah aye si mara ti ye tongaso asi na e pëpe (Jérémie 17:9). Lo ye si e tambela na ndara, e zia bê ti e kue na lo teti lo yeke fa lege na e na ndara. Tongana e sala tongaso, fini ti e ayeke duti nzoni nga na ngia.

⁸ Use nda ni so a lingbi e tambela na Nzapa andu tënë ti yongo ti tambela so e ye ti mû ni. Bible asala tënë ti mbeni ye ti mawa. Lo fa so e azo kue e yeke gue gi na ndo oko. Tongana lo yeke fa akpale so ayeke ga na lâ ti mbakoro ti zo, Zo-ti-fa-tene 12:7 atene: “Zo ayeke gue na da ti lo ti lakue lakue, na azo ti toto kuâ atambela na lege ti kodoro.” ‘Da ti lakue lakue’ so ayeke nyen? Tâ gi dû ti kuâ so e awasiokpari e yeke gue dä (aRomain 6:23). Ye oko, Jéhovah aye pëpe ti tene a dü gi zo, lo bâ pasi na lo kui, ên-ën. Ye so lo ye mingi ayeke ti tene e duti na fini lakue lakue (Job 14:1). Ni la, ti tene tambela ti e ni ayo tongana ti so Nzapa aye, a lingbi e tambela na lo. Mo ye ti duti na fini lakue lakue? Tongaso, zia mo tambela na Babâ ti mo.

Tongana nyen e lingbi ti tambela na Nzapa?

⁹ Zia e bâ ota hundango tënë so nzoni si. Tongana nyen e lingbi ti tambela na Nzapa? Esaïe 30:20, 21 amû kiringo tënë ni, lo tene: “Fade Maître ti i ahonde tele ti Lo mbeni pëpe, na fade lê ti i abâ Maître ti i. Tongana i gue na koti, wala na gati, fade mê ti i amä yanga na peko ti i, so atene, So ayeke lege ni, i tambela dä.” Atënë so adë bê ti azo ti Jéhovah biani! Atënë ti Jéhovah na versê 20 ni adabe ti azo ti lo peut-être so, na tango so lani ala ke yanga ti lo, lo honde tele ti lo na ala (Esaïe 1:15; 59:2). Me ti ge, a fa Jéhovah tongana zo so ayeke luti na gbele abe-ta-zo ti lo, lo honde tele ti lo na ala pëpe. A yeke tongana mbeni wafango-mbeti so ayeke luti na gbele a-élève ti lo, si lo yeke fa na ala ye so lo ye ala manda.

¹⁰ Na versê 21 ni, a fa Jéhovah tongana Nzapa so atambela na peko ti azo ti lo, lo yeke fa mbilimbili lege so a lingbi ala tambela dä. Azo so amanda ye na ndo ti Bible atene so peut-être tënë ti versê so aluti na ndo lege so ngoi na ngoi mbeni berger ayeke mû peko ti ataba ti lo. Lo yeke dekongo ti fa lege na ala si tongaso ala hon a yo pëpe. Tënë ni so abâ e tongana nyen? A yeke na lege so, tongana e diko Bible ti tene Nzapa afa lege na e, e yeke diko atënë so a sû ni a sala angu saki mingi awe. A yeke mo bâ mo tene mbeni go so alondo yongoro kâ ngbii a si na e laso. Biani, ala yeke fa lege na e tongana ti ândö, na ngoi so a sû ala na mbeti. Wango ti Bible alingbi ti fa na e ti mû anzoni desizion lâ oko oko, nga ti leke ye so e ye ti sala na yâ ti angu so ayeke ga (Psaume 119:105). Tongana e mû ngangu ti e ti gi awango so na ti sala ye alingbi na ni, ge so Jéhovah ayeke fa lege na e. E yeke tambela na Nzapa la.

