Zia Jéhovah afa na mo lege ti tâ liberté

‘Yôro lê ti mo na yâ ti ndia so alingbi kue, ndia ti liberté.’​—JACQ. 1:25.

MO LINGBI TI FA NDANI?

Ndia wa ague na zo ti wara tâ liberté? Azo wa la ayeke bâ nzoni dä?

Nyen la a lingbi e sara ti wara tâ liberté?

Liberté wa azo so angbâ ti mä yanga ti Jéhovah ayeke wara ande?

1, 2. (a) Nyen la asi na liberté ti azo? Ngbanga ti nyen? (b) Liberté wa la awakua ti Jéhovah ayeke ku ti wara?

E YEKE na yâ ti mbeni ngoi so sarango bê ti ye, kpengo ndia pëpe nga sarango ngangu na zo ayeke gue gi guengo na li ni (2 Tim. 3:1-5). Ye so asara si angorogbia ayeke sigigi na gbâ ti andia, ala yeke mû ngangu na azo ti lapolice nga ala yeke sara kusala na camera ti bâ aye so azo asara. Na yâ ti ambeni kodoro, azo ayeke zia alarme nga na akota clé na tere ti da ti ala; ala yeke zia même kuran na tere ti gbagba ti ala. Ambeni mingi ake ti sigigi na bï wala ti zia amolenge ti ala ti sara ngia na gigi ala oko na kota lâ wala na bï. A yeke polele so liberté ti azo ayeke kiri gi kiringo na peko, na a kpa ye so ayeke changé pëpe.

² Lani na yaka ti Éden, Satan atene so azo ayeke wara tâ liberté gi tongana ala sara ye ti li ti ala ahon ti sara ye so Jéhovah afa na ala. Aye so asi na pekoni afa so tënë so ayeke kota mvene! Mingi ni tongana azo asara sanka ti andia so Nzapa alu, a yeke sara si azo kue abâ pasi na pekoni. Aye ti sioni so aga na pekoni ayeke ndu nga awakua ti Jéhovah. Me e yeke na beku so mbeni lâ azo ayeke sigigi na gbe ti ngbâa ti siokpari na ti ye so afuti nga ala yeke wara ye so Bible airi ni “liberté ti gloire ti amolenge ti Nzapa.” (aRom. 8:21). Biani, Jéhovah ato nda ni awe ti leke awakua ti lo ti wara liberté ni so. Lo sara ni tongana nyen?

3. Ndia wa Jéhovah amû na adisciple ti Christ? Ahundango tënë wa e yeke sara tënë na ndo ni?

³ Ti leke awakua ti lo ti wara liberté so ayeke ga, Jéhovah amû na e ye so Jacques airi ni “ndia so alingbi kue, ndia ti liberté”. (Diko Jacques 1:25.) Ambeni Bible akiri peko ti tënë so atene “ndia so ayeke nzoni kue si ayeke zi zo na gbe ti ngbâa”. (Fini Mbuki, 2001). Nga ‘ndia ti nzoni kue so asö zo na yâ ti ngbâa biani’. (Tene ti Nzapa, Fini Mbuki, 1988). Tâ tënë, mingi ni azo abâ ndia tongana mbeni ye so akanga lege na zo, asara si zo ayeke na liberté pëpe. Tongaso, “ndia so alingbi kue, ndia ti liberté” ayeke nyen? Na lege wa ndia so azi e na gbe ti ngbâa?

NDIA SO AZI ZO NA GBE TI NGBÂA

4. “Ndia so alingbi kue, ndia ti liberté” ayeke nyen? Azo wa la ayeke bâ nzoni na lege ni?

⁴ “Ndia so alingbi kue, ndia ti liberté” ayeke pëpe Ndia ti Moïse. Jéhovah amû lani Ndia ti Moïse na azo ti Israël ti fa na ala so ala yeke awasiokpari nga Christ asara si Ndia so aga tâ tënë (Mat. 5:17; aGal. 3:19). Ka ndia wa la Jacques asara tënë ni so? Lo yeke sara lani tënë ti “ndia ti Christ,” so a iri ni nga “ndia ti mabe” nga “ndia ti azo so a zi ala na ngbâa awe”. (aGal. 6:2; aRom. 3:27; Jacq. 2:12). Tongaso, “ndia so alingbi kue” andu aye kue so Jéhovah ahunda na e ti sara. A-Chrétien so a soro ala ti gue na yayu nga na “ambeni ngasangbaga” ayeke bâ nzoni na lege ni.​—Jean 10:16.

