Atënë so azo ahunda
Ngbanga ti nyen 1 aCorinthien 10:8 atene so azo ti Israël 23 000 atï na lâ oko teti so ala sala pitan, atâa so Nombre 25:9 afa wungo ti azo 24 000?
Aye ayeke mingi so alingbi ti fa nda ti kangbi so ayeke na popo ti awungo so ayeke na yâ ti aversê use so. Oko ye ni so akpengba pëpe ayeke peut-être so tâ wungo ni ayeke mbilimbili na popo ti 23 000 na 24 000. Ye so a sû na yâ ti aversê use so amû lege ti kiri na wungo ni na gbe ni wala ti pusu ni na nduzu.
Zia e bâ mbeni ye nde. Bazengele Paul ayeke fa lani peko ti tondo ti azo ti Israël na Sittim tongana mbeni tapande ti gbotongo mê teti aChrétien so ayeke na yâ ngbele gbata ti Corinthe, mbeni gbata so a hinga ni lani teti sioni salango ye ti azo ni. Lo sû na mbeti: “A lingbi e sala pitan pëpe, legeoko tongana ambeni ti ala asala, si azo saki bale-use na ota atï na lâ oko.” Na ziango kangbi na popo ti ala so Jéhovah afâ ala teti ala sala pitan, Paul afa wungo ti azo 23 000.—1 aCorinthien 10:8.
Ye oko, Nombre chapitre 25 atene na e so “azo ti Israël asala beoko na Baal-Péor, na ngonzo ti L’Eternel alondo na tele ti azo ti Israël.” Jéhovah amû yanga na Moïse ti fâ “amokonzi kue ti azo ni”. Na pekoni, Moïse amû yanga na ajuge ti sala ye alingbi na ye so Jéhovah atene. Na nda ni, tongana Phinéas asala ye hio ti fâ zo ti Israël so aga na mbeni wali ti Madian na yâ kando ni, “kobela ti futi kodoro” ni ahunzi. Tondo ni ako nda ni na tënë so: “Wungo ti azo so akui na lege ti kobela ti futi kodoro ayeke [saki] bale-use na osio.”—Nombre 25:1-9.
Wungo so a fa ni na Nombre andu biani “amokonzi kue ti azo ni” so ajuge afâ ala nga na ala so Jéhovah mveni si afâ ala. A lingbi ti tene so wungo ti amokonzi so ajuge afâ ala asi saki oko. Tongana a yeke tongaso, a yeke sala si wungo ni asi 24 000. Atâa amokonzi ni so amû li ni na yâ salango pitan ni, ala mû mbage na yâ amatanga ni wala ala yeda na azo so asala aye so, ala kue ayeke na tënë na li ti ala teti so ala ‘sala beoko na Baal-Péor’.
Na ndo tënë ‘sala beoko’, mbeni buku atene so nda ni alingbi ti duti “ti kanga tele mveni na mbeni zo.” Azo ti Israël ayeke lani mbeni mara so amû tele ti lo na Jéhovah, me na ngoi so ala ‘sala beoko na Baal-Péor’, ala fâ yâ ti songo ti mungo tele ti ala na Nzapa. Ngu 700 tongaso na pekoni, na lege ti prophète Osée, Jéhovah atene na azo ti Israël: “Ala si na Baal-Péor na ala bata ala mveni nde teti ye ti kamene, na ala ga sioni mingi, alingbi na ye so ala ndoye.” (Osée 9:10). Ala kue so asala lani ye ti kamene so alingbi na sioni ngbanga ti Nzapa. Ni la, Moïse adabe ti amolenge ti Israël: “I bâ na lê ti i ye so L’Eternel asala tënë ti Baal-Péor, teti L’Eternel Nzapa ti i afâ azo kue na popo ti i so ague na peko ti Baal-Péor.”—Deutéronome 4:3.