နှစ်ခြင်းခံတယ်ဆိုတာ ဘာအဓိပ္ပာယ်လဲ
ကျမ်းစာအဖြေ
နှစ်ခြင်းခံတယ်ဆိုတာ လူတစ်ဦး ရေထဲမှာ စုံးစုံးမြုပ်အောင်နှစ်ပြီး ပြန်ပေါ်ထလာတာကို ဆိုလိုတယ်။a ဒါက ရေအတော်အသင့်ရှိတဲ့ မြစ်ထဲမှာ ယေရှု နှစ်ခြင်းခံရတဲ့ အကြောင်းရင်းကို သိရှိစေတယ်။ (မဿဲ ၃:၁၃၊ ၁၆) အလားတူ၊ အီသီယိုးပီးယား လူတစ်ယောက်ကလည်း ရေရှိတဲ့နေရာကို ရောက်တဲ့အခါ သူ့ကိုနှစ်ခြင်းပေးဖို့ တောင်းဆိုခဲ့တယ်။—တမန်တော် ၈:၃၆-၄၀။
နှစ်ခြင်းရဲ့အဓိပ္ပာယ်
ကျမ်းစာမှာ နှစ်ခြင်းကို သင်္ဂြိုဟ်ခြင်းနဲ့ နှိုင်းယှဉ်ထားတယ်။ (ရောမ ၆:၄; ကောလောသဲ ၂:၁၂) ဒါကြောင့် လူတစ်ဦး ရေမှာနှစ်ခြင်းခံတာက ဘဝလမ်းစဉ်အဟောင်းမှာ သေဆုံးပြီး ဘုရားသခင်ကို ဆက်ကပ်အပ်နှံထားတဲ့ ခရစ်ယာန်လူသစ်တစ်ယောက်အဖြစ် အသက်ရှင်နေထိုင်တာကို ဆိုလိုတယ်။ နှစ်ခြင်းနဲ့ နှစ်ခြင်းမခံခင် လုပ်ဆောင်ရတဲ့ အဆင့်တိုင်းဟာ ဘုရားသခင့်အစီအစဉ်ဖြစ်ပြီး ယေရှုခရစ်ရဲ့သေခြင်းကို ယုံကြည်ခြင်းအပေါ် အခြေခံတဲ့ ကြည်လင်တဲ့အမှားအမှန်သိစိတ်ကို ရရှိစေတယ်။ (၁ ပေတရု ၃:၂၁) ဒါကြောင့် ယေရှုက တပည့်တွေကို နှစ်ခြင်းခံယူရမယ်လို့ သင်ကြားပေးခဲ့တာပဲ။—မဿဲ ၂၈:၁၉၊ ၂၀။
ရေမှာနှစ်ခြင်းခံတာက အပြစ်တွေကို ဆေးကြောပေးသလား
မဆေးကြောပေးပါဘူး။ ယေရှုသွန်းလောင်းခဲ့တဲ့ သွေးကသာ အပြစ်တွေကို ဆေးကြောပေးနိုင်တယ်လို့ ကျမ်းစာကဆိုတယ်။ (ရောမ ၅:၈၊ ၉; ၁ ယောဟန် ၁:၇) ယေရှုရဲ့သေခြင်းကနေ အကျိုးရနိုင်ဖို့ဆိုရင် သူ့ကို သက်ဝင်ယုံကြည်ပြီး သူသွန်သင်ခဲ့တဲ့ တရားအတိုင်း ဘဝပုံစံကို ပြောင်းလဲနေထိုင်ရမယ်၊ နှစ်ခြင်းခံရမယ်။—တမန်တော် ၂:၃၈; ၃:၁၉။
မွေးကင်းစကလေးကို နှစ်ခြင်းပေးဖို့ ကျမ်းစာက သွန်သင်သလား