5. Ngbanga ti nyen ndia ti liberté akpengba pëpe?

⁵ “Ndia so alingbi kue” ayeke nde na ndia ti akodoro mingi. Na yâ ni a yeke wara acommandement so akpengba pëpe nga na aye so Nzapa afa so ayeke ngangu mingi pëpe ti mä yâ ni wala ti sara ye alingbi na ni (1 Jean 5:3). Jésus atene: “A yeke ngangu pëpe ti yô joug ti mbi na kungba ti mbi ayapu.” (Mat. 11:29, 30). Nga, “ndia so alingbi kue” ayeke pëpe mbeni yongoro molongo ti andia ndali ti so aluti na ndo ti ndoye nga a sû ni na yâ ti bibe nga na bê ti azo, me pëpe na ndo ti atableau ti tênë.​—Diko aHébreu 8:6, 10.

LEGE SO “NDIA SO ALINGBI KUE” AZI E NA GBE TI NGBÂA

6, 7. E lingbi ti tene nyen na ndo ti aye so Jéhovah ahunda na e ti sara? Ndia ti liberté amû lege na e ti sara nyen?

⁶ Andia so Jéhovah azia ni teti azo ayeke ndali ti nzoni ti ala nga ayeke bata ala. Na tapande, gbu li na ndo ti ngangu so sese ayeke na ni ti gboto aye na mbage ti lo. Azo adema tere pëpe atene so ndia ni so akanga lege na liberté ti ala. Me, ala bâ ndia so na nene ni, ndali ti so ala hinga so ndia so ayeke ndali ti nzoni ti ala. Legeoko nga, aye so Jéhovah ahunda na e ti sara so e manda ni na yâ ti ‘ndia ti Christ so alingbi kue’ ayeke ndali ti nzoni ti e.

⁷ Ndia ti liberté ayeke bata e, a yeke mû nga lege na e ti kaï anzara ti bê ti e kue so ayeke na lege ni sân ti sara sioni na tere ti e mveni wala ti bâ na nene ni pëpe droit nga na liberté ti amba ti e. Tongaso, e yeke na liberté ti sara ye ti bê ti e gi tongana e yeke na anzara so ayeke na lege ni. Ye so aye ti tene so a lingbi e duti na nzara ti sara ye so Jéhovah aye nga na aye so lo hunda na e ti sara. A lingbi e manda ti ndoye ye so Jéhovah aye nga ti ke ye so lo ke. Ndia ti liberté amû maboko na e ti sara ni.​—Amos 5:15.

8, 9. Aye ti nzoni wa azo so asara ye alingbi na ndia ti liberté ayeke wara? Fa mbeni tapande ni.

⁸ Teti so e yeke azo so alingbi kue pëpe, a yeke kete ye pëpe ti hon ndo ti asioni nzara. Me, tongana e sara ye lakue alingbi na ndia ti liberté, e yeke duti kamême na liberté laso. Na tapande, Jay so akomanse ti manda Bible fini fini ayeke ngbâa ti manga. Na ngoi so lo bâ so ye so lo sara so anzere na Nzapa pëpe, a lingbi lo mû desizion. Lo yeke ngbâ ti zia si mitele ti lo afa lege na lo wala lo yeke mä yanga ti Jéhovah? Na ndara, lo soro ti sara na Nzapa, atâa so a yeke ngangu mingi na lo ti zia lege ti manga. Tënë ti bê ti lo ayeke so wa na pekoni so lo zia lege ti ye so? Lo tene so lo yeke na ngia mingi nga lo yeke na “kota liberté.”

⁹ Ye so asi na Jay afa na lo so liberté so dunia so amû na zo ague na zo ti ‘bi bê na ndo ti mitele,’ a sara si zo aga ngbâa. Me liberté so alondo na Jéhovah, so aye ti tene “bingo bê na ndo ti yingo”, amû liberté na zo nga ague na zo ti wara “fini nga na siriri”. (aRom. 8:5, 6). Jay awara lani ngangu na ndo wa ti hon ndo ti ye so? A yeke pëpe na lege ti ngangu ti lo wani, me ti Nzapa. Lo tene: “Mbi manda Bible lakue, mbi sambela ti wara yingo vulu, nga mbi yeda na mungo maboko so aita ti congrégation amû na mbi na ndoye.” A-oko ye so alingbi ti mû maboko na e kue ti wara tâ liberté. Zia e bâ tongana nyen a yeke mû maboko na e.