¹¹ E yeke zia lege biani na Tënë ti Nzapa ti fa lege na e tongaso? A yeke nzoni e mû ngoi ti bâ tele ti e mveni nzoni. Bâ mbeni versê so alingbi ti mû maboko na e ti sala ni, a tene: “L’Eternel atene tongaso, Luti na lege, i bâ ndo, i hunda tënë ti lege ti giriri, lege nyen ayeke lege ti nzoni, na i tambela dä; na fade i wara lege ti hu âme ti i.” (Jérémie 6:16). Hinga pëpe atënë so adabe ti e na mbeni zo so ayeke tambela si lo si na mbeni lege so yâ ni afâ use, na lo hunda lege na azo. Na lege ti yingo, amolenge ti Israël ake lani yanga ti Jéhovah, ni la a lingbi ala hunda nga lege. A lingbi ala wara “lege ti giriri” ni ti kiri na ndo ni. “Lege ti nzoni” ni ayeke lege so ândö akotara ti ala atambela dä, me na lege ti buba azo ti Israël adö ni azia. A yeke ye ti mawa mingi, Israël ake ti mä dango bê ti Jéhovah so lo mû ni na ndoye. Oko versê ni akiri atene: “Me ala tene, E ye ti tambela na lege so pëpe.” Ye oko, laso azo ti Nzapa aye ti ala ti tambela na ndo lege so.

¹² Na yâ ti angu ngbangbo oko na ndo ni so ahon, adisciple ti Jésus so a sa yingo na ndo ti ala abâ so wango ti Jérémie na chapitre 6, versê ni 16 andu ala. Ala kue, na bê ti ala kue, amû li ni ti kiri na ndo ti “lege ti giriri”. Nde na azo so atene ala yeke aChrétien andâ ala zia lege ti Jéhovah awe, adisciple ti Jésus so ayeke mû lakue peko ti “tapande ti nzo tënë” so Jésus Christ azia ni na ala nga so akozo disciple ti lo amû lani pekoni (2 Timothée 1:13). Laso, ala so a sa yingo na ndo ti ala amû maboko na mba ti zia pëpe nzoni lege so azo so atene ala yeke aChrétien azia ni. Ala mû nga maboko na amba ti ala “ambeni ngasangbaga” ti sala tongaso nga.​—Jean 10:16.

¹³ Bungbi ti ngbâa ni ayeke mû kobe ti yingo na l’heure ni so alingbi (Matthieu 24:45-47). Ye so asala si azo kutu mingi awara “lege ti giriri” ni na ala tambela na Nzapa. Mo yeke na popo ti azo so? Tongana a yeke tongaso, ti tene mo zia lege ni pëpe na mo sala gi ye ti bê ti mo pëpe, a lingbi mo sala nyen? A yeke nzoni mo luti kete ngoi na ngoi ti bâ tongana nyen si mo yeke tambela na yâ ti fini ti mo. Tongana mo yeke diko lakue Bible nga na ambeti ti Nzapa, na mo yeke gue lakue na abungbi ti mä fango ye so alondo na bungbi ti ngbâa ni laso, a fa biani so mo yeke manda ti tambela na Nzapa. Nga, tongana mo yeda na tâ be-ti-molenge na wango so a yeke mû na mo, mo yeke tambela biani na Nzapa, mo yeke tambela na ndo ti “lege ti giriri”.

Tambela mo bâ mo tene mo yeke “bâ Lo so zo ayeke bâ Lo pëpe”

