အဆုံးထိ သစ္စာရှိရှိ ခံရပ်နိုင်ဖို့ ကူညီပေးမယ့် စာတစ်စောင်

၁-၂။ (က) တမန်တော် ပေါလု စာရေးချိန်မှာ ယုဒပြည်က ခရစ်ယာန်တွေရဲ့ အခြေအနေ ဘယ်လို ရှိသလဲ။ (ခ) ပေါလုရဲ့ စာဟာ ဘာကြောင့် အချိန်ကိုက် ဖြစ်သလဲ။

ယေရှု သေဆုံးပြီးနောက် ဂျေရုဆလင်မြို့နဲ့ ယုဒပြည်က ဟီဘရူးခရစ်ယာန်တွေ အခက်အခဲ အများကြီး ကြုံကြရတယ်။ ခရစ်ယာန် အသင်းတော် တည်ထောင်ပြီးနောက် မကြာခင်မှာ အကြီးအကျယ် နှိပ်စက်ညှဉ်းဆဲခံရတယ်။ (တ. ၈:၁) နောက်အနှစ် ၂၀ လောက်အကြာမှာ အငတ်ဘေးဆိုက်လို့ ငွေကြေးအကျပ်အတည်း ကြုံရတယ်။ (တ. ၁၁:၂၇-၃၀) အေဒီ ၆၁ ဝန်းကျင်ကတော့ ရှေ့မှာ ကြုံရမယ့် ဒုက္ခကာလနဲ့ ယှဉ်ရင် အေးချမ်းတဲ့ ကာလလို့ ပြောရမယ်။ အဲဒီကာလအတွင်း စွမ်းအားတော် လမ်းညွှန်မှုနဲ့ ရေးတဲ့ စာတစ်စောင်ကို တမန်တော် ပေါလုဆီကနေ သူတို့ ရတယ်။ အချိန်ကိုက် ရတဲ့ စာပါပဲ။

^၂ ဘာကြောင့် အချိန်ကိုက် ဖြစ်သလဲ။ အေးချမ်းတဲ့ ကာလ ကြာကြာခံမှာ မဟုတ်လို့ပါပဲ။ ဒါကြောင့် ရှေ့မှာ ကြုံရမယ့် ဒုက္ခကာလကို ခံရပ်နိုင်ဖို့ ကူညီပေးမယ့် လက်တွေ့ကျ အကြံပြုချက်တွေကို ပေါလု ထည့်ရေးထားတယ်။ ယေရှု ကြိုပြောခဲ့တဲ့အတိုင်း ဂျေရုဆလင်မြို့ ဖျက်ဆီးခံရတော့မယ်။ (လု. ၂၁:၂၀) ဖျက်ဆီးခံရမယ့် အချိန်အတိအကျကိုတော့ ပေါလုကော ယုဒပြည်က ခရစ်ယာန်တွေပါ မသိဘူး။ ဒါပေမဲ့ အဲဒီအချိန် မရောက်ခင်စပ်ကြား ယုံကြည်ခြင်း၊ ခံနိုင်ရည်လိုမျိုး အရည်အသွေးတွေ တိုးများအောင် လုပ်ခြင်းအားဖြင့် သူတို့ အသင့်ပြင်ထားနိုင်တယ်။—ဟီ. ၁၀:၂၅။ ၁၂:၁၊ ၂။

၃။ ဟီဘရူးခရစ်ယာန်တွေ ရခဲ့တဲ့ စာကို ဒီနေ့ခေတ် ခရစ်ယာန်တွေ ဘာကြောင့် အထူးအာရုံစိုက်သင့်သလဲ။

^၃ ဟီဘရူးခရစ်ယာန်တွေ ကြုံခဲ့တာထက် ပိုကြီးမားတဲ့ဒုက္ခ ကျွန်တော်တို့ ကြုံရတော့မယ်။ (မ. ၂၄:၂၁။ ဗျာ. ၁၆:၁၄၊ ၁၆) ဒါကြောင့် သူတို့ ရခဲ့တဲ့ စာမှာ ပါတဲ့ လက်တွေ့ကျ အကြံပြုချက်တချို့ကို သုံးသပ်ကြရအောင်။ အဲဒီအကြံပြုချက်တွေက ကျွန်တော်တို့ကိုလည်း ကူညီပေးနိုင်တယ်။