YÔRO LÊ TI MO NA YÂ TI MBETI TI NZAPA

10. Ti “yôro lê” na yâ ti ndia ti Nzapa aye ti tene nyen?

¹⁰ Jacques 1:25 atene: “Zo so ayôro lê ti lo na yâ ti ndia so alingbi kue, ndia ti liberté, na lo ngbâ dä . . . fade lo yeke duti na ngia tongana lo sara ye alingbi na ni.” (Jacq. 1:25). Mbupa ti Grec so a kiri pekoni na ‘yôro lê’ aye ti tene “ti kuku ti bâ mbeni ye,” ye so ahunda ti tene zo asara ngangu ti gbu li. Biani, tongana e ye ti tene ndia ti liberté asara ye na ndo ti bibe nga na bê ti e, a lingbi e sara ngangu ti manda Bible nzoni, nga e gbu li na ndo ti ye so e diko.​—1 Tim. 4:15.

11, 12. (a) Tongana nyen la Jésus afa so a yeke kota ye ti sara ye alingbi na tâ tënë na yâ ti fini ti e? (b) Tongana ti so tapande ti paragraphe ni afa, kpale wa a lingbi amaseka akpe ni?

¹¹ Na oko ngoi ni, a lingbi e “ngbâ,” wala e sara ngangu ti sara ye alingbi na Mbeti ti Nzapa. A lingbi e sara ye lakue ague oko na tâ tënë na yâ ti fini ti e. Jésus afa mara ti bibe ni so na ngoi so lo tene na ambeni zo so amä na bê na lo, lo tene: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.” (Jean 8:31, 32). Mbeni bakari atene so ge mbupa “hinga” aye nga ti sara tënë ti bango ye na nene ni ndali ti so ye ni so zo ni ahinga ni ayeke na ngere mingi na lê ti lo. Ni la, e lingbi ti tene so e “hinga” tâ tënë nzoni tongana e sara ye alingbi na ni na yâ ti fini ti e. Tongana e sara tongaso, “tënë ti Nzapa” ayeke ‘sara kua’ na yâ ti bê ti e. A yeke mû maboko na e ti ngbâ ti changé aye na yâ ti sarango ye ti e tongaso si e sara ye tongana ti Babâ ti e ti yayu nzoni mingi.​—1 aThes. 2:13.

¹² Hunda tere ti mo: ‘Mbi hinga tâ tënë biani? Mbi yeke sara ye alingbi na ni na yâ ti fini ti mbi? Wala nzara ti ambeni “liberté” ti dunia so angbâ ti sara mbi ngangu?’ Mbeni ita-wali so babâ na mama ti lo ayeke aChrétien asara tënë ti ye so asi na lo. Lo tene so na ngoi so lo de maseka, lo mä na bê na Jéhovah me lo hinga lo nzoni pëpe. Lo tene: “Mbi manda pëpe ti ke ye so lo ke. Mbi pensé pëpe so aye so mbi sara alingbi ti zia ngia na bê ti lo wala ti son bê ti lo. Mbi hinga nga pëpe ti gue na mbage ti lo na ngoi so mbi yeke na kpale. Mbi zia bê ti mbi gi na ndo ti hingango ye ti mbi me mbi ga ti bâ so a yeke ye ti buba ndali ti so mbi hinga ye oko pëpe.” Ye ti nzoni ni ayeke so, na pekoni ita-wali so aga ti bâ so pensé ti lo ayeke sioni mingi, na lo changé ambeni kota ye na yâ ti fini ti lo. Lo komanse même ti sara kua ti pionnier permanent.

