Esekielu

31 Ua oo mai foʻi le afioga a Ieova iā te aʻu i le tausaga lona sefulu tasi, i le masina lona tolu, i le aso muamua o le masina e faapea: 2 “Le atalii e o le tagata, ia e fai atu iā Farao le tupu o Aikupito ma ona tagata e toʻatele,+

“‘O ai ua faatusaina i ai oe ma lou tulaga sili? 3 Faauta foʻi! O le Asuria, o le laau o le arasi o Lepanona,+ e mananaia ona lālā,+ e felefele ona lālā e faapaolo ai, e maualuga tele,+ ma ua oo atu lona tumutumu i ao.+ 4 O vai, na tupu tele ai o ia;+ o vai loloto foʻi na maualuga ai o ia. O ona ālia ua faataamilomilo i le mea o loo totō ai ona laau; ma ua alu atu le vai i ona alāvai i laau uma o le fanua. 5 O le mea lea ua sili ai ona tupu tele o ia nai lo o isi laau uma o le fanua.+

“‘Ua faateleina ona lālā ma ua atili ai foʻi ona uumi ona lālā ona o le tele o le vai i ona alāvai.+ 6 Ua ofaga i ai manufelelei uma o le lagi i ona lālā,+ ma ua fanafanau ai manu uma o le vao i lalo o ona lālā,+ ua nonofo ai foʻi nuu tetele i lalo ifo o lona paolo. 7 E manaia le laau i lona telē,+ i le uumi o ona lālā, auā ua sosolo atu ona aa i luga o vai e tele. 8 E leai se isi laau o le arasi e tutusa ma lea laau i le faatoʻaga a le Atua.+ A o laau o le perosi, e lē tutusa lālā o ia laau ma lālā o lea laau. O laau o le aremoni, e lē tutusa lālā o ia laau ma lālā o lea laau. E leai se isi laau i le faatoʻaga a le Atua e tutusa ma le manaia o lea laau.+ 9 Na ou faia ina ia manaia ona o le tele o ona lālā,+ ma e lotoleaga i ai isi laau uma o Etena ia ua i ai i le faatoʻaga a le Atua moni.’+

10 “O lea, o le fetalaiga lenei a le Alii Pule Silisili Ese o Ieova, ‘Talu ai ua maualuga tele o ia,* ua oo atu foʻi lona tumutumu i ao,+ ma ua faamaualuga lona loto ona o lona umī,+ 11 ou te tuuina atu ai o ia i le lima o se pule malosi.+ O le a ia faasagatau atu lava iā te ia. Ou te tulieseina o ia ona o lana amioleaga.+ 12 O le a tuu i lalo e tagata ese le laau, o pule sauā o nuu, ma e tuulafoaʻia o ia e tagata i luga o mauga; e paʻuʻū ona lālā i vanu uma, ma e gauia ona lālā i autafa o vaitafe uma o le laueleele.+ O le a ō ese tagata uma o le atunuu mai i lona paolo ma tuulafoaʻia ai.+ 13 O le a nonofo manufelelei uma o le lagi i luga o lona ogālaau ua taatia i lalo, ma o le a nonofo ai foʻi manu uma o le vao i ona lālā;+ 14 ina ia lē tupu maualuga atu se laau ua faasūsūina, pe oo atu o latou tumutumu i ao, ma e leai foʻi se laau e inu i vai e tū maualuga ina ia paʻi atu i ao, auā o le a tuuina atu i latou ia faaumatia,+ i le mea i lalo+ ifo o le eleele, faatasi ma le fanau a tagata, faatasi foʻi ma ē e ō ifo i le lua.’

15 “O le fetalaiga lenei a le Alii Pule Silisili Ese o Ieova, ‘Ou te faapogaia le faavauvau+ i le aso e alu ifo ai o ia i le Tuugamau.* Ona o ia o le a ou ufitia ai vai loloto ina ia ou punitia ai ona ālia ma taofia ai ona tafega; ou te faapogisa Lepanona ona o ia ma o le a mamae ai laau uma o le fanua ona o ia. 16 O le paʻō o lona paʻū ou te lūlūina ai nuu pe a ou ave ifo le laau i le Tuugamau faatasi ma i latou e ō ifo i le lua,+ ma i le mea i lalo ifo o le eleele o le a faamāfanafanaina ai laau uma e inu i vai, o laau uma o Etena,+ o laau e aupito i mananaia ma sili o Lepanona.+ 17 Na latou ō ifo faatasi ma ia i le Tuugamau,+ iā i latou na fasiotia i le pelu, e faapena foʻi i latou o lana fanau* o ē na nonofo i lona paolo i le lotolotoi o nuu.’+

18 “‘O ai ua faatusaina i ai oe e tusa ai ma lou mamalu+ ma lou tulaga sili i laau o Etena?+ Ae o le a ave ifo lava oe faatasi ma laau o Etena i le mea i lalo ifo o le eleele.+ E te taoto faatasi ma ē ua lē peritomeina, o ē ua fasiotia i le pelu. O Farao lea ma ona tagata e toʻatele,’ o le fetalaiga lea a le Alii Pule Silisili Ese o Ieova.”