Maatewoosi Wongeella
18 Hatte yannara rosaanosi Yesuusiwa shiqqi yite, “Gordu Gashshootira baalanka roorannohu ayeti?” yitu. 2 Hakko daafira Yesuusi mitto shiima qaaqqo woshshe mereeronsa uurrise, 3 togo yii: “Halaale yeemmoˈnena, higa* gibbinironna qaaqquullu gede ikka hoogginiro, horonta gordu Gashshoote dieˈinanni. 4 Konnira, gordu Gashshootira baalanka roorannohu konni shiimu qaaqqi gede umosi heeshshi assannoho; 5 togooha shiima qaaqqo suˈmiˈyanni haaˈrannohu baalu aneno haaˈranno. 6 Ikkollana ane ammantannori kuri shiimmaaddu giddonni mittoho guficho ikkannohu baalu, goowaho jawa daamma* usudhe baaru diimera bairo woyyanno.
7 “Tini alame mannaho guficho ikkitanno daafira isera aanneˈe! Hige guficho ikkannori daasi digattannote; ikkollana wolootu gufidhanno gede assanno manchira aanneˈe! 8 Konnira, angakki woy lekkakki guficho ikkituhero murte huni. Lame anga woy lame lekka heedheennahe hegere giirara tugamattonte, kotticha woy naaficha ikkite heeshsho afiˈrittoro woyyannohe. 9 Qoleno illekki guficho ikkituhero fushshite huni; lame ille heedheennahe Gaannaamete* giirara tugamattonte, mitte illeha ikkite heeshsho afiˈrittoro woyyannohe. 10 Iima noo sokkaasinensa, iima noo Anniˈya albira woˈmanka woyite shiqqanno daafira, kuri shiimmaaddu giddonni mittono mishshinannikki gede qorophe. 11 ——*
12 “Kiˈnera ma lawannoˈne? Mittu manchira 100 geˈreewi heeˈrisironna insa giddonni mitte baˈusiro, 99 ilaalaho agure hattee baˈinota mitte hasiˈrara dihaˈranno? 13 Halaale yeemmoˈnena afiˈranno woyite, bainokkiri 99 geˈreewinni roore baˈeenna afiˈri geˈrechonni hagiidhanno. 14 Hatteente gede iima heeˈranno Anniˈya* kuri shiimmaaddu giddonni mittu nafa baˈˈara dihasiˈranno.
15 “Konnira rodiikki koffi assihero, hadhe isinna ati callu heedhinoonniwa soˈrosi xawisse kulisi.* Macciishshihero rodookki raga qolatto. 16 Macciishsha giwihero kayinni, aye coyino lamu woy sasu naqaashshe farcidhannorinni* kaajjanno daafira, mitto woy lame mancho haadhe mari. 17 Insa macciishsha giwiro, songote kuli. Songono macciishsha giwiro dagatenna qaraxaasinchu gede assite aguri.
18 “Halaale yeemmoˈnena, uulla usurtinanni coyi baalu balaxe iima usuraminoha ikkanno; uulla tirtinanni coyi baaluno balaxe iima tidhaminoha ikkanno. 19 Qoleno halaale kuleemmoˈnena, uullate aana kiˈne giddo lamu mitto lowo geeshsha hasiisanno coye huucciˈrate sumuu yituro, iima heeˈranno Anniˈya aannonsa. 20 Lamu woy sasu suˈmiˈyanni gamba yitannowa anino hakko mereeronsa heeˈreemmo.”
21 Hakkiinni Pheexiroosi Yesuusiwa daye togo yii: “Mooticha, rodiiˈya koffi assiero meˈˈe hige gatona yoosi? Lamala hige?” 22 Yesuusino “Lamalayina lamala higge* ikkinnina lamala higge calla gatona yii diyeemmohe” yiisi.
23 “Hakko daafira gordu Gashshooti borojjootisi asalensa qoltara hasiˈrino moote gedeeti. 24 Woxesi gamba assiˈra hanafita 10,000 taalaante* liqiiˈrino borojjicho isiwa abbitu. 25 Ikkollana kuni borojjichi asale baaxxa hoogino daafira, mootichisi iso, minaamasi, oososinna noosire baala hirre asale baantanni gede hajaji. 26 Konnira borojjichu lekkate uwe kumbuule ‘Nooe asale baala baaxxeemmona yanna uue’ yii. 27 Mootichisino lowo geeshsha marare asalesi agure haˈrisisi. 28 Ikkollana kuni borojjichi hakkiinni fule haˈranni heeˈre, isiwiinni 100 diinaare* liqiiˈrinohu miilasi ikkino borojjichinni xaadi; hakkiinni qalxe amade ‘Asale baala qolie’ yii. 29 Konnira miilasi ikkino borojjichi lekkasira uwe, ‘Qoleemmohena yanna uue’ yee huucciˈri. 30 Isi kayinni giwe, asalesi baaxxa geeshsha usuramanno gede assisi. 31 Miillasi ikkitino borojjooti tenne affuti lowo geeshsha dadillitu; hakkiinni hadhe baalanka coye mootichinsara kultu. 32 Mootichisino hakkonne borojjicho woshshiishe togo yiisi: ‘Ati bushu borojjichi, huucciˈroottoe daafira asalekki baala agurummohe. 33 Ani maarummohente gede atino miilakki ikkino borojjicho maara dihasiissannohe?’ 34 Mootichisino lowo geeshsha hanqe asalesi baala baata geeshsha, usuru mini agaraasinera sayise uyi. 35 Kiˈneno mittu mittunku rodooˈne godowinta gatona yitinannikkiha ikkiro, iimi Anniˈya kiˈneno gatona diyaannoˈne.”