YINGO VULU ALINGBI TI MÛ MABOKO NA MO TI WARA LIBERTÉ

13. Na lege wa yingo vulu ti Nzapa ayeke mû maboko na e ti duti na liberté?

¹³ Mbeti 2 aCorinthien 3:17 atene: “Ndo so yingo ti Jéhovah ayeke dä, liberté ayeke dä.” Na lege wa yingo vulu ayeke mû maboko na e ti wara liberté? A yeke mû maboko na e ti duti na asarango ye tongana “ndoye, ngia, siriri, kangango bê ti ku, sarango nzoni na zo, bê so aye gi ti sara nzoni na zo, mabe, sarango ye na ngangu pëpe, kangango nzara ti bê.” (aGal. 5:22, 23). Tongana azo ayeke na asarango ye so pëpe, mbilimbili ndoye, ala yeke duti biani na liberté ape. Aye so asi na yâ ti dunia laso afa ni. Na pekoni so bazengele Paul ahunzi ti fa molongo ti ambage ti lengo ti yingo, lo tene: “Mbeni ndia ti ke aye so ayeke dä pëpe.” Lo ye ti tene nyen la? Mbeni ndia alingbi pëpe ti kanga lege na lengo ti yingo ti maï (aGal. 5:18). Jéhovah aye si e ngbâ ti duti na asarango ye so mingi nga teti lakue lakue.

14. Na lege wa azo so amû peko ti yingo ti dunia so aga ngbâa ti lo?

¹⁴ Azo so yingo ti dunia so ayeke fa lege na ala nga so asara ye so nzara ti mitele ti ala afa na ala alingbi ti pensé so ala yeke na liberté. (Diko 2 Pierre 2:18, 19.) Me ala hinga pëpe so ala yeke tâ angbâa. A lingbi angorogbia amû gbâ ti andia ti kanga lege na asioni nzara nga na asioni tambela ti azo. Paul atene: “A sigigi na ndia pëpe ndali ti zo so ayeke mbilimbili, me ndali ti azo so akpe ndia pëpe na azo ti ngangu-li.” (1 Tim. 1:9, 10). Ala yeke nga angbâa ti siokpari nga ‘aye so mitele aye,’ mitele so ayeke sioni mokonzi, la ayeke fa lege na ala (aÉph. 2:1-3). Legeoko tongana akete nyama so atï na yâ ti mafuta ti wotoro ti kaï nzara ti ala me so na pekoni ala lingbi ti kpe pëpe, azo so amû peko ti asioni nzara ti bê ti ala aga ngbâa ti siokpari.​—Jacq. 1:14, 15.

WARA LIBERTÉ NA YÂ TI CONGRÉGATION TI ACHRÉTIEN

15, 16. Aye ti nzoni wa la e wara ngbene ye so e ga membre ti congrégation? Liberté wa e yeke na ni na yâ ti congrégation?

¹⁵ Na ngoi so mo to nda ti gue na congrégation ti aChrétien, a yeke pëpe mbeni bungbi so azo ni ayeke wara tere ti sara ambeni senge ye la mo lï na yâ ni. Me, mo ga na yâ ti congrégation ndali ti so Jéhovah la agboto mo (Jean 6:44). Nyen la apusu lo ti gboto mo? Lo bâ so mo yeke mbeni zo ti mbilimbili so akpe mbeto ti Nzapa? Peut-être mo yeke tene: “Ên-ën!” Ka nyen la Nzapa abâ nyen? Lo bâ so mo yeke nduru ti sara ye alingbi na ndia ti lo nga ti yeda na fango lege so lo yeke fa na ndoye. Na yâ ti congrégation, Jéhovah amû na mo kobe na lege ti yingo, lo zi mo na yâ ti afango ye ti abungbi ti vorongo nzapa ti wataka nga na atënë ti mvene nga lo fa na mo tongana nyen ti sara ye tongana ti Christ. (Diko aÉphésien 4:22-24.) Ye so asara si mo wara pasa ti duti na popo ti azo so, na yâ ti dunia, gi ala la ayeke biani na liberté.​—Jacq. 2:12.

¹⁶ Gbu li na ndo ti ye so: Na ngoi so mo yeke na popo ti azo so aye Jéhovah na bê ti ala kue, mbeto asara mo? Na ngoi so mo yeke sara lisoro na aita ti mo na Da ti Royaume, mo yeke gbu aye ti mo ngangu ti tene agirisa ape? Oko pëpe! Mo bâ so mo duti nzoni nga mo yeke na liberté. Bê ti mo ayeke duti tongaso na ngoi so mo yeke na popo ti ambeni zo na mbeni ndo nde? Oko pëpe! Liberté so mo yeke na ni laso na popo ti azo ti Jéhovah ayeke gi mbeni kete yanga ti liberté so mo yeke wara ande na yâ ti ngoi so ayeke ga.