“ရင့်ကျက်တဲ့အဖြစ်ကို တက်လှမ်းကြစို့”

၄။ ဂျူးခရစ်ယာန်တွေ ဘာအခက်အခဲတွေ ကြုံရသလဲ။ (ရုပ်ပုံကိုလည်း ကြည့်ပါ။)

^၄ ဂျူးနောက်ခံ ရှိတဲ့ ခရစ်ယာန်တွေ ကြီးကြီးမားမား အခက်အခဲတစ်ခု ကြုံရတယ်။ တစ်ချိန်ကဆိုရင် ဂျူးလူမျိုးဟာ ယေဟောဝါဘုရား ရွေးချယ်ထားတဲ့ လူမျိုး ဖြစ်ခဲ့တာ။ ဂျေရုဆလင်မြို့ဟာ ယေဟောဝါကို ကိုယ်စားပြုတဲ့ ဘုရင်တွေ နန်းစိုက်ရာမြို့ ဖြစ်ခဲ့တာ။ ဗိမာန်တော်ဟာ စင်ကြယ်တဲ့ ဝတ်ပြုရေးရဲ့ အချက်အချာနေရာ ဖြစ်ခဲ့တာ။ သစ္စာရှိ ဂျူးအားလုံးဟာ မောရှေပညတ်မှာ ပါတာတွေ၊ ဘာသာရေး ခေါင်းဆောင်တွေ သင်ပြတဲ့ စည်းမျဉ်းတွေကို လိုက်နာခဲ့တာ။ အစားအသောက်၊ အရေဖျားဖြတ်ခြင်း၊ လူမျိုးခြားတွေကို ပြောဆိုဆက်ဆံခြင်းစတဲ့ ကဏ္ဍတွေကအစ စည်းမျဉ်းတွေ ရှိတယ်။ ဒါပေမဲ့ ယေရှု သေဆုံးပြီးနောက် ပညတ်တရား အဆုံးတိုင်သွားတယ်။ ဗိမာန်တော်မှာ ပူဇော်သက္ကာတွေကို ဆက်သစရာ မလိုတော့ဘူး။ ပညတ်တရား လိုက်နာတာ ခေါက်ရိုးကျိုးနေပြီ ဖြစ်တဲ့ ဂျူးခရစ်ယာန်တွေအတွက် ကြီးကြီးမားမား အခက်အခဲပါပဲ။ (ဟီ. ၁၀:၁၊ ၄၊ ၁၀) တမန်တော် ပေတရုတို့လို ရင့်ကျက်တဲ့ ခရစ်ယာန်တွေတောင် အပြောင်းအလဲတချို့ လုပ်ဖို့ ခက်ခဲ့တယ်။ (တ. ၁၀:၉-၁၄။ ဂလ. ၂:၁၁-၁၄) ယုံကြည်ချက်အသစ်တွေကြောင့် ဂျူးခရစ်ယာန်တွေဟာ ဂျူးဘာသာရေး ခေါင်းဆောင်တွေရဲ့ ပစ်မှတ် ဖြစ်လာတယ်။

၅။ ဂျူးခရစ်ယာန်တွေကို ဘယ်အုပ်စုနှစ်စု ဆန့်ကျင်ခဲ့သလဲ။

^၅ ဂျူးခရစ်ယာန်တွေကို ဆန့်ကျင်တဲ့ အုပ်စုနှစ်စု ရှိတယ်။ တစ်စုက သူတို့ကို အယူဖောက်ပြန်သွားသူတွေလို ဆက်ဆံနေကြတဲ့ ဂျူးဘာသာရေး ခေါင်းဆောင်တွေ။ နောက်တစ်စုကတော့ မောရှေပညတ် အတင်းအကျပ် ဆက်လိုက်နာခိုင်းနေတဲ့ အသင်းတော်ထဲက အမည်ခံ ခရစ်ယာန်တွေ။ နှိပ်စက်ညှဉ်းဆဲမခံရအောင် အဲဒီလိုလိုက်နာခိုင်းတာ ဖြစ်နိုင်တယ်။ (ဂလ. ၆:၁၂) အမှန်တရားမှာ စွဲမြဲနေဖို့ သစ္စာရှိ ခရစ်ယာန်တွေကို ဘာက ကူညီပေးမလဲ။

