Maatewoosi Wongeella
16 Hakkiinni Farisootunna Saduqootu isiwa daggu; jiffe laˈasira yite gordunni malaate leellishansara xaˈmitu. 2 Isino togo yee qolinsa: “Hawarranno woyite ‘Gordu duuˈmino daafira foorararaati’ yitinanni; 3 soodo qole ‘Gordu duuˈmirono gomichu noo daafira techo ayyare qiiddanno, xeenano gananno’ yitinanni. Gordo laˈine ayyarete gara afa dandiitinanni; diru malaati tiro kayinni afa didandiitinanni. 4 Bushanna foora* ilama woˈmanka woyite malaate laˈˈa hasidhanno; ikkollana Yoonaasi malaate agurranna wole malaate dileellinshanni.” Hakkiinni Yesuusi insa hakko agure haˈri.
5 Rosaanosi baara tayisse widoonni fultu; hakka woyite insa habbe daabbo adhitukki hadhino. 6 Yesuusi togo yiinsa: “Farisootunna Saduqootu irsho qorophe.” 7 Konnira insa insanaawa, “Togo yiinonkehu daabbo adhinoommokki daafiraati” yitu. 8 Yesuusi tenne afe togo yii: “Kiˈne ammana xeˈinoˈneri, daabbo adhinoommokki daafiraati yitine kiˈne kiˈnewa mayira hasaabbinanni? 9 Xaano coyi dileellinoˈne? Onte daabbo 5,000 manni iteenna gatinoha meˈˈe gimboola gamba assitiniro diqaagginanni? 10 Woy lamala daabbo 4,000 manni iteenna gatinoha meˈˈe jajjabba gimboola gamba assitiniro diqaagginanni? 11 Kulanni noommoˈnehu daabbote daafira ikkinokkita hiitto huwata hoogginoonni? Ikkollana Farisootunna Saduqootu irsho qorophe.” 12 Hakkiinni qorophe yiinonsahu timu irsho ikkikkinni Farisootunna Saduqootu roso ikkinoti leeltunsa.
13 Yesuusi, Filiphoosi Qiisaariya yinanni qooxeessa dayi yannara rosaanosi “Mannu manchi Beetto ayeti yaanno?” yee xaˈminsa. 14 Insano “Mitu Cuuaancho Yohaannisiiti, mitu Eeliyaasiiti, mitu kayinni Ermiyaasiiti woy masaalaanote giddonni mittoho yaanno” yitu. 15 Isino “Kiˈnena, ane ayeti yitinannie?” yee xaˈminsa. 16 Simooni Pheexiroosi, “Ati heeshshote Magani Beetto Kiristoosiiti” yee qoli. 17 Yesuusino togo yee qolisi: “Yoonaasi beetto Simooni, ati baˈraaˈroottoho; korkaatuno tenne xawisinohehu maalanna mundee ikkikkinni* iima heeˈranno Annaˈyaati. 18 Qoleno ani kuleemmohena, ati Pheexiroosiiti; konni kinchi aana songoˈya miˈneemmo; Waammate* waalchuwano diqeeltannose. 19 Atera gordu Gashshooti makafachuwa eemmohe; uulla usurattohu baalu balaxe gordoho usuraminoha ikkanno; uulla tirattohu baaluno balaxe gordoho tidhaminoha ikkanno.” 20 Hakkiinni rosaanosi, isi Kiristoosa ikkinota mittohono kultannokki gede seekke hajajinsa.
21 Hatte yannanni kayise Yesuusi, Yerusaalame haˈra hasiissannosita, hattono cimeeyye, kakkalaanote roorrootinna seeru rosiisaano lowo geeshsha qarrissannositanna reyannota, qoleno sayikki barra kaˈˈannota rosaanosira kulinsa. 22 Hatte yannara Pheexiroosi Yesuusa bade qacce fushshe, “Mooticha, ateneeto togoonta gadadissooti; kuni horonta diˈˈiillannohe” yee seejjisi. 23 Yesuusi kayinni Pheexiroosira badhe wodhe togo yiisi: “Sheexaane,* muliˈyanni hoˈli!* Ati mannu hedo ikkinnina Maganu hedo hedattokki daafira anera guficho ikkoottoe.”
24 Hakkiinni Yesuusi rosaanosi togo yii: “Hoodeˈya haˈra hasiˈrannohu aye manchino umosi kaado; qarru haqqasi duqqe agurikkinni hoodeˈya dayo. 25 Heeshshosi* gatisiˈra hasiˈrannohu baalu huˈnanno; anera yee heeshshosi* huˈnannohu baalu kayinni afiˈranno. 26 Qoleno mittu manchi alame woˈma isita assiˈre heeshshosi* huˈniro kayinni maa kaaˈlitannosi? Woy mittu manchi heeshshosi* gatisiˈrate maa aa dandaanno? 27 Manchi Beetti Annisi ayirrinyinni sokkaasinesi ledo daanno woyite, mittu mittunkura loosisi guma aanno. 28 Halaale yeemmoˈnena, kowiicho uurritinori giddo mitu manchi Beetti Gashshootisinni daanna laˈa geeshsha horonta direyitanno.”