“LIBERTÉ TI GLOIRE TI AMOLENGE TI NZAPA”

17. Na lege wa ‘fango tere ti amolenge ti Nzapa na gigi’ ayeke mû maboko na azo ti wara liberté?

¹⁷ Paul asara tënë ti liberté so Jéhovah ayeke mû ande na azo ti lo na sese, lo tene: “Lê ti création ayeke gi na lege ti ku ngoi so amolenge ti Nzapa ayeke fa tere ti ala na gigi.” Lo kiri lo tene: “Fade a yeke zi création nga na gbe ti ngbâa ti ye so abuba, na lo yeke wara liberté ti gloire ti amolenge ti Nzapa.” (aRom. 8:19-21). Tënë “création” aye ti sara tënë ti azo so ayeke na beku ti wara fini na ndo ti sese, azo so ayeke bâ nzoni na ngoi so amolenge ti Nzapa so a soro ala ti gue na yayu ayeke “fa tere ti ala na gigi.” “Amolenge” ni so ayeke fa tere ti ala na gigi ande na ngoi so, na peko ti so a zingo ala na kuâ na yayu, ala yeke bungbi oko na Christ ti zi aye ti sioni na ndo ti sese nga ti bata “azo mingi mingi” ti gue na ala na yâ ti fini dunia.​—Apoc. 7:9, 14.

18. Na lege wa liberté ti azo so amä yanga ayeke kiri ti ga kota? Liberté wa la azo ayeke wara ande na nda ni?

¹⁸ Azo ayeke wara ande mbeni liberté so ayeke tâ nde mingi. A yeke zi ala na gbe ti ngangu ti Satan na asioni yingo (Apoc. 20:1-3). Azo ayeke wu ande pupu! Ti londo na ngoi ni so ti gue na ni, na lege ti sandaga ti Christ, azo 144 000 so ayeke agbia nga aprêtre ayeke ngbâ ande ti zi azo na gbe ti ngbâa ti siokpari juska ti tene ala sigigi biani biani na gbe ni (Apoc. 5:9, 10). Tongana azo so amä yanga angbâ be-ta-zo na yâ ti tara, ala yeke wara ande liberté so alingbi kue, so Jéhovah aleke lani ndali ti ala, so ayeke “liberté ti gloire ti amolenge ti Nzapa.” Gbu li kete! A yeke duti ande ngangu na mo mbeni pëpe ti sara ye so ayeke nzoni na lê ti Nzapa. Ye ti sioni ayeke duti ande mbeni pëpe na yâ ti tere ti mo, na yâ ti bê ti mo nga na bibe ti mo nga mo yeke wara lege ti sara ye tâ gi tongana ti Nzapa.

19. Nyen la a lingbi e ngbâ ti sara tongana e ye ti wara “liberté ti gloire ti amolenge ti Nzapa”?

¹⁹ Mo ye ti wara “liberté ti gloire ti amolenge ti Nzapa”? Tongana mo ye ti wara ni, zia si “ndia so alingbi kue, ndia ti liberté” angbâ ti sara ngangu na ndo ti bibe nga na bê ti mo. Manda Mbeti ti Nzapa nzoni. Sara ye alingbi na tâ tënë na yâ ti fini ti mo. Sambela ti wara yingo vulu. Gi ti bâ nzoni na lege ti congrégation ti aChrétien nga na kobe ti yingo so Jéhovah ayeke mû na e. Zia lege pëpe na Satan ti handa mo, tongana ti so lo handa Ève lani, ti pensé so aye so Nzapa ahunda na e ti sara akpengba mingi. Atâa so Zabolo ayeke na amayele mingi, e lingbi ti hon ndo ti lo “ngbanga ti so e hinga nzoni mingi aye so lo ye ti sara.” A yeke ye so e yeke bâ na yâ ti article ti peko.​—2 aCor. 2:11.

[Foto na lembeti 9]

Mbi ngbâ ti sara nzara ti ambeni “liberté” ti dunia so?

[Foto na lembeti 9]

Mbi yeke sara ye alingbi na tâ tënë na yâ ti fini ti mbi?