၆။ ဘာလုပ်ဖို့ ယုံကြည်သူချင်းတွေကို ပေါလု အားပေးသလဲ။ (ဟီဘရူး ၅:၁၄–၆:၁)

^၆ ကျမ်းစာကို နက်နက်နဲနဲ လေ့လာဖို့ ယုံကြည်သူချင်းတွေကို စာထဲမှာ ပေါလု အားပေးတယ်။ (ဟီဘရူး ၅:၁၄–၆:၁ ကို ဖတ်ပါ။) ခရစ်ယာန်ဝတ်ပြုမှုဟာ ဂျူးဝတ်ပြုမှုထက် ပိုသာကြောင်း ဟီဘရူးကျမ်းစောင်တွေ သုံးပြီး ကျိုးကြောင်းဆင်ခြင်ပြတယ်။a အမှန်တရားကို ပိုသိလာရင်၊ နက်နက်နဲနဲ နားလည်လာရင် သွန်သင်ချက်အမှားတွေကို သူတို့ ခွဲခြားသိမယ်၊ ငြင်းပယ်တတ်မယ်၊ လမ်းမလွဲတော့ဘူးဆိုတာ ပေါလု သိတယ်။

၇။ ကျွန်တော်တို့ ဘာစမ်းသပ်မှုတွေ ကြုံရသလဲ။

^၇ ဒီနေ့လည်း ယေဟောဝါရဲ့ အမှားအမှန်စံနှုန်းတွေကို ဆန့်ကျင်တဲ့ အတွေးအခေါ်တွေ ပျံ့နေတယ်။ လိင်မှုကိစ္စနဲ့ပတ်သက်ပြီး ကျမ်းစာစံနှုန်းကို ယေဟောဝါသက်သေတွေ လိုက်နာတာဟာ အမြင်ကျဉ်းတာပဲဆိုပြီး ဆန့်ကျင်သူတွေ ပြောကြတယ်။ လောကအမြင်ဟာ ဘုရားရဲ့ ပြည့်ဝစုံလင်တဲ့ အမြင်နဲ့ ကွာသည်ထက် ကွာလာတယ်။ (ပညာ. ၁၇:၁၅) ဒါကြောင့် အမှန်တရားမှာ အားလျော့သွားစေဖို့၊ အမှန်တရားကို လုံးလုံး ကျောခိုင်းသွားစေဖို့ ရည်ရွယ်ချက်နဲ့ ဆန့်ကျင်သူတွေ ဖြန့်နေတဲ့ အတွေးအခေါ်အမှားတွေကို ကျွန်တော်တို့ ခွဲခြားသိရမယ်၊ ငြင်းပယ်တတ်ရမယ်။—ဟီ. ၁၃:၉။

၈။ ရင့်ကျက်တဲ့အဖြစ်ကို ဘယ်လို တက်လှမ်းနေနိုင်သလဲ။

^၈ ဟီဘရူးခရစ်ယာန်တွေကို ပေါလု အကြံပေးတဲ့အတိုင်း ကျွန်တော်တို့လည်း ရင့်ကျက်တဲ့အဖြစ်ကို တက်လှမ်းနေရမယ်။ ဆိုလိုတာက အမှန်တရားကို နက်နက်နဲနဲ နားလည်လာအောင်၊ ယေဟောဝါ တွေးသလို တွေးတတ်လာအောင် လုပ်ရမယ်။ ဒါဟာ ဆက်ကပ်အပ်နှံ နှစ်ခြင်းခံပြီးရင်တောင် ဆက်လုပ်နေရမယ့်အရာပဲ။ အမှန်တရားသက်တမ်း ဘယ်လောက်ပဲ ရှိပါစေ ကျွန်တော်တို့အားလုံး မှန်မှန် ကျမ်းစာဖတ်ရှုလေ့လာရမယ်။ (ဆာ. ၁:၂) ဒါဆိုရင် ဟီဘရူးခရစ်ယာန်တွေဆီ ရေးတဲ့ စာမှာ ပေါလု အလေးပေးဖော်ပြတဲ့ အရည်အသွေးတစ်ခု တိုးများလာမယ်။ အဲဒါကတော့ ယုံကြည်ခြင်းပါ။—ဟီ. ၁၁:၁၊ ၆။

