Sala si Lâ ti Pendere ti Mo Atambela Nzoni

A HUNDA la ni na azo ti mbeni kodoro ti Poto ti soro popo ti aye ota: pendere ti tele, mosoro, wala lâ ti pendere. Kozo ye so ala soro ayeke lâ ti pendere. Biani, azo kue atä ngu ti ala ayeke tongana nyen aba lâ ti pendere nga tongo nda ti angu 20 tongana mbeni ngoi ti fini so ayeke nde. Na azo kue aye si ngoi so apendere agbian ti ga biazo atambela nzoni. Me tongana nyen?

Bible alingbi ti mu maboko? Kiringo tene ni ayeke biani tâ tene. Zia e ba aye use so na yâ ni Tene ti Nzapa alingbi ti mu mbilimbili maboko na apendere, peut-être ti mu maboko na apendere mingi ahon tanga ti azo kue so ngu ti ala ayeke nde.

Dutingo na Nzoni Songo na Azo

Jugend 2000 ayeke mbeni tondo na ndo ti mbeni kota gingo nda ti ye na ndo abango ndo, alengo, na asalango ye ti apendere ahon 5 000 na Zamani. Gingo nda ti ye ni afa so tongana apendere amu ngoi ti hu tele, tongana ti mä mozoko, ti sala ye ti awanguru, wala ti duti gi tongaso na salango ye oko pepe, mingi ni ala yeke na popo ti ambeni zo nde. Peut-être ahon azo kue so ngu ti ala ayeke nde, apendere aye ti duti na popo ti amba ti ala. A lingbi biani ti tene so mbeni oko ti akelele ti lâ ti pendere so atambela nzoni ayeke ti duti na nzoni songo na azo.

Me ti duti na nzoni songo na azo ayeke lakue kete ye pepe. Biani, asongo na popo ti azo ayeke mbeni ye so amaseka koli na wali ayeda so fani mingi a ga na ala akpale. Na ndo so Bible alingbi ti mu biani maboko. Tene ti Nzapa ayeke na fango lege teti apendere so alingbi ti duti gunda ti asalango songo so ayeke na lege ni. Ye nyen Bible atene?

A hiri mbeni oko ti akpengba-ndia ti kota ahon na yâ asongo na popo ti azo Ndia ti Lor: “I sala na azo ye kue so i ye ala sala na i.” Ti sala ye na azo na kpengo mbito, nengo tele, nga na nzobe ayeke pusu ala ti sala nga na mo legeoko tongaso. Salango ye na nzobe alingbi ti sala si mango tele pepe na kpale akaï. Tongana a to nda ti hinga mo teti salango ye ti mo na nzobe na mbage ti azo, mo lingbi ti gboto lê ti ala na ti wara yengo dä ti ala. Tele ti mo anzere pepe tongana mo ba so azo ayeda na mo?​—Matthieu 7:12, TOB.

Bible awa mo ti “ndoye mba ti mo tongana mo mveni.” A lingbi mo ndoye mo mveni na batango tele ti mo nga na nengo tele ti mo na lege ni, ahon ndo ni pepe nga kete mingi pepe. Ngbanga ti nyen ye so amu maboko? Ba kete, tongana mo ne tele ti mo mveni pepe, peut-être mo lingbi ti kasa azo ahon ndo ni, na ye tongaso akanga lege na anzoni songo. Me ti ne tele ti mo na lege ni ayeke gunda ti mbeni ye so mo lingbi ti leke akpengba songo na ndo ni.​—Matthieu 22:39, NW.

Na ngoi so a lë songo awe, a lingbi azo use ni asala ngangu mbage na mbage ti kpengba ni. A lingbi mungo ngoi mingi ti kpengba mbeni songo azia ngia na bê ti mo, teti so “ngia ayeke na zo so amu ye ahon ngia ti lo so akamata ye.” Mbeni mbage ti mungo ye ayeke mungo pardon, so andu hongo na ndo ti akete glisango lege na kungo pepe ti tene azo asala ye kue mbilimbili. Bible atene na e: “Zia azo kue ahinga salango ye ti i na lege ni.” Biani, ‘tongana tene ni ayeke na tïtî mo, mo duti na siriri na azo kue.’ Ye nyen asi tongana mbeni kamarade afa na gigi mbeni wokongo ti mo? Mo sala ye tongana nyen? Ba nzoni wango so Bible amu: “Mo sala si ngonzo alondo na yâ yingo ti mo fade pepe,” teti “kä so ndeko asala na mo afa na gigi lo yeke tâ ndeko.” A yeke tâ tene pepe so akamarade asala ngangu na ndo abibe, salango tene, nga na salango ye ti mo? Tongaso, Bible agboto mê: “Asioni kamarade ayeke buba anzoni salango ye.” Nde na so, “zo so atambela na awandara, fade lo ga zo ti ndara.”​—Kusala 20:35; aPhilippien 4:5, NW; aRomain 12:17, 18; Zo-ti-fa-tene 7:9; aProverbe 13:20, NW; 27:6; 1 aCorinthien 15:33, NW.

