Umi Yohaannisi Sokka

1 Uminni kayise noohu, macciishshinoommohu, illenkenni laꞌnoommohu, seekkine huwantoommohunna angankenni amandoommohu heeshshote qaali daafira borreessineemmoꞌne; 2 (ee, tini heeshsho xabbino; ninkeno laꞌnoommo; qoleno farciꞌnanni heeꞌnoommo; Anninkewa nootanna ninkera xabbinota hegere heeshsho kiꞌnera kullanni heeꞌnoommo); 3 kiꞌnerano ninke ledo mittimma heedhannoꞌne gede,* laꞌnoommorenna macciishshinoommore kullanni heeꞌnoommoꞌne. Tini mittimmankeno Anninkenna Beettisi Yesuusi Kiristoosi ledooti. 4 Konne coye borreessinanni heeꞌnoommoꞌnehu hagiirrinke woꞌma ikkanno gedeeti.

5 Isiwiinni macciishshinoommotinna kiꞌnera kulleemmo sokka tenneeti: Maganu xawaabbaho; isiwa horonta tunsichu dino. 6 “Isi ledo mittimma noonke” yine coyiꞌnanni heeꞌne, tunsichu giddo millinseemmoha ikkiro, kaphinanni heeꞌnoommo; halaaleno loosu aana hosiinsanni diheeꞌnoommo. 7 Ikkollana isi umisi xawaabbaho noonte gede ninkeno xawaabbu giddo millinseemmoha ikkiro, mimmitinke ledo mittimma heedhannonke; qoleno Beettisi Yesuusi mundee cubbu baalunni keereensitannonke.

8 “Cubbu dinonke” yine coyiꞌneemmoha ikkiro, umonke donganni heeꞌnoommo; halaaluno giddonke dino. 9 Cubbonke kulleemmoha ikkiro, isi ammanaminohanna keeraancho ikkino daafira cubbonke gatona yaannonke; bunshe baalantennino keereensannonke. 10 “Cubbo diloonsoommo” yine coyiꞌneemmoha ikkiro, iso kaphaancho assinanni heeꞌnoommo; qaalisino giddonke dino.