‘ယုံကြည်ခြင်း ရှိတဲ့အတွက် အသက်ဆက်ရှင်မယ်’

၉။ ဟီဘရူးခရစ်ယာန်တွေ ခိုင်မာတဲ့ ယုံကြည်ခြင်း ဘာကြောင့် လိုအပ်သလဲ။

^၉ ယုဒပြည်မှာ ဒုက္ခကာလ ရောက်လာတဲ့အခါ အသက်ရှင်လွတ်မြောက်ဖို့ ဟီဘရူးခရစ်ယာန်တွေ ခိုင်မာတဲ့ ယုံကြည်ခြင်း လိုအပ်တယ်။ (ဟီ. ၁၀:၃၇-၃၉) ဂျေရုဆလင်မြို့ကို စစ်တပ် ဝိုင်းရံထားတာ မြင်တဲ့အခါ တောင်ပေါ် ပြေးဖို့ နောက်လိုက်တွေကို ယေရှု သတိပေးခဲ့တယ်။ ဂျေရုဆလင်မြို့ထဲမှာ နေနေ၊ ယုဒတောရွာမှာ နေနေ ခရစ်ယာန်အားလုံး ထွက်ပြေးကြရမှာ။ (လု. ၂၁:၂၀-၂၄) ပုံမှန်ဆိုရင် စစ်တပ် ဝိုင်းရံခံရတဲ့အခါ ဂျေရုဆလင်မြို့လိုမျိုး မြို့ရိုး အခိုင်အခံ့ ရှိတဲ့နေရာကို လူတွေ လာခိုလှုံလေ့ရှိတယ်။ ဒါကြောင့် တောင်ပေါ် ပြေးပါဆိုတဲ့ ညွှန်ကြားချက်ဟာ လက်တွေ့မကျပုံပေါက်နိုင်တယ်။ ညွှန်ကြားချက် လိုက်နာဖို့ ခိုင်မာတဲ့ ယုံကြည်ခြင်း လိုအပ်တယ်။

၁၀။ ခိုင်မာတဲ့ ယုံကြည်ခြင်းက ဘာလုပ်ဖို့ ခရစ်ယာန်တွေကို လှုံ့ဆော်ပေးသလဲ။ (ဟီဘရူး ၁၃:၁၇)

^၁၀ အသင်းတော်ကို ညွှန်ကြားဖို့ ယေရှု အသုံးပြုသူတွေကိုလည်း ဟီဘရူးခရစ်ယာန်တွေ ယုံကြည်ဖို့ လိုအပ်တယ်။ ဘယ်အချိန်၊ ဘယ်လို ပြေးရမယ်ဆိုတာနဲ့ပတ်သက်ပြီး ဦးဆောင်နေသူတွေ သတ်သတ်မှတ်မှတ် ညွှန်ကြားပေးခဲ့ပုံရတယ်။ (ဟီဘရူး ၁၃:၁၇ ကို ဖတ်ပါ။) “နာခံပါ” ဆိုပြီး ဟီဘရူး ၁၃:၁၇ မှာ ပေါလု သုံးတဲ့ ဂရိစကားလုံးက နာခံဖို့ တာဝန်ရှိလို့ မဟုတ်ဘဲ ဦးဆောင်နေသူတွေကို ယုံလို့ နာခံတာ ဖြစ်သင့်ကြောင်း ဖော်ပြတယ်။ ဒါကြောင့် ဟီဘရူးခရစ်ယာန်တွေဟာ ဦးဆောင်နေသူတွေကို ဒုက္ခကာလ မရောက်ခင်ကတည်းက ယုံကြည်စိတ်ချတတ်အောင် လုပ်ထားဖို့ လိုအပ်တယ်။ ဦးဆောင်နေသူတွေရဲ့ ညွှန်ကြားချက်တွေကို အေးချမ်းတဲ့ ကာလမှာ နာခံမှ ဒုက္ခကာလမှာ နာခံဖို့ လွယ်မယ်။