မသွန်သင်ပါဘူး။ မွေးကင်းစကလေးကို နှစ်ခြင်းပေးတဲ့အကြောင်း ကျမ်းစာမှာ မဖော်ပြထားဘူး။ တချို့ချာ့ချ်က မွေးကင်းစကလေးရဲ့ ခေါင်းကို ရေဖြန်းပြီးတော့ဖြစ်စေ၊ ရေလောင်းပြီးတော့ဖြစ်စေ “နှစ်ခြင်းမင်္ဂလာ” ပေးပြီး နာမည်ပေးကင်ပွန်းတပ်တဲ့ ထုံးစံလုပ်ကြတယ်။ တကယ်တော့ နှစ်ခြင်းခံတဲ့သူတွေဟာ ‘ဘုရားသခင့်နိုင်ငံတော် သတင်းကောင်း’ အကြောင်း ကောင်းကောင်းနားလည်ပြီး ယုံကြည်လက်ခံရမှာဖြစ်လို့ အရွယ်ရောက်သူတွေဖြစ်ရမယ်။ (တမန်တော် ၈:၁၂) ဘုရားသခင့်တရားစကားကို ကြားနာတာ၊ လက်ခံတာ၊ ပြုပြင်ပြောင်းလဲတာတွေနဲ့လည်း ဆက်စပ်နေတယ်။ မွေးကင်းစကလေးက ဒါတွေကို လုပ်နိုင်မှာမဟုတ်ဘူး။—တမန်တော် ၂:၂၂၊ ၃၈၊ ၄၁။
အဲဒီအပြင် ခရစ်ယာန်မိဘတွေရဲ့ သစ္စာရှိမှုကြောင့် သူတို့ရဲ့ကလေးတွေကို သန့်ရှင်းစင်ကြယ်တယ်လို့ ဘုရားသခင် ယူဆတဲ့အကြောင်း ကျမ်းစာမှာ ဖော်ပြထားတယ်။ (၁ ကောရိန္သု ၇:၁၄) မွေးကင်းစကလေးကို နှစ်ခြင်းပေးတာက ကျမ်းစာနဲ့သာ ကိုက်ညီတယ်ဆိုရင် မိဘရဲ့သစ္စာရှိမှုကြောင့် သူတို့ရဲ့ကလေးတွေ အကျိုးရနိုင်တယ်လို့ ကျမ်းစာမှာ ဖော်ပြမှာမဟုတ်ဘူး။b
ခရစ်ယာန်နှစ်ခြင်းအကြောင်း ယူဆချက်အမှားများ
ယူဆချက်အမှား- ရေမှာစုံးစုံးမြုပ်အောင် နှစ်စရာ မလိုဘဲ ရေဖြန်းပေးရုံ ဒါမှမဟုတ် ရေလောင်းပေးရုံနဲ့ လုံလောက်တယ်။
အမှန်တရား- ကျမ်းစာပါ နှစ်ခြင်းခံခဲ့ကြတဲ့ မှတ်တမ်းအားလုံးဟာ ရေမှာစုံးစုံးမြုပ်ကြတာချည်းပဲ။ ဥပမာ၊ အီသီယိုးပီးယားလူကို ဖိလိပ္ပု နှစ်ခြင်းပေးတဲ့မှတ်တမ်းမှာ သူတို့ ‘ရေထဲဆင်းပြီး’ ဖိလိပ္ပုက သူ့ကို နှစ်ခြင်းပေးတယ်၊ အဲဒီနောက် သူတို့ “ရေထဲက တက်” လာကြတယ်လို့ ဖော်ပြထားတယ်။—တမန်တော် ၈:၃၆-၃၉။c
ယူဆချက်အမှား- တစ်အိမ်သားလုံး နှစ်ခြင်းခံတယ်ပြောရင် မွေးကင်းစကလေးတွေလည်း ပါတယ်ဆိုတဲ့သဘော ကျမ်းစာမှာ ဖော်ပြထားတယ်။ ဥပမာ၊ ဖိလိပ္ပိမြို့က ထောင်မှူးဟာ ‘မိမိ၏အိမ်သူအိမ်သား အားလုံးနှင့်အတူ နှစ်ခြင်းခံ’ တယ်လို့ ကျမ်းစာမှာ ပြောထားတယ်။”—တမန်တော် ၁၆:၃၁-၃၄။
