Yaaqoobi Sokka
3 Roduuwaꞌya, kiꞌne giddo lowo manni rosiisaano ikkoonke; korkaatuno ninkera roore kaajjado yoo yinanninketa affinoonni. 2 Ninke baalunku duucha hinge gufiꞌneemmo.* Coyiꞌranno qaalinni gufiꞌrannokkihu aye manchino heeꞌriro, hakku manchi mannimmasi woꞌma eemadha* dandaannoho guuta manchooti. 3 Farashshu hajajamannonke gede, afiisira bixaala worrummoro hasiꞌnummo widira qola dandiineemmo. 4 Hanni markaaweno laꞌe: Markaawe lowo geeshsha jawanna wolqaataame bubbe xiibbanna hadhannota ikkiturono, mare amadino manchi shiimu laaqiꞌraanchinni hasiꞌri widira qole haaꞌre haꞌranno.
5 Hatteente gede, arrawuno shiima mannimmate biso ikkirono lowo geeshsha booꞌnanno. Lowo dubbira giira qasate shiima giira ikkitanno! 6 Arrawuno giirate. Arrawu bisinke giddo bunshete alame riqiwanno; korkaatuno mannimma woꞌma batteessanno; qoleno heeshshote doogo* woꞌma giiranno; isino Gaannaamete giiramanno. 7 Duuchunku garita dubbu saada, cea, godowunni haꞌranno kalaqamanna baaru giddo heeꞌranno kalaqama mannu leenjishara dandaanno; qoleno leenjishino. 8 Ikkollana arrawo leenjisha dandaannohu mittu manchino dino. Arrawu shaanno harfi woꞌminoho, eemarate qarrisannohonna gawajjannoho. 9 Arrawinkenni Annanke Yihowa guwisiꞌneemmo; isinni qolle “Maganu daninni” kalaqamino manna rummeemmo. 10 Mittu afiinni maassono rumono fultanno.
Roduuwaꞌya, hatti gara diꞌꞌikkitino. 11 Mitte buicho giddonni coommanno wayinna qaraaranno wayi fulannoni? 12 Roduuwaꞌya, balasete haqqicho ejersu guma, woy woyinete haqqicho balasete guma laala dandiitannoni? Maxinaamu wayi giddonnino coommanno wayi fula didandaanno.
13 Kiꞌne giddo hayyichunna xiinxallu ayeti? Loososi loosannohu hayyotewiinni afiꞌnanni joongillinni ikkinota danchu amanyootisinni leellisho. 14 Ikkollana wodaniꞌne giddo hinaasonna gibbo* batidhinoha ikkiro booꞌnitinoonte; halaalu aanano kaphitinoonte. 15 Tini gordunni dagganno hayyo diꞌꞌikkitino; hatteentenni tini hayyo uullannite, maalunnitenna* agaanintennite. 16 Hinaasonna gibbo* noowa baalawa cancunna bushu coyi baaluno heeꞌranno.
17 Gordu hayyo kayinni umo coꞌittete; hakkiinni keere baxxannote; quwa saꞌannokkite, hajajamate qixxaabbinote, maaronna dancha gumma woꞌmitinote, mallaadanna lawisiisa nookkite. 18 Hakkiino sae keeraanchimmate gumi keere kalaqanno mannira, keeru noowa wixamanno.*