၁၁။ ဒီနေ့ခေတ် ခရစ်ယာန်တွေ ခိုင်မာတဲ့ ယုံကြည်ခြင်း ရှိဖို့ ဘာကြောင့် အရေးကြီးသလဲ။

^၁၁ ဒီနေ့ခေတ် ခရစ်ယာန်တွေလည်း ခိုင်မာတဲ့ ယုံကြည်ခြင်း ရှိဖို့ အရေးကြီးတယ်။ ဘာကြောင့်လဲ။ ဒီလောကစနစ်အဆုံး ရောက်တော့မယ်ဆိုတာကို လူအများစု မယုံတဲ့၊ ကဲ့ရဲ့လှောင်ပြောင်တဲ့ ခေတ်ကာလမှာ အသက်ရှင်နေရလို့ပဲ။ (၂ ပေ. ၃:၃၊ ၄) ဒါ့အပြင် ကြီးစွာသောဒုက္ခအတွင်း ဘာတွေ ဖြစ်မယ်ဆိုတာ ကျမ်းစာမှာ ဖော်ပြထားလို့ ကျွန်တော်တို့ တော်တော်များများ သိထားတယ်။ ဒါပေမဲ့ မသိတာတွေလည်း ရှိတယ်။ သတ်မှတ်ထားချိန်မှာ ဒီလောကစနစ်အဆုံး ရောက်လာမယ်၊ ကျွန်တော်တို့ကို ယေဟောဝါ စောင့်ရှောက်မယ်ဆိုတာ အခိုင်အမာ ယုံကြည်ရမယ်။—ဟဗ. ၂:၃။

၁၂။ ကြီးစွာသောဒုက္ခမှာ လွတ်မြောက်ဖို့ ဘာက ကူညီပေးမလဲ။

^၁၂ ဒီနေ့အချိန်မှာ “သစ္စာနဲ့ သတိပညာရှိတဲ့ ကျွန်” ကို သုံးပြီး ယေဟောဝါ ညွှန်ကြားနေတယ်ဆိုတာလည်း ကျွန်တော်တို့ အခိုင်အမာ ယုံကြည်ရမယ်။ (မ. ၂၄:၄၅) ဂျေရုဆလင်မြို့ကို ရောမစစ်တပ် ဝိုင်းရံချိန်မှာ အသက်ကယ် ညွှန်ကြားချက်တွေကို ဟီဘရူးခရစ်ယာန်တွေ ရခဲ့သလိုပဲ ကြီးစွာသောဒုက္ခ စချိန်မှာ သတ်သတ်မှတ်မှတ် ညွှန်ကြားချက်တွေကို ကျွန်တော်တို့ ရလာနိုင်တယ်။ အခုအချိန်ဟာ အဖွဲ့အစည်းကို ဦးဆောင်နေသူတွေရဲ့ ညွှန်ကြားချက်တွေကို ယုံကြည်စိတ်ချတတ်အောင် လုပ်ထားရမယ့် အချိန်ပဲ။ ညွှန်ကြားချက်တွေကို အခုအချိန်မှာ လိုက်နာဖို့ ခက်နေရင် ကြီးစွာသောဒုက္ခအတွင်း စိတ်ချလက်ချ လိုက်နာဖို့ ပိုခက်မယ်။

၁၃။ ဟီဘရူး ၁၃:၅ မှာ ပါတဲ့ အကြံပေးချက်က ဘာကြောင့် အရေးကြီးသလဲ။

^၁၃ ဘယ်အချိန်၊ ဘယ်လို ပြေးရမယ်ဆိုတာနဲ့ပတ်သက်ပြီး ညွှန်ကြားချက် စောင့်နေတုန်း ဟီဘရူးခရစ်ယာန်တွေဟာ ဝတ်ပြုရေးကို ဦးစားထားတဲ့ ဘဝပုံစံနဲ့ နေခဲ့ကြရတယ်။ “ငွေတပ်မက်တာကို ရှောင်” ခဲ့ကြရတယ်။ (ဟီဘရူး ၁၃:၅ ကို ဖတ်ပါ။) ခရစ်ယာန်တချို့ဟာ အငတ်ဘေး၊ ဆင်းရဲဒုက္ခ ကြုံခဲ့ဖူးတယ်။ (ဟီ. ၁၀:၃၂-၃၄) သတင်းကောင်းအတွက် အခက်အခဲတွေကို ကျေကျေနပ်နပ် ခံရပ်ခဲ့ပေမဲ့ နောက်နောင် ဒီလိုဒုက္ခတွေ မကြုံရဖို့ဆိုရင် ငွေရှိမှ ဖြစ်မယ်ဆိုတဲ့ အတွေး ဝင်သွားကြပုံပဲ။ ဒါပေမဲ့ ဂျေရုဆလင်မြို့ ဖျက်ဆီးခံရချိန်မှာ ငွေက ကယ်တင်နိုင်မှာ မဟုတ်ဘူး။ (ယာ. ၅:၃) ပိုဆိုးတာက ပစ္စည်းဥစ္စာမက်ရင် အိမ်နဲ့ ပိုင်ဆိုင်ရာတွေ ထားခဲ့ပြီး ထွက်ပြေးဖို့ ပိုခက်မယ်။