¹⁴ Tongana e ye ti tambela na Jéhovah, a lingbi lo duti tâ zo na lê ti e. Bâ, Jéhovah atene lani na abe-ta-zo ti lo ti giriri so lo honde tele ti lo na ala pëpe. Laso nga, lo yeke fa tele ti lo na azo ti lo tongana Kota Wafango ye na ala. Ti mo, Jéhovah ayeke tâ zo na lê ti mo? Mo yeke bâ lo tongana mbeni zo so ayeke luti na gbele mo ti fa ye na mo? Bâ mara ti mabe so la a lingbi e duti na ni tongana e ye ti tambela na Nzapa. Moïse ayeke ândö na mabe so, “teti lo gbu ngangu legeoko tongana lo yeke bâ Lo so zo abâ Lo pëpe.” (aHébreu 11:27). Tongana Jéhovah ayeke tâ zo na lê ti e, e yeke bâ ye so bê ti lo aye na ndembe so e ye ti sala mbeni ye. Na tapande, e yeke gi nga même ti sala ye ti sioni pëpe, si na pekoni e honde ni na a-ancien wala na azo ti sewa ti e. Nde na so, e yeke sala kue ti tambela na Nzapa atâa mbeni zo abâ e pëpe. E ye ti sala ye tongana ti so Gbia David atene ândö, lo tene: “Fade mbi tambela na yâ da ti mbi na be-biani.”​—Psaume 101:2.

¹⁵ Jéhovah ahinga nzoni so e yeke mbilimbili-kue pëpe, e yeke asenge zo ti sese. Lo hinga so ngoi na ngoi a lingbi ti duti ngangu na e ti mä na bê na ye so e lingbi ti bâ pëpe (Psaume 103:14). Lo mû maboko na e mingi ti hon ndo ti awokongo so. Na tapande, lo bungbi azo ti amara kue ti sese “teti iri ti lo”. (Kusala 15:14). Na ndembe so e yeke voro lo yanga oko, e yeke kpengba mba. Tongana e mä tongana nyen si Jéhovah amû maboko na mbeni ita ti e ti yingo ti hon ndo ti ambeni wokongo nga na ambeni kpale, ye so asala si Jéhovah aga tâ zo na lê ti e ahon ti kozo.​—1 Pierre 5:9.

¹⁶ Kota ye ni ayeke tapande ti Molenge ti lo so Jéhovah amû ni na e. Jésus atene: “Mbi yeke Lege ni, na Tene-biani na Fini. Mbeni zo aga na Babâ pëpe, gi na lege ti Mbi.” (Jean 14:6). Tongana e ye biani ti tene Jéhovah aduti tâ zo na lê ti e, a yeke nzoni mingi ti gi ti hinga ye so Jésus asala ândö na sese ge. Ye kue so Jésus asala wala lo tene ayeke tâ gi tongana ti so Babâ ti lo ti yayu asala (Jean 14:9). Na ngoi so e ye ti sala mbeni ye, a yeke nzoni e hunda tele ti e tongana a duti fade Jésus, lo yeke sala nyen? Tongana e sambela nga e gbu li ti e kozoni na ndo ni, a yeke fa so e yeke tambela na senda ti Christ (1 Pierre 2:21). A sala nga si e tambela na Nzapa.

Aye ti nzoni wa e yeke wara ni?

¹⁷ Zo so atambela na Jéhovah Nzapa, lo yeke wara aye ti nzoni mingi na yâ ti fini ti lo. Mo dabe ti mo na zendo so Jéhovah amû na azo ti lo tongana ala gi ti tambela na ndo ti “lege ti nzoni” ni? Lo tene: “I tambela dä; na fade i wara lege ti hu âme ti i.” (Jérémie 6:16). Ti “hu âme” aye ti tene nyen? A ye ti tene mo duti na aye ti nginza mingi? mo sala ambeni ye so amû ngia na mo mingi? Oko pëpe. Ye so Jéhovah amû ayeke kota ahon so mingi. A yeke mbeni ye so a yeke ngangu na azo ti nginza ti wara ni. Ti hu âme ti mo aye ti tene ti duti na siriri ti bê, ti duti na ngia, na nzerengo tele, nga ti wara ngia na yâ kua ti Nzapa. Ye so apusu mo ti hinga biani na bê ti mo so mo soro nzoni lege ni. A yeke mbeni ye so a yeke bâ ni mingi pëpe na yâ ti dunia so aye ti sioni asi singo dä!