Marco asala tene na iri ti apendere koli na amaseka wali mingi tongana lo tene: “Akpengba-ndia ti Bible amu maboko mingi ti duti na nzoni songo na azo. Mbi hinga ambeni zo so ayeke duti na fini gi teti ala mveni na ye so ala mveni alingbi ti wara na yâ fini. Bible afa na e ti bi bê, mingi pepe na ndo e mveni, me na ndo ambeni zo. Tongana ti so mbi lingbi ti ba, ye so ayeke lege ti nzoni ahon ti duti na nzoni songo na azo.”

Ye so apendere tongana Marco amanda na lege ti Bible amu maboko na ala gi pepe na lâ ti pendere me nga teti angoi so ayeke ga na peko. Nga na ndo kekereke, e wara mbeni lege nde so Bible alingbi ti mu maboko mingi ahon na apendere.

Gingo Bê Teti Kekereke

Apendere mingi aye ti hinga nda ti ye kue. Peut-être ahon azo kue so ngu ti ala ayeke nde, apendere aye ti hinga ye so ayeke si nga ngbanga ti nyen. Na Bible, ahon tanga ti abuku kue, afa anda ti dutingo ti aye ti sese so na atene na e ye so ayeke si kekereke. A yeke ye so wagame ti apendere aye ti hinga. Ngbanga ti nyen e tene tongaso?

Biani, atä so azo mingi atene so apendere aduti na fini gi teti ye so asi na ngoi ti fadeso, ambeni gingo nda ti ye afa so tene ni ayeke nde kete. Ala fa so fani mingi apendere ayeke ba nzoni ye so ayeke tambela na tele ti ala, na nda ni ala mveni afa mara ti fini so alingbi ti duti kekereke. Ye so afa ni ayeke so na popo ti apendere koli na amaseka wali 4, ala 3 abi bê “mingi” wala “fani mingi” na ndo kekereke. Atä so apendere mingi ayeke na beku so ye ayeke ga ande nzoni, mingi ti ala agi bê ti ala teti ye so ayeke si kekereke.

Ngbanga ti nyen ala gi bê ti ala? Mingi ti apendere ti ngoi ti e awara awe akpale so kengo-ndia, salango ngangu, nga na nyongo mbangi aga na ni. Apendere ayeke gi bê ti ala teti warango mbeni nzoni kua ti nginza na yâ bungbi ti azo so ayeke na bibe ti salango mandako mingi. Nzala ti wara anzoni note na ekole wala ti duti mbeni zo so asala ye nzoni nga na kode mingi ahon na ndo ti kusala asala ngangu na ndo ti ala. Mbeni maseka wali ti ngu 17 adema tele: “E yeke na yâ bungbi ti azo so ate tele tongana ambo. Zo oko oko atara ti sala ye kue so bê ti lo aye. A lingbi mo fa lakue ye so mo lingbi ti sala, na ye so aso bê ti mbi.” Mbeni pendere nde, so ayeke na ngu 22, atene: “Azo so ayeke na akode mingi ayeke na fini so atambela nzoni na ala lingbi ti duti na ngia na yâ fini. Ala so ye ti ala atambela nzoni pepe, so ndali ti anzene nzene ye nde nde alingbi pepe ti sala ye ti nzoni tongana ti amba ti ala, angbâ gi na peko.” Ngbanga ti nyen bibe ti mandako ayeke mingi na yâ fini? Fade fini ayeke duti lakue tongaso?

Fango Nda ti Ye so Ayeke na Lege Ni

Tongana apendere aba bungbi ti azo na mbito wala na gingo bê, atä na hingango ni wala pepe, ala yeda na Bible. Tene ti Nzapa afa so ‘bungbi ti azo ti laso so ate tele tongana ambo’ ayeke mbeni fä ti ngoi ni. Bazengele Paul asû ye na ndo ngoi ti e na yâ mbeni mbeti so lo to na mbeni pendere so iri ti lo ayeke Timothée: “Ngoi ti kpale na ti ngangu asi.” Ngbanga ti nyen ti kpale, na ngbanga ti nyen ti ngangu? Ngbanga ti so, tongana ti so Paul asû na pekoni, azo ayeke duti “azo so andoye tele ti ala mveni, azo so andoye nginza, azo ti fandara, azo ti baba, . . . azo so akiri singila pepe, azo so ayeke be-biani pepe . . . azo so asala pasi na mba ti ala.” A yeke pepe tâ fango peko ti salango ye ti azo mingi laso?​—2 Timothée 3:1-3, NW.

Bible atene so angoi ti kpale so ayeke si “na lâ ti nda ni,” kozoni si akota gbiango ye asi na ndo ti bungbi ti azo kue. Fade agbiango ye so ayeke ndu azo kue, apendere na ambakoro legeoko. Mara ti agbiango ye wa? Na yâ ngoi kete, mbeni ngorogbia ti yayu ayeke londo ti komande azo, na azo so ayeke duti ande na gbe ni ayeke wara “kota ngia na yâ ti siriri so asi singo” na ndo kue. “Sese ni aga ye ti héritier ti azo ti mbilimbili, na fade ala duti dä lakue.” Fade gingo bê na mbito ayeke hon biaku.​—Psaume 37:11, 29, NW.