၁၄။ ခိုင်မာတဲ့ ယုံကြည်ခြင်းက ပိုင်ဆိုင်ရာတွေနဲ့ပတ်သက်တဲ့ ကျွန်တော်တို့ရဲ့ ဆုံးဖြတ်ချက်တွေအပေါ် ဘယ်လို သက်ရောက်မလဲ။

^၁၄ ဒီလောကစနစ်အဆုံး ရောက်လာတော့မယ်ဆိုတာ အခိုင်အမာ ယုံကြည်ရင် ငွေတပ်မက်တာကို ကျွန်တော်တို့ ရှောင်နိုင်မယ်။ “ယေဟောဝါ အမျက်ထွက်တဲ့နေ့မှာ ရွှေငွေတွေ ကယ်တင်နိုင်မှာ မဟုတ်” မှန်း လူတွေ သဘောပေါက်သွားကြမှာ ဖြစ်လို့ “ငွေကို လမ်းပေါ် လွှင့်ပစ်လိမ့်မယ်။” (ယေဇ. ၇:၁၉) ဒါကြောင့် ငွေ ရှာနိုင်သမျှ ရှာဖို့ အာရုံမစိုက်ပါနဲ့။ မပိုလွန်း၊ မလိုလွန်း ဘဝပုံစံနဲ့ နေနိုင်မယ့် ဆုံးဖြတ်ချက်တွေ ချပါ။ မလိုအပ်ဘဲ အကြွေးတင်မခံပါနဲ့။ ပိုင်ဆိုင်ရာတွေ ထိန်းသိမ်းတာနဲ့ပဲ အချိန်ကုန်တာမျိုး အဖြစ်မခံပါနဲ့။ ပိုင်ဆိုင်ရာတွေကို အလွန်အမင်း မဖက်တွယ်ပါနဲ့။ (မ. ၆:၁၉၊ ၂၄) ဒီလောကစနစ်အဆုံး နီးလာလေ ယေဟောဝါကို အားကိုးသလား၊ ပိုင်ဆိုင်ရာတွေကို အားကိုးသလားဆိုတာ ရွေးချယ်ရမယ့် အခြေအနေတွေ ကြုံလာရနိုင်တယ်။

“ခံနိုင်ရည် ရှိဖို့ လိုတယ်”

၁၅။ ဟီဘရူးခရစ်ယာန်တွေ ခံနိုင်ရည် ရှိဖို့ ဘာကြောင့် အထူးလိုအပ်သလဲ။

^၁၅ ယုဒပြည်မှာ အခြေအနေတွေ ပိုဆိုးလာတာနဲ့အမျှ ဟီဘရူးခရစ်ယာန်တွေဟာ ယုံကြည်ခြင်း စမ်းသပ်မှုတွေ ခံရပ်ခဲ့ကြရတယ်။ (ဟီ. ၁၀:၃၆) တချို့က နှိပ်စက်ညှဉ်းပန်းမှု အကြီးအကျယ် ကြုံဖူးပေမဲ့ တော်တော်များများက အေးချမ်းတဲ့ ကာလမှာ ခရစ်ယာန် ဖြစ်လာတာ။ ဘာပဲဖြစ်ဖြစ် ယေရှုလို သွေးမြေကျတဲ့အထိ မခံရသေးလို့ ရှေ့မှာ ကြုံရမယ့် ယုံကြည်ခြင်း စမ်းသပ်မှုတွေအတွက် အသင့်ပြင်ထားဖို့ ပေါလု သတိပေးတယ်။ (ဟီ. ၁၂:၄) ခရစ်ယာန်ဘာသာ ပျံ့နှံ့လာတာနဲ့အမျှ ဆန့်ကျင်သူတွေ ပိုမုန်းတီးရန်လိုလာကြတယ်။ ဟီဘရူးကျမ်း မရေးခင် နှစ်အနည်းငယ်တုန်းက ဂျေရုဆလင်မြို့ကို ပေါလု ရောက်လာလို့ လူတွေ ဆူပူအုံကြွသွားသေးတယ်။ “သူ့ကို မသတ်ရသေးခင် စားသောက်မိရင် ကျိန်စာသင့်ပါစေ” ဆိုပြီး ဂျူးအယောက် ၄၀ ကျော် ကျိန်ကြတယ်။ (တ. ၂၂:၂၂။ ၂၃:၁၂-၁၄) မုန်းတီးရန်လိုခံရမယ်ဆိုပေမဲ့ ခရစ်ယာန်တွေဟာ ဝတ်ပြုဖို့ စုဆုံကြရမယ်၊ ဟောပြောကြရမယ်၊ ယုံကြည်ခြင်း ခိုင်မာအောင် လုပ်ကြရမယ်။

