Efeso

5 O lea, ia faaaʻoaʻo i le Atua+ e faapei o lana fanau pele, 2 ma ia savavali i le alofa+ e pei foʻi ona alofa o le Keriso iā te outou,+ ma foaʻi mai lona ola mo outou, o le taulaga+ ma le togiola i le Atua, o le mea e manogi lelei lea.+

3 O le faitaaga,*+ ma amioga lē mamā uma, po o le matapeʻapeʻa,+ aua lava neʻi taʻua iā te outou+ e pei ona tatau i tagata paia;+ 4 po o amioga e māsiasi ai,+ pe e tautala i tala valea, po o tausuaga matagā,+ o mea ia e lē tatau, a o le avatu o le faafetai.+ 5 Auā ua outou iloa ma malamalama lelei i lenei mea, o sē e faitaaga,+ pe amio lē mamā, po o lē e matapeʻapeʻa,+ o lona uiga o le tagata e ifo i tupua lea, e lē fai mo latou tofi le malo o le Keriso ma le Atua.+

6 Aua neʻi ʻolegia e se tasi outou i upu lē aogā,+ auā o mea e pei ona taʻua, e oo mai ai le toʻasā o le Atua i le fanau lē usiusitaʻi.+ 7 O lea, aua neʻi outou faifaimea faatasi ma i latou;+ 8 auā sa outou i le pōuliuli muamua,+ a o lenei ua outou i le malamalama+ e tusa ma le Alii. Ia outou savavali e faapei o le fanau o le malamalama, 9 auā o le fua o le malamalama o mea lelei uma lava, ma le amiotonu ma le upu moni.+ 10 Ia faamautinoa pea po o ā mea e fiafia+ i ai le Alii; 11 aua le toe faifaimea faatasi+ ma i latou i galuega lē aogā o le pogisa,+ ae ia aʻoaʻi iā i latou,+ 12 auā o se mea e māsiasi ai le faamatala atu o mea latou te faia faalilolilo.+ 13 O lenei, o mea uma ua aʻoaʻiina,+ ua faaalia mai i le malamalama, auā o mea uma ua faaalia,+ o le malamalama lea. 14 O le mea lea ua fai mai ai o ia: “O lē o loo moe, inā ala mai+ ia ma tulaʻi mai i le oti,+ ona faamalamalama+ mai lea o Keriso iā te oe.”

15 Ia outou matuā faautauta ina neʻi outou savavali+ e pei o ē e vālea, ae ia pei o ē e atamamai, 16 ia outou faaaogā tatau le taimi,*+ auā o aso nei ua leaga.+ 17 O le mea lea, soia tou te faavalea, a ia malamalama+ po o le ā le finagalo+ o Ieova. 18 Aua foʻi tou te onanā+ i le uaina lea e iʻu ai i amioga valea,+ ae ia faaauau ona faatumulia i le agaga,+ 19 ia outou talatalanoa i salamo,+ ma viiga+ o le Atua, ma pese faaleagaga. Ia outou pepese+ i viiga iā Ieova i o outou loto, 20 ia avatu le faafetai+ i lo tatou Atua o le Tamā, i le suafa o lo tatou Alii o Iesu Keriso mo mea uma lava.

21 Ia gauaʻi le tasi i le isi+ i le mataʻu iā Keriso. 22 O avā, ia gauaʻi+ atu i a latou lava tane e pei ona gauaʻi atu i le Alii, 23 auā o le tane o le ulu lea o le avā,+ e pei foʻi o Keriso o le ulu ia o le faapotopotoga,+ o ia foʻi o le faaola o lenei tino. 24 O le mea moni, e pei ona gauaʻi o le faapotopotoga iā Keriso, ia faapena foʻi ona gauaʻi o avā i a latou tane i mea uma lava.+ 25 O outou tane, ia faaauau ona alolofa atu i a outou avā,+ e pei o le Keriso foʻi ona alofa i le faapotopotoga, ma foaʻi mai lona ola mo le faapotopotoga,+ 26 ina ia faapaiaina ai e ia,+ ma faamamāina i le faatāʻele i le vai e ala i le upu,+ 27 ina ia mafai ona ia ofoina atu iā te ia lava le faapotopotoga i lona matagofie,+ e aunoa ma se ila, po o se maanuminumi, po o se isi mea faapena, ae ia paia ma ia lē taʻuleagaina.+

28 O le mea lea, e tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava, 29 auā e leai se tane e ita i lona lava tino; ae e na te fafaga ma faapelepele i ai,+ e pei foʻi ona faia e Keriso i le faapotopotoga, 30 auā o i tatou o itutino o lona tino.+ 31 “O le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi.”+ 32 E sili lava lenei mea lilo paia.+ O lea ua ou tautala atu ai e faatatau iā Keriso ma le faapotopotoga.+ 33 Ia taʻitasi outou ma alofa i lana lava avā+ e pei ona ia alofa iā te ia lava; a o le avā, ia matuā faaaloalo+ o ia i lana tane.