Gi Bible oko si afa tâ ye so ayeke si kekereke so a lingbi ti zia bê dä. Tongana mbeni pendere ahinga ye so ayeke si na yâ angu so ayeke ga, lo lingbi ti leke tele teti gango ti aye ni na ti ba so lo yeke na nzoni dutingo, na lo lingbi ti fa lege na ye so asi na yâ fini ti lo. Bibe so asala si ye so asala ngangu na ndo bibe nga na gingo bê akiri na peko. Na lege so, Bible afa aye so atia mbilimbili apendere: ti hinga nda ti bungbi ti azo na ti hinga ye so kekereke abata na ala.

Nzoni Tambelango na Lâ ti Pendere

Ye so a hunda ti tene lâ ti pendere atambela nzoni ayeke nyen? Mbeni kota mandango mbeti, warango akungba mingi, nga na mbeni kota wungo ti akamarade? Azo mingi alingbi ti bi bê tongaso. A lingbi lâ ti pendere nga tongo nda ti angu 20 amu mbeni nzoni tongo nda ni na apendere teti fini ti kekereke. So ti tene nga, lâ ti pendere so atambela nzoni alingbi ti duti mbeni fä ti ye so ayeke si ande.

Tongana ti so e ba awe, Bible alingbi ti mu maboko na mbeni pendere ti sala si lâ ti pendere ti lo atambela nzoni. Apendere mingi aba so a ga tâ tene awe na yâ fini ti ala mveni. Ala diko Tene ti Nzapa lâ na lâ na ala sala ye alingbi na ye so ala manda. (Ba “Nzoni Wango ti Mbeni Wakua ti Jéhovah so Ade Pendere,” na lembeti 6.) Tâ tene, Bible ayeke biani mbeni buku teti apendere laso teti so a lingbi ti mu maboko na ala ti ‘lingbi kue, na ti wara ye kue alingbi na nzoni kusala kue.’​—2 Timothée 3:16, 17, NW.

[Akete tene na lembeti 5]

Mbeni oko ti akelele ti lâ ti pendere so atambela nzoni ayeke ti duti na nzoni songo na azo

[Akete tene na lembeti 6]

Peut-être ahon azo kue so ngu ti ala ayeke nde, apendere aye ti hinga ye so ayeke si nga ngbanga ti nyen

[Encadré na lembeti 6, 7]

Nzoni Wango ti Mbeni Wakua ti Jéhovah so Ade Pendere

Alexandre ayeke na ngu 19. Lo kono na yâ ti mbeni sewa ti aTémoin ti Jéhovah, na lo wara ngia mingi ti sala na bê kue ye alingbi na mabe ti lo. Me a duti la ni lakue tongaso pepe. Alexandre afa nda ni:

“Peut-être bê ti i ayeke dö ti mä so mbi bungbi na aTémoin ti Jéhovah tongana mbeni pendere so ade ti mu batême pepe teti angu ahon mbasambala. Na ngoi ni so, vorongo ti mbi ayeke la ni na bê kue pepe, a yeke gi mbeni ye so mbi sala senge tongaso. Mbi ba so la ni mbi yeke na ngangu pepe ti gi polele nda ti asalango ye ti mbi.”

Na pekoni, bango ndo ti Alexandre agbian. Lo ngbâ ti tene:

“Babâ na mama ti mbi nga na akamarade ti mbi na yâ ti kongregation angbâ la ni ti wa mbi ti diko Bible lâ oko oko, ti gi ti hinga Jéhovah nzoni mbi mveni. Na nda ni, mbi mu desizion ti tara ni. Tongaso mbi zia lege ti ba televizion mingi na mbi leke programme ti mbi ti diko Bible lakue na kota ndapelele. Na nda ni, mbi to nda ti gbu nda ti Bible nzoni. Mbi ga ti ba tongana nyen a lingbi ti mu maboko na mbi mveni. Na, ye ti kota mingi ahon, mbi gbu nda ni so Jéhovah aye si mbi manda ti hinga lo. Na ngoi so mbi gbu tene so na bê ti mbi, songo ti mbi mveni na lo ato nda ti kono, na asongo ti mbi na azo na yâ ti kongregation aga nzoni ahon. Ba tongana nyen Bible agbian ye ngangu na yâ fini ti mbi! Mbi hunda na awakua oko oko kue ti Jéhovah so ade pendere ti diko Bible lâ na lâ.”

Apendere kutu mingi na ndo sese kue ayeke dä so abungbi oko na aTémoin ti Jéhovah. Mo yeke oko ti ala? Mo ye ti wara nzoni na lege ti dikongo Bible lakue? Ngbanga ti nyen ti mu pepe peko ti tapande ti Alexandre? Zi akusala so ayeke kota ye pepe na yâ kapa ti mo na yôro dikongo Bible na popo ti aye so mo yeke sala lâ oko oko. Fade mo yeke wara biani ye ti nzoni dä.