၁၆။ စမ်းသပ်မှုတွေနဲ့ပတ်သက်ပြီး ကျွန်တော်တို့ အမြင်မှန် ရှိဖို့ ပေါလုရဲ့ စာက ဘယ်လို ကူညီပေးနိုင်သလဲ။ (ဟီဘရူး ၁၂:၇)

^၁၆ စမ်းသပ်မှုတွေကို ဟီဘရူးခရစ်ယာန်တွေ ခံရပ်နိုင်ဖို့ဆိုရင် အမြင်မှန် ရှိရမယ်ဆိုတာ ပေါလု သိတယ်။ ဒါကြောင့် စမ်းသပ်မှုတွေကို ဘုရားရဲ့ လေ့ကျင့်မှုလို့ သဘောထားဖို့ ပြောတယ်။ (ဟီဘရူး ၁၂:၇ ကို ဖတ်ပါ။) ဒီလိုလေ့ကျင့်မှုတွေက အရည်အသွေးကောင်းတွေ ရှိလာစေတယ်၊ ရှိပြီးသား အရည်အသွေးတွေကို တိုးတက်လာစေတယ်။ စမ်းသပ်မှုကနေ ရလာမယ့် အကျိုးကျေးဇူးတွေကို အာရုံစိုက်မယ်ဆိုရင် ခံရပ်ဖို့ ပိုလွယ်တယ်။—ဟီ. ၁၂:၁၁။

၁၇။ နှိပ်စက်ညှဉ်းပန်းမှုတွေကို ခံရပ်တာနဲ့ပတ်သက်ပြီး ပေါလု ဘာတွေ သိထားသလဲ။

^၁၇ သန္နိဋ္ဌာန် အခိုင်အမာ ချပြီး စမ်းသပ်မှုတွေ ခံရပ်ဖို့ ဟီဘရူးခရစ်ယာန်တွေကို ပေါလု အားပေးတယ်။ ပေါလုဟာ ဒီလိုအားပေးနိုင်တဲ့ အနေအထားမှာ ရှိတယ်။ ကိုယ်တိုင်ဟာ ခရစ်ယာန်တွေကို နှိပ်စက်ညှဉ်းပန်းသူ ဖြစ်ခဲ့လို့ နှိပ်စက်ညှဉ်းပန်းသူတွေ ဘယ်လောက် ရက်စက်သလဲဆိုတာ သိတယ်။ ကိုယ်တိုင် ခရစ်ယာန် ဖြစ်လာပြီးနောက်မှာ အမျိုးမျိုး နှိပ်စက်ညှဉ်းပန်းခံခဲ့ရလို့ ဘယ်လို ခံရပ်ရမယ်ဆိုတာလည်း သိတယ်။ (၂ ကော. ၁၁:၂၃-၂၅) ဒါကြောင့် ခံရပ်နိုင်ဖို့ ဘာလုပ်ပါဆိုပြီး ပြောနိုင်တာ။ စမ်းသပ်ခံရတဲ့အခါ ကိုယ့်ကိုယ်ကိုယ် မဟုတ်ဘဲ ယေဟောဝါကို အားကိုးဖို့ လိုကြောင်း သတိပေးတယ်။ အဲဒီလိုအားကိုးလို့လည်း “ယေဟောဝါဟာ ကူညီမစရှင် ဖြစ်တဲ့အတွက် ငါ ဘာကိုမှ မကြောက်ဘူး” လို့ ပေါလု ရဲရဲဝံ့ဝံ့ ပြောနိုင်တာ။—ဟီ. ၁၃:၆။

