Salamo

36 O le taʻua o le solitulafono i lē ua amioleaga, o loo i lona loto lea;+

Ua leai sona mataʻu i le Atua.+

 2 Auā o loo faaʻoleʻole o ia iā te ia lava+

Ina ia iloa lana mea sesē ina ia ʻinoʻino ai.+

 3 O upu a lona gutu e tigā ma taufaasesē;+

Ua leai sona tofā mamao e faia ai le mea lelei.+

 4 Ua ia faufau pea i mea e tigā ai i luga o lona moega,+

Ua tū o ia i se ala e lē lelei.+

Ua lē teena foʻi e ia le mea leaga.+

 5 Ieova e, o loo i le lagi lou alofa faamaoni;+

Ua oo i ao lou faamaoni.+

 6 O lau amiotonu ua pei o mauga o le Atua;+

O iʻuga o au faamasinoga o vai loloto ia.+

Ieova e, ua e faaolaina le tagata atoa ma manu.+

 7 Le Atua e, maʻeu lava le tāua o lou alofa faamaoni!+

Ua sulufaʻi atu le fanau a tagata i le paolo o ou apaʻau.+

 8 Ua latou feinu ma malilie i mea lololo o loo i lou fale;+

Ua e faainu foʻi i latou i vaitafe o au mea faafiafia.+

 9 Auā o loo iā te oe le puna o le ola;+

O le malamalama foʻi mai iā te oe, ua matou iloa ai le malamalama.+

10 Ia e alofa faamaoni pea i ē o loo iloa oe,+

Ma ia e amiotonu foʻi iā i latou e saʻo o latou loto.+

11 Aua neʻi solia aʻu e vae o lē e faasausili;+

Aua foʻi neʻi tuliesea aʻu e lima o tagata amioleaga.+

12 O i inā ua paʻuʻū ai o ē e faia mea e tigā ai;+

Ua tuleia i lalo i latou ma ua lē mafai ona toe tutū i luga.+