Salamo

51 Le Atua e, ia e manatu mai iā te aʻu e tusa ma lou alofa faamaoni.+

Ia e tafiesea aʻu solitulafono e tusa ma le tele o lou alofa mutimutivale.+

 2 Ia e matuā faamamā iā te aʻu mai i laʻu mea sesē,+

Ma faamamā foʻi iā te aʻu mai i laʻu agasala.+

 3 Auā ua ou iloa aʻu solitulafono,+

Ma ua iai pea i oʻu luma laʻu agasala.+

 4 Ua ou agasala iā te oe, ua na o oe lava,+

Ua ou faia le mea leaga i lau silafaga,+

Ina ia iloa lou amiotonu pe a e fetalai mai,+

Ina ia sao foʻi oe pe a e faamasino.+

 5 Faauta! Na fanaua aʻu i le amioleaga ma le tigā,+

Na afuafua foʻi aʻu i le manava o loʻu tinā i le agasala.+

 6 Faauta! Ua e fiafia i le faamaoni o le loto;+

Ma ia e faailoa mai i loʻu tagata lilo le atamai.+

 7 Ia e faamamā iā te aʻu mai i le agasala i le isopo, ina ia ou mamā ai;+

Ia e faamamā foʻi iā te aʻu, ina ia ou paʻepaʻe ai e sili i le kiona.+

 8 Ia e faafaalogo aʻu i le leo o le olioli ma le fiafia,+

Ina ia fiafia ai ivi na e nutililiia.+

 9 Ia natia ou fofoga mai i aʻu agasala,+

Ma ia soloiesea aʻu mea sesē uma.+

10 Le Atua e, ia e faia se lotomamā mo aʻu,+

Ma ia e tuu foʻi i totonu iā te aʻu se agaga fou, o se agaga e tumau.+

11 Aua e te lafoaʻiina aʻu mai i ou luma;+

Aua foʻi neʻi e aveesea lou agaga paia mai iā te aʻu.+

12 Ia e toe faafoʻisia mai iā te aʻu le olioli o le faaolataga mai iā te oe,+

Tau ina ia e lagolagoina aʻu i le agaga usiusitaʻi.+

13 Ou te aʻoaʻo atu ou ala i tagata solitulafono,+

Ina ia toe liliu atu iā te oe tagata agasala.+

14 Le Atua e, o le Atua o loʻu faaolataga,+ ia e laveaʻi iā te aʻu mai i le nofosala i le toto,+

Ina ia fiafia ai loʻu laulaufaiva e taʻu atu e uiga i lou amiotonu.+

15 Ieova e, ia e faamātala oʻu laugutu,+

Ina ia taʻutaʻu atu e loʻu gutu lou viiga.+

16 Auā e te lē fiafia i le taulaga, ana e fiafia i ai semanū ou te ofoina atu;+

E te lē fiafia foʻi i le taulaga mū.+

17 O le loto momomo ua faia ai taulaga i le Atua;+

Le Atua e, e te lē inosia le loto momomo ma le nutimomoia.+

18 Ia e feutagaʻi lelei ma Siona i lou finagalo malie;+

Tau ina ia e atiina pā o Ierusalema.+

19 Ona e fiafia ai lea i taulaga o le amiotonu,+

Ma le taulaga mū ma le taulaga atoa;+

Ona ofoina lea o povi poʻa i luga o lou fata faitaulaga.+