၁၈။ ကျွန်တော်တို့အားလုံး အနာဂတ်မှာ ဘာကြုံရမလဲ။ အခု ဘာလုပ်နေရမလဲ။

^၁၈ ဒီနေ့လည်း ညီအစ်ကို/မတချို့ဟာ နှိပ်စက်ညှဉ်းပန်းခံနေကြရတယ်။ ဆုတောင်းပေးခြင်း၊ လက်တွေ့ကျကျ ကူညီနိုင်ရင် ကူညီပေးခြင်းအားဖြင့် သူတို့ကို မေတ္တာပြနိုင်တယ်။ (ဟီ. ၁၀:၃၃) “ခရစ်တော်ယေရှုရဲ့ နောက်လိုက်အနေနဲ့ ဘုရားတရားကိုင်းရှိုင်းတဲ့ အသက်တာနဲ့ နေချင်သူတိုင်းဟာ ညှဉ်းဆဲခံရမှာပဲ” လို့ ကျမ်းစာမှာ ရှင်းရှင်းလင်းလင်း ဖော်ပြထားတယ်။ (၂ တိ. ၃:၁၂) ဒါကြောင့် ရှေ့မှာ ကြုံရမယ့်အရာတွေအတွက် ကျွန်တော်တို့အားလုံး အသင့်ပြင်ထားရမယ်။ ရှေ့မှာ ဘာစမ်းသပ်မှုပဲ ကြုံရပါစေ ခံရပ်နိုင်ဖို့ ယေဟောဝါ ကူညီပေးမယ်ဆိုတာ အပြည့်အဝ ဆက်ယုံကြည်စိတ်ချနေကြရအောင်။ အချိန်တန်တဲ့အခါ သစ္စာရှိ ကျေးကျွန်အားလုံးကို ယေဟောဝါ သက်သာရာရစေမယ်။—၂ သက်. ၁:၇၊ ၈။

၁၉။ ကြီးစွာသောဒုက္ခအတွက် ဘယ်လို အသင့်ပြင်ထားနိုင်သလဲ။ (ရုပ်ပုံကိုလည်း ကြည့်ပါ။)

^၁၉ ရှေ့မှာ ကြုံရမယ့်အရာတွေအတွက် အသင့်ဖြစ်နေဖို့ ပေါလုရဲ့ စာက ဟီဘရူးခရစ်ယာန်တွေကို ကူညီပေးခဲ့မှာ သေချာတယ်။ အမှန်တရားကို ပိုသိလာအောင်၊ နက်နက်နဲနဲ နားလည်လာအောင် လုပ်ဖို့ ပေါလု အားပေးတယ်။ ဒါမှ ယုံကြည်ခြင်း ယိုင်နဲ့သွားစေနိုင်တဲ့ သွန်သင်ချက်တွေကို သူတို့ ခွဲခြားသိမှာ၊ ငြင်းပယ်တတ်မှာ။ ယုံကြည်ခြင်း ခိုင်မာအောင် လုပ်ဖို့လည်း အားပေးတယ်။ ဒါမှ ယေရှုနဲ့ ဦးဆောင်နေသူတွေရဲ့ ညွှန်ကြားချက်တွေကို သူတို့ မဆိုင်းမတွ လိုက်နာနိုင်မှာ။ ဒါ့အပြင် စမ်းသပ်ခံရတဲ့အခါ မေတ္တာရှင်အဖ လေ့ကျင့်ပေးတာကို ခံယူနိုင်တဲ့ အခွင့်အရေးလို့ သဘောထားဖို့ ပေါလု အားပေးတယ်။ ဒါမှ သူတို့ ခံနိုင်ရည် ရှိမှာ။ ကျွန်တော်တို့လည်း ဒီအကြံပေးချက်တွေအတိုင်း လိုက်လျှောက်မယ်ဆိုရင် အဆုံးထိ သစ္စာရှိရှိ ခံရပ်နိုင်ပါလိမ့်မယ်။—ဟီ. ၃:၁၄။