အမှန်တရား- ထောင်မှူး ဘာသာပြောင်းလာတဲ့ မှတ်တမ်းမှာ နှစ်ခြင်းခံတဲ့သူတွေဟာ ‘ယေဟောဝါဘုရားရဲ့ တရားစကား’ ကိုနားလည်ပြီး ‘အလွန်ဝမ်းမြောက်ကြ’ တယ်လို့ ဖော်ပြထားတယ်။ (တမန်တော် ၁၆:၃၂၊ ၃၄) မွေးကင်းစကလေးဟာ ယေဟောဝါဘုရားရဲ့ တရားစကားကို နားလည်နိုင်စွမ်း မရှိပါဘူး။ ဒါကြောင့် နှစ်ခြင်းခံခဲ့ကြတဲ့ ထောင်မှူးရဲ့ အိမ်သူအိမ်သားတွေထဲမှာ မွေးကင်းစကလေးတစ်ယောက်မှ မပါဘူးလို့ ကောက်ချက်ချနိုင်တယ်။
ယူဆချက်အမှား- ကောင်းကင်နိုင်ငံတော်ဟာ ကလေးငယ်တွေရဲ့ နိုင်ငံပဲလို့ ယေရှုပြောခဲ့တဲ့အတွက် မွေးကင်းစကလေးတွေရဲ့ နှစ်ခြင်းအကြောင်း သူသွန်သင်ပေးနေတာ ဖြစ်တယ်။—မဿဲ ၁၉:၁၃-၁၅; မာကု ၁၀:၁၃-၁၆။
အမှန်တရား- ဒီစကားတွေပြောတုန်းက နှစ်ခြင်းအကြောင်း ယေရှုပြောနေတာ မဟုတ်ဘူး။ ဘုရားသခင့်နိုင်ငံတော် ဝင်ထိုက်သူတွေဟာ ကလေးတွေလို နှိမ့်ချပြီး သွန်သင်ရလွယ်သူတွေ ဖြစ်ရမယ်လို့ ယေရှုပြောနေတာ ဖြစ်တယ်။—မဿဲ ၁၈:၄; လုကာ ၁၈:၁၆၊ ၁၇။
a “နှစ်ခြင်း” လို့ပြန်ဆိုထားတဲ့ မူရင်းဂရိစကားလုံးဟာ “နှစ်မြုပ်ခြင်း” လို့ အဓိပ္ပာယ်ရတယ်။ Theological Dictionary of the New Testament အတွဲ ၁၊ စာမျက်နှာ ၅၂၉ မှာကြည့်ပါ။
b “မွေးကင်းစကလေးကို နှစ်ခြင်းပေးတဲ့အကြောင်း ဓမ္မသစ်ကျမ်းမှာ လုံးဝမတွေ့ရပါ” ဆိုပြီး စာအုပ်တစ်အုပ်မှာ ဖော်ပြထားတယ်။ နှစ်ခြင်းခံတာက အပြစ်တွေကို ဆေးကြောပေးတယ်ဆိုပြီး “နှစ်ခြင်းရဲ့တန်ဖိုးကို လွဲမှားစွာ ချဲ့ကားယူဆခြင်း” ကြောင့် အဲဒီထုံးစံ ပေါ်ပေါက်လာတယ်လို့လည်း ဖော်ပြထားတယ်။—The International Standard Bible Encyclopedia အတွဲ ၁၊ စာမျက်နှာ ၄၁၆-၄၁၇။
c “အစောပိုင်းချာ့ချ်တွေမှာ နှစ်ခြင်းခံတဲ့အခါ ရေထဲစုံးစုံးနှစ်မြုပ်ခဲ့ကြတယ်ဆိုတဲ့ အထောက်အထားရှိတယ်” လို့ စာအုပ်တစ်အုပ်ရဲ့ “နှစ်ခြင်း” ခေါင်းစဉ်အောက်မှာ ဖော်ပြထားတယ်။”—New Catholic Encyclopedia အတွဲ ၂၊ စာမျက်နှာ ၅၉။