¹⁸ Tâ tënë, a yeke tâ kota ye mingi ti tene mo zo mo duti na fini. Même tongana mo ninga na gigi pëpe ayeke nzoni ahon ti tene a dü mo lâ oko pëpe. Ye oko, Jéhovah aye lâ oko pëpe si a dü mo, mo kono na mo wara kpale ti lâ ti mbakoro na pekoni. Me lo ye si mo wara ye ti nzoni so ayeke tâ kota ahon tanga ni kue. Lo ye si mo tambela na lo lakue lakue! Michée 4:5 afa na e tënë ni so nzoni mingi, a tene: “Azo kue atambela na iri ti anzapa ti ala, me fade e tambela na iri ti L’Eternel Nzapa ti e lakue lakue.” Mo ye ti wara pendere ye so? Mo ye ti duti na fini so Jéhovah ahiri ni pendere mingi “tâ fini”? (1 Timothée 6:19). Tongaso, leke na bê ti mo ti tambela na Jéhovah laso, kekereke nga kpu na kpu!

Mo yeke kiri tënë tongana nyen?

• Ti tambela na Nzapa aye ti tene nyen?

• Ngbanga ti nyen mo bâ so a lingbi mo tambela na Nzapa?

• Nyen la ayeke mû maboko na mo ti tambela na Nzapa?

• Aye ti nzoni wa azo so atambela na Nzapa ayeke wara ni?

[Ahundango tënë ti manda na ye]S

1, 2. Na lege wa atënë ti bê ti Jéhovah na mbage ti e ayeke tongana ti mbeni babâ so ayeke fa na molenge ti lo ti tambela?

3, 4. (a) Ngbanga ti nyen tapande ti azo use so ayeke tambela oko ayeke pendere lege ti hinga na tënë ti tambela na Nzapa? (b) Ti tambela na Nzapa aye ti tene nyen?

5. Ngbanga ti nyen tongana Jésus asala tënë ti fini ti zo, lo sala tënë ti yongo ti mbeni ye?

6, 7. E azo e yeke lakue na bezoin ti ye wa? Ngbanga ti nyen a yeke nzoni e gue na mbage ti Jéhovah ti wara ni?

8. E awasiokpari, e yeke gue na ndo wa? Me Jéhovah aye nyen ndali ti e?

9. Ngbanga ti nyen Jéhovah ahonde lani tele ti lo na azo ti lo? Me atënë ti dengo bê wa lo tene na Esaïe 30:20?

10. Tongana nyen mo lingbi ti mä na peko ti mo yanga so alondo na Kota Wafango ye na mo?

11. Tënë ti dengo bê wa Jéhovah atene na azo ti lo na Jérémie 6:16? Me ala sala ti ala ye tongana nyen?

12, 13. (a) Adisciple ti Christ so a sa yingo na ndo ti ala asala ye tongana nyen na wango ti Jérémie 6:16? (b) E lingbi ti bâ lege so e yeke tambela na yâ ti fini ti e laso tongana nyen?

14. Tongana Jéhovah ayeke tâ zo na lê ti e, e yeke fa ni tongana nyen na yâ ti aye so e ye ti sala?

15. Ti duti oko na aita ti e amû maboko na e ti bâ Jéhovah tongana tâ zo na lê ti e tongana nyen?

16. Ti manda ye na ndo ti Jésus amû maboko na e tongana nyen ti tambela na Nzapa?

17. Tongana e tambela na lege ti Jéhovah, e yeke wara lege ti hu âme ti e tongana nyen?

18. Ye ti nzoni wa Jéhovah aye ti mû na e? Mo leke na bê ti mo ti sala nyen?

[Afoto na lembeti 23]

Na yâ ti Bible, e yeke mä go ti Jéhovah na peko ti e, a tene: “So ayeke lege ni”

[Foto na lembeti 25]

Na abungbi, e yeke wara kobe na tâ ngoi ni